1. ¿Tiʼ o bʼant kyuʼn nejenel kye txqantl okslabʼil aj tok qʼoj?

¿TAJBʼILTZULO Dios tuʼn kyxiʼ axix okslal toj qʼoj ex tuʼn qxiʼ bʼiyol kye xjal kyoj junjuntl tnam? Toj jun syent abʼqʼi tzma in nikʼ, at nim xjal aʼyeju in kyqʼamaʼn qa okslal qe o cheʼx toj qʼoj ex o kubʼ kybʼiyoʼn txqantl xjal aʼyeju junx kyokslabʼil kyukʼil. Ik tzeʼn qe junjun nejenel at kyokslabʼil te católico o cheʼx kʼiwlal qeju soldad ex qeju kyqʼaqʼ in che ajbʼen tuʼn kykubʼ bʼiyet qe txqantl católico te juntl tnam aʼyeju aj qʼoj qe. Ax o bʼant kyuʼn txqantl nejenel kye txqantl okslabʼil. Aju tej tok Tkabʼ Nimaq Qʼoj twitz Tkyaqil Txʼotxʼ atzun jun techelju kyiʼj nimxix xjal junx kyokslabʼil ex o kubʼ kybʼiyon kyibʼ kyxolx toj qʼoj.

2, 3. a) ¿Tiʼ bʼant kyuʼn testigos de Jehová tej tok Tkabʼ Nimaq Qʼoj twitz Tkyaqil Txʼotxʼ, ex tej tbʼet ambʼil? b) ¿Tiquʼn mintiʼ i eʼx testigos de Jehová toj qʼoj?

² ¿Tiʼ bʼant kyuʼn testigos de Jehová tej tok Tkabʼ Nimaq Qʼoj twitz Tkyaqil Txʼotxʼ? Aju txʼolbʼabʼil tiʼjju o tzikʼ in tzaj tyekʼun qa mintiʼ i eʼx testigos de Jehová toj qʼoj. ¿Tiquʼn mintiʼ i eʼx toj qʼoj? Tnejelxix, tuʼnju el kykanoʼn techel kyaj tqʼoʼn Jesús ex tuʼnju e ok lepeʼ tiʼjju kyaj t-xnaqʼtzaʼn. Tqʼama Jesús jlu: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35). Ax ikx tuʼnju tzaj  kynaʼn qeju kawbʼil xi tqʼamaʼn apóstol Pablo kye okslal te tnam Corinto ex xi kybʼiʼn jlu (kjawil uʼjit 2 Corintios 10:3, 4).

³ Ax ikx, tuʼnju in kubʼ kyxnaqʼtzaʼn axix okslal aju kynabʼil tiʼj Tyol Dios, in kynaʼn qa mintiʼ tuʼn kyxiʼ xnaqʼtzal kyibʼ tuʼn tbʼant kyqʼojin ex qa mintiʼ tuʼn kyxiʼ toj qʼoj. Tuʼnju in japun Tyol Dios kyuʼn testigos de Jehová, at nim kye kyxol i el ikʼun. Ik tzeʼn tej kyokx qʼoʼn kuʼxin, qe tij xjal, qe xinaq ex qe xuʼj kyoj carcel ex tej kyxi qʼiʼn kyoj junjun tembʼil tuʼn kyok obligarin aqʼunal kyoj tembʼil lu. Axpe ikx at junjun e kubʼ bʼiyoʼn toj tnam te Alemania nazi. At nim nya bʼaʼn ikʼx kyuʼn testigos de Jehová toj Europa, noqtzun tuʼnj, mintiʼ kyaj kytzaqpiʼn tuʼn kypakbʼan tiʼj Tkawbʼil Jehová. Tuʼntzunju, kukx e pakbʼan kyoj carcel, kyoj tembʼil jatumel e ok obligarin tuʼn kyaqʼunan ex kyoj tnam jatumel i ex samaʼn. * Ax ikx tej tbʼet ambʼil, toj 1994, mintiʼ e ten kyxol xjal aʼyeju kubʼ kybʼiyoʼn junjuntl kyyajil, moqa kyiyjil, xjal toj tnam Ruanda. Ax ikx tej tkubʼ tpan tibʼ tnam Yugoslavia, mintiʼ e ten kyxol qeju e bʼiyon kye nimxix xjal toj qʼoj ok kyoj tembʼil Balcanes tbʼi.

4. ¿Tiʼ o tzʼok qʼuqeʼ kykʼuʼj nim xjal tiʼj tuʼnju mintiʼ in qoʼx toj qʼoj?

⁴ Tuʼnju mintiʼ in cheʼx testigos de Jehová toj qʼoj, at nim xjal twitz tkyaqil Txʼotxʼ o tzʼok qʼuqeʼ kykʼuʼj qa ax tok at kykʼuʼj qe jlu tiʼj Dios ex kyiʼj xjal, toj juntl yol, qa ax tok okslal qe. Noqtzun tuʼnj, at junjuntl tiquʼn nim xjal in kubʼ kyximen qa aqe testigos de Jehová axix tok okslal qe.

5. ¿Alkye chʼixpubʼil e ok weʼ tnejil t-xnaqʼtzbʼen Jesús twitz?

⁵ Atxix tej ttzaj tzyet pakbʼabʼil tuʼn Jesús, ok tilil tuʼn tuʼn t-xi pakbʼet tbʼanel tqanil tiʼj Tkawbʼil Dios. E jaw t-skʼoʼn 12 t-xnaqʼtzbʼen tuʼn ttzaj tzyet jun aqʼuntl kyuʼn aju kpol twitz tkyaqil Txʼotxʼ, ex yajxitl i ex t-xnaqʼtzaʼntl 70 xjal tiʼj jlu (Luc. 6:13; 10:1). E bʼaj t-xnaqʼtzaʼn tuʼn t-xi kypakbʼaʼn aju tbʼanel tqanil kye xjal judiy qe, noqtzun tuʼnj, yajxitl tzaj qʼamaʼn kye qa iltoq tiʼj tuʼn t-xi kypakbʼaʼn tbʼanil tqanil kye xjal nya judiy te junjuntl tnam. ¡Nimxix chʼixpubʼil ela jlu toj kywitz t-xnaqʼtzbʼen Jesús tuʼnju judiy qe! (Hech. 1:8.)

6. ¿Alkye tten el tnikʼ apóstol Pedro tiʼj qa mintiʼ in nok tqʼoʼn Jehová twitz tiʼj kyxilen xjal?

⁶ Xi samaʼn apóstol Pedro tuʼn t-xiʼ tja Cornelio, aju jun xjal nya judiy. Atz el tnikʼ apóstol Pedro tiʼj qa mintiʼ in nok tqʼoʼn Dios twitz tiʼj kyxilen xjal. Ex xi tqʼamaʼn tuʼn tjaw aʼ twiʼ Cornelio ex qe toj tja (Hech. 10:9-48). Atxix toj ambʼil aju, iltoq tiʼj tuʼn t-xi pakbʼet Tyol Dios twitz tkyaqil Txʼotxʼ: kykyaqil xjal kyoj kykyaqil tnam jakutoq tzʼok kybʼiʼn ex jakutoq t-xi kynimen aju Tyol Dios.

7, 8. ¿Tiʼ o bʼant tuʼn ttnam Jehová tuʼn t-xi pakbʼet Tyol Dios kye nimxix xjal? (Qʼoʼnka twitza tiʼj tnejel tilbʼilal.)

⁷ Toj ambʼil jaʼlo, aʼye ermano qʼil twitz aqʼuntl kyxol testigos de Jehová in che onin tuʼn tkyaqil kykʼuʼj tiʼj pakbʼabʼil ex tiʼj tuʼn t-xi xnaqʼtzet tbʼanel tqanil kye xjal twitz tkyaqil Txʼotxʼ. Ex toj ambʼil jaʼlo, at chʼixmi 8 millón testigos de Jehová in che pakbʼan kyoj mas te 600 yol tiʼj tqanil kyaj tqʼoʼn Jesús, ex toj chʼintl ambʼil ax ikx kbʼantel kyoj mastl yol. Ojtzqiʼn kywitz tuʼnju in cheʼx pakbʼal kyojele kyja xjal, kyojele bʼe ex at maj atz jatumel in che kubʼ qʼet qe mes ex qe tal kʼuxbʼil jaku chex iqʼit jaxku tumel.

⁸ O tzaj qʼoʼn jun tbʼanel xnaqʼtzbʼil kye mas te 2,900 testigos de Jehová tuʼn tkubʼ kyqʼoʼn Tyol Dios ex qe onbʼil tiʼj Tyol Dios kyoj txqantl yol. Ex nya oʼkx in kubʼ kyqʼoʼn qe uʼj lu kyoj yol in che ajbʼen kyuʼn chʼixmi kykyaqil xjal, ax ikx in che kubʼ  kyqʼoʼn kyoj txqantl yol aʼyeju mintiʼ ojtzqiʼnxix, noqtzun tuʼnj, at nim millón xjal in najbʼen kyuʼn. Jun techel, toj tnam España, at nim millón xjal catalán tbʼi kyyol atxix tej kyul itzʼji, ex in najbʼen kyuʼn toj tkyaqil ambʼil ex jaxku tumel. Ex mas toj ambʼil jaʼlo, at mastl xjal in che yolin toj yol catalán, ex nya oʼkxju, ax ikx at junjuntl tten yol lu kyoj tnam Andorra, Alicante, Valencia ex kyoj piẍ txʼotxʼ Balear kybʼi. Kyjuʼtzun, in che etz onbʼil tiʼj Tyol Dios ex in che ok chmabʼil kyuʼn testigos de Jehová toj yol catalán, aju yol in kuʼpin toj kyanmi qeju xjal in che yolin toj yol lu.

9, 10. ¿Alkye yekʼbʼil at qa tajbʼil ttnam Jehová tuʼn tok kybʼiʼn kykyaqil xjal Tyol Dios?

⁹ Twitz tkyaqil Txʼotxʼ, in che kubʼ onbʼil tiʼj Tyol Dios kyoj txqantl yol ex in xi qʼet xnaqʼtzbʼil kye xjal tojxix kyyol. Ik tzeʼn México, in che yolin xjal toj kastiy, noqtzun tuʼnj, at junjuntl tnam toj México in che yolin xjal kyoj txqantl yol. Jun kyxol jlu, aju yol maya. Aju ninja qʼil twitz aqʼuntl i ex t-samaʼn kʼloj erman in kubʼ kyqʼoʼn uʼj toj yol maya toj jun tnam atz jatumel jaku tzʼok kybʼiʼn kyyol tkyaqil qʼij. Juntl techel tiʼj jlu, aju yol nepalél aju jun yol in yolinjtz toj tnam Nepal tbʼi. At mas te 29 millón xjal in che anqʼin toj tnam Nepal. Ex ax tok ateʼ junlo 120 yol toj tnam lu, noqtzun tuʼnj, mas te 10 millón xjal in che yolin toj yol nepalés, ex at txqantl xjal in najbʼen yol lu kyuʼn te tkabʼ kyyol. Ax ikx in che etz uʼj tuʼn ttnam Dios toj yol nepalés.

¹⁰ ¿Tiquʼn in che ajbʼen nim kʼloj erman tuʼn ttnam Jehová tuʼn tkubʼ kyqʼoʼn uʼj kyoj txqantl yol? Tuʼnju nimxix toklen toj twitz tuʼn t-xi pakbʼet tbʼanel tqanil kyoj kykyaqil tnam. Nimxix millón tal uʼj, qe uʼj ex junjuntl o txi kysipen testigos de Jehová, ex nya chjoʼn kywiʼ qe uʼj lu. Aju pwaq in kubʼ bʼaj kyiʼj uʼj lu, atz in nel iqʼet tiʼj onbʼil in xi kyqʼoʼn testigos de Jehová, aʼyeju in japun kyuʼn aju tqʼama Jesús: «Noq kukx ma kykʼame [...], ax ikx [...] noq kukx kybʼinchame» (Mat. 10:8).

11, 12. ¿Tiʼ in kyqʼamaʼn xjal tuʼnju in qo pakbʼan ex tuʼnju in xi qqʼoʼn xnaqʼtzbʼil twitz tkyaqil Txʼotxʼ?

¹¹ Tuʼn tkyaqil kykʼuʼj testigos de Jehová in che pakbʼan ex in xi kyqʼoʼn xnaqʼtzbʼil. Qʼuqlixix kykʼuʼj qa o kanet axix tok kyuʼn ex kyjuʼtzun in nok tilil kyuʼn tuʼn t-xi pakbʼet tbʼanel tqanil kyoj junjuntl tnam ex kye junjuntl kyyajil xjal. Tuʼntzunju, at nim erman o kubʼ kychʼixpuʼn junjun tten kyanqʼibʼil tuʼn tten mas ambʼil kyiʼj, o  bʼant kyyolin kyoj junjuntl yol ex o t-xi kyxnaqʼtzaʼn kyibʼ tuʼn kyanqʼin toj junjuntl tnam. Tuʼnju in qo pakbʼan ex in xi qqʼoʼn xnaqʼtzbʼil twitz tkyaqil Txʼotxʼ, at nim xjal in kyqʼamaʼn qa aqe testigos de Jehová ax tok in che ok lepeʼ tiʼjju kyaj t-xnaqʼtzaʼn Jesús.

¹² Aqoʼ testigos de Jehová in bʼant tkyaqil quʼn tuʼnju qʼuqli qkʼuʼj qa ma kanet axix tok quʼn. Noqtzun tuʼnj, ¿tiʼ junjuntl tiʼchaq o tzʼonin kyiʼj txqantl tuʼn tel kynikʼ qa aʼye testigos de Jehová ax tok okslal? (Kjawil uʼjit Romanos 14:17, 18.)

13. ¿Tiʼ in bʼant kyuʼn testigos de Jehová tuʼn kyten saq?

¹³ ¿Tiquʼn qʼuqli kykʼuʼj junjun okslal, aʼyeju kukx in che ajbʼen te Dios toj ambʼil jaʼlo, qa o kanet axix tok kyuʼn? At jun tmajen Jehová aju o tzikʼ nim ambʼil in najbʼen te, tqʼama jlu tiʼjju in tnaʼn: «In nok tilil tuʼn ttnam Jehová tuʼn tten saq tiʼjju nya bʼaʼn, mintiʼ in tzaj xobʼ tuʼn t-xi kawit alkyexku tuʼn t-xi kawit». ¿Tiʼ in bʼant kyuʼn tuʼn tbʼant jlu? Kykyaqil testigos de Jehová in nok tilil kyuʼn tuʼn tjapun kyuʼn aʼyeju kawbʼil ateʼkux toj Tyol Dios ex in nok tilil kyuʼn tuʼn kyok lepeʼ tiʼj techel kyaʼj tqʼoʼn Jesús ex qe t-xnaqʼtzbʼen. Tuʼnju in bʼant jlu kyuʼn, nya nim qeju mintiʼ in xi kynimen tkawbʼil Dios ex o che etz lajoʼn toj ttnam Dios. Chʼixmi kykyaqil testigos de Jehová in nok tilil kyuʼn tuʼn tten kyanqʼibʼil saq ex tuʼn kyok te jun tbʼanel techel, axpe ikx qeju attoq jun kyanqʼibʼil aju nya bʼaʼn toj twitz Dios (kjawil uʼjit 1 Corintios 6:9-11).

14. ¿Tiʼ chʼixpubʼil o bʼant kyuʼn nimku kyxol qeju o che ex lajoʼn, ex tiʼ o bʼaj kyiʼj?

¹⁴ ¿Tiʼ o bʼaj kyiʼj qeju i ex lajoʼn toj ttnam Dios ik tzeʼn in tzaj tqʼamaʼn Tyol Dios? Ateʼ nim o tzʼajtz tiʼj kyanmi ex o kyaj kytzaqpiʼn nya bʼaʼn kybʼinchbʼen, ex tuʼn jlu, o che okx kʼamoʼn juntl maj kyuʼn erman tuʼn tkyaqil kykʼuʼj (kjawil uʼjit 2 Corintios 2:6-8). Tuʼnju in najbʼen Tyol Dios kyuʼn testigos de Jehová tuʼn tel kynikʼ tiʼj alkye tuʼn tbʼant kyuʼn, in che ten saq. Ex a jlu in nonin tuʼn tok qeʼ kykʼuʼj qa in tzalaj Dios kyiʼj. In nok tilil kyuʼn tuʼn kykolin kyiʼj tkawbʼil Dios, nya ik tzeʼn qe txqantl okslabʼil, aʼyeju in xi kyqʼoʼn ambʼil kye kyxjal tuʼn tbʼant alkyexku nya bʼaʼn kyuʼn. A jlu o tzʼonin kyiʼj nimku xjal tuʼn tel kynikʼ qa atz taʼ axix tok kyukʼil testigos de Jehová.

15. ¿Tiquʼn qʼuqli tkʼuʼj jun ermano qa o kanet axix tok tuʼn?

¹⁵ ¿Tiquʼn in nok qeʼ kykʼuʼj junjuntl testigos de Jehová, aʼyeju o tzikʼ nim ambʼil in che ajbʼen te Dios, qa at axix tok kyukʼil? Jun erman te 54 abʼqʼi tqʼama jlu: «Atxix toj nkuʼxumale, at oxe tiquʼn qʼuqlixix nkʼuʼje: 1) qa at Dios; 2) qa a Dios o qʼamante aju tkuʼx toj Tuʼjil Tyol, ex 3) qa in che ajbʼen testigos de Jehová tuʼn ex qa in che tzaj tkʼiwlaʼn. Toj tkyaqil abʼqʼi iqʼin wuʼne tuʼn nxaqʼtzane tiʼj Tyol Dios, kukx in che kubʼ nqʼoʼne qeju oxe tiquʼn lu toj malbʼil tuʼn tel nnikʼe tiʼj qa ax tok jaku tzʼok qeʼ  nkʼuʼje tiʼj. Ex aʼyeju axix tok lu at yekʼbʼil kyiʼj ex o chʼiy qʼuqbʼil nkʼuʼje tiʼj aj tbʼet ambʼil».

16. ¿Tiquʼn in nok qeʼ tkʼuʼj jun ermana qa atz taʼ toj ax tok?

¹⁶ Jun ermana at tchmil in najbʼen toj kytxuylal ninja qʼil twitz aqʼuntl toj Nueva York, tqʼama jlu tiʼj ttnam Jehová: «Oʼkx te in xi tqʼamaʼn tbʼi Jehová. ¡Ex ax tok in kanet junlo 7,000 maj tbʼi Dios quʼn toj Xjan Uʼj!». Ax ikx yolin ermana tiʼj taqikʼ Tyol Dios tkuʼx toj 2 Crónicas 16:9, aju in tqʼamaʼn: «Ate Qman in keʼyin tiʼj tkyaqilju in bʼaj twitz txʼotxʼ ex in xi tqʼoʼn kyipun qeju axix tok nnoʼk qeʼ kykʼuʼj tiʼj». Ex tqʼamatl jlu: «O chin tzaj xnaqʼtzaʼne tuʼn axix tok tuʼn tten jun wanmiye tzʼaqli tuʼntzun ttzaj tyekʼun Jehová tipumal weye. Aju wamiwbʼile tukʼil atzun mas nim toklenju at weye. Ex in xi nqʼoʼne chjonte tuʼnju in qo tzaj tonin Jesús tuʼn tel qnikʼ tiʼj Jehová. Aju ojtzqibʼil lu in tzaj tqʼuqbʼaʼn nkʼuʼje».

17. ¿Tiquʼn qʼuqli tkʼuʼj jun ermano qa o kanet axix tok tuʼn, aju tnejel mintiʼ ok qeʼ tkʼuʼj qa at jun Dios?

¹⁷ At jun ermano, aju mintiʼtoq in nok qeʼ tkʼuʼj qa at jun Dios, tqʼama jlu: «Aj tok nqʼoʼne nwitze tiʼj tbʼinchbʼen Dios, in nel nnikʼe tiʼj qa tajbʼil Dios tuʼn qtzalaj tiʼj qchwinqlal; tuʼntzunju, in nok qeʼ nkʼuʼje qa mlay txi tqʼoʼn ambʼil tuʼn kukx tikʼx kʼixkʼoj quʼn. Ax ikx, xiʼni kyxiʼ xjal toj il, atzun qeju ateʼ toj ttnam Jehová kukx in chʼiy qʼuqbʼil kykʼuʼj, mas in che tzalaj ex mas at kykʼujlabʼil kyiʼj txqantl. Oʼkx t-xew Jehová jaku bʼant jlu tuʼn» (kjawil uʼjit 1 Pedro 4:1-4).

18. ¿Tiʼ kyqʼama kabʼetl erman, ex tzeʼn in nela teya toj twitz?

¹⁸ At juntl ermano ma bʼet ambʼil in najbʼen te Dios, tzaj tqʼamaʼn junjuntl tiquʼn jaku tzʼok qeʼ qkʼuʼj tiʼjju axix tok: «Atxix ojtxe, o tzʼonin nxnaqʼtzbʼile tiʼj Tyol Dios wiʼje tuʼn tel nnikʼe qa in nok tilil kyuʼn testigos de Jehová tuʼn kyok lepeʼ tiʼj techel kyaj kyqʼoʼn okslal te tnejel syent abʼqʼi. O chin bʼete twitz tkyaqil Txʼotxʼ ex o tzʼokxix nqʼoʼne nwitze tiʼj mujbʼabʼil at kyxol. Aju axix tok tkuʼx toj Tyol Dios nimxix in chin tzalaje tuʼn». Ax ikx tej t-xi qanin te jun ermano te 60 abʼqʼi tiquʼn qʼuqli tkʼuʼj qa atz taʼ axix tok kyukʼil testigos de Jehová, tzaj tchikʼbʼaʼn qa oʼkx kye o tzʼok tilil kyuʼn tuʼn kyok lepeʼ tiʼj Jesús. Tqʼama jlu: «O tzʼok tilil quʼne tuʼn tkubʼ qxnaqʼtzaʼne tchwinqlal Jesús ex aju aqʼuntl ul bʼinchalte, ex nim toklen techel kyaj tqʼoʼn Jesús toj qwitze. O bʼaj qchʼixpuʼne qanqʼibʼile tuʼn qxi laqʼeʼye ttxlaj Dios tuʼnju bʼant tuʼn. In nel qnikʼe qa tuʼn tkyimlen jaku qo klet. Ex qʼuqli qkʼuʼje qa jaw anqʼin kyxol kyimni, tuʼnju at junjuntl xjal ok kyqʼoʼn kywitz tiʼj tej otoqxi jaw anqʼin» (kjawil uʼjit 1 Corintios 15:3-8).

19, 20. a) ¿Tiʼ xi tqʼamaʼn apóstol Pablo kye okslal te Roma? b) ¿Alkye jun tbʼanel qoklen o tzaj qʼoʼn?

¹⁹ Aʼyeju ax tok okslal kʼujlaʼnxix qe xjal kyuʼn. Tuʼntzunju, aju axix tok o tzʼel kynikʼ tiʼj, in xi kyqʼamaʼn kye txqantl xjal. Xi tqʼamaʼn apóstol Pablo jlu kye okslal te Roma: «Qa in tchikʼbʼaʼna tuʼn ttziʼya qa a Jesús Qajaw, ex qa ma tokslaya tuj tanmiya qa tuʼn Dios jatz anqʼin Jesús kyxol kyimni, ok kletela. Porque tuj qanmi in xi qokslaʼn tuʼn qok te tzʼaqlxix tuʼn Dios, ex tuʼn qtziʼ in qchikʼbʼaʼn qa a Jesús Qajaw tuʼn qklet» (Rom. 10:9, 10).

²⁰ Aqoʼ testigos de Jehová qʼuqli qkʼuʼj qa o kanet axix tok quʼn. Ex ojtzqiʼn quʼn qa nim qoklen o tzaj qʼoʼn tuʼn t-xi qxnaqʼtzaʼn tbʼanel tqanil tiʼj Tkawbʼil Dios. Aj qpakbʼan, nya oʼkx qqʼoʼnk tilil tuʼn tel bʼaʼn toj kywitz xjal aju in xi qxnaqʼtzaʼn kye toj Tyol Dios, sino ax ikx qyekʼinku qa qʼuqli qkʼuʼj tiʼjju axix tok in xi qyekʼun kye.