1, 2. ¿Tiʼ ajbʼen tuʼn Dios tuʼn tok xqʼuqit tyajil xuʼj, ex tiquʼn?

 AJU tnejel yol kyaj qʼamaʼn toj Tyol Dios nimxix toklen tuʼn tel qnikʼ tiʼj alkye tten kjapunel twi t-ximbʼetz Dios. Tej ttzaj ttziyen Dios tyol toj Edén tqʼama jlu: «Kbʼel nqʼoʼne qʼoj kyxole [Satanás] tukʼil xuʼj, ex kyxol tiyjila tukʼil tiyjil xuʼj». ¿Jniʼtoq qʼoj ktel kyxol qe jlu? Tqʼama Jehová: «Aju tiyjil xuʼj kbʼel paʼn twiʼya tuʼn, atzun teya [Satanás] kʼokel ttxʼaʼna t-xe tqan, chi Dios» (Gén. 3:15). Tuʼnju nimxix qʼoj at kyxol Satanás tukʼil xuʼj, kʼokeltoq tilil tuʼn Satanás tuʼn tajbʼen tkyaqil tipumal tuʼn tkubʼ tnajsaʼn aju tyajil xuʼj.

² Tuʼn jlu nya kwest tuʼn tel qnikʼ tiʼjju tqʼama jun ajbʼitzil tej tnaʼn Dios tiʼj ttnam Dios: «Keʼyintza qe aj qʼoj tiʼja ex qeju in che ikʼun teya; in che jaw tilj ex in jaw kyiʼn kyibʼ tiʼja. Tuʼnju jawni kywitz, ma bʼant tiʼj kyuʼn tuʼn kybʼinchante mya bʼaʼn kyiʼj qe xjal etzan tuʼna ex kyiʼj qeju kloʼmaj tuʼna. O kubʼ kyximan tuʼn kytzaj xitul qeye, tuʼn miʼn qtentle ik tzaʼn jun nasyon, ex tuʼn miʼn ttzaj naʼntl qbʼiye, aqoʼye aj Israel» (Sal. 83:2-4). Tuʼnju tajbʼiltoq Satanás tuʼn tkubʼ tnajsaʼn ex tuʼn tokx tqʼoʼn nya bʼaʼn kyxol qeju t-xeʼchel tyajil xuʼj, ok t-xqʼuqin Jehová tyajil xuʼj. Tuʼn tbʼant jlu tuʼn Jehová, e ajbʼen yol e kyaj bʼant tiʼj tuʼn aju kʼonil tuʼn tjapun twiʼ t-xim.

3, 4. a) ¿Toj alkye ambʼil tzaj tzyet tuʼn tjapun twiʼ yol kyaj bʼant tiʼj tej ttzaj qʼoʼn Ley, ex tiʼ tzaj kyqʼamaʼn aj Israel tuʼn tbʼant kyuʼn? b) ¿Tiquʼn kyaj bʼant tiʼj yol tej ttzaj qʼoʼn Ley?

³ Tej tchmet nim millón kybʼaj qe tyajil, moqa tiyjil, Abrahán, Isaac ex Jacob, e ok te jun tnam tuʼn Jehová. Ajbʼen Moisés tuʼn Jehová tuʼn t-xi tqʼamaʼn tyol kye aj Israel ex tuʼn tkyaj bʼant tiʼj tyol tukʼe tnam lu. I ex tqʼoʼn Jehová qe Tley kye ex kyqʼama aj Israel qa ok che japunel kyuʼn. In tzaj tqʼamaʼn Tyol Dios qa «tzaj tiʼn Moisés aju uʼj jatum tzʼibʼantoq yol otoq kyaj bʼant tiʼj tuʼn Dios kyukʼil, ex jaw t-schʼiʼn kywitz xjal. Atzun kye xjal kyma kyjaʼ: —Kbʼantel quʼne tkyaqilju ma tma Qman, ex kxel qnimane, che chi. Tzajtzun tiʼn Moisés chikʼ [aju kychkʼel alumaj], xi ttxʼitoʼn kyibʼaj xjal ex tma: Aju chikʼ lu, atzun kyuwsabʼl te yol ma kyaj bʼant tiʼj tuʼn Qman kyukʼile, ik tzaʼn in tmaʼn tkyaqil yol lu» (Éx. 24:3-8).

⁴ Aju yol kyaj bʼant tiʼj tej ttzaj qʼoʼn Ley tzaj tzyet tuʼn tjapun twiʼ tej atxtoq 1513 abʼqʼi tuʼn tul Jesús. Ajbʼen yol lu tuʼn Jehová tuʼn tok tnam Israel te ttnam ex tuʼn tjapun twiʼ aju ximan tuʼn. Tukʼe jlu ok Jehová te Jwes, te Qʼol Ley kye ex te Ajkawil kye aj Israel (Is. 33:22). Aju ikʼ kyiʼj aj Israel in tzaj tyekʼun tiʼtoq in bʼaj kyiʼj qa in che japuntoq tbʼanel tkawbʼil Dios kyuʼn ex qa mintiʼtoq in che japun kyuʼn. Kyxol qeju Tley Jehová e tzaj tqʼoʼn, tzaj tqʼamaʼn tuʼn miʼn kykubʼ mojeʼ kyukʼe xjal nya junx kyokslabʼil kyukʼil ex tuʼn miʼn kyajbʼen kye junjuntl dios. E tzaj qʼoʼn Ley tuʼn miʼn tnaj tyajil Abrahán (Ex. 20:4-6; 34:12-16).

5. a) ¿Tiʼ ambʼil tzaj qʼoʼn kye aj Israel tuʼnju yol kyaj bʼant tiʼj tej ttzaj qʼoʼn Ley? b) ¿Tiquʼn el tikʼun Dios tnam te Israel?

⁵ Aju yol kyaj bʼant tiʼj tej ttzaj qʼoʼn Ley, ax ikx tzaj tqʼamaʼn qa ok che ajbʼel qe pal toj Israel. Aqeju pal lu e ok te techel tiʼj alkye tten che tel juntl kʼloj pal toj ambʼil tzul (Heb. 7:11; 10:1). Ikju, tukʼe yol lu tzaj qʼoʼn jun ambʼil kye aj Israel tuʼn kyok «te pal tuj» tkawbʼil Dios, ex jakutoq bʼant jlu qa ma che japuntoq tkawbʼil Jehová kyuʼn (kjawil uʼjit Éxodo 19:5, 6). Noqtzun tuʼnj, mintiʼ e japun tkawbʼil Jehová kyuʼn aj Israel. Tej tul Mesías, aju tnejel tiyjil Abrahán, el ikʼen kyuʼn aj Israel. Kyjuʼtzun el ikʼen tnam Israel tuʼn Jehová.

6. ¿Tiʼ tajbʼen yol kyaj bʼant tiʼj tej ttzaj qʼoʼn Ley?

⁶ Tuʼnju naj qʼuqbʼil kykʼuʼj aj Israel tiʼj Dios, mintiʼ e ok te jun kʼloj pal tuʼn tjapun kyajlal qeju che kawil toj tkawbʼil Dios. Noqtzun tuʼnj, nya t-xilen jlu qa mintiʼwt tajbʼen Ley tzaj qʼoʼn. Aju Ley lu ok t-xqʼuqin tyajil xuʼj ex onin kyiʼj xjal tuʼn tel kynikʼ tiʼj Mesías. Tej tul Jesucristo twitz Txʼotxʼ ex tej tel kynikʼ xjal tiʼj, japun twiʼ Ley. «Porque aju tley Moisés oʼkx japun bʼaj tiʼj Crist», chi Tyol Dios (Rom. 10:4). Qa ikju, ¿alkyetzun juntl kʼloj xjal kxel qʼoʼn ambʼil kye tuʼn kyok te pal toj tkawbʼil Dios? Kyaj bʼant tiʼj juntl yol tuʼn Jehová tuʼn tten juntl tnam.

7. ¿Tiʼ tzaj tqʼamaʼn Jehová te Jeremías tiʼj jun akʼaj yol?

⁷ Tej atxtoq nim ambʼil tuʼn tjapun bʼaj twiʼ yol kyaj bʼant tej ttzaj qʼoʼn Ley, tzaj tqʼamaʼn Jehová te Jeremías, aju t-sanjel, qa «tzul tqʼijlalil tuʼn tbʼant tiʼj jun akʼaj yol» tuʼn kyukʼil aj Israel (kjawil uʼjit Jeremías 31:31-33). Junxitl yol kyaj bʼant tiʼj lu twitzju yol kyaj bʼant tiʼj tej ttzaj qʼoʼn Ley tuʼnju nya kychkʼel alumaj in tzaj tqʼanin tuʼn tkubʼ najset il. ¿Alkye tten in bʼant jlu?

8, 9. a) ¿Tiʼ bʼant tuʼn tchkʼel Jesús? b) ¿Alkye ambʼil tzaj qʼoʼn tuʼn akʼaj yol? (Qʼoʼnka twitza tiʼj tnejel tilbʼilal.)

⁸ Tej tikʼ nim syent abʼqʼi, kyaj bʼant tiʼj tuʼn Jesús tkubʼ ikʼset Wabʼj te Qale toj 14 te nisán toj abʼqʼi 33. Xi tqʼamaʼn Jesús jlu kye qeju 11 tbʼanel t-apóstol: «Aju tkuʼx tuj vas lu, atzun [‹techel›, TNM] akʼaj yol ma kyaj bʼant tiʼj tuʼn Dios kyukʼile, ex aju nchkʼele kʼelel chitj te kolbʼil kyeye, atzunju kʼokel te kyuwsabʼl teju yol lu» (Luc. 22:20). Chʼixmi aʼyex yol lu kubʼ ttzʼibʼen Mateo tej tqʼama: «Atzun [‹techel›, TNM] nchkʼele jlu te kyuwsabʼl te akʼaj yol, aju ma kyaj bʼant tiʼj tuʼn Dios kyukʼile; atzun nchkʼele kʼelel chitj tuʼn kylaj nimku xjal, tuʼn tnajset kyil» (Mat. 26:27, 28).

⁹ Ajbʼen tchkʼel Jesús tuʼn tkyaj bʼant tiʼj akʼaj yol. Noq junx maj el chitj tchkʼel Jesús tuʼn tkubʼ najset kyil xjal te jumajx. Mintiʼ ok Jesús te kyajlal xjal in kubʼ najsaʼn kyil aʼyeju kyaj bʼant tiʼj akʼaj yol kyukʼil. Tuʼnju mintiʼ te kubʼ tbʼinchaʼn il, mintiʼ til tuʼn tkubʼ najset. Noqtzun tuʼnj, ajbʼen chojbʼil tuʼn Dios aju bʼant tuʼn Jesús tuʼn tonin kyiʼj xjal. Ax ikx in najbʼen xewbʼaj xjan tuʼn, tuʼn kyjaw t-skʼoʼn junjun tbʼanel xjal ex tuʼn kyok tqʼoʼn «te tkʼwaʼl» (kjawil uʼjit Romanos 8:14-17). Toj twitz Dios, mintiʼtl kyil xjal lu, toj juntl yol, jaku txi qʼamet qa chʼixmi ik kyten ik tzeʼn Jesús, aju Tkʼwaʼl Dios mintiʼ til. Aqeju skʼoʼn maj lu, che «tel junx tukʼil» Jesucristo ex kxel qʼoʼn ambʼil ex oklenj kye aju mintiʼ xi qʼoʼn kye aj Israel tuʼnju mintiʼ japun yol kyuʼn aju kyaj bʼant tiʼj tej ttzaj qʼoʼn Ley, aju tuʼn kyok «te pal tuj» Tkawbʼil Dios. Tej tyolin apóstol Pedro kyiʼj qeju che «tel junx tukʼil» Jesucristo, tqʼama jlu: «Aqeye junx kyiyjile, skʼoʼmaj qeye, ex ma che oke te rey ex pal, ma che oke te jun tnam oʼkx te Dios tuʼn kyajbʼene, ma che oke te jun tnam tekuxix Dios tuʼntzun t-xi kychikʼbʼaʼne tbʼinchbʼen Dios nim tipumal; ate Dios txkon kyeye tuʼn kyetze tuj qlolj ex tuʼn kytene tuj t-spikʼumal tbʼanilxix» (1 Ped. 2:9). ¡Nimxix toklen aju akʼaj yol kyaj bʼant tiʼj! A jlu xi tqʼoʼn ambʼil kye qeju lepchiqeʼk tiʼj Jesús tuʼn kyok te tkabʼ tyajil Abrahán.

10. a) ¿Toj alkye ambʼil tzaj tzyet tuʼn tjapun twiʼ akʼaj yol kyaj bʼant tiʼj? b) ¿Tiquʼn tzmaxi toj ambʼil aju tzaj tzyet tuʼn tjapun bʼaj twiʼ yol lu?

¹⁰ Aju akʼaj yol mintiʼ tzaj tzyet tuʼn tjapun twiʼ tej tkubʼ ikʼset Wabʼj te Qale te Jesús. ¿Tiquʼn? Tuʼnju tnejel iltoq tiʼj tuʼn tmeltzʼaj Jesús toj kyaʼj ex tuʼn t-xi tqʼamaʼn te Jehová qa otoq txi tqʼoʼn tchwinqlal te chojbʼil. Ax ikx aqeju che «tel junx tukʼil» Jesucristo iltoq tiʼj tuʼn kyjaw jyoʼn tuʼn xewbʼaj xjan. Tuʼntzunju, aju akʼaj yol kyaj bʼant tiʼj tzaj tzyet tuʼn tjapun twiʼ toj ninqʼij Pentecostés toj abʼqʼi 33 tiʼj ambʼil iqʼen quʼn jaʼlo, tej ttzaj qʼoʼn xewbʼaj xjan kyibʼaj qeju lepchiqeʼk tiʼj Jesús.

11. ¿Alkye tten in che ok aj judiy ex nya aj judiy te aj Israel etzan tuʼn Dios tuʼn akʼaj yol kyaj bʼant tiʼj, ex jteʼ kybʼaj qeju at kyoklen tiʼj akʼaj yol?

¹¹ Tej ttzaj tqʼamaʼn Jehová te Jeremías qa oktoq kjel bʼant tiʼj jun akʼaj yol tuʼn kyukʼil aj Israel, tzaj tyekʼun qa aju yol kyaj bʼant tiʼj tuʼn tej ttzaj tqʼoʼn Ley, ya mlay tzʼajbʼentl. Aju yol kyaj bʼant tiʼj tej ttzaj qʼoʼn Ley bʼaj tajbʼen tej ttzaj tzyet tuʼn tjapun twi akʼaj yol (Heb. 8:13). Tej ttzaj tzyet tuʼn tjapun twi akʼaj yol, junx i ela xjal aj judiy ex qe xjal te txqantl tnam toj twitz Dios, kykyaqil jakutoq txi  qʼoʼn ambʼil kye tuʼn kyten toj Tkawbʼil Dios tuʼnju «aju xjal axix tok judiy, atzun teju at tley Dios tuj tanmi; ex aju sircunsisyón axix tok, atzun tuʼn tten tuj qanmi, mya tuʼn ley tzʼibʼan in bʼant jlu, noq oʼkx tuʼn T-xew Dios in tbʼinchaʼn» (Rom. 2:29). In japun jlu tuʼn Dios kyiʼj qeju o che jaw jyoʼn: «Kʼokex nqʼoʼne nleye tuj kynabʼl, ex kbʼel ntzʼibʼane twitz kyanmi» (Heb. 8:10). 144,000 kybʼaj qeju at kyoklen tiʼj akʼaj yol kyaj bʼant tiʼj, iktzun tten in che ok te jun akʼaj tnam, aʼyeju «axix tok aj Israel qe ex etzan qe tuʼn Dios» (Gál. 6:16; Apoc. 14:1, 4).

12. ¿Tiquʼn jaku txi qʼamet qa chʼixmi junx yol kyaj bʼant tiʼj tej ttzaj qʼoʼn Ley tukʼe akʼaj yol?

¹² ¿Tiquʼn jaku txi qʼamet qa chʼixmi junx yol kyaj bʼant tiʼj tej ttzaj qʼoʼn Ley tukʼe akʼaj yol? Tuʼnju aju yol kyaj bʼant tiʼj tej ttzaj qʼoʼn Ley kyaj bʼant tiʼj tuʼn Jehová kyukʼe aj Israel ojtxe, ax ikx aju akʼaj yol kyaj bʼant tiʼj tuʼnx Jehová kyukʼe «axix tok aj Israel qe ex etzan qe tuʼn Dios». Ex ik tzeʼn a Moisés ajbʼen tuʼn Jehová tuʼn t-xi tqʼamaʼn yol kyaj bʼant tiʼj, ax ikx a Jesús ajbʼen tuʼn Jehová tuʼn tkyaj bʼant tiʼj akʼaj yol. Ax ikx aju yol kyaj bʼant tiʼj tej ttzaj qʼoʼn Ley, xi qʼet toklen tuʼn kychkʼel alumaj, ax ikx te akʼaj yol xi qʼet toklen tuʼn tchkʼel Jesús. Nya oʼkxju, ax ikx e ok ojtxe tnam aj Israel te jun tnam nukʼuʼn tten tjaqʼ Tley Moisés, ax ikx ttnam Dios toj ambʼil jaʼlo nukʼuʼn tten tjaqʼ tkawbʼil Jesús, aju Wibʼaj te ttnam Dios (Efes. 1:22, TNM).

13, 14. a) ¿Tiʼ toklen akʼaj yol tukʼe Tkawbʼil Dios? b) ¿Tiʼ juntl il tiʼj tuʼn tten tuʼn tbʼant kykawin qeju aj Israel etzan tuʼn Dios tukʼil Jesús toj kyaʼj?

¹³ Aju akʼaj yol at toklen tukʼe Tkawbʼil Dios tuʼnju in nonin tuʼn tten jun tnam xjan aʼyeju at kyoklen tuʼn kyok te kawil ex te pal toj Tkawbʼil Dios toj kyaʼj. Aju tnam lu in nok te tyajil Abrahán (Gál. 3:29). A jlu in tzaj tyekʼun qa aju akʼaj yol in xi tqʼoʼn tipumal yol kyaj bʼant tiʼj tukʼe Abrahán.

¹⁴ Aju akʼaj yol in nonin tuʼn kyitzʼji aj Israel etzan tuʼn Dios ex in xi tqʼoʼn kyoklen tuʼn kyten «junx tukʼil» Jesucristo. Noqtzun tuʼnj, ilxix tiʼj juntl yol aju jaku tzʼonin kyiʼj qeju o che jaw jyoʼn tuʼn kykawin tukʼil Jesús toj Tkawbʼil toj kyaʼj ex tuʼn kyok te pal.

15. ¿Alkye yol kyaj bʼant tiʼj tuʼn Jesús kyukʼe qe tbʼanel t-apóstol?

¹⁵ Tej tkyaj bʼant tiʼj tuʼn Jesús tuʼn tkubʼ ikʼset Wabʼj te Qale te Jesús, kyaj bʼant tiʼj jun yol tuʼn kyukʼe qeju tbʼanel t-xnaqʼtzbʼen aju yol lu in nok tbʼi te yol kyaj bʼant tiʼj tuʼn tten jun Kawbʼil (kjawil uʼjit Lucas 22:28-30). Aju yol lu nya ik tten ik tzeʼn qe txqantl yol e kyaj bʼant kyiʼj, tuʼnju tuʼn Jesús kyaj bʼant tiʼj yol lu kyukʼe qeju lepchiqeʼk tiʼj, aʼyeju o che jaw jyoʼn tuʼn xewbʼaj xjan. Tej tqʼama Jesús: «Ik tzaʼn weye ma tzaj qʼoʼn woklene tuʼn Nmane tuʼn nkawine», atzlo yolin tiʼj tej tkyaj bʼant tiʼj tyol Jehová tukʼe, aju tuʼn tok «te pal te jumajx [...] ik tzaʼn te Melquisedec» (Heb. 5:5, 6).

16. ¿Alkye oklenj in xi tqʼoʼn yol kyaj bʼant tiʼj tuʼn tten jun Kawbʼil kye okslal o che jaw jyoʼn?

¹⁶ Aqeju 11 tbʼanel apóstol kukx e ten tukʼil Jesús toj yajbʼil te. Aju yol kyaj bʼant tiʼj tuʼn tten jun kawbʼil xi ttziyen kye qa ok che kbʼel qeʼ kyoj qʼuqbʼil ex qa che kawil ex che okel te pal tukʼil Jesús toj kyaʼj. Noqtzun tuʼnj, nya oʼkx qeju 11 apóstol xi qʼoʼn kyoklen lu. Tej tkubʼ tyekʼun tibʼ Jesús twitz apóstol Juan toj jun witzikʼ tqʼama jlu: «Alkye ma kubʼ tiʼj mya bʼaʼn tuʼn, kxel nmaʼne te tuʼn tkubʼ qeʼ wukʼile tuj nqʼuqbʼile jatum in chin kawine, ik tzaʼn weye ma kubʼ tiʼj mya bʼaʼn wuʼne, ex ma chin kubʼ qeʼye tukʼil Nmane tuj tqʼuqbʼil» (Apoc. 3:21). Tuʼntzunju, aju yol kyaj bʼant tiʼj tuʼn tten jun Kawbʼil, ax ikx kyaj bʼant tiʼj kyukʼe qeju 144,000 okslal o che jaw jyoʼn (Apoc. 5:9, 10; 7:4). Aju yol kyaj bʼant  tiʼj tuʼn tten jun Kawbʼil in xi tqʼoʼn oklenj kye tuʼn kykawin tukʼil Jesús toj kyaʼj. Ik tten jlu ik tzeʼn jun tbʼanel ja xjal aju kbʼel mojeʼ kymeʼl, moqa kymyal, tukʼil jun ajkawil ex kxel tqʼoʼn ajkawil toklen t-xuʼjil tuʼn tkawin tukʼil. Kyjuʼtzun in tzaj tqʼamaʼn Tyol Dios qa ik kyten okslal o che jaw jyoʼn ik tzeʼn «t-xuʼjil» Jesucristo kʼokel ex ik tzeʼn «jun qʼapoj mintiʼ tpaltil» aju o kyaj bʼant tiʼj tuʼn tkubʼ mojeʼ Jesucristo tukʼil (Apoc. 19:7, 8; 21:9; 2 Cor. 11:2).

17, 18. a) Qʼamantza toj chʼin yol aqe qaq yol e kyaj bʼant tiʼj aʼyeju at kyoklen tukʼe Tkawbʼil Dios. b) ¿Tiquʼn jaku tzʼok qʼuqeʼxix qkʼuʼj tiʼj Tkawbʼil Dios?

¹⁷ Kykyaqil qeju qaq yol ma qo xnaqʼtzan kyiʼj kyoj kabʼe xnaqʼtzbʼil lu at kyoklen tiʼj Tkawbʼil Dios. (Qʼoʼnka twitza tiʼj aju «¿Alkye tten kjapunel twiʼ t-ximbʼetz Dios?», aju at toj xnaqʼtzbʼil ma kyaj.) Aqeju yol lu in tzajxix tqʼuqbʼaʼn qkʼuʼj qa o kyaj bʼant-xix tiʼj Tkawbʼil Dios ex qa o txi qʼoʼnxix toklen Kawbʼil lu tuʼn tkawin. Jaku tzʼok qʼuqeʼxix qkʼuʼj qa ok kajbʼel Tkawbʼil Mesías tuʼn Dios tuʼn tjapun twi t-ximbʼetz at tiʼj Txʼotxʼ ex kyiʼj xjal (Apoc. 11:15).

¹⁸ Tuʼn jlu jaku tzʼok qʼuqeʼxix qkʼuʼj qa oʼkx Tkawbʼil Dios kʼelel tiʼn tkyaqil nya bʼaʼn in tzaj kyiʼj xjal. Jaku tzʼok qʼuqeʼxix qkʼuʼj tiʼj qa aqeju kʼiwlabʼil che ul tiʼn kye xjal che tel te jumajx. Tuʼntzunju, kukx qqʼonk tilil tuʼn t-xi qqʼamaʼn tbʼanel tqanil lu kye txqantl xjal (Mat. 24:14).