Ik tzeʼn saj qʼamaʼn toj xnaqʼtzbʼil ma kyaj. Ok tilil tuʼn Jesús tuʼn tajbʼen tchwinqlal tuʼn, tuʼn tpakbʼan ex tuʼn t-xi «tmaʼn tqanil bʼaʼn tiʼj tkawbʼil Dios» (Lucas 8:1). Nimxix bʼet Jesús toj tkyaqil tnam Israel tuʼn t-xi tqʼoʼn xnaqʼtzbʼil kye xjal tiʼj Tkawbʼil Dios. Aju Kawbʼil lu, in kanet mas te 100 maj quʼn kyoj qeju kyaje uʼj in che yolin tiʼj tchwinqlal Jesús. Chʼixmi toj tkyaqil maj lu, a Jesús qʼamante, ¡ex noq chʼin te jlu tiʼj tkyaqilju maj yolin Jesús tiʼj Tkawbʼil Dios! (Juan 21:25).

¿Tiquʼn xi tqʼoʼn Jesús nimxix toklen Tkawbʼil Dios tej tten tzalu twitz Txʼotxʼ? Tuʼnju ojtzqiʼntoq tuʼn qa atoq kjawil jyoʼn tuʼn tok te Ajkawil toj Kawbʼil lu (Isaías 9:6; Lucas 22:28-30). Noqtzun tuʼnj, mintiʼ te Jesús ok tilil tuʼn, tuʼn tten tipumal tuʼnx tibʼ ex mintiʼ ok tilil tuʼn, tuʼn tjaw tnimsan tibʼ (Mateo 11:29; Marcos 10:17, 18). Mintiʼ ajbʼen Tkawbʼil Dios tuʼn, tuʼn tkambʼet junjun tichaq tuʼn, tuʼn tajbʼen tex. Nimxix toklen Tkawbʼil Dios toj twitz, tnejel, tuʼnju kbʼantel tuʼn Kawbʼil tuʼn tonin kyiʼj xjal kʼujlaʼnqe tuʼn, ik tzeʼn Ttat ex qeju lepchiqeʼk tiʼj. *

At nim tkʼuʼj Jesús tiʼj Ttat at toj kyaʼj (Proverbios 8:30; Juan 14:31). Kʼujlaʼnxix qe tmod Ttat tuʼn, ik tzeʼn tkʼujlabʼil Ttat, tqʼaqʼbʼil tkʼuʼj ex tuʼnju tzʼaqli te Ttat (Deuteronomio 32:4; Isaías 49:15; 1 Juan 4:8). Tuʼntzunju, nya bʼaʼn ela toj twitz Jesús tej tok tbʼiʼn junjun nya ax yol tzaj qʼamaʼn tiʼj Ttat, ik tzeʼn qa mintiʼ in tzaj tqʼoʼn Dios twitz tiʼj nya bʼaʼn in nikʼx kyuʼn xjal ex ik tzeʼn qa tajbʼil Dios tuʼn ttzaj nya bʼaʼn qiʼj. Kyjuʼtzun, ok tilil tuʼn, tuʼn tpakbʼan «tiʼj tqanil bʼaʼn tiʼj tkawbʼil Dios» tuʼnju ojtzqiʼntoq tuʼn qa kpol jun ambʼil jatumel ok kbʼel saqix tbʼi Dios tuʼn Kawbʼil lu (Mateo 4:23; 6:9, 10). ¿Alkye tten kbʼantel jlu tuʼn Tkawbʼil Dios?

Kajbʼel Kawbʼil lu tuʼn Jehová tuʼn ttzaj tiʼn junjun chʼixpubʼil tuʼn tonin kyiʼj xjal. «Kʼelel t-suʼn Dios taʼl kywitz» tbʼanel xjal. Ok kʼelel tiʼn Dios aju tiquʼn in che jaw oqʼ xjal, miʼn tentl «kamik», miʼn tentl «bʼis», miʼn tentl «oqʼel» ex miʼn tentl «kʼixkʼoj» (Apocalipsis 21:3, 4). Tuʼnju Kawbʼil lu, ok kʼelel tiʼn Dios tkyaqil yajbʼil in tzaj kyiʼj xjal. *

 Tuʼntzunju, nya kwest tuʼn tel qnikʼ tiʼj tiquʼn ok tilil tuʼn Jesús tuʼn tyolin tiʼj Tkawbʼil Dios. Ojtzqiʼntoq tuʼn qa ok kʼonil Kawbʼil lu tuʼn tel nikʼ tiʼj nimxix tipumal ex tiʼj nimxix qʼaqʼbʼil tkʼuʼj Ttat (Santiago 5:11). Ax ikx ojtzqiʼntoq tuʼn qa aju Kawbʼil lu, ok kʼonil kyiʼj xjal kʼujlaʼnqe tuʼn, aʼyeju in tzalaj Dios kyiʼj.

Tej naʼmxtoq tul Jesús twitz Txʼotxʼ, anqʼin toj kyaʼj tukʼe Ttat. Ajbʼen Kʼwalbʼaj lu tuʼn Qman Dios tuʼn tkubʼ tbʼinchaʼn tkyaqilju at, ik tzeʼn tkyaqilju tbʼanel at twitz kyaʼj, qe txqan cheʼw, aju tbʼanel Txʼotxʼ ex tkyaqilju at twitz (Colosenses 1:15, 16). Nya oʼkxju, axpe ikx tqʼama Jesús jlu: «In chin tzalaje kyiʼj qe xjal» (Proverbios 8:31).

Tej tpakbʼan Jesús, kubʼ tyekʼun tkʼujlabʼil kyiʼj xjal. Tej ttzaj tzyet tuʼn tpakbʼan, bʼiʼx tzaj tqʼamaʼn qa otoq tzul twitz Txʼotxʼ tuʼn t-xi tqʼoʼn «tqanil bʼaʼn kye» qeju kyaj tuʼn tok kybʼiʼn (Lucas 4:18). Noqtzun tuʼnj, nya oʼkx tqʼama Jesús qa in nonin kyiʼj xjal. Nim maj kubʼ tyekʼun tkʼujlabʼil kyiʼj xjal. Jun techel tiʼj jlu aju tej tok tqʼoʼn twitz kyiʼj nim xjal otoq che pon bʼil te aju in tqʼamaʼn «tzaj qʼaqʼan tkʼuʼj kyiʼj, ex e bʼanix yabʼ tuʼn, aqeju ateʼ kyxol xjal» (Mateo 14:14). Ex tej tok qeʼ tkʼuʼj jun xjal tiʼj aju nimxix tyabʼ tok ex xi tqanin jlu te: «Tat, qa tajbʼila jaku chin bʼanixe tuʼna, chi xjal», tzaj qʼaqʼin tkʼuʼj tiʼj xjal. Tukʼe nim tkʼujlabʼil ok tmakoʼn tqʼabʼ xjal ex xi tqʼamaʼn te: «Wajbʼile. Bʼiʼx kbʼantela» (Lucas 5:12, 13). Ax ikx tej tok tqʼoʼn Jesús twitz tiʼj María in noqʼ tuʼnju otoq kyim t-xibʼan aju Lázaro tbʼi, «tzaj taʼw tuj tanmi tuʼn tbʼis» ex «jawtzun oqʼ Jesús» (Juan 11:32-36). Ex yajxitl bʼant jun tiʼ tuʼn Jesús aju mintiʼtoq ximen kyuʼn xjal; ¡jaw anqʼin juntl maj Lázaro tuʼn ex otoq tzikʼ kyaje qʼij tkyimlen Lázaro! (Juan 11:38-44).

Ax tok ojtzqiʼntoq tuʼn Jesús qa nya nim ambʼil kteltoq aju bʼant tuʼn. Aqeju e qʼanit tuʼn, ok tzajeltoq juntl maj kyyabʼ ex qeju otoq che jaw anqʼin tuʼn, ok che kyimeltoq juntl maj. Noqtzun tuʼnj, ax ikx ojtzqiʼntoq tuʼn Jesús qa aju Tkawbʼil Dios ok kbʼantel jlu tuʼn te jumajx. Tuʼntzunju, nya oʼkx ok tqʼoʼn Jesús twiʼ tiʼj tuʼn tbʼant milagro tuʼn: quʼn mas ok tilil tuʼn, tuʼn tpakbʼan «tiʼj tqanil bʼaʼn tiʼj tkawbʼil Dios» (Mateo 9:35). Aʼyeju milagro e bʼant tuʼn noq kubʼ tyekʼun chʼin tiʼjju kbʼantel tuʼn Tkawbʼil Dios toj chʼintl ambʼil. Qqʼoʼnkpe qwiʼ tiʼjju in tzaj ttziyen Tyol Dios tiʼj ambʼil aju.

• Miʼn tzajtl qyabʼ.

  «Kjaqetel kywitz qe moẍ ex kbʼantel kybʼin qeju chkyin kywiʼ, che jawil tʼikpaj qe kox ik tzaʼn masat, ex che jawil schʼin qe men tuʼn tzalajbʼil.» Ax ikx toj ambʼil aju, «mi jun xjal najl tuj tnam ok tmaʼ kyjaʼ: Yabʼ qine, chiwt» (Isaías 33:24; 35:5, 6).

• Miʼn che kyimtl xjal.

  «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx.» (Salmo 37:29.)

  «Te jumajx knajel kamik tuʼn Qman, kʼelel t-suʼn taʼl kywitz kykyaqil.» (Isaías 25:8.)

• Ok che jawil anqʼintl qeju o che kyim.

  «Kykyaqil xjal maquʼn tuj camposant ok kybʼiʼ tqʼajqʼajel nwiʼye, ex che jawitz anqʼin tuj muqbʼil.» (Juan 5:28, 29.)

  «Ok che jawil anqʼin qe kyimni.» (Hechos 24:15.)

• Ktel kyja xjal ex ktel kyaqʼun.

  «Kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz. Ok tjaw tbʼinchaʼn xjal jun ja, mlay bʼant tuʼn tpon junxitl najal tuj, ex ok tkuʼx tawal xjal, mlay bʼant junxitl tuʼn twaʼn tiʼj [...]; qe xjal skʼoʼmaj wuʼne che tzalajel tiʼj taqʼunbʼen kyqʼabʼ.» (Isaías 65:21, 22.)

• Miʼn tzʼoktl qʼoj.

  «Ma weʼ [‹kwebʼil›, TNM] tkyaqil qʼoj tuʼn tuj tkyaqil twitz txʼotxʼ.» (Salmo 46:9.)

  «Mlayx tzaj kytzyuʼn qe tnam juntl maj kyspad tuʼn kyqʼojin kyiʼj mastl tnam, ex mlayx kykʼam juntl maj xnaqʼtzbʼil tuʼn tbʼant kyqʼojin.» (Isaías 2:4.)

• Ok ktel nim wabʼj.

  «Ma tzaj [‹ktzajel›, TNM] tqʼoʼn txʼotxʼ twitz awal ex ma qo kyʼiwlanjtz tuʼn Qdios.» (Salmo 67:6.)

  «Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz txʼotxʼ.» (Salmo 72:16)

• Miʼn tentl mebʼayil, moqa prowil.

  «Mya te jumajx kʼikʼel kynaʼnjtz qe xjal mebʼa, ex mya te jumajx miʼn japun aju onbʼil in che ayon tiʼj.» (Salmo 9:18.)

  «A kkolol kyiʼj qe mebʼa in che kubʼsan twitz ex kyiʼj qeju in che yajlanjtz ex mintiʼ jun onil kye. Ktzajel tzʼeʼy tkʼuʼj kyiʼj qe xjal mans, ex che kletel qe xjal mebʼa tuʼn.» (Salmo 72:12, 13.)

Aj tok qqʼoʼn qwiʼ tiʼjju kbʼantel tuʼn Tkawbʼil Dios, in nel qnikʼ tiʼj tiquʼn nimxixtoq toklen toj twitz Jesús. Tej tten tzalu twitz Txʼotxʼ ok tilil tuʼn, tuʼn t-xi tqʼamaʼn tqanil tiʼj Tkawbʼil Dios te alkyexku tajtoq tuʼn tok tbʼiʼn, tuʼnju bʼintoq tuʼn qa ok tzul tiʼn Kawbʼil lu tkyaqil kʼiwlabʼil ex qa ok kʼelel tiʼn tkyaqil nya bʼaʼn in tzaj kyiʼj xjal toj ambʼil jaʼlo.

¿Tzeʼn in nela toj twitza aju kbʼantel tuʼn Tkawbʼil Dios? ¿Tajbʼil teya tuʼn ttena tjaqʼ Kawbʼil lu? Qa ikju, ¿tzeʼn jaku tzʼel mastl tnikʼa tiʼj Kawbʼil lu? ¿Ex tzeʼn jaku tzʼok qʼuqeʼ tkʼuʼja qa jaku tzaj tkʼamoʼna qe kʼiwlabʼil lu? Aju juntl xnaqʼtzbʼil tzul, ok tzul ttzaqʼweʼn qe xjelbʼitz lu.