Kubʼ ttzʼibʼen David jlu: «Bʼajx wile jun xinaq bʼaʼn otoq kyaj kolin, ex bʼajx wile in che moʼn qe tkʼwaʼl [moqa ‹in che jyon tkʼwaʼl kywa›, TNM]». Tqʼama David jlu tuʼnju yolin David tiʼjxju otoq tzikʼ tiʼj. Otoq tzʼok tqʼoʼn twitz tiʼj qa kukx otoq tzʼok xqʼuqin tuʼn Dios (Sal. 37:25). Noqtzun tuʼnj, aju tyol David mintiʼ in tzaj tyekʼun qa nijun maj tzaj weʼyaj kyiʼj tmajen Dios ex qa mlay tzaj.

Axpe ikx te David at maj tzaj nim nya bʼaʼn tiʼj. Ik tzeʼn ambʼil tej tel oq twitz Saúl. At maj mintiʼtoq twa ex xi tqanin twa ex kywa qeju e ten tukʼil (1 Sam. 21:1-6). Toj ambʼil aju, «jyon» David tiʼj twa. Ax ikx ikʼ junjun nya bʼaʼn tiʼj, noqtzun tuʼnj, ojtzqiʼntoq tuʼn qa melaytoq kyaj tzaqpiʼn tuʼn Jehová. Ex mlay kanet jun taqikʼ Tyol Dios quʼn jatumel in tqʼamaʼn qa ok ten David moʼl twa tuʼn tkyaj anqʼin.

Atzun toj Mateo 6:33 in tzaj tqʼamaʼn Jesús qa ok tzul tqʼoʼn Dios aju at tajbʼen kye tmajen aʼyeju in kubʼ kyqʼoʼn Tkawbʼil Dios tnejel toj kyanqʼibʼil. Tqʼama Jesús jlu: «Kynimanxe tnejelxix aju tkawbʼil Dios ex tuʼn kybʼinchanteye aju tzʼaqlxix twitz; tkyaqiltzun jlu [aju wabʼj, aju kʼabʼj ex aju xbʼalun] ktzajel qʼoʼn kyeye». Noqtzun tuʼnj, ax ikx tqʼama Jesús qa at junjun kyxol terman, ok kikʼex weʼyaj kyuʼn (Mat. 25:35, 37, 40). Ik bʼajju tiʼj apóstol Pablo. At maj ikʼx weʼyaj ex kʼaj, moqa kʼwaj, tuʼn (2 Cor. 11:27).

In tzaj tqʼamaʼn Jehová qa at junjun nya bʼaʼn tzul qiʼj. At maj in tzaj tqʼoʼn ambʼil tuʼn ttzaj nya bʼaʼn qiʼj tuʼn t-xi tzaqʼwet aju nya ax tok in tqʼamaʼn Satanás (Job 2:3-5). Jun techel, at junjun qerman e ok obligarin tuʼn kyaqʼunan kyuʼn xjal te Nazi (toj ambʼil tej kyokx qʼoʼn xjal toj carcel tjaqʼ tkawbʼil Hitler) ex e ten toj nya bʼaʼn tuʼnju i el ikʼen. Nya nim kywa qerman xi kyqʼoʼn aj qʼoj tuʼnju ok tilil kyuʼn tuʼn miʼn kyoktl qerman te testigos de Jehová, ik tzeʼn tajbʼil Tajaw il. Aqeju kukx e ajbʼen te Jehová, mintiʼ e kyaj tzaqpiʼn tuʼn Jehová. Tzaj tqʼoʼn Jehová ambʼil tuʼn tikʼx nya bʼaʼn lu kyuʼn tmajen, ax ikx in tzaj tqʼoʼn ambʼil tuʼn tikʼx junjuntl nya bʼaʼn kyuʼn kykyaqil okslal. Noqtzun tuʼnj, a jlu mintiʼ in tzaj tyekʼun qa mintiʼ in che tzaj tonin Jehová qeju in nikʼx kyuʼn tuʼnju in jaw kynimsaʼn tbʼi (1 Cor. 10:13). Jaku tzaj qnaʼn qeju yol ateʼkux toj Filipenses 1:29: «Ma tzaj qʼoʼn jun kyoklene mya noq oʼkx tuʼn kyokslane tiʼj Crist, ax ikx tuʼn tikʼx kyuʼne tuʼn tlaj».

O tzaj ttziyen Jehová qa ok ktel kyukʼe tmajen. Ik tzeʼn in tzaj tqʼamaʼn Isaías 54:17: «Mi jun xjal jaku bʼant jun ubʼl tuʼn tuʼn tnaja tuʼn». Ik tzeʼn taqikʼ Tyol Dios lu ex qe junjuntl taqikʼ Tyol Dios in tzaj ttziyen qa in kolin Jehová tiʼj ttnam, noqtzun tuʼnj, at maj in tzaj tqʼoʼn Jehová ambʼil tuʼn tikʼx junjun nya bʼaʼn kyuʼn junjun tmajen, axpe ikx jaku tzaj tqʼoʼn ambʼil tuʼn kykyim.