1. ¿Tiʼ in tnaʼn Jehová tiʼj aqʼuntl, ex alkye ambʼil o txi tqʼoʼn kye anjel ex kye xjal?

 TGAN te Jehová tuʼn taqʼunan (Sal. 135:6; Juan 5:17). Ex o tzaj tqʼoʼn ambʼil kye anjel ex kye xjal tuʼn kytzalaj ax ikx tiʼj kyaqʼun. Jun techel tiʼj jlu aju tej t-xi tqʼoʼn ambʼil te tnejel Tkʼwaʼl tuʼn taqʼunan tukʼil toj kyaʼj tuʼn tbʼinchet junjuntl tiʼchaq (kjawil uʼjit Colosenses 1:15, 16). In tzaj tqʼamaʼn Tyol Dios qa tej attoq Jesús toj kyaʼj, ten ttxlaj Ttat «tuʼn tkubʼ ximet alkye tuʼn tbʼant», toj juntl yol, ok Jesús te jun tbʼanel aqʼunal ttxlaj Ttat (Prov. 8:30).

2. ¿Tiquʼn jaku txi qʼamet qa kukx o tzaj tqʼoʼn Jehová jun tbʼanel aqʼuntl kye anjel?

² Toj tkyaqil Tyol Dios tkuʼx nim techel aju in tzaj tyekʼun qa kukx o txi tqʼoʼn Jehová oklenj kye t-anjel tuʼn kyaqʼunan. Ik tzeʼn tej tkubʼ kybʼinchaʼn Adán ex Eva il ex tej kyetz lajoʼn toj Tbʼanel Najbʼil «e kubʼ tqʼoʼn» Qman Jehová «querubín ttxlaj awal tuj tjawitz qʼij, tukʼix jun spad in kʼanttoq ex in yukchtoq tuj tkyaqil pakʼ, tuʼntzun miʼn kyokx xjal tiʼj ju tzeʼ in tqʼoʼn chwinqlal» (Gén. 3:24). Ex in tzaj tqʼamaʼn Apocalipsis 22:6 qa «tzaj t-samaʼn [Qman Dios] t-anjel tuʼn ttzaj tyekʼun kye tmajen tkyaqilju chʼix tul».

3. ¿Alkye tten el tkanoʼn Jesús techel tiʼj Ttat tej tten tzalu twitz Txʼotxʼ?

³ Tej tten Jesús twitz Txʼotxʼ, o tzalaj tuʼn tkubʼ tbʼinchaʼn aqʼuntl xi tqʼoʼn Jehová te. Ok lepeʼ tiʼj techel otoq tzaj tqʼoʼn Tman te tej t-xi tqʼoʼn kyoklen t-xnaqʼtzbʼen tuʼn tbʼant aqʼuntl kyuʼn aju nim toklen. O tzalaj tiʼjju jakutoq bʼant kyuʼn, ex xi tqʼamaʼn jlu kye: «Ax tok kxel nmaʼne kyeye, alkye ma tzʼokslan wiʼje, ax aqʼuntl ok tbʼinchaʼ ik tzaʼn in nbʼinchaʼne; ex mas nim aqʼuntl ok tbʼinchaʼ kywitz qe jlu, porque aqine ma chinxe tukʼil Nmane» (Juan 14:12). Ok tilil tuʼn Jesús tuʼn tbʼinchet aqʼuntl lu, quʼn tqʼama jlu: «Il tiʼj tuʼn nbʼinchanteye taqʼun ju tzaj samante weye akux atx qʼij; tzul qonikʼan mi jun xjal jaku bʼant tuʼn taqʼnantl» (Juan 9:4).

4-6. a) ¿Tiquʼn in qo tzalaj tuʼnju bʼant aqʼuntl tuʼn Noé ex Moisés? b) ¿Tiʼ in bʼant tuʼn alkyexku aqʼuntl in tzaj tqʼoʼn Dios kye tmajen?

⁴ Atxix tej naʼmxtoq tul Jesús twitz Txʼotxʼ, xi qʼoʼn aqʼuntl kye xjal tuʼn tbʼant kyuʼn. Ax tok aju aqʼuntl xi qʼoʼn te Adán tukʼe Eva mintiʼ bʼant kyuʼn, noqtzun tuʼnj, e ten junjuntl xjal kubʼ kybʼinchaʼn aju xi tqʼamaʼn Dios kye (Gén. 1:28). Ik tzeʼn te Noé xi qʼamaʼn te alkyexixtoq tten tuʼn tbʼant ark tuʼn, tuʼn kykyaj anqʼin tej ttzaj Nim Jbʼal. Kubʼ tbʼinchaʼn Noé ikxix tzeʼnj tzaj tqʼamaʼn Jehová te. Noq tuʼnju ok tilil tuʼn Noé tuʼn t-xi tbʼiʼn aju tzaj qʼamaʼn te, kukx in qo anqʼin toj ambʼil jaʼlo (Gén. 6:14-16, 22; 2 Ped. 2:5).

⁵ Ax ikx te Moisés xi qʼamaʼn te alkyexix tten tuʼn tjaw bʼinchet ja xbʼalun ex alkye tten tuʼn tbʼant kyaqʼun qe pal, ex ok tilil tuʼn Moisés tuʼn tjapun jlu (Éx. 39:32; 40:12-16). Axpe ikx toj ambʼil jaʼlo, aju techel kyaj kyqʼoʼn qeju japun aqʼuntl kyuʼn ikxix tzeʼnj xi qʼamaʼn kye kukx in nonin qiʼj. ¿Alkye tten in nonin qiʼj? Tzaj tchikʼbʼaʼn apóstol Pablo qa at junjun tiʼchaq at toklen tukʼe Ley ok te techel junjun tbʼanel tiʼchaq tzul (Heb. 9:1-5, 9; 10:1).

⁶ Junxichaq aqʼuntl o txi tqʼoʼn Dios kye tmajen noq toj alkye ambʼil o che anqʼin ex noq alkye at toklen tukʼil tajbʼil. Noqtzun tuʼnj, aju aqʼuntl xi qʼoʼn kye ex bʼant kyuʼn o jaw nimsaʼn Jehová tuʼn ex o tzʼonin kyiʼj xjal in che nimen te Jehová. Axlo jlu bʼaj tukʼe aju bʼant tuʼn Jesús tej tten toj kyaʼj ex tej tten twitz Txʼotxʼ (Juan 4:34; 17:4). Ax ikx qe o tzaj qʼoʼn jun aqʼuntl qe toj ambʼil jaʼlo, aju jun aqʼuntl in jaw nimsaʼn Jehová tuʼn (Mat. 5:16; kjawil uʼjit 1 Corintios 15:58). ¿Alkye tten in jaw nimsaʼn Jehová tuʼn aqʼuntl lu?

7, 8. a) ¿Alkyeqe aqʼuntl in bʼant kyuʼn okslal toj ambʼil jaʼlo? b) ¿Alkye bʼaʼn tuʼn tbʼant quʼn qa ma tzul jun chʼixpubʼil tuʼn Jehová?

⁷ Axlo teya t-xim ik tzeʼn qeye aj t-xi qqʼamaʼne qa nimxix oklenj o tzaj tqʼoʼn Jehová kye xjal tuʼnju in che jaw tjyoʼn tuʼn kyaqʼunan tukʼil maske aj il qe (1 Cor. 3:9). Aqeju in che aqʼunan tuʼn kyjaw qe Ja te Nimaq Chmabʼil, qe Ja te Chmabʼil ex qe ninja qʼil twitz aqʼuntl in bʼant jun aqʼuntl kyuʼn aju qʼanchaʼl, ik tzeʼn bʼant tuʼn Noé ex Moisés. Qa at teya toklen o tzaj qʼoʼn tuʼn tbʼaj bʼinchet chʼintl Ja te Chmabʼil atz jatumel in nok tchmon tibʼa, moqa o tzaj qʼoʼn toklena tuʼn taqʼunana tiʼj jun ja kyxol qeju in che jaw bʼinchet tiʼj kytxuylal ninja qʼil twitz aqʼuntl toj Warwick, Nueva York, kʼujlaʼnka toklena tuʼn taqʼunana tiʼj jlu (Qʼoʼnka twitza tiʼj tnejel tilbʼilal). Xjan qeju aqʼuntl lu. Noqtzun tuʼnj, chʼixmi kykyaqil okslal in che tzaj txkoʼn tuʼn kyaqʼunan tiʼj juntl aqʼuntl aju mintiʼ qʼanchaʼl. Ax ikx in najbʼen tuʼn tjaw nimset Jehová ex tuʼn tonin kyiʼj xjal in che ajbʼen te Jehová (Hech. 13:47-49). In tzaj tqʼamaʼn ttnam Dios alkyexix tumel tuʼn tbʼant aqʼuntl lu. Ex at maj tuʼn tbʼant aqʼuntl lu in chʼexpaj kyoklen junjun.

⁸ Aqeju ax tok kʼujlaʼn Jehová kyuʼn in kubʼ kybʼinchaʼn tukʼe tzalajbʼil aju in tzaj tqʼamaʼn Dios kye (kjawil uʼjit Hebreos 13:7, 17). Atlo maj mintiʼxix in nel qnikʼ tiquʼn in kubʼ chʼixpuʼn jun qoklen. Noqtzun tuʼnj, ilxix tiʼj tuʼn qximen tiʼj tkyaqil tbʼanel tzul qa ma qo onin tiʼj Jehová tiʼj alkyexku chʼixpubʼil kbʼantel tuʼn.

9. ¿Alkye techel in kubʼ kyqʼoʼn ansyan qwitz tiʼj alkye tten tuʼn tbʼant aqʼuntl toj Ja te Chmabʼil?

 ⁹ Aju techel in kubʼ kyqʼoʼn ansyan toj ttnam Jehová, in tzaj tyekʼun qa kyajxix tuʼn tbʼant tajbʼil Jehová kyuʼn (2 Cor. 1:24; 1 Tes. 5:12, 13). In kubʼ kyyekʼun qa kyajbʼil tuʼn kyaqʼunan wen ex kukx in bʼant kyuʼn maske in chʼexpaj junjun tiʼchaq in nikʼ kyiʼj. Axpe ikx qa in nul jun chʼixpubʼil tiʼj alkye tten tuʼn qpakbʼan tiʼj Tkawbʼil Dios, in nok tilil kyuʼn tuʼn tkubʼ kybʼinchaʼn ik tzeʼn in tzaj qʼamaʼn. Axpe ikx at junjun erman e tzaj xobʼ tuʼn kypakbʼan toj yolbʼil, ttzi mar ex jatumel ateʼ nim xjal o tzʼok kyqʼoʼn naj kywitz tiʼj junjun tbʼanel tiʼ o tzikʼ tuʼnju in bʼant jlu kyuʼn. Ik tzeʼn qe kyaje precursor toj tnam te Alemania i eʼx pakbʼal atz jatumel at nim kʼaẍjel ex atz jatumel mintiʼtltoq in kubʼ pakbʼet. Jun kyxol qe jlu aju Michael tbʼi tqʼama jlu: «Otoq tzikʼ nim abʼqʼi naʼmxtoq tbʼant jlu quʼne, tuʼntzunju, tzaj luʼlin qanmiye tuʼn jlu. Okle tqʼoʼn twitz Jehová tiʼj jlu, quʼn tbʼanel exa qqʼije toj pakbʼabʼil. ¡Nimxix o qo tzalaje tuʼnju kubʼ qbʼinchaʼne ik tzeʼn tzaj tqʼamaʼn uʼj Aju Taqʼun Dios in Bʼant Quʼn ex tuʼnju ok qeʼ qkʼuʼje tiʼj onbʼil tzaj tqʼoʼn Jehová!». ¿In nokpe tilil tuʼna tuʼn tpakbʼana tiʼj junjuntl tten pakbʼabʼil in bʼant atz jatumel najliya?

10. ¿Alkye chʼixpubʼil in bʼant toj ttnam Dios kyoj qe abʼqʼi tzma in che ikʼ?

¹⁰ Toj ambʼil jaʼlo o bʼant junjun chʼixpubʼil tuʼn ttnam Dios. Kyoj qeju abʼqʼi tzma in che ikʼ, at nim ninja qʼil twitz aqʼuntl in che ok mojbʼet kyukʼe txqantl. Tuʼnju in bʼant qe chʼixpubʼil lu, ax ikx il tiʼj tuʼn tchʼixpet kyoklen junjun ermano ex junjun ermana, aqeju in che ajbʼen kyoj qe jlu. Noqtzun tuʼnj, toj chʼin ambʼil o tzʼel kynikʼ qa tbʼanel aju chʼixpubʼil bʼant (Ecl. 7:8). ¡Nimxix tzalajbʼil in xi tqʼoʼn jlu kye qeju tbʼanel aqʼunal in che aqʼunan toj ttnam Jehová!

11-13. Tuʼnju chʼixpubʼil o bʼant tuʼn ttnam Dios, ¿alkye junjun chʼixpubʼil o che ok weʼ junjun erman twitz?

¹¹ Jaku tzʼel qkanoʼn techel in kubʼ kyqʼoʼn qe erman qwitz aqeju in che ajbʼen kyoj ninja qʼil twitz aqʼuntl. At junjun ma tzikʼ nim abʼqʼi in che ajbʼen toj tkyaqil ambʼil kyoj Ja te Betel. At jun mejebʼleʼn e ajbʼen toj jun tal Betel atz Centro América xi qʼamaʼn kye tuʼn kyxiʼ ajbʼel toj juntl Betel aju mas matij ex aju at toj México. Tqʼama Rogelio, aju chmilbʼaj: «Kwest ela toj qwitze tej tkyaj qtzaqpiʼne qe toj qjaye ex qe qamiwoye». Ax ikx at juntl erman, aju Juan tbʼi, xi qʼamaʼn te tuʼn txiʼ ajbʼel atz México ex tqʼama jlu: «Chʼixmi ik tten jlu ik tzeʼn aj qul itzʼ juntl maj, in qnaʼn qa in che tzaj chʼiy juntl maj qbʼaqil. Ilxix tiʼj tuʼn tkubʼ qchʼixpuʼn junjun tten qanqʼibʼil ex junjun tten qximbʼetz».

¹² Ax ikx at junjuntl erman e ajbʼen toj Betel kyoj junjun tnam te Europa xi qʼamaʼn kye tuʼn kyxiʼ ajbʼel toj ninja qʼil twitz aqʼuntl te Alemania, ax ikx e ok weʼ twitz junjun chʼixpubʼil. Noq alkyexku jun xjal tgan tuʼn tok tqʼoʼn twitz kyiʼj junjun tbʼanel witz jaku tzʼel tnikʼ tiʼjju kynaʼ erman te tnam Suiza tej tkyaj kytzaqpiʼn junjun tbʼanel witz aju tok tbʼi Alpes. Ax ikx aju kynaʼ qe erman kyaj kyqʼoʼn tbʼanel kyanqʼibʼil toj tnam te Austria.

¹³ Tuʼnju il tiʼj tuʼn kyxiʼ kyoj junjuntl tnam, il tiʼj tuʼn kynaqʼet tiʼj junjuntl tten kyanqʼibʼil, tuʼn kyaqʼunan kyukʼe junjuntl ermano ex ermana aʼyeju mintiʼ ojtzqiʼn qe kyuʼn, ex at maj il tiʼj tuʼn tbʼant juntl tten aqʼuntl kyuʼn. Ax ikx il tiʼj tuʼn kyxiʼ toj juntl Ja te Chmabʼil ex il tiʼj tuʼn kyxiʼ pakbʼal kyoj junjuntl lugar, ex at maj il tiʼj tuʼn tbʼant juntl yol kyuʼn. Ex kwest tuʼn tbʼant junjun chʼixpubʼil ik tzeʼn qe jlu. Noqtzun tuʼnj, nim qe erman in che ajbʼen toj Betel o che bʼant qe chʼixpubʼil lu kyuʼn. ¿Tiquʼn o bʼant jlu kyuʼn?

14, 15. a) ¿Alkye tten o kubʼ kyyekʼun nimku tmajen Jehová qa kʼujlaʼn kyoklen kyuʼn aju tuʼn kyaqʼunan tukʼe Jehová jaxku tumel? b) ¿Tiquʼn in che ok qe erman lu te jun tbʼanel techel qwitz qkyaqilx?

¹⁴ At jun ermana Grethel tbʼi tqʼama jlu: «In chinxe atz jatumel in chin tzaj txkoʼne tuʼnju in kubʼ nximane qa a jun tten jlu tuʼn t-xi nyekʼune te Jehová qa mas nim toklen nkʼujlabʼile tiʼj toj nwitze twitzju jun tnam, jun ja moqa jun oklenj aju mintiʼ in  chʼexpaj». Ax ikx juntl ermana Dayska tbʼi tqʼama jlu: «Aj ttzaj nnaʼne qa atz in tzaj txokbʼil tukʼe Jehová, in xi nkʼamoʼne txokbʼil tukʼe tzalajbʼil». Ax ikx te ermano André ex Gabriela kyqʼama jlu: «Aju ambʼil in tzaj qʼoʼn qeye in qo tzaj tonine tuʼn qajbʼenxixe te Jehová ex tuʼn miʼn tkubʼ qqʼoʼne aju qajbʼile tnejel. In xi qqʼamaʼne jlu qexe: ‹Qa in qo ok weʼ twitz junjun chʼixpubʼil tukʼil Jehová, mas bʼaʼn tuʼn t-xi qbʼiʼn twitzju qa ma qo ok ten qʼojil›».

¹⁵ Tuʼnju in che ok mojbʼet junjun ninja qʼil twitz aqʼuntl, at junjun erman, aqeju in che ajbʼen toj Betel, in chex samaʼn tuʼn kyxiʼ ajbʼel te precursor. Ik bʼajju kyiʼj nimku erman tej tok mojbʼet ninja qʼil twitz aqʼuntl toj Dinamarca, Noruega ex te Suecia tukʼe ninja qʼil twitz aqʼuntl te Escandinavia. Tqʼama Florian tukʼe Katherine, aju jun ermano tukʼe jun ermana, jlu: «Tbʼanelxix in nela toj qwitze aj ttzaj qʼoʼn juntl qoklene. Nimxix in qo tzalaje tuʼnju in qo ajbʼene tuʼn Jehová jaxku tumel. ¡Ax tok quʼne aj t-xi qqʼamaʼne qa o tzaj qkʼamoʼne nim kʼiwlabʼil!». Ax tok chʼixmilo qkyaqilx nyalo il tiʼj tuʼn tbʼant junjun chʼixpubʼil quʼn ik tzeʼn in bʼant kyuʼn erman lu, noqtzun tuʼnj, jaku tzʼel qkanoʼn techel in kubʼ kyqʼoʼn aj tkubʼ kyqʼoʼn tnejel toj kyanqʼibʼil aju at toklen tukʼe Tkawbʼil Dios (Is. 6:8). Ax tok in che tzaj tkʼiwlaʼn Jehová qeju in nok kykʼujlaʼn kyoklen tuʼn kyaqʼunan tukʼil, jaxku tumel ateʼ.

16. a) ¿Tiʼ in tzaj tqʼamaʼn Gálatas 6:4 qe? b) ¿Alkye jun oklenj mas tbʼanel o tzaj qʼoʼn qe?

¹⁶ Tuʼnju aj il xjal qoʼ qgan tuʼn tkubʼ qximen qa mas tbʼanel aju in bʼant quʼn moqa mas chʼin in bʼant quʼn kywitz txqantl. Noqtzun tuʼnj, in tzaj tqʼamaʼn Tyol Dios qa teyele junjun qe bʼaʼn tuʼn tok qqʼoʼn qwiʼ tiʼjju jaku bʼant quʼn (kjawil uʼjit Gálatas 6:4). Chʼixmi qkyaqilx mintiʼ jun matij qoklen toj ttnam Dios. Ex nya qkyaqilx jaku qo ok te precursor, tuʼn qxi samaʼn pakbʼal kyoj txqantl tnam moqa tuʼn qxiʼ ajbʼel toj Betel. ¡Tbʼanel qe oklenj lu! Noqtzun tuʼnj, qkyaqilx mintiʼ tuʼn tikʼ tnaʼl quʼn qa at jun tbʼanel qoklen o tzaj tqʼoʼn Jehová aju nya kykyaqilx xjal jaku tzaj qʼoʼn kye, aju tuʼn qaqʼunan tukʼe Jehová toj  pakbʼabʼil. Atzun jun qoklen jlu aju jaku tzʼok qkʼujlaʼn.

17. ¿Tiʼ mintiʼ in bʼant quʼn tuʼnju kukx atx tkawbʼil Satanás twitz Txʼotxʼ, noqtzun tuʼnj, tiquʼn mintiʼ tuʼn ttzaj qbʼis tuʼn?

¹⁷ Tuʼnju atx tkawbʼil Satanás twitz Txʼotxʼ, kwest jaku tzʼela qe tuʼn qajbʼen te Jehová toj tkyaqil ambʼil. Atlo maj mlay bʼant jlu quʼn tuʼnju il tiʼj tuʼn kyok qwentin toj qja, tuʼnju yabʼ qoʼ moqa tuʼn junjuntl tiʼchaq. Noqtzun tuʼnj, miʼn txi qqʼoʼn ambʼil te jlu tuʼn ttzaj qbʼis tuʼn. Kukx qnaʼntz qa o tzaj tqʼoʼn Dios jun tbʼanel qoklen aju tuʼn qaqʼunan tukʼil. Tuʼn tbʼant jlu, jaku kubʼ qyekʼun junjun tbʼanel qmod aju in nonin tuʼn tjaw nimset tbʼi ex jaku tzʼok tilil quʼn toj tkyaqil ambʼil ex jaxku tumel tuʼn tel kynikʼ xjal tiʼj Tkawbʼil. Aju mas nim toklen aju tuʼn qaqʼunan tukʼe Jehová ex tuʼn tok tilil quʼn tuʼn t-xi qjyoʼn tumel tuʼn qajbʼen mastl te ex tuʼn t-xi qqanin te tuʼn kytzaj tkʼiwlaʼn qeju erman jaku bʼant tuʼn kyajbʼen toj tkyaqil ambʼil te. Bʼaʼn tuʼn ttzaj qnaʼn qa aju xjal in jaw tnimsaʼn tbʼi Jehová tbʼanelxix in nela toj twitz.

18. ¿Alkye mintiʼ tuʼn tokxix qqʼoʼn qwiʼ tiʼj, ex tiquʼn?

¹⁸ Aj il xjal qoʼ ex in kubʼ qbʼinchaʼn junjun nya bʼaʼn, noqtzun tuʼnj, in tzalaj Jehová tuʼn qok tqʼoʼn te aqʼunal tukʼil. Tuʼntzunju, ¡qkʼujlam aju qoklen tuʼn qaqʼunan tukʼil Qdios Jehová kyoj qeju bʼajsbʼil qʼij jaʼlo! Ex bʼaʼn tuʼn miʼn tok qqʼoʼnxix qwiʼ tiʼj junjun tiʼchaq nyaxix nim toklen at twitz txʼotxʼ, tuʼnju chʼix tpon ambʼil tuʼn tul akʼaj twitz Txʼotxʼ ex tuʼn qtzaj tkʼiwlaʼn Jehová tukʼe «chwinqlal axix tok», atz jatumel qo anqʼil te jumajx ex qo tzalajel toj mujbʼabʼil (1 Tim. 6:18, 19).

19. ¿Tiʼ tzul tqʼoʼn Jehová qe toj ambʼil tzul?

¹⁹ Tuʼnju chʼixtl qokx toj Tbʼanel Najbʼil, qo ximen tiʼjju xi tqʼamaʼn Moisés kye aj Israel tej chʼixtoq kyokx toj Txʼotxʼ aju otoq txi Tziyen kye: «Che bʼeltzun kyʼiwlaʼne tuʼn Qman Dios tiʼj tkyaqilju kbʼantel kyuʼne» (Deut. 30:9). Aj tikʼ Armagedón, kykyaqil qeju otoq tzʼok tilil kyuʼn tuʼn kyaqʼunan wen tukʼil Dios, ok kxel qʼoʼn Txʼotxʼ kye aju otoq txi tziyen kye. Ex toj ambʼil aju, qkyaqilx atz kʼokel qqʼoʼn qwiʼ tiʼj juntl aqʼuntl tzul qʼoʼn qe, aju tuʼn tok Txʼotxʼ te Tbʼanel Najbʼil.