At nim millón xjal twitz tkyaqil Txʼotxʼ in kyqʼamaʼn qa aju Tkawbʼil Dios in nonin kyiʼj tuʼn tten qʼuqbʼil kykʼuʼj toj ambʼil tzul. In nel kykanoʼn techel kyaj tqʼoʼn Jesús, aju kyaj tyekʼun kye qeju lepchiqeʼk tiʼj tuʼn t-xi kyqanin jlu toj kynaʼj Dios: «E ttzaj ju tkawbʼila. Bʼant-xwit ju tajbʼila twitz txʼotxʼ» (Mateo 6:10).

In che tzalaj qe nimxix xjal lu tiʼj Tkawbʼil Dios, atzun kye nimxix okslabʼil mintiʼ in nokxix kyqʼoʼn kywiʼ tiʼj Tkawbʼil Dios. Tej tyolin jun xjal in xnaqʼtzan tiʼjju o tzikʼ, aju Herbert George Wells tbʼi, tqʼama qa «nimxix toklen» ela toj twitz Jesús tuʼn «tkubʼ t-xnaqʼtzaʼnxix aju ok tqʼoʼn tbʼi te Kawbʼil te toj Kyaʼj», ex tqʼama qa «mintiʼx [....] in kubʼ kyxnaqʼtzaʼn chʼixmi kykyaqil okslabʼil aju Kawbʼil lu».

Atzun kye testigos de Jehová nya ik kyten ik tzeʼn qe okslabʼil jlu, tuʼnju nimxix in che yolin tiʼj Tkawbʼil Dios. Jun techel, aju kyuʼj in netz tkyaqil xjaw, ik tzeʼn in uʼjina tiʼj jaʼlo, in netz toj 220 yol. In netz chʼixmi 46 millón tajlal toj jun xjaw, aju uʼj lu mas in bʼaj sipen twitz alkyexku juntl uʼj twitz tkyaqil Txʼotxʼ. ¿Alkyexix tqanil in netz toj uʼj lu? Axju tbʼi uʼj lu in tzaj tzaqʼwente: Aju Xqʼuqil Qʼol tqanil tiʼj Tkawbʼil Jehová.  *

¿Tiquʼn in nokxix tilil kyuʼn testigos de Jehová tuʼn t-xi kyqʼoʼn tqanil tiʼj Tkawbʼil Dios? Tnejel, tuʼnju o tzʼel kynikʼ tiʼj qa aju uʼj mas nim toklen twitz tkyaqil Txʼotxʼ, aju Tuʼjil Tyol Dios, mas in yolin tiʼj Tkawbʼil Dios. Nya oʼkxju, ax ikx qʼuqli kykʼuʼj qa oʼkx Tkawbʼil Dios jaku tzʼel tiʼn nya bʼaʼn in che ok weʼ xjal twitz toj ambʼil jaʼlo.

Tuʼn t-xi pakbʼet Tkawbʼil Dios lu, in nok tilil kyuʼn testigos de Jehová tuʼn kyok lepeʼ tiʼj techel kyaj tqʼoʼn Jesús. Tej tten Jesús twitz Txʼotxʼ, kubʼ tqʼoʼn tnejel toj tanqʼibʼil ex toj tpakbʼabʼil aju Tkawbʼil Dios (Lucas 4:43). ¿Tiquʼn nimtoq toklen Tkawbʼil Dios toj twitz Jesús? ¿Ex tiquʼn nim toklen jaku tzʼela toj twitza? In qo txokene tiʼja tuʼn tel tnikʼa tiʼj tzaqʼwebʼil tkuʼx toj Tyol Dios, aju tzul qʼamaʼn kyoj xnaqʼtzbʼil che ul.