Nya kwest tuʼn t-xi qʼamet qa aju bʼibʼaj Satanás in kanet quʼn aj tkuʼx qẍchʼiʼn toj Tyol Dios noq in nok te techel nya bʼaʼn. Noqtzun tuʼnj, ¿ape jlu in tzaj t-xnaqʼtzaʼn Tyol Dios? Qa ik ttenju, ¿tiquʼn in tzaj tqʼamaʼn Tyol Dios qa yolin Satanás tukʼil Jesucristo ex tukʼe Dios aju nimxix tipumal? Qo xnaqʼtzan tiʼj kabʼe yekʼbʼil.

Tej ttzaj tzyet tuʼn tpakbʼan Jesús, kubʼ tqʼoʼn Tajaw il oxe tiʼ twitz Jesús tuʼn tkubʼ tbʼinchaʼn nya bʼaʼn. Tnejel, xi tqʼamaʼn te Jesús tuʼn tajbʼen ipumalj tuʼn, aju otoq txi tqʼoʼn Dios te, tuʼn twaʼn Jesús. Tkabʼ, xi tqʼamaʼn te Jesús tuʼn tok tbʼinchaʼn nya bʼaʼn tiʼjx tchwinqlal, tuʼntzun tjaw tnimsan tibʼ. Ex toxin, xi tqʼamaʼn te Jesús qa ok kxel tqʼoʼn toklen tuʼn tkawin kyibʼaj kykyaqil kawbʼil twitz Txʼotxʼ qa ma kʼulin chʼin, moqa ma nimen chin twitz. El tikʼun Jesús qeju oxe nya bʼaʼn lu, ex xi tqʼamaʼn jun taqikʼ Tyol Dios tiʼj teyele junjun nya bʼaʼn lu tuʼn ttzaqʼwet tuʼn (Mateo 4:1-11; Lucas 4:1-13).

¿Al qukʼil yolin Jesús? ¿Axpe jun nya bʼaʼn t-xim Jesús yolin tukʼil? In tzaj tqʼamaʼn Tyol Dios jlu: «Tuj tkyaqil ok jlu tuj joybʼil tiʼj ik tzaʼn qe, pero mintiʼ bʼinchan il»  (Hebreos 4:15). Ax ikx in tzaj tqʼamaʼn Tyol Dios jlu: «Mintiʼ jun il o tbʼincha Crist, ex mintiʼ o tma jun yol te sbʼubʼl» (1 Pedro 2:22). Kukx ten Jesús te tzʼaqli, ex kukx ajbʼen te Jehová. Mintiʼx jun nya bʼaʼn ximbʼetz ul toj twiʼ. Mintiʼ yolin Jesús tukʼex t-ximbʼetz, quʼn atz yolin tukʼe jun xjal, aju mintiʼ qʼanchaʼl t-xmilal.

Nya oʼkx jlu in tzaj tyekʼun qe qa ax tok at Satanás.

• Qa ma tzaj qnaʼn, xi tqʼamaʼn Satanás te Jesús qa kxeltoq tqʼoʼn toklen tuʼn tkawin tibʼaj tkyaqil Txʼotxʼ qa ma kʼulin chʼin twitz, moqa ma nimen chʼin te (Mateo 4: 8, 9). Mlay tzʼel qnikʼ tiʼj taqikʼ Tyol Dios lu noqwit ax tok mintiʼ Satanás. Nya oʼkxju, axpe ikx, mintiʼ te Jesús jun tyol tzaj tqʼamaʼn tiʼj qa mintiʼ tipumal Satanás.

• Tej tel tikʼun Jesús qeju nya bʼaʼn kubʼ tqʼoʼn Satanás twitz, «el tiʼn» Satanás «tgan tiʼj noq te kabʼ qʼij» (Lucas 4:13). ¿Tzeʼn in nela taqikʼ Tyol Dios lu toj twitza? ¿Noqpe jun ximbʼetz aju Satanás, moqa jun nya bʼaʼn aj qʼoj aju kukx in nok tilil tuʼn, tuʼn kykubʼ tzʼaq xjal?

• Qa ma tzʼok qqʼoʼn qwiʼ tiʼj, in tzaj qʼamaʼn qa «e ul qe anjel tukʼil Jesús tuʼn kyajbʼen te» (Mateo 4:11). ¿Axpe tok qe anjel lu, aʼyeju e ul qʼuqbʼal tkʼuʼj Jesús ex e ul onilte? Ax tok. Qa ikju, ax ikx ax tok at Satanás.

Juntl yekʼbʼil tiʼj qa at Satanás, aju ikʼ tiʼj Job, aju jun xjal ajbʼen te Dios tuʼn tkyaqil tkʼuʼj. In yolin Tyol Dios tiʼj aju kabʼe maj yolin Tajaw il tukʼe Dios. Kyoj qeju kabʼe maj lu jaw nimsaʼn Job tuʼn Jehová tuʼnju in najbʼentoq te tuʼn tkyaqil tkʼuʼj. Tzaj tqʼamaʼn Satanás qa in najbʼen Job te Dios oʼkx tuʼnju in tzajtoq tqʼoʼn Dios te. Tukʼe jlu tqʼama qa in tzaj tchjoʼn Jehová te Job tuʼnju in najbʼen te. Ikju, toj juntl yol, tqʼama Satanás qa mas ojtzqiʼntoq Job tuʼn twitztl te Dios. Xi tqʼoʼn Jehová ambʼil te Satanás tuʼn tel telqʼaʼn tqʼinumabʼil Job, tuʼn kykubʼ tbʼiyoʼn qe tkʼwaʼl, axpe ikx tuʼn ttzaj tyabʼ Job tuʼn. * Tej tbʼet ambʼil, el nikʼ tiʼj qa ax tok tyol Jehová tiʼj Job, ex el nikʼ tiʼj qa nya ax tok tyol Satanás. Tzaj tkʼiwlaʼn Dios Job tuʼnju kukx ajbʼen te tuʼn tkyaqil tkʼuʼj (Job 1:6-12; 2:1-7).

Kyoj qeju kabʼe maj tej tyolin Dios tukʼe Satanás, ¿yolinpe Jehová tukʼex jun nya bʼaʼn t-xim? Mintiʼ, quʼn in tzaj tqʼamaʼn Tyol Dios jlu: «Aju bʼe te Dios tzʼaqlxix te» (2 Samuel 22:31). Ax ikx tzaʼj tqʼamaʼn Tyol Dios jlu: «Xjante, xjante, xjante, Qman Dios aju at tipumal tuʼn tbʼant tkyaqil tuʼn» (Apocalipsis 4:8). Aju yol xjan, in yolin tiʼj jun xjal saq, tbʼanel ex paʼn tten tiʼj il. Tzʼaqli te Jehová ex mintiʼx chʼin nya bʼaʼn tiʼj. Mintiʼx jun nya bʼaʼn t-ximbʼetz moqa tmod.

Noqtzun tuʼnj, atlo junjun jaku kyqʼama qa nya ax tok txʼolbʼabʼil tiʼj Job, qa mintiʼ ten xjal lu ex qa tkyaqil aju kyyol noq aqe xjal in che qʼamante qa ik bʼajju. ¿Axpe tok aju in kyqʼamaʼn junjun? At junjuntl taqikʼ Tyol Dios in tzaj kyqʼamaʼn qa ax tok ten jun tmajen Dios Job tbʼi. Ik tzeʼn in tzaj tyekʼun Santiago 5:7-11, atz jatumel in tzaj tqʼamaʼn qa in nok te jun techel kywitz okslal (nimel) aju jaku tzʼonin kyiʼj tuʼn tikʼx nya bʼaʼn kyuʼn ex in xi tqʼamaʼn kye okslal qa in che tzaj tkʼiwlaʼn Jehová qeju in nikʼx kyuʼn. ¿Jakutzulo tzʼonin techel lu kyiʼj okslal noqwit mintiʼ jun xjal ten aju Job tbʼi aju ok ten Satanás bʼinchal nya bʼaʼn tiʼj? Nya oʼkxju, ax ikx toj Ezequiel 14:14, 20, in tzaj tqʼamaʼn qa ax jun Job at kyxol qeju xjal tzʼaqli qe ik tzeʼn Noé ex Daniel. Ik tzeʼn te Noé ex Daniel ax tok e ten, ax ikx te Job ax tok ten ex ten nim qʼuqbʼil tkʼuʼj. Qa ax tok ten Job, ax ikx ax tok ten aju ok bʼinchante nya bʼaʼn tiʼj.

In tzaj tchikʼbʼaʼn Tyol Dios qa ax tok at Satanás ex qa jun xjal xewbʼaj te. Tuʼntzunju, jakulo ximen teya tiʼj jlu: «¿Jakupe tzʼok tbʼinchaʼn Satanás nya bʼaʼn wiʼje ex kyiʼj qe toj njaye?»

Qape jaku ximana tiʼj qa in nikʼ jlu tiʼja: noq minabʼen ma che pon jun kʼloj nya bʼaʼn xjal toj tnam jatumel najliya. Okle kʼokel tilil tuʼna tuʼn tok t-xqʼuqin tibʼa tuʼnju chebʼe chebʼe che okel qe t-vesina te nya bʼaʼn xjal kyuʼn qe nya bʼaʼn xjal lu. Chʼixmi ax in bʼajju toj ambʼil jaʼlo: noq minabʼen ma kutz xoʼn Satanás kyukʼe t-anjel twitz Txʼotxʼ, aʼyeju ax tok xewbʼaj qe aʼyeju o che ok ik tzeʼn te Satanás ex o tzʼel kypan kyibʼ tiʼj Dios. ¿Tiʼ o tzaj tuʼn jlu? Tuʼn ttzaqʼwet jlu, bʼaʼn tuʼn t-ximana tiʼj junjun tqanil in che etz kyuʼn xjal twitz tkyaqil Txʼotxʼ.

• ¿O tzʼok tqʼoʼn teya twitz tiʼj qa in nok tilil kyuʼn xjal tuʼn tweʼ nya bʼaʼn, noqtzun tuʼnj, kukx tchʼiy nya bʼaʼn ex bʼiybʼil?

• Nya bʼaʼn in nela toj kywitz nim (bʼampo) mambʼaj aju nim kyaqʼun chman tok tiʼj junjun saqchbʼil, noqtzun tuʼnj, kukx tchʼiy lu, ¿o tzʼok tqʼoʼn teya twitz tiʼj?

• ¿O tzʼok tqʼoʼn teya twitz tiʼj nimxix nya bʼaʼn in nok kybʼinchaʼn xjal tiʼjju at twitz Txʼotxʼ maske,  moqa inchq, in nok tilil kyuʼn junjuntl xjal tuʼn tklet Txʼotxʼ?

• ¿O tzʼok tqʼoʼn teya twitz tiʼj jun ipumalj aju in chex tiʼn xjal tuʼn tkubʼ kybʼinchan junjun nya bʼaʼn?

Bʼaʼn tuʼn tok qqʼoʼn qwiʼ tiʼj alkye in bʼinchante tkyaqil nya bʼaʼn lu, in tzaj tqʼamaʼn Tyol Dios jlu: «Etz xoʼn ju nintz jil dragón, aju ojtxi lobʼaj, aju tok tbʼi tajaw il ex Satanás, aju in sbʼun kyiʼj kykyaqil xjal twitz txʼotxʼ; kuʼtz xoʼn twitz txʼotxʼ, ex kyukʼix qe t-anjel e kuʼtz xoʼn tukʼil. [...] Pero bʼekʼbʼil kywitze aqeye najl twitz txʼotxʼ ex tuj mar. Porque ma kuʼpun tajaw il kyxole tukʼil nim tqʼoj, porque bʼaʼn tuʼn mya nim qʼij tuʼn ttentl» (Apocalipsis 12:9, 12). At nim xjal, aʼye o bʼaj kyxnaqʼtzaʼn qe yekʼbʼil tiʼj jlu, o tzʼel kynikʼ qa ax tok at Satanás ex qa ax tok jun xjal xewbʼaj te, aju in nok tilil tuʼn, tuʼn tkubʼ qbʼinchaʼn aju nya bʼaʼn kybʼinchbʼen xjal.

Jakulo ximana tiʼj alkye tten jaku tzʼok t-xqʼuqin tibʼa. Aju juntl xnaqʼtzbʼil in yolin tiʼj jlu ex in tzaj tqʼamaʼn junjun onbʼil aju jaku tzʼonin tiʼja.