TBʼI XNAQʼTZBʼIL TOK TIʼJ T-XKʼOMIL: ¿ATPE SATANÁS?
¿Axpe tok at Satanás?
Jun tilbʼilal anjel at toj tnam Madrid, te España, aju in tzaj tyekʼun tej tkubʼ tbʼinchaʼn Satanás il
«Atz in tzaj chʼiye toj tnam El Salvador. Qa mintiʼtoq in xi nbʼiʼne ntxuʼye in tzajtoq tqʼamaʼn jlu weye: ‹¡Ok tzul Tajaw il qʼil teya!›, ex in xi ntzaqʼweʼne jlu te ntxuʼye: ‹¡Qʼamanxa te tuʼn ttzaj!›. Qʼuqlitoq nkʼuʼje qa at Dios, noqtzun tuʼnj, mintiʼtoq in xi nnimane qa at Satanás.» (CHI ROGELIO)
¿Ik teya t-xim ik tzeʼn te Rogelio tej ttzaj chʼiy? Kyxol qeju xim che ul qʼamaʼn, ¿alkye teya ax tok (bʼaʼn ax) toj twitz?
-
Mintiʼ (tiloʼ) Satanás, noq in kyqʼamaʼn xjal qa at Satanás tuʼn tok kyqʼoʼn te techel nya bʼaʼn.
-
At Satanás, noqtzun tuʼnj, mintiʼ in ximen kyiʼj xjal.
-
Jun nya bʼaʼn anjel te Satanás aju at nimxix tipumal, ex in nok tbʼinchaʼn nim nya bʼaʼn kyiʼj xjal.
Teyele junjun xjal junxitl t-ximbʼetz twitz juntl. Yajtzun teya, ¿tiʼ teya t-xim tiʼj? ¿Alkye ax tok toj twitza kyxol qeju ximbʼetz ma che bʼaj qʼamet? Qo ximen tiʼj jlu: qa ax tok mintiʼ Satanás, aqeju in kubʼ kyximen qa at, o che bʼaj sbʼuʼn. Qatzun ax tok at Satanás, noqtzun tuʼnj, mintiʼ in ximen qiʼj, aqeju in kubʼ kyximen qa kʼokel tbʼinchaʼn nya bʼaʼn kyiʼj, noqx gan in nok kyxqʼuqin kyibʼ ex noqx gan in tzaj bʼaj kykʼuʼj. Noqtzun tuʼnj, qa ax tok in sbʼuʼn Satanás kyiʼj xjal ex in naqʼunan wen tuʼn tok tbʼinchaʼn nya bʼaʼn kyiʼj, mas nya bʼaʼn te tmod twitzju in kubʼ kyximen xjal.
Qqʼoʼnx ambʼil te Tuʼjil Tyol Dios tuʼn ttzaj ttzaqʼweʼn qe xjel lu: ¿Tiʼtzun moqa alkyetzun Satanás? ¿Noqpe in nok qʼoʼn te techel nya bʼaʼn, moqa jun nya bʼaʼn anjel te? Qa ax tok at Satanás, ¿jniʼ nya bʼaʼn jaku tzʼok tbʼinchaʼn tiʼja?
