TBʼI XNAQʼTZBʼIL TOK TIʼJ T-XKʼOMIL: ¿ATPE SATANÁS?
¿Qo tzajeltzulo xobʼ te Satanás?
Mintiʼ qʼanchal aju gas ex jaku tbʼincha nya bʼaʼn qiʼj, ax ikx te Satanás
At jun gas aju kwest tuʼn tel nikʼ tiʼj qa at tuʼnju mintiʼ qʼanchaʼl ex tuʼnju mintiʼ tkʼokʼjal. Nimxix xjal o che kyim tuʼn. Chʼixmilo kykyaqil qeju o che kyim, o che kyim tuʼnju xi kytzqoʼn, ex twitz tkyaqil Txʼotxʼ kukx in che kyim xjal tuʼn: aju gas lu tok tbʼi te monóxido de carbono. Noqtzun tuʼnj, miʼn tzaj bʼaj tkʼuʼja. At tumel tuʼn tel nikʼ tiʼj qa in bʼet gas lu toj kyqʼiqʼ ex at tumel tuʼn tok t-xqʼuqin tibʼa tuʼn miʼn tkyima. Tbʼanel tuʼnju at junjun xjal o kubʼ kyqoʼn junjun kʼuxbʼil aju in tzaj tqʼamaʼn qa in bʼet gas lu toj kyqʼiqʼ ex in xi kybʼiʼn alkyexku tqʼajqʼajel kʼuxbʼil lu aj tjaw qʼajt.
Ik tzeʼn gas lu mintiʼ qʼanchaʼl, ax ikx te Satanás mintiʼ qʼanchaʼl, kwest-xix tuʼn tel kynikʼ xjal tiʼj qa at, ex jaku tzʼok tbʼinchaʼn nimxix nya bʼaʼn kyiʼj xjal. Noqtzun tuʼnj, mintiʼ o qo kyaj tqʼoʼn Dios qjunalx, tuʼnju o kyaj tqʼoʼn onbʼil qe. Mlay qo tzaj xobʼ qa ma che ajbʼen qeju onbʼil quʼn aju o che tzaj tqʼoʼn Dios qe.
O tzaj qʼoʼn ambʼil qe tuʼn tjaw qjyoʼn alkye qajbʼil. In tzaj tqʼamaʼn Santiago 4:7 jlu: «Che weʼxixe twitz tajaw il, ex kʼeleltzun oq kywitze». Ax tok at tipumal Satanás, noqtzun tuʼnj, mlay bʼant tuʼn tok ten obligaril teya tuʼn tok tena bʼinchalte aju nya taja tuʼn tbʼant. A teya kyqʼamalte tiʼ kbʼantel tuʼna. In tzaj tqʼamaʼn 1 Pedro 5:9 jlu: «Che weʼxixe twitz [Tajaw il], kyuw kytene tuj kyokslabʼle». Naʼntza qa kyaj tzaqpiʼn Jesús tuʼn Satanás tej tel tikʼen Jesús tuʼn tkyaqil tkʼuʼj aju oxe joybʼil kubʼ tqʼoʼn twitz (Mateo 4:11). Ax ikx teya aya kbʼajel ximente tuʼn miʼn t-xi tqʼoʼna ambʼil te Satanás tuʼn tkubʼ tzʼaqa tuʼn.
Aju qamiwbʼil tukʼe Dios. In tzaj tqʼamaʼn Santiago 4:8 jlu qe: «Che laqʼexe ttxlaj Dios». Aku Jehová in txoken tiʼj teyele junjun qe tuʼn qok te tamiw. ¿Alkye tten jaku qo ok te tamiw? Aju jun tbʼanel tten aju qa ma tzʼel mastl qnikʼ tiʼj toj Tuʼjil Tyol (Juan 17:3). Qa ma tzʼel mastl tnikʼa tiʼj Jehová ok ktel tkʼujlabʼila tiʼj, ex aju tkʼujlabʼila lu ok kʼonil tiʼja tuʼn tkubʼ tbʼinchaʼna tajbʼil (1 Juan 5:3). Qa ma txi laqʼeʼya ttxlaj Qtat at toj kyaʼj, ¿tiʼ te kbʼantel tuʼn? In tzaj ttzaqʼweʼn uʼj te Santiago jlu: «Ax ikx te ktzajel laqʼeʼ kyukʼile».
In tzaj tqʼoʼn Jehová junjun tbʼanel onbʼil qe tuʼn qok t-xqʼuqin
O tzaj ttziyen Dios kolbʼil qe. In tzaj tqʼamaʼn Tyol Dios jlu: «Ik tten tbʼi Dios, aju Jehová, ik tzeʼn jun ja maʼ twaʼl ex kyuw tten. Ex atzun in pon naj aju xjal tzʼaqlxix ex in tzaj qʼoʼn kolbʼil te» (Proverbios 18:10, TNM). Ax tok a jlu mintiʼ in tzaj tyekʼun qa aju tbʼi Dios jaku tzʼajbʼen te jun techel qswert. Noqtzun tuʼnj, in tzaj tyekʼun qa aʼyeju ax tok in jaw kynimsaʼn tbʼi Dios jaku txi kyqanin kolbʼil te toj alkyexku ambʼil.
Aju techel o kyaj qʼoʼn. In tzaj tyekʼun Hechos 19:19 aju bʼant kyuʼn tnejel okslal te tnam Éfeso aj ttzaj tqʼamaʼn: «Ex nimku xjal bʼaʼn mañ kyuʼn nej, tzaj kyiʼn kylibro, kubʼ kypatun kywitz kykyaqil xjal; ex jaw kyiʼn tajlal twiʼ, japuntzun tajlal twiʼ 50 mil saq pwaq». * Aqeju okslal lu, kubʼ kypatun alkyexku jun tiʼ aju at toklen kyukʼe taqʼunal Tajaw il maske, moqa inchq, nimku twiʼ jlu. Tbʼanel techel jlu kubʼ kyqʼoʼn qwitz toj ambʼil jaʼlo. Twitz tkyaqil Txʼotxʼ, nojni tuʼn kyaqʼun chman aju at kyoklen kyukʼe taqʼunal Tajaw il. Axpe at junjun xnaqʼtzbʼil ex junjun bʼinchbʼen at kyoklen kyukʼe taqʼunal Tajaw il, bʼaʼn jaku che ela toj qwitz, noqtzun tuʼnj, jaku qo okx kyqʼoʼn tjaqʼ kyipumal taqʼunal Tajaw il. Tuʼntzunju, tzʼokx tilil quʼn tuʼn tel qpan qibʼ tiʼj tkyaqil jlu (Deuteronomio 18:10-12).
Aju xjal Rogelio tbʼi xqo yolin tiʼj tej saj tzyet qe xnaqʼtzbʼil lu, tzmaxi tej otoq japun te 50 abʼqʼi, xi tnimen qa at Tajaw il. ¿Tiquʼn? Tzaj tqʼamaʼn Rogelio qa tej tjapun te 50 abʼqʼi, tzaj qʼoʼn tnejel maj jun Tuʼjil Tyol Dios te ex tqʼamatl jlu: «Tuʼnju wojtzqibʼile tiʼj Tyol Dios el nnikʼe tiʼj ex ok qʼuqeʼ nkʼuʼje qa at Tajaw il. Ax wojtzqibʼile lu in nok xqʼuqin weye jaʼlo tuʼn miʼn nkubʼ tzʼaqe tuʼn nya bʼaʼn in tzaj tukʼil Satanás».
«Tuʼnju wojtzqibʼile tiʼj Tyol Dios el nnikʼe tiʼj ex ok qʼuqeʼ nkʼuʼje qa at Tajaw il. Ax wojtzqibʼile lu in nok xqʼuqin weye jaʼlo tuʼn miʼn nkubʼ tzʼaqe tuʼn nya bʼaʼn in tzaj tukʼil Satanás»
¿Tajbʼila tuʼn tpon jun qʼij jatumel ya miʼn tentl Satanás? Jaku bʼant jlu. In yolin Tyol Dios tiʼj jun ambʼil jatumel ya miʼn sbʼuntl Satanás kyiʼj xjal, tuʼnju ok kbʼelex xoʼn «tuj najabʼ in kʼant tuʼn qʼaqʼ ex tuʼn azufre» (Apocalipsis 20:10). Ax tok, aju axix qʼaqʼ ex aju axix azufre mlay bʼant tuʼn tok tbʼinchaʼn jun nya bʼaʼn tiʼj jun xewbʼaj, moqa tiʼj jun anjel.Noqtzun tuʼnj, aju qʼaqʼ in nok te techel aju najsbʼil te jumajx. Ikju, ok kbʼel najsaʼn Satanás te jumajx. ¡Tbʼanelxix aju ambʼil tzul tqʼoʼn Qman Dios qe, aju at tkʼuʼj qiʼj!
Akux in nul ambʼil lu, kukx qʼoʼnka tilil tuʼn kukx t-xnaqʼtzaʼna tiʼj Jehová ex kyiʼj tbʼe. * Noqpe ximana tiʼj ambʼil, ex toj tkyaqil ambʼil, atz jatumel kxel qʼamet jlu: «¡Mintiʼ te Satanás!».
^ taqik' 8 Qa aju tajlal saq pwaq lu, jun tten pwaq aju denario tbʼi in najbʼentoq kyuʼn xjal te Roma, a jlu in tzaj tyekʼun qa iltoq tiʼj tuʼn taqʼunan jun xjal 50,000 qʼij tuʼn tkambʼet aju nimxix tajlal pwaq lu.
^ taqik' 11 Qa taja chʼintl tqanil tiʼj Satanás ex tiʼj kyaqʼun chman, jyonkuxa aju xnaqʼtzbʼil 10 toj uʼj ¿Tiʼ in tzaj t–xnaqʼtzaʼnxix Tyol Dios? Jaku txi tqanina uʼj lu te alkyexku jun testigo de Jehová tuʼn ttzaj qʼoʼn jun teya.
