TBʼI XNAQʼTZBʼIL TOK TIʼJ T-XKʼOMIL: JAKU TZʼOK LAQʼEʼYA TTXLAJ DIOS
¿In kubʼ tbʼinchaʼn teya aju in tzaj tqanin Dios?
Olo tzʼok tbʼinxi teya jun xjal in xi tqʼamaʼn jlu te juntl: «Alkyexku tajbʼila tuʼn tbʼant, noq qʼamantza ex kbʼel nbʼinchaʼne tuʼn tkyaqil nkʼuʼje». Mlaylo txi qqʼamaʼn jlu te alkyexku xjal ex te jun xjal noq tal chʼin ojtzqiʼn quʼn. Noqtzun tuʼnj, tajbʼil-lo teya tuʼn t-xi tqʼamaʼna qe yol lu te jun tamiwoya aju kʼujlaʼn tuʼna. Qa ateʼ kabʼe xjal kyamiw kyibʼ, chʼixmi tkyaqil maj kygan tuʼn tkubʼ kybʼinchaʼn aju in xi tqanin jun te juntl.
In tzaj tyekʼun Tyol Dios qa kukx in kubʼ tbʼinchaʼn Jehová aju in che tzalaj tmajen tiʼj. Jun techel, tqʼama aj kawil David jlu, aju ok te tamiw Dios: «Nman Dios, nimku tbʼinchbʼena tbʼanelxix ma bʼant, aju t-ximbʼetza qiʼje puro bʼaʼn, [...] nim jlu» (Salmo 40:5). Nya oʼkxju, axpe ikx in tzaj tqʼoʼn Jehová wabʼj ex tkyaqilju in tzalaj kyanmi qeju mintiʼ ojtzqiʼn Dios kyuʼn (Hechos 14:17).
In qo tzalaj aj tkubʼ qbʼinchaʼn junjun tiʼchaq kye qeju kʼujlaʼn qeʼ quʼn ex nim kyoklen toj qwitz
Qa in tzalaj Jehová tuʼn tkubʼ tbʼinchaʼn aju in che tzalaj txqantl tiʼj, a jlu in tzaj tyekʼun qa ax ikx tajbʼil tuʼn tkubʼ kybʼinchaʼn tamiw aju in tzalaj tanmi tiʼj (Proverbios 27:11). Noqtzun tuʼnj, ¿tiʼxix jaku tzalaj Jehová tiʼj? In tzaj ttzaqʼweʼn Tyol Dios jlu: «Miʼn tzikʼ tnaʼl kyuʼne tuʼn kybʼinchanteye aju bʼaʼn ex tuʼn kyoninte kyibʼe kyxolxe; porque ate jlu jun oyaj in xi kyqʼoʼne te Dios in tzalaj tiʼj» (Hebreos 13:16). ¿In tzajpe tyekʼun jlu qa oʼkx qa in kubʼ qbʼinchaʼn aju bʼaʼn ex qa in xi qqʼoʼn chʼin kye txqantl ok ktzalajel Dios quʼn?
In tzaj tqʼamaʼn Tyol Dios jlu: «Qa mintiʼ qokslabʼl mlayx tzalaj Dios qiʼj» (Hebreos 11:6). Ax ikx in tzaj tqʼamaʼn Tyol Dios qa ok Abrahán te «tamiw Dios» tej t-xi «tokslaʼn [...] Tyol Dios» (Santiago 2:23). Ax ikx yolinxix Jesucristo tiʼj qa il tiʼj tuʼn tten qʼuqbʼil qkʼuʼj tuʼn ttzalaj Dios qiʼj tej tqʼama jlu: «Qeʼk kykʼuʼje tiʼj Dios» (Juan 14:1). Qa ikju, ¿tiʼ jaku bʼant tuʼna tuʼn tten qʼuqbʼil tkʼuʼja ik tzeʼn in tjyoʼn Dios kyiʼj qeju in che ok laqʼeʼ ttxlaj? Jaku txi tzyet tuʼn tten qʼuqbʼil tkʼuʼja qa ma xnaqʼtzana tiʼj Tyol Dios. Qa ma bʼant jlu tuʼna, ok ktel axix tok tojtzqibʼila tiʼj «tkyaqilju tajbʼil» ex kʼelel tnikʼa tzeʼn jaku bʼeta «bʼaʼnxix ik tzaʼn tajbʼil Qajaw». Ex qa ma chʼiy tojtzqibʼila tiʼj Jehová ex qa ma tzʼel tnikʼa kyiʼj qeju tkawbʼil tzʼaqli qeʼ, ok kchʼiyel qʼuqbʼil tkʼuʼja tiʼj Dios ex mas kʼokel laqʼeʼya ttxlaj (Colosenses 1:9, 10).
Bʼalo ax ikx tgana jlu
AJU XQʼUQIL
Mintiʼ juntl tten qanqʼibʼil mas bʼaʼn twitz jlu
At oxe tumel tiʼj alkye tten jaku tzʼoka te tamiw Dios.
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.
