Jaku chex xnaqʼtzet kʼwaʼl tuʼn tok kykʼujlaʼn Dios oʼkx qa ma txi yekʼit kye qa at Dios ex qa kʼujlaʼn qeʼ tuʼn Dios. Il tiʼj tuʼn tok kyojtzqiʼn kʼwaʼl Dios tuʼn tok kykʼujlaʼn (1 Juan 4:8). Jun techel, il tiʼj tuʼn tok kyojtzqiʼn jlu: ¿Tiquʼn xkubʼ tbʼinchaʼn Dios xjal? ¿Tiquʼn in tzaj tqʼoʼn Dios ambʼil tuʼn ttzaj nya bʼaʼn? ¿Alkye t-xim Dios at kyiʼj xjal toj ambʼil tzul? (Uʼjinxa Filipenses 1:9.)

Tuʼn tonina kyiʼj tkʼwaʼla moqa kyiʼj tala tuʼn tok kykʼujlaʼn Dios, il tiʼj tuʼn tkubʼ tyekʼuna kywitz qa kʼujlaʼn Dios tuʼna. Qa ma tzʼok kyqʼoʼn kywitz tiʼj jlu, ax ikx kye che okel lepeʼ tiʼj techel in kubʼ tqʼoʼna kywitz. (Uʼjinxa Deuteronomio 6:5-7; Proverbios 22:6.)

At nim tipumal Tyol Dios (Hebreos 4:12). Tuʼntzunju, oninxa qe tkʼwaʼla tuʼn tel kynikʼ kyiʼj xnaqʼtzbʼil nim kyoklen. Tuʼn tkuʼpin xnaqʼtzbʼil tiʼj kyanmi xjal, e ajbʼen xjel tuʼn Jesús, e kubʼ tbʼiʼn qe xjal ex xi tchikʼbʼaʼn Tyol Dios kye. Ax ikx tuʼn tkuʼpin xnaqʼtzbʼil tiʼj kyanmi tkʼwaʼla, jaku tzʼel tkanoʼna aju alkye tten xi tqʼoʼn Jesús xnaqʼtzbʼil kye xjal. (Uʼjinxa Lucas 24:15-19, 27, 32.)

Ax ikx, ateʼkux junjun txʼolbʼabʼil toj Tyol Dios aju in yolin tiʼj alkye tmod Dios ten kyukʼil xjal. A jlu jaku tzʼonin tiʼj tkʼwaʼla tuʼn tok tojtzqiʼn Dios ex tuʼn tok tkʼujlaʼn. Ateʼ uʼj o che bʼaj bʼinchaʼn tuʼn tbʼant jlu, toj (Uʼjinxa 2 Timoteo 3:16.)