1-3. ¿Alkyeqe nya bʼaʼn in che ok weʼ mejebʼleʼn twitz? (Qʼonka twitza tiʼj tnejel tilbʼilal.)

AT JUN chmilbʼaj, aju ma bʼent 38 abʼqʼi in tzalaj toj tmejebʼleʼn, tqʼama jlu: «Qa ax tok in nok tilil quʼn tuʼn tten jun qmejebʼleʼn toj tbʼanel, in qo tzaj tkʼiwlaʼn Jehová». Ikju, jaku che tzalajxix qeju o che kubʼ mojeʼ ex jaku che onin kyibʼ aj kyok weʼ twitz junjun nya bʼaʼn (Proverbios. 18:22).

² Kykyaqil qeju o che kubʼ mojeʼ in che ok weʼ twitz nya bʼaʼn ik tzeʼn aj ttzaj tqʼamaʼn Tyol Dios qa «aqeju in che mojeʼ, tzul yajbʼil kye tuj kychwinqlal tzalu twitz txʼotxʼ» (1 Corintios 7:28). ¿Tiquʼn in tzaj yajbʼil kyiʼj? Tuʼnju in nikʼ junjun nya bʼaʼn tkyaqil qʼij. Tuʼnju aj il qoʼ, jaku txi tqʼamaʼn chmilbʼaj moqa a xuʼjilbʼaj jun tyol aju jaku kux chyon toj tanmi tukʼil tuʼn ex, qa mintiʼxix in che yolin, jaku junxitl jaku tzʼela tyol jun te juntl (Santiago 3:2, 5, 8). At nim mejebʼleʼn il tiʼj tuʼn kyaqʼunan, ex il tiʼj tuʼn kychʼiyset kʼwaʼl kyuʼn. Tuʼnju in che sikti ex in tzaj bʼaj kykʼuʼj, mintiʼtl in ten ambʼil kyiʼj tuʼn kyten junx ex tuʼn tchʼiy kykʼujlabʼil kyxolx. Ax ikx aqeju junjuntl nya bʼaʼn ik tzeʼn jun yabʼil ex junjuntl nya bʼaʼn jaku chewix kykʼujlabʼil qeju o che kubʼ mojeʼ tuʼn ex tuʼn jlu, mlay kubʼ kynimentl kyibʼ. Nya oʼkxju, axpe ikx qeju mejebʼleʼn bʼaʼn ateʼ, jaku kubʼ xitj kymejebʼleʼn qa ma kubʼ kybʼinchaʼn aju «in kybʼinchaʼn xjal in xi kyniman tajbʼil kychibʼjal», ik tzeʼn qa ma che yaẍin, qa ma kubʼ kybʼinchaʼn aju tzʼil, qa kyajqʼoj kyibʼ, qa noq in txʼaʼl tiʼj kykʼuʼj  tiʼj juntl, qa in che jaw kyaqpaj ex qa in bʼaj kyikʼlen kyibʼ (Gálatas 5:19-21).

³ Nya oʼkxju, tuʼnju in qo anqʼin kyoj «mankbʼil tqʼijlalil», moqa kyoj bʼajsbʼil tqʼijlal, chʼixmi kykyaqil xjal in che anqʼin qtxlaj oʼkx tok kykʼuʼj kyiʼjx ex at junjuntl xjal nya bʼaʼn kymod aju jaku tzaj tiʼn xitbʼil toj qmejebʼleʼn (2 Timoteo 3:1-4). Ax ikx tajbʼil Satanás tuʼn kykubʼ tpaʼn qeju o che kubʼ mojeʼ. Tqʼama apóstol Pedro jlu: «Ate tajaw il aj qʼoj kyiʼje, ex in bʼet kyiʼjele, in tzanun ik tzaʼn jun bʼalun, in jyon tiʼj alkye jun tuʼn t-xi tchyoʼn» (1 Pedro 5:8; Apocalipsis 12:12).

4. ¿Tzeʼn jaku ten jun mejebʼleʼn kyuwxix ex toj tzalajbʼil?

⁴ Tqʼama jun ermano te Japón jlu: «Nimtoq in bʼaj nkʼuʼje tiʼj pwaq ex mintiʼtoq in kanet ambʼil quʼne tukʼil nxuʼjile tuʼn qyoline, tuʼntzunju, ax ikx kubʼ tnaʼn nxuʼjile nim nya bʼaʼn. Ax ikx, kʼitzqeku ikʼ nxuʼjile toj yabʼil. At maj otoq bʼaj qgane ex in kubʼ bʼaj twiʼ qyole tukʼil qʼoj». Ilxix tiʼj in tzaj nya bʼaʼn toj mejebʼleʼn, noqtzun tuʼnj, tuʼn onbʼil in tzaj tqʼoʼn Jehová jaku kyaj toj ttxolil kyuʼn qeju o che kubʼ mojeʼ ex tuʼn miʼn tkubʼ xitj kymejebʼleʼn ex tuʼn kytzalaj tiʼj (kjawil uʼjit Salmo 127:1). Qo xnaqʼtzan tiʼj jweʼ tumel tuʼn tten qmejebʼleʼn kyuwxix ex aju jaku tzikʼx alkyexku nya bʼaʼn tuʼn. Ax ikx kʼelel qnikʼ tiʼj tiquʼn ilxix tiʼj tuʼn tten kʼujlabʼil toj mejebʼleʼn.

5, 6. ¿Alkye tten jaku tzaj kynaʼn mejebʼleʼn Jehová?

⁵ Qa kukx ma tzʼajbʼen ex ma bʼiʼn chmilbʼaj ex xuʼjilbʼaj te Jehová, aju kyaj tqʼoʼn tuʼn kykubʼ mojeʼ xjal, a jlu kʼonil kyiʼj tuʼn tten jun kymejebʼleʼn kyuwxix (kjawil uʼjit Eclesiastés 4:12). ¿Alkye tten jaku tzaj kynaʼn Jehová toj kymejebʼleʼn aqeju o che kubʼ mojeʼ? Ok tzul kynaʼn Jehová toj kymejebʼleʼn qa ma che ok lepeʼ tiʼjju in tzaj tqʼamaʼn Jehová ex kyiʼj qe tkawbʼil ateʼ toj Tyol. In tzaj tqʼamaʼn Tyol Dios jlu: «Qa ma cheʼxe tuj bʼe, qa tuj bʼanqʼabʼaj ex qa tuj nayaj, ok kybʼiʼye jun tqʼajqʼajel kyiʼjtzeye in tmaʼn kyjaʼ: Lu ju bʼe lu, kyxiʼye tuj» (Isaías 30:20, 21). Toj ambʼil jaʼlo, in xi kybʼiʼn mejebʼleʼn aju in tzaj tqʼamaʼn Jehová aj kyuʼjin junx tiʼj Xjan Uʼj (Salmo 1:1-3). Ax ikx, ktel kymejebʼleʼn kyuwxix qa ma tzʼok tilil kyuʼn tuʼn kytzalaj tiʼjju Ambʼil in xi kyqʼoʼn te Jehová kyukʼil qe toj kyja ex tuʼn tonin kyiʼj tuʼn kychʼiy toj kyokslabʼil. Ex qa ma che naʼn Dios junx tkyaqil qʼij, jaku che ex twitz nim nya bʼaʼn in tzaj tuʼn tkyaqilju tokx tjaqʼ tipumal Tajaw il.

⁶ Jun ermano te Alemania, aju Gerhard tbʼi tqʼama jlu: «Aʼyeju nabʼil tkuʼx toj Tyol Dios in che onin qiʼje tuʼn tten qpasense ex tuʼn tkubʼ qnajsaʼne il qxole aj ttzaj junjun nya bʼaʼn tuʼn qmode toj qmejebʼleʼne.  Aju qpasens ex aju tuʼn tkubʼ qnajsaʼn qil, il tiʼj tuʼn tten tuʼntzun tok jun mejebʼleʼn te tbʼanel». Qa kykabʼil ma tzʼok kyqʼoʼn tilel tuʼn ttzaj kynaʼn Jehová toj kymejebʼleʼn ex qa junx in che aqʼunan toj taqʼun Dios, ok che tel nqayin ttxlaj Jehová ex a jlu kʼonil kyiʼj tuʼn tten mujbʼabʼil kyxolx toj kymejebʼleʼn.

7. ¿Alkye tmod chmilbʼaj ktel tukʼil t-xuʼjil?

⁷ Aju alkye tten in kawin chmilbʼaj toj tmejebʼleʼn, jaku tzʼonin kyiʼj tuʼn tten jun kymejebʼleʼn kyuw ex toj tzalajbʼil. In tzaj tqʼamaʼn Tyol Dios jlu: «Ate Crist nejenel te tkyaqil xinaq, atzunte xinaq nejenel te xuʼj» (1 Corintios 11:3). Tej tqʼama apóstol Pablo jlu, xi tchikʼbʼaʼn tzeʼn tten tuʼn kykawin chmilbʼaj toj kyja ex tuʼn kyok te jun tbʼanel wibʼaj, ik tzeʼn bʼant tuʼn Jesucristo kyukʼil qe t-xnaqʼtzbʼen. Mintiʼ xi t-xnaqʼtzaʼn Jesús qe t-xnaqʼtzbʼen tukʼil qʼoj, quʼn tkyaqil maj xi t-xnaqʼtzaʼn kye tukʼil kʼujlabʼil, el tnikʼ kyiʼj, ten tpasens, ok te mans kyukʼil ex mintiʼ jaw tnimen tibʼ kywitz (Mateo 11:28-30).

8. ¿Tzeʼn jaku kambʼet kʼujlabʼil ex nimbʼel te xuʼjilbʼaj tuʼn chmilbʼaj?

⁸ Aju chmilbʼaj in nok lepeʼ tiʼj Jesús, mintiʼ in xi tnaʼn jun ex juntl maj te t-xuʼjil tuʼn tnimen te. Sino in nok te mans tukʼil t-xuʼjil. In xi tqʼoʼn nimbʼil te t-xuʼjil tuʼnju in nel tnikʼ tiʼj qa «chʼin kye xuʼj kykʼuʼj» (1 Pedro 3:7). Qa kyjunalx moqa ateʼ kyxol mas xjal, in ximen tiʼj tiʼ in tnaʼn t-xuʼjel ex in xi tqʼoʼn nimbʼel te aj tyolin tukʼil. In kubʼ tyekʼun tukʼil qe tyol ex kyukʼil qe tbʼinchbʼen qa nim toklen t-xuʼjil te te (Proverbios 31:28). Qa ik tmod chmilbʼaj ma ten, ok kʼokel kʼujlan ex kʼokel nimen tuʼn t-xuʼjil ex che tzajel kʼiwlan tuʼn Jehová.

9. ¿Alkye tten in kubʼ tyekʼun xuʼjilbʼaj qa bʼaʼn nimen?

⁹ In nonin qiʼj tuʼn tkubʼ qin qibʼ «tjaqʼ tipumal tqʼabʼ Dios» qa ax tok kʼujlaʼn Dios quʼn ik tzeʼn in tzaj tqʼamaʼn toj Tyol (1 Pedro 5:6). ¿Alkye tten jaku kubʼ kyyekʼun xuʼjilbʼaj qa nokx kynimen toklen Jehová? Jun tten jaku kubʼ kyyekʼun aju qa in che onin tukʼil kychmil. In tzaj tqʼamaʼn Tyol Dios jlu: «Aqeye xuʼj, kynimanxe kychmile, atzun jlu il tiʼj porque okslal qeye tiʼj Qajaw» (Colosenses 3:18). Ax tok, nya tkyaqil maj tbʼanel kʼelel te xuʼjilbʼaj aju in kubʼ t-ximen tchmil tuʼn tbʼant. Noqtzun tuʼnj, qa mintiʼ in yolin jun taqikʼ Tyol Dios tiʼj jlu, in nonin xuʼjilbʼaj tiʼj tchmil (1 Pedro 3:1).

10. ¿Tiquʼn nim toklen aju qa bʼaʼn nimen xuʼjilbʼaj?

¹⁰ At nim toklen jun xuʼj toj mejebʼleʼn, quʼn ‹atzun tmoj›, moqa atzun tukʼil tchmil (Malaquías 2:14). Aj tkubʼ kyximen tukʼil tchmil alkye tuʼn tbʼant, in xi tqʼamaʼn toj tumel te tchmil aju te in kubʼ t-ximen ex mintiʼ in tjyoʼn tuʼn tbʼant aju te tajbʼil. Aju te in tqʼamaʼn at nim toklen, tuʼntzunju in nok tqʼoʼn tchmil twiʼ tiʼj tyol (Proverbios 31:10-31). Qa tukʼe kʼujlabʼil bʼaʼn nimen xuʼjilbʼaj ex chmilbʼaj, a jlu kʼonil tuʼn tten tzalajbʼil ex mujbʼabʼil kyukʼil toj kyja, ex kykabʼil ok che tzalajel tuʼnju ojtzqiʼn kyuʼn qa in kubʼ kybʼinchen aju in tzaj tqʼamaʼn Jehová kye (Efesios 5:22).

11. ¿Tiquʼn nim toklen aju qa ma kubʼ kynajsaʼn mejebʼleʼn kyil?

¹¹ Aju juntl in nonin tuʼn tten jun mejebʼleʼn kyuwxix, aju qa ma kubʼ tnajsaʼn chmilbʼaj ex xuʼjilbʼaj jun nya bʼaʼn in tzaj kyxol. Toj jun mejebʼleʼn in chʼiy kʼujlabʼil kyxol qeju o che kubʼ mojeʼ qa kykabʼil sok tilel kyuʼn tuʼn tten tbʼanel kyxol ex qa in kubʼ kynajsaʼn kyil (Colosenses 3:13). Quʼn qa kukx in tzaj kynaʼn juntl maj aju nya bʼaʼn in bʼant kyuʼn ex qa in najbʼen kyuʼn aj ttzaj juntl maj kyqʼoj, tuʼn jlu in tzaj nim nya bʼaʼn tiʼj kymejebʼleʼn. Ik tzeʼn qa ma txi tzilj jun plaj ja ex jaku kubʼ tilj ja tuʼn, iktzun in nok mejebʼleʼn qa at jun tiʼ in kux chyon tiʼj kyanmi qeju o che kubʼ mojeʼ, ex tuʼn jlu mas kwest tuʼn tkubʼ kynajsaʼn kyil kyxolx. Qatzun ma tzʼok tilel kyuʼn tuʼn tkubʼ kynajsaʼn naj kyil, ik tzeʼn in bʼant tuʼn Jehová, a jlu kʼonil kyiʼj tuʼn miʼn tel kypan kyibʼ (Miqueas 7:18, 19).

12. ¿Tiquʼn in kubʼ tnajsaʼn kʼujlabʼil «nimku kyil» mejebʼleʼn kyxolx?

¹² Aju axix tok kʼujlabʼil «mintiʼ in xi tkʼuʼn qʼoj» ex in najset «nimku kyil» mejebʼleʼn tuʼn (1 Corintios 13:4, 5; kjawil uʼjit 1 Pedro 4:8). Toj juntl yol, qa at  kykʼujlabʼil chmilbʼaj ex xuʼjilbʼaj, mintiʼ in kubʼ kyajlaʼn jteʼ maj kbʼel kynajsaʼn kyil kyxolx. Tej txi tqanin apóstol Pedro jteʼ maj tuʼn tkubʼ tnajsaʼn til jun xjal, xi ttzaqʼweʼn Jesús jlu te: «Qa at kykʼujlalile, knajsetel nimku kyil txqantl kyuʼne» (Mateo 18:21, 22). Tuʼn jlu tqʼama Jesús qa aʼye okslal il tiʼj tuʼn tkubʼ kynajsaʼn noq jteʼxku maj til juntl, qa il tiʼj (Proverbios 10:12). * (Qʼonka twitza tiʼj tqanil t-xe t-xaq uʼj.)

13. ¿Tiʼ jaku bʼant quʼn qa kwest tuʼn tkubʼ qnajsaʼn kyil txqantl?

¹³ Tqʼama Annette jlu: «Qa mintiʼ ma kubʼ kynajsaʼn chmilbʼaj ex xuʼjilbʼaj kyil kyxolx, in chʼiy qʼoj toj kyanmi tuʼn jlu ex ya mintiʼ in nok qe tkʼuʼj jun tiʼj juntl ex a jlu in nok ik tzeʼn jun veneno toj kymejebʼleʼn. Qatzun ma kubʼ kynajsaʼn kyil, in che ok mojbʼan mas tuʼn jlu». ¿Tiʼ jaku tzʼonin qiʼj qa kwest tuʼn tkubʼ qnajsaʼn kyil txqantl? Aju qa ma ten jun tbʼanel qximbʼetz tiʼj juntl. Qo ximen tiʼjju tbʼanel in bʼant tuʼn juntl ex qqʼamanx te qa in qo tzalaj tiʼjju in bʼant tuʼn (Colosenses 3:15). Qa ma bʼant jlu quʼn, ktel qximbʼetz toj txubʼtxaj, ok ktel tbʼanel qxol tukʼil juntl ex ktzalajel Jehová qiʼj (Romanos 14:19).

14, 15. a) ¿Alkye tbʼanel nabʼil kyaj tqʼamaʼn Jesús? b) ¿Tiquʼn at tajbʼen toj mejebʼleʼn aju tbʼanel nabʼil tqʼama Jesús?

¹⁴ Qkyaqilx qgan tuʼn tok bʼinchaʼn bʼaʼn qiʼj, tuʼn qxi nimen ex tuʼn kyximen txqantl tiʼjju in kubʼ qximen ex tiʼjju in qnaʼn. Noqtzun tuʼnj, ax ikx ole tzʼok qbʼiʼn aju kyyol xjal lu: «Yonku te nej, kychjetel te til». Atlo maj jaku tzʼel qnikʼ tiʼj tiquʼn in tzaj kyqʼamaʼn xjal lu, noqtzun tuʼnj, in tzaj tqʼamaʼn Tyol Dios jlu qe: «Miʼn kubʼ t-ximana tuʼn taj tqʼoʼna t-xel mya bʼaʼn, mi tuʼn tbʼinchanteya tiʼj juntl ik tzaʼnx otoq tbʼincha tiʼja» (Proverbios 24:29). Kyaj tchikʼbʼaʼn Jesús alkye tbʼanel qmod ktel qa at jun ma tzʼok bʼinchante jun nya bʼaʼn qiʼj. Tqʼama Jesús jun tbʼanel nabʼil tej tqʼama jlu: «Ik tzaʼn kyaje tuʼn kybʼinchante xjal kyeye, ikxtzun kyeye kybʼinchame kye» (Lucas 6:31). Tuʼn qe yol lu, tqʼama Jesús qa il tiʼj tuʼn tok qbʼinchaʼn kyiʼj xjal ik tzeʼn qe qajbʼil tuʼn tok bʼinchaʼn qiʼj, ex mintiʼ tuʼn taj qqʼoʼn t-xel aju nya bʼaʼn in nok bʼinchen qiʼj. A t-xilen jlu, qa ax ikx toj mejebʼleʼn il tiʼj tuʼn t-xi qqʼoʼn aju qajbʼil tuʼn ttzaj qʼoʼn qe toj qmejebʼleʼn.

¹⁵ In chʼiy kʼujlabʼil kyxol chmilbʼaj tukʼil xuʼjilbʼaj qa teyele junjun ma ximen tiʼjju in tnaʼn tukʼil. Tqʼama jun ermano te Sudáfrica qa in nok tilel kyuʼn tukʼil t-xuʼjil tuʼn t-xi kybʼiʼn tbʼanel nabʼil tqʼama Jesús, ex tqʼama: «At maj in tzaj qqʼoje, noqtzun tuʼnj, in nok tilel quʼne tuʼn tkubʼ qbʼinchene ik tzeʼnx qajbʼile tuʼn tok bʼinchen qiʼje, aju tuʼn qxi nimane».

16. ¿Tiʼ mintiʼ tuʼn tbʼant tuʼn chmilbʼaj ex tuʼn xuʼjilbʼaj?

¹⁶ Mintiʼ tuʼn t-xi qqʼamaʼn kye txqantl alkye junjun tiʼchaq nya toj tumel in bʼant tuʼn qukʼil, axpe ikx qa noq in qo yaqin. Bʼaʼn tuʼn ttzaj qnaʼn qa mintiʼ in che kubʼ mojeʼ kabʼe xjal noq tuʼn tel nikʼbʼaj kyiʼj alkye jun mas at tipumal, alkye mas in jaw ẍchʼin ex alkye mas in xi tqʼamaʼn aju yol in kux chyon tiʼj tanmi juntl. Ax tok tuʼnju aj il qoʼ, at maj kbʼel tbʼinchaʼn qukʼil jun tiʼ aju nya bʼaʼn kʼelel toj qwitz. Noqtzun tuʼnj, a jlu mintiʼ in tzaj tqʼoʼn ambʼil qe tuʼn qxmayin tiʼj moqa tuʼn tkubʼ qqʼoʼn tchʼixwe, ax ikx mintiʼ in tzaj tqʼoʼn ambʼil qe tuʼn t-xi qlamoʼn ex tuʼn qok ten bʼiyolte (kjawil uʼjit Proverbios 17:27 ex 31:26).

17. ¿Alkye tten jaku japun kyuʼn chmilbʼaj aju tbʼanel nabʼil kyaj t-xnaqʼtzaʼn Jesús?

¹⁷ Ax tok, at junjun tnam jatumel in kubʼ kyximen xjal qa jun ax tok xinaq, moqa jun ax tok ichan, jun xjal qa in nok ten bʼiyolte t-xuʼjil, noqtzun tuʼnj, in tzaj tqʼamaʼn Tyol Dios jlu: «Mas bʼaʼn qa mya jurat in qo jaw qʼojl twitzju tuʼn qok kyuw qkʼuʼj; mas bʼaʼn qa ma qjakʼunte qibʼ quʼnx qibʼ twitzju tuʼn tkubʼ tiʼj jun tnam quʼn» (Proverbios 16:32). Il  tiʼj tuʼn tten nim tipumal jun xjal tuʼn tjakʼunte tibʼ ex tuʼn tkubʼ tyekʼun jun tbʼanel tmod ik tzeʼn kubʼ tyekʼun Jesús, aju xjal mas nim toklen o tzʼanqʼin twitz Txʼotxʼ. Aju xjal in nok ten kʼixbʼisal t-xuʼjil kyuʼn qe tyol moqa tuʼn tqʼabʼ, mintiʼ jun tamiwbʼil tukʼil Jehová. Aju aj bʼitzil David nimtoq tipumal ex mintiʼtoq in tzaj xobʼ, kubʼ ttzʼibʼen jlu: «Tzajx t-xobʼil kyiʼje [moqa ‹tzajx kyqʼoje›, TNM] ex miʼn che bʼinchane il. Che ximane tiʼj jlu tuj kyanmiye ok kyxiʼye tal, ex miʼn che qʼajte» (Salmo 4:4).

18. ¿Tiquʼn nimxix toklen tuʼn tten kykʼujlabʼil qeju o che kubʼ mojeʼ?

¹⁸ (Kjawil uʼjit 1 Corintios 13:4-7.) Nimxix toklen tuʼn tten kʼujlabʼil toj jun mejebʼleʼn. In tqʼama Tyol Dios jlu: «Qʼaqʼanx kykʼuʼje tiʼj juntl, kybʼinchame xtalbʼil, miʼn jaw kyniman kyibʼe, che oke mans, ten kypasense [...]. Ex aju mas il tiʼj twitz tkyaqil jlu, tuʼn tten kykʼujlalile, porque tuʼntzun jlu qtzuylaj qibʼ qkyaqil» (Colosenses 3:12, 14). Il tiʼj tuʼn tkubʼ tyekʼun chmilbʼaj ex xuʼjilbʼaj jun kʼujlabʼil ik tzeʼn kubʼ tyekʼun Jesús, aju xi tqʼoʼn tchwinqlal kyiʼj txqantl. Qa ma kubʼ yekʼet kʼujlabʼil ik tzeʼn kubʼ tyekʼun Jesús, jaku tzikʼx alkyexku nya bʼaʼn kyuʼn qeju o che kubʼ mojeʼ. Ok kʼonil kʼujlabʼil lu tuʼn kyex twitz alkyexku nya bʼaʼn ik tzeʼn qa mintiʼxix pwaq, qa ma tzaj jun yabʼil, qa at junjun kymod nyaxix bʼaʼn ex qa at jun nya bʼaʼn saj kyukʼe toj tja chmilbʼaj moqa kyukʼe toj tja xuʼjilbʼaj.

19, 20. a) ¿Tzeʼn jaku che tzalaj qeju o che kubʼ mojeʼ ex tzeʼn jaku ten jun kymejebʼleʼn kyuw? b) ¿Tiʼ kʼelel qnikʼ tiʼj toj juntl xnaqʼtzbʼil?

¹⁹ Tuʼn tten jun tbʼanel mejebʼleʼn, il tiʼj tuʼn tten kykʼujlabʼil qeju o che kubʼ mojeʼ, tuʼn tkubʼ kyximen tuʼn miʼn tkubʼ kypan kyibʼ ex tuʼn tok tilil kyuʼn. Aj ttzaj jun nya bʼaʼn, mintiʼ tuʼn tkubʼ kyximen qeju o che kubʼ mojeʼ tuʼn tkyaj kytzaqpiʼn kyibʼ, mas bʼaʼn tuʼn tkubʼ kyximen tuʼn tok tilil kyuʼn tuʼn tok laqʼeʼ jun tiʼj juntl. Aqeju mejebʼleʼn kʼujlaʼn Jehová kyuʼn ex at kʼujlabʼil kyxolx in xi kybʼinchen tiʼj nya bʼaʼn tukʼe kʼujlabʼil tuʼnju «aju kʼujlalil mlay bʼaj» (1 Corintios 13:8; Mateo 19:5, 6; Hebreos 13:4).

²⁰ Mas kwest tuʼn kytzalaj qeju o che kubʼ mojeʼ toj ambʼil jaʼlo ex tuʼn tten jun kymejebʼleʼn aju kyuw tuʼnju in qo anqʼin toj jun ambʼil jatumel at «nim yajbʼil» (2 Timoteo 3:1). Noqtzun tuʼnj, tukʼe onbʼil in tzaj tqʼoʼn Jehová jaku che tzalaj qeju o che kubʼ mojeʼ ex jaku ten jun tbʼanel kymejebʼleʼn. Noqtzun tuʼnj, ax ikx at juntl nya bʼaʼn in che ok weʼ qeju o che kubʼ mojeʼ twitz tuʼnju aqeju xjal toj ambʼil jaʼlo oʼkx in che ximen tiʼj yaẍbʼil. Tuʼntzunju, toj juntl xnaqʼtzbʼil kʼelel qnikʼ tiʼj tiʼ jaku bʼant tuʼn chmilbʼaj ex tuʼn xuʼjilbʼaj tuʼn tten kymejebʼleʼn kyuw.