At nim xjal in che sbʼuʼn. Tuʼntzunju, toj alkyexku kykawbʼil, kukx ktel sbʼubʼil. Kyjuʼtzun, tuʼn tten jun kawbʼil mintiʼ sbʼubʼil toj, nya kyxol xjal kjawil jyet. In yolin Tyol Dios tiʼj jun kawbʼil ik tzeʼn jlu: aju Tkawbʼil Dios, aju kyaj tqʼamaʼn Jesús qa il tiʼj tuʼn t-xi qqanin toj naʼj Dios (Mateo 6:9, 10).

Aju Tkawbʼil Dios ax tok jun kawbʼil aju in kawin max toj kyaʼj ex chʼix tok te kyxel kykyaqil kykawbʼil xjal twitz Txʼotxʼ (Salmo 2:8, 9; Apocalipsis 16:14; 19:19-21). Kyxol qe kʼiwlabʼil tzul tuʼn Kawbʼil lu kye xjal, aju tuʼn tkubʼ tnajsaʼn sbʼubʼil. Qo xnaqʼtzan tiquʼn mintiʼ o bʼant tuʼn tkubʼ kynajsaʼn kykawbʼil xjal aju sbʼubʼil ex tiquʼn jaku tzʼok qʼuqeʼ qkʼuʼj qa atzunte Tkawbʼil Dios kbʼel tnajsaʼn aju sbʼubʼil.

AJU NYA BʼAʼN IN TZAJ: Aʼyex xjal in che chjoʼn tiʼjju in najbʼen kyuʼn aj kawil. Tuʼnju at nimxix pwaq in nok kyqʼoʼn nejenel kywitz tiʼj, in che elqʼan tiʼj. At junjuntl, in xi kykʼamoʼn pwaq toj ewaj aju in tzaj kyqʼoʼn xjal nya kyajbʼil tuʼn tchjet tkyaqil chojbʼil kyuʼn te kawbʼil. Ex aj tbʼaj kynajsaʼn aj kawil nim pwaq, tuʼn tkambʼet juntl maj pwaq lu kyuʼn, in nel kyqanin mas chojbʼil kyiʼj xjal ex tuʼn jlu in chʼiy mas sbʼubʼil toj kykawbʼil xjal. Tuʼn tkyaqil jlu, aʼyeju tbʼanel xjal jaku tzaj yajbʼil kyiʼj tuʼn jlu.

AJU KBʼANTEL: Aju Tkawbʼil Dios in tzaj tkʼamoʼn ipumalj tukʼil Jehová, aju Dios Nimxix Tipumal (Apocalipsis 11:15). * Nya il tiʼj tuʼn jaw tchmoʼn Tkawbʼil Dios pwaq tuʼn tchjet aju in najbʼen tuʼn. Tuʼnju «at nim tipumal Dios» ex nim qʼaqʼbʼil tkʼuʼj kyiʼj xjal, kxel tqʼoʼn tkyaqilju at tajbʼen kye xjal tjaqʼ Tkawbʼil (Isaías 40:26; Salmo 145:16).

AJU NYA BʼAʼN IN TZAJ: Tuʼn tkubʼ naj sbʼubʼil «il tiʼj tuʼn ttzaj tzyet tzmax kyukʼil aj kawil», chi Susan RoseAckerman, aju xqo yolin tiʼj toj xnaqʼtzbʼil ma kyaj. Qa at jun kawbʼil in nok tilil tuʼn, tuʼn tkubʼ tnajsaʼn sbʼubʼil kyxol polisiy ex kyxol xjal ateʼ jatumel in noktz ex in nex iqtz toj jun tnam, ex mintiʼ in nok tilil tuʼn, tuʼn tnaj sbʼubʼil kyxol qeju at mas kyoklen toj tkawbʼil, in xi tnajsaʼn nimbʼil in xi kyqʼoʼn xjal te. Ex axpe ikx aju xjal mas mintiʼ sbʼubʼil tukʼil in nel txalpaj, ik tten ik tzeʼn in tqʼamaʼn Tyol Dios aj ttzaj tqʼamaʼn jlu: «Ax tok mi aʼl jun xjal at twitz txʼotxʼ tzʼaqlxix wen in tbʼinchaʼn aju bʼaʼn» (Eclesiastés 7:20).

AJU KBʼANTEL: Aju aj Kawil Jesucristo, aju in kawin toj Tkawbʼil Dios, mlayx t-xi tqʼoʼn ambʼil tuʼn tok ik tzeʼn qe xjal sbʼul qe. O kubʼ tyekʼun Jesús qa mlayx tzʼok te nya bʼaʼn tej tel tikʼun aju nimxix qʼinumabʼil twitz Txʼotxʼ tej t-xi qʼamaʼn te qa jakutoq tzʼok te tajaw. Aju nejenel te twitz Txʼotxʼ, aju Satanás, xi ttziyen te Jesús qa kxeltoq tqʼoʼn «kykyaqil tnam ateʼ twitz txʼotxʼ, tukʼix kyoklen maʼxix» te qa ma kubʼ ẍmejeʼtoq twitz tuʼn tkʼulin te, noqtzun tuʼnj, jurat el tikʼun Jesús jlu (Mateo 4:8-10; Juan 14:30). Tzʼaqlixix Jesús, tuʼntzunju, axpe ikx tej chʼixtoq tkubʼ bʼiyoʼn, mintiʼ xi tkʼaʼn jun kʼul aju jakutoq chewix kʼixkʼoj tok tiʼj tuʼn, noqtzun tuʼnj, jakutoq naj tnabʼil tuʼn jlu ex mintiʼwtlo el tnikʼ tiʼj tiʼtoq in bʼaj (Mateo 27:34). O kubʼ tyekʼun Jesús qa tzʼaqlixix tuʼn tbʼant tkawin toj Tkawbʼil Dios, ex mas jaʼlo tuʼnju o jaw anqʼin ex atz taʼ toj kyaʼj (Filipenses 2:8-11).

AJU NYA BʼAʼN IN TZAJ: Kyoj nimku tnam in che jaw jyoʼn xjal toj junjun ambʼil tuʼn kykawin, ex in xi kyximen xjal qa a jlu in xi tqʼoʼn ambʼil kye tuʼn tel kyiʼn qeju nejenel nya bʼaʼn qe. Noqtzun tuʼnj, kyoj qeju ambʼil aj kyjaw jyoʼn xjal te aj kawil, in bʼaj nim sbʼubʼil, axpe ikx  kyoj nimaq tnam mas qʼinun. Jun techel, aqeju xjal qʼinun in xi kyqʼoʼn nim pwaq te jun oyaj kye nejenel tuʼn tajbʼen kye tiʼj junjun tiʼchaq in bʼant kyuʼn tuʼn kyjaw jyoʼn te aj kawil.

Aju jwes John Paul Stevens, jun kyxol qeju ateʼ toj Tribunal Supremo de Estados Unidos, kubʼ ttzʼibʼin qa aju in bʼant kyuʼn qʼinun «nya oʼkx mintiʼ in tzaj tqʼoʼn ambʼil te kawbʼil tuʼn tjaw jyoʼn toj tumel ex tuʼn tok te tbʼanel kawbʼil, ax ikx in xi tnajsaʼn qʼuqbʼil kykʼuʼj xjal». Kyjuʼtzun nya kwest tuʼn tel qnikʼ kyiʼj xjal aj ttzaj kyqʼamaʼn qa aqeju kyajbʼil tuʼn kyxiʼ te kawil, kykyaqil sbʼul qe.

AJU KBʼANTEL: Tuʼnju kukx ktel Tkawbʼil Dios te jumajx, ya mlay che jaw jyoʼntl xjal te kawil toj junjun ambʼil ex kbʼel naj sbʼubʼil in bʼaj kyxol aj kawil toj ambʼil jaʼlo (Daniel 7:13, 14). Ax ikx, aju aj Kawil toj Tkawbʼil Dios, nya aqe xjal in che jaw jyonte, quʼn a Dios in jaw jyonte, tuʼntzunju mlay bʼant tuʼn tok juntl te t-xel. A jlu in nonin tuʼn kukx tten Kawbʼil ex tuʼn tten tipumal tuʼn tbʼaj ximet toj tumel alkye jaku tzʼonin te jumajx kyiʼj xjal ateʼkx tjaqʼ tkawbʼil.

AJU NYA BʼAʼN IN TZAJ: Atlo junjun xjal jaku kubʼ t-ximen qa kbʼel naj sbʼubʼil qa ma che bʼaj bʼinchet mastl ley. Noqtzun tuʼnj, aqeju xjal at kynabʼil tiʼj jlu, o tzʼel kynikʼ tij qa mas nim ley at, mas mintiʼ in xi kybʼiʼn xjal ley. Nya oʼkxju, ax ikx in xi tiʼn nim pwaq tuʼn kyjapun qe ley kyuʼn xjal aqeju in tzaj kyqʼamaʼn qa mintiʼ tuʼn kysbʼun xjal, ex noq chʼinx bʼaʼn in bʼant kyuʼn qe ley lu.

AJU KBʼANTEL: Aʼyeju tley Tkawbʼil Dios mas tbʼanel qe twitz qe kyley xjal. Jun techel, mintiʼ tqʼama Jesús jun matij tajlal ley tiʼjju jaku bʼant ex tiʼjju mintiʼ tuʼn tbʼant, quʼn oʼkx tzaj tqʼamaʼn jun nabʼil aju nya kwest tuʼn tbʼant. Aju tbʼanel nabʼil kyaj t-xnaqʼtzaʼn Jesús a jlu: «Kyjaʼtzun tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (Mateo 7:12). Nya oʼkxju, ax ikx aju mas tbʼanel kyiʼj tley Tkawbʼil Dios aju ateʼ junjun tley aju nya atz in yolin tiʼjju in bʼant kyuʼn xjal, sino atz in yolin tiʼjju in kynaʼn xjal. Tqʼama Jesús jlu: «Kykʼujlame qe kyukʼile ik tzaʼnx kyeye in kykʼujlan kyibʼe» (Mateo 22:39). Ex tuʼnju ojtzqiʼn tuʼn Dios aju in kubʼ kyximen xjal toj kyanmi, jaku bʼant tuʼn, tuʼn kyjapun qe Tley kyuʼn xjal (1 Samuel 16:7).

AJU NYA BʼAʼN IN TZAJ: In che sbʼun xjal tuʼnju kyajbʼil nimku tiʼchaq kye ex tuʼnju oʼkx in che ximen kyiʼjx, tuʼntzunju, nim qe nejenel ex nim qe xjal in che sbʼun. Aju ja te nimaq kʼaybʼil xqo yolin tiʼj toj xnaqʼtzbʼil ma kyaj, el nikʼbʼaj tiʼj qa aʼyeju e kubʼ bʼinchante xi kyqʼoʼn pwaq toj ewaj kye xjal at kyoklen toj kawbʼil tuʼnju ojtzqiʼntoq kyuʼn qa mas nya nim pwaq kxeltoq kyqʼoʼn qa mintiʼ xjapun ley kyuʼn tuʼn tbʼinchet ja ex qa mintiʼ saj kylaqʼoʼn junjun tiʼchaq tbʼanel aju in najbʼen tuʼn tjaw bʼinchet ja.

Tuʼntzunju, tuʼn tkubʼ naj sbʼubʼil, il tiʼj tuʼn kyxi xnaqʼtzet xjal tuʼn tkubʼ naj kyajbʼil tuʼn tten nimku tiʼchaq kye ex tuʼn miʼn kyximen oʼkx kyiʼjx. Noqtzun tuʼnj, aqeju kykawbʼil xjal toj ambʼil jaʼlo, nya kyajbʼil ex mintiʼ in kanet tumel kyuʼn tuʼn t-xi kyqʼoʼn xnaqʼtzbʼil lu kye xjal.

AJU KBʼANTEL: Atzunte Tkawbʼil Dios jaku tzʼel tiʼn nya bʼaʼn toj kyanmi xjal tuʼnju in xi tqʼoʼn xnaqʼtzbʼil kye tuʼn tten tbʼanel kymod. * Aju xnaqʼtzbʼil lu in nonin kyiʼj tuʼn tok «kyanmi te akʼaj tukʼix» kynabʼil (Efesios 4:23). Ex a jlu in nonin kyiʼj tuʼn tkubʼ kynajsaʼn kyajbʼil tuʼn tten nim tiʼchaq kye, in nonin kyiʼj tuʼn kytzalaj tiʼjju at kye ex tuʼn kyximen kyiʼj txqantl xjal (Filipenses 2:4; 1 Timoteo 6:6).

AJU NYA BʼAʼN IN TZAJ: Axpe ikx qa chʼixmi kykyaqil xjal at jun tbʼanel kymod ex qa otoq txi qʼoʼn jun tbʼanel xnaqʼtzbʼil kye, at junjun in jaw kyjyoʼn tuʼn kyok te nya bʼaʼn xjal. Aʼyeju xjal in che xnaqʼtzan tiʼj jlu, in kyqʼamaʼn qa tuʼntzun jlu mintiʼ in bʼant tuʼn tel kyiʼn xjal sbʼubʼil. Oʼkx chʼin jaku bʼant kyuʼn aju tuʼn miʼn tchʼiy nya bʼaʼn in tzaj tuʼn sbʼubʼil.

AJU KBʼANTEL: Aju Convención de las Naciones Unidas contra la Corrupción in tzaj tqʼamaʼn qa tuʼn tkubʼ najset sbʼubʼil, il tiʼj tuʼn t-xi kyqʼamaʼn kawbʼil kye xjal tuʼn kyok te «tzʼaqli, te bʼaʼn xjal ex tuʼn tjapun kyuʼn aju in tzaj qanin kye». Tbʼanel aju kyximbʼetz, noqtzun tuʼnj, atzunte tkawbʼil Dios, nya noq oʼkx in tzaj tqʼamaʼn jlu kye xjal, ax ikx in tzaj tqanin qa il tiʼj tuʼn tbʼant jlu kyuʼn xjal. In tzaj tqʼamaʼn Tyol Dios qa aju xjal tajbʼil nim tiʼchaq ex aju in qʼamaʼn nya ax tok yol, mintiʼ toklen toj Tkawbʼil Dios (1 Corintios 6:9-11; Apocalipsis 21:8).

Kykyaqil xjal jaku tzʼel kynikʼ tiʼj tzeʼn jaku che japun qe tley Tkawbʼil Dios kyuʼn, ik tzeʼn bʼant kyuʼn tnejel okslal. Jun techel, tej tajbʼiltoq jun t-xnaqʼtzbʼen Jesús, aju Simón tbʼi, tuʼn t-sbʼun kyiʼj apóstol, el kyikʼun apóstol sbʼubʼil lu ex xi kyqʼamaʼn jlu te: «Tajtz tiʼj tanmiya tuʼnju mya bʼaʼn ma tbʼinchaya». El tnikʼ Simón qa nya bʼaʼn aju tajbʼiltoq tuʼn tbʼant, ex xi tqʼamaʼn kye apóstol tuʼn kynaʼn Dios tiʼj tuʼn tkubʼ naj nya bʼaʼn toj tanmi (Hechos 8:18-24).

Noq te alkyexku tnam teya, jaku tzʼokxa tjaqʼ Tkawbʼil Dios (Hechos 10:34, 35). Aju xnaqʼtzbʼil in xi qʼet tuʼn Tkawbʼil Dios jaku tzʼonin tiʼja tuʼn tel tnikʼa tiʼj alkye tten jaku tzʼokxa tjaqʼ tkawbʼil Dios. Ok che tzalajel testigos de Jehová qa ma txi kyyekʼun teya tzeʼn qe xnaqʼtzbʼil in chex qʼet tiʼj Tyol Dios. Qa ma tzʼel tpaʼna junjun minut tkyaqil seman, kʼelel mastl tnikʼa tiʼj «tqanil bʼaʼn tiʼj tkawbʼil Dios». kyxol qeju xnaqʼtzbʼil kʼelel tnikʼa tiʼj, ax ikx kʼelel tnikʼa tiʼj alkye tten kʼelel tiʼn Dios sbʼubʼil (Lucas 4:43). Yolina kyukʼe testigos de Jehová jatumel najliya moqa jaku tzʼokxa toj qtembʼile jw.org/mam.