1. ¿Tiquʼn kwest o tzʼel toj kywitz tmajen Jehová tuʼn kypakbʼan?

MA TZIKʼ mas te 130 abʼqʼi in che pakbʼan testigos de Jehová. * (Qʼonka twitza tiʼj tqanil t-xe t-xaq uʼj.) Noqtzun tuʼnj, kwest o tzʼel jlu toj kywitz. ¿Tiquʼn? At nim tiquʼn. Tnejel tuʼnju ik tzeʼn qe okslal toj tnejel syent abʼqʼi, noq chʼin kybʼaj ex xi kyqʼoʼn jun xnaqʼtzbʼil aju nya kygan nimku xjal. Nya oʼkxju, ax ikx at nim xjal kubʼ kyximen qa nya nim kyxnaqʼtzbʼil otoq tzʼetz toj tja xnaqʼtzbʼil. Ax ikx tej tetz xoʼn Tajaw il toj kyaʼj tuʼn Jesús, tzaj tzyet tuʼn kyok tmajen Jehová toj joybʼil (Apocalipsis 12:12). Atxix toj ambʼil aju, tzaj tzyet tuʼn kypakbʼan «tuj mankbʼil tqʼijlalil» atz jatumel at «nim yajbʼil» (2 Timoteo 3:1).

2. ¿Alkye tten in qo tzaj tonin Jehová tuʼn qpakbʼan tiʼj Tyol?

² Tajbʼil Jehová tuʼn kypakbʼan tmajen toj tkyaqil twitz Txʼotxʼ, ex mintiʼ jun jaku kubʼ makonte kye. Kyjuʼtzun, toj ambʼil jaʼlo kukx in nonin Jehová qʼij tuʼn qpakbʼan. ¿Alkye tten? O qo el tpaʼn tiʼjju okslabʼil nya ax tok. Axju o bʼant tuʼn Jehová toj ambʼil ojtxi, tej kyetz tiʼn qe aj Israel toj Babilonia (Apocalipsis 18:1-4). Ax ikx, o tzaj t-xnaqʼtzaʼn nim tiʼchaq  qe tuʼn tonin tiʼj teyle junjun qe. Jun techel, o qo tzaj t-xnaqʼtzaʼn tuʼn tbʼant qpakbʼan ex tuʼn qanqʼin toj mujbʼabʼil kyukʼil txqantl (kjawil uʼjit Isaías 48:16-18). Ik tzeʼn ma tzʼok qkeʼyin, in qo tzaj tonin Jehová tuʼn qpakbʼan. ¿In tzaj tyekʼun jlu qa tuʼn Jehová in nikʼ junjun tiʼchaq twitz tkyaqil Txʼotxʼ tuʼntzun tonin qʼij tuʼn qpakbʼan? Mintiʼ. Ax tok, tuʼnju in nikʼ junjun tiʼchaq twitz Txʼotxʼ, nyaxix kwest tuʼn qpakbʼan. Noqtzun tuʼnj, kukx in qo anqʼin kyxol xjal ateʼkx tjaqʼ tkawbʼil Satanás, ex tuʼntzunju kukx in qo el ikʼun ex kukx in tzaj txqantl nya bʼaʼn qiʼj. Aju in bʼant tuʼn Jehová aju in qo tzaj tonin tuʼn tikʼx junjun nya bʼaʼn quʼn ex tuʼn kukx qpakbʼan (Isaías 41:13; 1 Juan 5:19).

3. ¿Alkye tten o japun twiʼ taqikʼ Tyol Dios tkuʼx toj Daniel 12:4?

³ Kyaj tqʼamaʼn Daniel qa tojju «mankbʼil tqʼijlalil», nimku xjal kʼelel tnikʼ tiʼj aju in tzaj t-xnaqʼtzanxix Tyol Dios (kjawil uʼjit Daniel 12:4). ¿Alkye tten o japun twiʼ taqikʼ Tyol Dios lu? Tej chʼixtoq ttzaj tzyet mankbʼil tqʼijlalil, onin Jehová kyiʼj tmajen tuʼn tel kynikʼ tiʼj junjun xnaqʼtzbʼil nim toklen ex tuʼn tel kyikʼun qe xnaqʼtzbʼil nya ax tok. Toj ambʼil jaʼlo, aʼyeju qe tmajen in xi kyxnaqʼtzaʼn twitz tkyaqil Txʼotxʼ aju in tzaj tqʼamaʼn Tyol Dios. Chʼixmi 8 millón kybʼaj xjal o tzʼel kynikʼ tiʼjju in tzaj t-xnaqʼtzaʼn Tyol Dios ex in xi kyxnaqʼtzaʼn kye txqantl xjal. Noqtzun tuʼnj, ¿tiʼ junjun tiʼchaq o tzʼonin qiʼj tuʼn t-xi qpakbʼaʼn Tyol Dios twitz tkyaqil Txʼotxʼ? Qo xnaqʼtzan tiʼj junjun.

4. ¿Toj jteʼ yol jakutoq kanet Tyol Dios kyuʼn xjal toj 1900?

⁴ Toj nimku syent abʼqʼi, at nim nejenel kye okslabʼil xi kyqʼamaʼn kye xjal tuʼn miʼn tkubʼ kyuʼjin Tyol Dios. Ex el ikʼun kywitz qeju xjal in kubʼtoq kyuʼjin Tyol Dios, axpe ikx at junjun kyxol qeju kubʼ kyqʼoʼn Tyol Dios kyoj txqantl yol e kubʼ bʼiyoʼn. Ma bʼant junlo 200 abʼqʼi, nim kʼloj xjal kubʼ kyqʼoʼn Tyol Dios, tkyaqil moqa junjun plaj, kyoj txqantl yol moqa etz kyuʼn toj kʼuxbʼil kyoj junlo 400 yol. Tej tjapun abʼqʼi 1900, jakutoq kanet Tyol Dios kyuʼn xjal kyoj nimku lugar ex kyoj nimku yol. Tbʼaneltoq jlu. Noqtzun tuʼnj, chʼixmi kykyaqil xjal mintiʼtoq in nel kynikʼ tiʼj Tyol Dios.

5. ¿Tiʼ o bʼant kyuʼn testigo de Jehová tuʼn kyonin kyiʼj xjal tuʼn tel kynikʼ tiʼj Tyol Dios?

⁵ Ojtzqiʼntoq kyuʼn tmajen Jehová qa iltoq tiʼj tuʼn kyonin kyiʼj xjal tuʼn tel kynikʼ tiʼjju in tzaj tqʼamaʼn Tyol Dios, ex atzun jlu bʼant kyuʼn. Tnejelku, ajbʼen junjun Tyol Dios kyuʼn aju attoq toj ambʼil aju ex xi kyqʼoʼn qe Tyol Dios lu kye xjal. Atzun toj abʼqʼi 1950 etz jun akʼaj Tyol Dios kyuʼn, aju tok tbʼi te Traducción del Nuevo Mundo. Toj ambʼil jaʼlo, at Traducción del Nuevo Mundo toj mas te 120 yol, qa tkyaqil ex qa oʼkx aju kubʼ tzʼibʼen toj yol griego. Ax ikx toj abʼqʼi 2013 bʼaj bʼinchaʼn chʼintl Traducción del Nuevo Mundo toj inglés. Aju etz toj abʼqʼi lu mas nya kwest tuʼn tel qnikʼ tiʼj ex tuʼn tkubʼ kyoj txqantl yol. Tukʼe jlu, ¡mas nya kwest tuʼn t-xi qyekʼun aju in tzaj tqʼamaʼn Tyol Dios!

6, 7. a) ¿Alkyeqe qʼoj o che ok kyoj 100 abʼqʼi tzma in che ikʼ? b) ¿Alkye tten o tzʼajbʼen ambʼil te mujbʼabʼil quʼn?

⁶ Kyoj qeju 100 abʼqʼi tzma in che ikʼ, o tzʼok nim qʼoj axpe ikx o che ok kabʼe nimaq qʼoj. O che kyim nim millón xjal kyoj qʼoj lu. Qa ikju, ¿tiquʼn in xi qqʼamaʼn qa at mujbʼabʼil ex tzeʼn o tzʼonin tuʼn qpakbʼan? Qo xnaqʼtzan tiʼj. Jun erman aju Nathan Knorr tbʼi qʼil twitz aqʼuntl kye testigos de Jehová tej tok Tkabʼ Nimaq Qʼoj twitz Tkyaqil Txʼotxʼ. Aju erman lu etz tqʼoʼn jun chikʼbʼabʼil toj jun nimaq chmabʼil toj abʼqʼi 1942, aju tok tbʼi: «Paz... ¿será duradera?». Etz tchikʼbʼaʼn erman lu aju yol kyaj qʼamaʼn toj uʼj Apocalipsis capítulo 17. Ex tzaj tqʼamaʼn qa mintiʼ ul Armagedón toj ambʼil aju. Ex  tqʼama qa aj tikʼ qʼoj, tzul jun ambʼil te mujbʼabʼil (Apocalipsis 17:3, 11).

⁷ Aju yol kyaj qʼamaʼn toj capítulo 17 te uʼj Apocalipsis japun twiʼ ex ul jun ambʼil te mujbʼabʼil. Nya t-xilen jlu qa mintiʼ in nok qʼoj twitz tkyaqil Txʼotxʼ. Tej tikʼ Tkabʼ Nimaq Qʼoj twitz Tkyaqil Txʼotxʼ, o che ok txqantl qʼoj ex o che kyim nim millón xjal toj. Noqtzun tuʼnj, o ten mujbʼabʼil kyoj nimku tnam, ex o tzʼajbʼen ambʼil lu quʼn tuʼn qpakbʼan mastl. ¿Tiʼ o bʼant tuʼn jlu? Toj ambʼil jaʼlo, ma japun kybʼaj testigos de Jehová te chʼixmi wajxaq millón. Nimxix kyajlal qa ma kubʼ qmojbʼaʼn kyukʼil 110,000 kyajlal attoq tej tok Tkabʼ Nimaq Qʼoj twitz Tkyaqil Txʼotxʼ (kjawil uʼjit Isaías 60:22). Ik tzeʼn in nel qnikʼ tiʼj, o bʼant tuʼn t-xi qpakbʼaʼn Tyol Dios kye nimku xjal toj ambʼil te mujbʼabʼil.

8, 9. a) ¿Tiquʼn mas nya kwest tuʼn qxiʼ kyoj txqantl tnam toj ambʼil jaʼlo? b) ¿Tiʼ jaku bʼant quʼn tuʼnju ateʼ mas tbʼanel iqbʼil kye xjal jaʼlo?

⁸ Tej ttzaj ttzyet tuʼn kypakbʼan tmajen Dios, kwesttoq tuʼn kyxiʼ xjal kyoj txqantl tnam. Jun techel, oʼkxtoq at 8,000 kar ex noq chʼinx tbʼanel bʼe at toj abʼqʼi 1900 atz Estados Unidos. Atzun jaʼlo, at mas te 1,500 millón kar twitz tkyaqil Txʼotxʼ ex at nim lugar at nim tbʼanel bʼe kyoj. Tuʼn jlu, nya kwest tuʼn qxiʼ pakbʼal kyoj tnam najchaq ateʼ. Axpe ikx qa in qo anqʼin atz jatumel kwest tuʼn qxiʼ kyoj txqantl tnam ex qa il tiʼj tuʼn t-xi qbʼetin nim, in nok tilil quʼn tuʼn qpon jatumel ateʼ xjal tuʼn t-xi qqʼamaʼn Tyol Dios kye (Mateo 28:19, 20).

⁹ Ax ikx at junjuntl iqbʼil xjal in qo tzaj kyonin tuʼn qpakbʼan. Jun techel, tuʼnju ateʼqe camión, qe bark ex qe tren, nyaxix nim seman jaku txi tiʼn tuʼn kypon qsamaʼn Tuʼjil Tyol Dios ex txqantl onbʼil tiʼj Tyol Dios kye qerman aqeju in che anqʼin kyoj lugar najchaq. Ex tuʼnju ateʼ avión, jaku cheʼx nimku qerman kyoj txqantl tnam qʼol chikʼbʼabʼil kyoj nimaq chmabʼil ex qʼuqbʼal kykʼuʼj erman kyoj Ja te Chmabʼil. Aqeju ansyan in che bʼet kyojele Ja te Chmabʼil, qe ateʼ toj Kʼloj ansyan toj Ninja qʼil twitz aqʼuntl, qe in cheʼx samaʼn pakbʼal kyoj junjuntl tnam, qe junjun ateʼ kyxol qeju Kʼloj Xjal Qʼil Twitz Aqʼuntl kye testigos de Jehová ex qeju txqantl erman aqe in che ajbʼen toj kytxuylal ninja qʼil twitz aqʼuntl, jaku cheʼx kyoj txqantl tnam kyoj avión tuʼn kyxiʼ qʼuqbʼal kykʼuʼj erman ex tuʼn kyxiʼ xnaqʼtzal kye erman. Tkyaqil jlu in nonin tiʼj ttnam Jehová tuʼn tten mujbʼabʼil kyxol (Salmo 133:1-3).

10. ¿Jatumel in najbʼen yol inglés?

¹⁰ Toj tnejel syent abʼqʼi, chʼixmi kykyaqil xjal, aqeju ateʼkx tjaqʼ tkawbʼil tnam Roma, in che yolin  toj yol griego. Toj ambʼil jaʼlo, nimku xjal in che yolin toj inglés. At jun uʼj aju in yolin tiʼj yol inglés, in tzaj tqʼamaʼn qa jun tiʼj kyaje xjal twitz tkyaqil Txʼotxʼ in yolin inglés moqa in nok toj twiʼ. At nim xjal in che xnaqʼtzan tuʼn kyyolin toj yol lu tuʼnju a yol lu mas in najbʼen kyoj kʼaẍjel, toj kykawbʼil xjal, toj junjun nimaq kyxnaqʼtzbʼil xjal ex tuʼn tkubʼ bʼinchet junjun kʼuxbʼil.

11. ¿Jatumel in najbʼen aju yol inglés quʼn aqoʼ testigos de Jehová?

¹¹ Nim maj in najbʼen aju yol inglés quʼn ex in nonin qiʼj tuʼn qpakbʼan. Ma tzikʼ nim abʼqʼi, tnejel in che etz quʼj toj inglés ex yajxitl i etz kyoj txqantl yol. Tuʼnju nim xjal in che yolin toj inglés toj tkyaqil twitz Txʼotxʼ, nim xjal in bʼanttoq kyuʼjin kyiʼj quʼj toj inglés. Ax ikx, aju yol inglés atzunju in najbʼen kyuʼn erman toj kytxuylal ninja qʼil twitz aqʼuntl. Ex axju yol inglés in najbʼen kyuʼn erman kyoj nimaq tnam, aʼyeju in che pon kʼamol xnaqʼtzbʼil atz Patterson (Nueva York).

12. a) ¿Toj jteʼ yol in che kubʼ qʼet onbʼil tiʼj Tyol Dios? b) ¿Alkye tten in qo tzaj kyonin junjun programa te computadora?

¹² In najbʼenxix aju yol inglés quʼn, noqtzun tuʼnj, aju aqʼuntl il tiʼj tuʼn tbʼant aju tuʼn qpakbʼan tiʼj Tyol Dios toj tkyaqil twitz Txʼotxʼ. Tuʼntzunju, in che kubʼ qʼet uʼj te onbʼil tiʼj Tyol Dios kyoj mas te 700 yol. ¿Alkye tten in bʼant jlu quʼn? Tukʼil onbʼil in tzaj kyqʼoʼn computadora ex in najbʼen jun programa quʼn aju tok tbʼi te MEPS aju in najbʼen tuʼn tbʼaj bʼinchet qe uʼj kyoj nimku yol. Tukʼilju onbʼil lu, at mujbʼabʼil kyxol testigos de Jehová ex in nel kynikʼ tiʼjju yol «tuj tumelxix», toj juntl yol, in nel kynikʼ tiʼjju xnaqʼtzbʼil in tzaj tqʼoʼn Tyol Dios (kjawil uʼjit Sofonías 3:9).

13, 14. ¿Alkye tten o che onin junjun ley qiʼj ex aju in tzaj kyqʼamaʼn jwes?

¹³ Toj tnejel syent abʼqʼi e onin qe kyley xjal te Roma kyiʼj okslal tuʼn kypakbʼan. Ax ikx jaʼlo, at kyley nimku tnam in qo tzaj kyonin tuʼn qpakbʼan. Jun techel tiʼj, at junjun ley toj tnam Estados Unidos aju in tzaj tqʼoʼn ambʼil kye xjal tuʼn tten kyokslabʼil, tuʼn kyyolin tiʼjju in nok qʼuqeʼ kykʼuʼj tiʼj ex tuʼn tok kychmon kyibʼ. Ax ikx in tzaj tqʼoʼn ambʼil qe tuʼn tten kytxuylal ninja qʼil twitz aqʼuntl toj tnam lu, atz jatumel in bʼaj ximet alkye tten kxel pakbʼet Tyol Dios twitz tkyaqil Txʼotxʼ. Ax tok, nya toj tkyaqil maj o tzaj qʼoʼn ambʼil qe. Tuʼntzunju, at maj in qoʼx kywitz jwes tuʼn qkolin tiʼjju in qpakbʼaʼn (Filipenses 1:7). Ex qa in nel kyiʼn qe jwes ambʼil qe tuʼn qpakbʼan, in qoʼx kywitz qeju jwes mas nim kyoklen ex o qo tzaj kyonin jlu nimku maj.

¹⁴ Ax ikx kyoj txqantl tnam at maj in qoʼx  kywitz jwes tuʼn ttzaj kyqʼoʼn ambʼil tuʼn qajbʼen te Jehová ex tuʼn qpakbʼan. Ex qa mintiʼ in tzaj kyqʼoʼn jlu ambʼil qe, in qoʼx kyukʼil jwes kyoj junjuntl nimaq tnam. Jun techel, o qoʼx nim maj toj Tribunal Europeo de Derechos Humanos. Tej tjapun junio te 2014, tzaj tqʼoʼn Tribunal Europeo de Derechos Humanos 57 maj ambʼil qe. Ex chʼixmi kykyaqil tnam te Europa, il tiʼj tuʼn t-xi kybʼiʼn jlu. In qo el ikʼun kyuʼn «kykyaqil xjal», noqtzun tuʼnj, at nimku tnam in tzaj kyqʼoʼn kyley ambʼil qe tuʼn qajbʼen te Jehová (Mateo 24:9).

15. a) ¿Tzeʼn qe kʼuxbʼil aʼyeju in che etz uʼj kyoj toj ambʼil jaʼlo? b) ¿Alkye tten in che onin qe akʼaj kʼuxbʼil lu qiʼj?

¹⁵ Toj nimku ambʼil ajbʼen jun kʼuxbʼil kyuʼn xjal aju in najbʼen tuʼn kyetz uʼj toj ex aju ma bʼet mas te 500 abʼqʼi tkubʼlen bʼinchaʼn. Ex kyoj qeju 200 abʼqʼi tzma in che ikʼ, o che bʼaj bʼinchaʼn junjuntl akʼaj. Tuʼn jlu, jaku che etz naj uʼj ex nimaq uʼj, ex mas nya nim pwaq jaku txi tiʼn ex mas tbʼanel aj kyetz. Aqeju kʼuxbʼil lu, nimxix in qo tzaj kyonin. ¿Alkye tten? Tuʼn tel qnikʼ tiʼj, qqʼonku jun techel. Toj 1879 etz tnejel uʼj Aju Xqʼuqil ex oʼkx etz toj inglés. Mintiʼtoq jun foto nix jun dibuj toj ex noq 6,000 etz. Atzunte toj ambʼil jaʼlo, in netz toj mas te 200 yol, ateʼkux tbʼanel foto toj, at nim tcoloril ex teyele junjun tajlal, in netz mas te 50 millón uʼj.

16. ¿Alkye junjun tiʼchaq in che onin qiʼj tuʼn t-xi qpakbʼaʼn Tyol Dios twitz tkyaqil Txʼotxʼ? (Qʼonka twitza tiʼj tnejel tilbʼilal.)

¹⁶ Kyoj qeju 200 abʼqʼi tzma in che ikʼ o chi kubʼ bʼinchaʼn nim tiʼchaq aʼyeqe in che onin qʼij tuʼn t-xi qpakbʼan Tyol Dios twitz tkyaqil Txʼotxʼ. Ma qo yolin kyiʼj tren, qe kar ex qe avión. Junjuntl techel aju biciclet, aju máquina tuʼn qtzʼibʼin, aju kʼuxbʼil in che etz uʼj toj kye moẍ, aju telégrafo, aju yolbʼil, aju cámara in che el foto tuʼn, aju kʼuxbʼil tuʼn tgrabarit audio ex video, aju radio, aju televisión, aju computadora, aju Internet ex qe película. Ax tok, nya aqoʼ testigos de Jehová in kubʼ qbʼinchaʼn qe tiʼchaq lu, noqtzun tuʼnj, in che ajbʼen quʼn tuʼn kyetz uʼj toj ik tzeʼn Tyol Dios ex txqantl uʼj toj nimku yol ex tuʼn t-xi qpakbʼaʼn Tyol Dios twitz tkyaqil Txʼotxʼ. Iktzun tten in japun twi yol tkuʼx toj Isaías 61:6, jatumel tqʼama Jehová jlu te ttnam: «Che waʼle tiʼj kyqʼinumabʼl mastl nasyon» (kjawil uʼjit).

17. a) ¿Tiʼ qʼanchaʼlxix tiʼj pakbʼabʼil? b) ¿Tiquʼn tajbʼil Jehová tuʼn qaqʼunan junx tukʼil?

¹⁷ Qʼanchaʼlxix qa a Jehová in nonin qiʼj tuʼn t-xi qpakbʼaʼn Tyol twitz tkyaqil Txʼotxʼ. Nya il tiʼj tuʼn qajbʼen tuʼn Jehová, noqtzun tuʼnj, o tzaj tqʼoʼn qoklen lu tuʼnju kʼujlan qoʼ tuʼn ex taj tuʼn qaqʼunan tukʼil. Iktzun tten in kubʼ qyekʼun qa kʼujlaʼn quʼn ex qa kʼujlaʼn qe xjal quʼn (Marcos 12:28-31; 1 Corintios 3:9). Ax tok, qkyaqilx in xi qqʼoʼnxix chjonte te Dios tuʼnju in qo tzaj tonin tuʼn t-xi qpakbʼaʼn Tyol twitz tkyaqil Txʼotxʼ. Tuʼntzunju, tzʼajbʼenx tkyaqil ambʼil quʼn tuʼn qyolin tiʼj Jehová ex tiʼj Tkawbʼil kyukʼil xjal.