Noqpe ximana tiʼj tiʼ jaku bʼaj noqwit oʼkx jun kawbʼil in kawin kyibʼaj kykyaqil xjal aju in tzaj tiʼn tbʼanel kye xjal. Toj ambʼil jaʼlo, nim xjal ateʼ toj yajbʼil tuʼn mebʼayil, atzun junjuntl xjal at nim kypwaq moqa qʼinun qe. Noqtzun tuʼnj, noqwit at jun aj kawil in kawin twitz tkyaqil Txʼotxʼ aju in qʼaqʼin tkʼuʼj kyiʼj xjal, jaku tzʼonin kyiʼj kykyaqil xjal ex jaku tzaj tqʼoʼn tkyaqilju at tajbʼen kye xjal. ¿Tiʼ teya t-xim tiʼj? ¿Jakupe bʼant tkyaqil jlu tuʼn kykawbʼil xjal? (Uʼjinxa Jeremías 10:23.)

Kyoj qe ambʼil o che ikʼ, nim qe aj kawil mintiʼ in japun twiʼ kyximbʼetz tuʼn kyonin kyiʼj xjal, mas kyiʼj qe xjal ateʼ toj mebʼayil (prowil), ex ateʼ junjuntl aj kawil nya bʼaʼn xjal qe (Eclesiastés 4:1; 8:9). Noqtzun tuʼnj, aju Dios at tkyaqil ipumalj tukʼil, o tzaj ttziyen qa kbʼel tqʼoʼn jun aj kawil te kyxel qeju aj kawil ateʼ jaʼlo. Aju aj Kawil lu, ax tok kʼokel t-xqʼuqin qe xjal. (Uʼjinxa Isaías 11:4 ex Daniel 2:44.)

O jaw t-skʼoʼn Jehová jun tbʼanel aj Kawil tuʼn tkawin tibʼaj tkyaqil twitz Txʼotxʼ, a Jesucristo, aju Tkʼwaʼl (Lucas 1:31-33). Tej tten Jesús tzalu twitz Txʼotxʼ, ten nim tajbʼil tuʼn tonin kyiʼj xjal. Ex tuʼnju toklen te aj Kawil, ok ktel mujbʼabʼil tuʼn kyxol kykyaqil tnam ex ok kʼelel tiʼn tkyaqil yajbʼil kyiʼj kykyaqil xjal. (Uʼjinxa Salmo 72:8, 12-14.)

¿Kykyaqilpe qe xjal tbʼanel in nela toj kywitz tuʼn tok Jesús te aj Kawil? Nya kykyaqil. Noqtzun tuʼnj, at nim tpasens Jehová (2 Pedro 3:9). In tzaj tqʼoʼn Jehová ambʼil kye kykyaqil xjal tuʼn kytzalaj tiʼj toklen Jesús te aj Kawil. Chʼix tul ambʼil tuʼn tel tiʼn Jesús kykyaqil qe xjal nya bʼaʼn ex kbʼel tqʼoʼn mujbʼabʼil kyxol xjal ex ya mlay tentl xobʼajil toj tkyaqil twitz Txʼotxʼ. (Uʼjinxa Miqueas 4:3, 4.)