1, 2. a) ¿Tiʼ il tiʼj tuʼn tbʼant quʼn qa qajbʼil tuʼn qanqʼin te jumajx? b) ¿Tiʼ kʼonil qiʼj tuʼn kukx qten tzʼaqlixix ajxi tul kanun xitbʼil?

AJ QOK lepeʼ tiʼj Jesús, ik tten ik tzeʼn aj t-xi tzyet tuʼn qbʼet toj jun bʼe. Aj tpon bʼaj aju bʼe lu quʼn, atztzun taʼ aju chwinqlal te jumajx. Tqʼama Jesús jlu: «Alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mateo 24:13). ¿Tiʼ kbʼantel quʼn tuʼn qanqʼin te jumajx? Il tiʼj tuʼn kukx qajbʼen te Dios tzmaxi aj qkyim moqa tzmaxi aj tul xitbʼil. Noqtzun tuʼnj, at junjun tiʼchaq jaku qo el tlaqʼbʼaʼn tiʼj Dios ex tuʼn miʼn qajbʼentl te (1 Juan 2:15-17). ¿Tiʼ kbʼantel quʼn tuʼn kukx qajbʼen te Dios tzmaxi aj qkyim moqa tzmaxi aj tul xitbʼil?

² Il tiʼj tuʼn tel qkanoʼn techel kyaj tqʼoʼn Jesús. In tzaj t-xnaqʼtzan Tyol Dios tzeʼn te Jesús, tuʼntzunju, qa ma qo xnaqʼtzan tiʼjju in tzaj tqʼamaʼn Tyol Dios tiʼj Jesús, jaku tzʼok qkʼujlaʼn ex jaku tzʼok qʼuqe qkʼuʼj tiʼj (kjawil uʼjit 1 Pedro 1:8, 9). Tqʼama apóstol Pedro qa il tiʼj tuʼn qok lepeʼxix tiʼj techel kyaj tqʼoʼn Jesús (1 Pedro 2:21). Qa ma bʼant quʼn ikju, kukx  kʼikʼex quʼn ajxi tul kanun xitbʼil. * (Qʼonka twitza tiʼj tqanil t-xe t-xaq uʼj.) Toj xnaqʼtzbʼil ma kyaj, o xnaqʼtzan tiʼj alkye tten tuʼn tkubʼ qin qibʼ ik tzeʼn te Jesús ex tuʼn ttzaj qʼaqʼin qkʼuʼj kyiʼj txqantl. Atzun toj xnaqʼtzbʼil lu, kʼelel qnikʼ tiʼ kbʼantel quʼn tuʼn miʼn qtzaj xobʼ ex alkye mas bʼaʼn tuʼn tbʼant quʼn ik tzeʼn te Jesús.

3. a) ¿Tiʼ t-xilen aju tuʼn miʼn qtzaj xobʼ? b) ¿Tiʼ kʼonil qiʼj tuʼn miʼn qtzaj xobʼ?

³ Aju tuʼn miʼn qtzaj xobʼ, a t-xilen qa il tiʼj tuʼn tten qipun ex qa il tiʼj tuʼn tikʼx quʼn aj ttzaj junjun nya bʼaʼn. Ax ikx a t-xilen tuʼn qkolin tiʼjju bʼaʼn ex tuʼn miʼn ttzaj qqʼoj ex tuʼn kukx qajbʼen te Jehová aj qok weʼ twitz nya bʼaʼn. Tuʼnju nya qajbʼil tuʼn ttzaj tbʼis Jehová quʼn, mintiʼ in xiʼ qqʼoʼn ambʼil tuʼn qtzaj xobʼ kyuʼn xjal (1 Samuel 11:7; Proverbios 29:25). Qa ma tzʼok qʼuqe qkʼuʼj tiʼjju in tzaj tziyen Jehová, ok kʼonil qiʼj tuʼn qximen tiʼjju ambʼil tzul ex nya kyiʼj qeju nya bʼaʼn in che tzaj qiʼj (Salmo 27:14). Ex qa kʼujlaʼn qe xjal quʼn, ok qo onil kyiʼj maske jaku naj qchwinqlal tuʼn jlu (Juan 15:13). ¿Tiʼ kʼonil qiʼj tuʼn miʼn qtzaj xobʼ? Aju qa ma tzʼok qʼuqe qkʼuʼj tiʼj Jehová ex qa ma tzʼel qkanoʼn tiʼj Jesús (Salmo 28:7).

4. ¿Alkye tten mintiʼ tzaj xobʼ Jesús tej tyolin toj tja Dios? (Qʼonka twitza tiʼj tnejel tilbʼilal.)

⁴ Toj jun maj mintiʼ tzaj xobʼ Jesús tej tten «tuj tja Dios, qʼuqltoq kyxol qe xnaqʼtzal tiʼj ley» (kjawil uʼjit Lucas 2:41-47). Tzmatoq 12 abʼqʼi iqʼin tuʼn Jesús ex atzun kye qeju xnaqʼtzal tiʼj ley, attoq nim kyojtzqibʼil tiʼj tley Moisés ex ax ikx at nim kyojtzqibʼil tiʼjju kycostumbr qe xjal judiy ex tuʼn jlu kwesttoq tuʼn t-xi kybʼiʼn aju in tzaj tqʼamaʼn Ley. Noqtzun tuʼnj, mintiʼ tzaj xobʼ Jesús. Tuʼntzunju, xi tqanin nim xjelbʼitz kye. Nya noq alkyexku xjelbʼitz xi tqanin Jesús ik tzeʼn jaku txi tqanin jun tal kʼwaʼl. Oklo kyqʼoʼn aj xnaqʼtzal qwiʼ kyiʼj xjelbʼitz lu ex e oklo ten ximel tiʼjju xi tqanin Jesús kye. Ax ikx xilo kyqanin xjelbʼitz te Jesús tuʼn ttzaj tqʼoj, noqtzun tuʼnj, mintiʼ tzaj tqʼoj Jesús. Aʼyeju e bʼin tiʼj Jesús, axpe ikx qeju aj xnaqʼtzal, etz kywitz tiʼjju nim tojtzqibʼil Jesús at ex tiʼjju alkye tten yolin Jesús. Mintiʼ tzaj xobʼ Jesús ex kolin tiʼjju axix tok.

5. ¿Alkye tten kubʼ tyekʼun Jesús qa mintiʼ tzaj xobʼ tej tpakbʼan?

⁵ Mintiʼ tzaj xobʼ Jesús tej tpakbʼan ex kubʼ tyekʼun te nimku tten. Jun techel, mintiʼ tzaj xobʼ tuʼn t-xi tqʼamaʼn kye xjal qa in che kubʼ sbʼuʼn kyuʼn nejenel kye nya ax tok okslabʼil (Mateo 23:13-36). Ax ikx, mintiʼ xi tqʼoʼn ambʼil tuʼn tkubʼ tiʼj tuʼnju at twitz Txʼotxʼ (Juan 16:33). Kukx pakbʼan Jesús maske ok tilel kyuʼn xjal tuʼn miʼntl tpakbʼan (Juan 5:15-18; 7:14). Ax ikx, i ex tlajoʼn Jesús kabʼe maj qeju xjal in che kʼayin toj tja Dios tuʼn kykambʼan pwaq (Mateo 21:12, 13; Juan 2:14-17).

6. ¿Alkye tten mintiʼ tzaj xobʼ Jesús tej tanqʼin mankbʼil qʼij tzalu twitz Txʼotxʼ?

⁶ Qo xnaqʼtzan tiʼj alkye tten mintiʼ tzaj xobʼ Jesús tej tanqʼin mankbʼil qiʼj twitz Txʼotxʼ. Ojtzqiʼn tuʼn Jesús tiʼtoq tuʼn tbʼaj aj t-xi kʼayin tuʼn Judas. Ex xi tqʼamaʼn jlu te: «Aju ok tbʼinchaʼya, bʼincham naja» (Juan 13:21-27). Mintiʼ kubʼ tewin tibʼ Jesús tej kypon soldad tzyul te. Maske jakutoq kyim Jesús, xi tqʼon tibʼ ex xi tqʼamaʼn kye aj qʼoj tuʼn t-xi kyqʼoʼn ambʼil tuʼn kyxi kytzaqpin qe t-xnaqʼtzbʼen (Juan 18:1-8). Tej tok Jesús toj xjelbʼitz kyuʼn nejenel kyxol aj Judiy, mintiʼ tzaj xobʼ tuʼn t-xi tqʼamaʼn kye qa a te in nok te Jesucristo ex qa a Tkʼwaʼl Dios. Jyon nejenel kye pal alkye tten tuʼn tkubʼ bʼiyet Jesús, noqtzun tuʼnj, mintiʼ tzaj xobʼ Jesús (Marcos 14:60-65). Kukx ajbʼen Jesús te Jehová tzmaxi tej tkubʼ bʼyoʼn kyuʼn aj qʼoj. Tuʼntzunju, chʼinxtoq tkyim, tqʼama: «Ma japun tkyaqil» (Juan 19:28-30).

7. a) Aya kuʼxin, ¿tiʼ in tnaʼna tuʼnju testigo de Jehová teya? b) ¿Alkye tten jaku kubʼ tyekʼuna qa mintiʼ in tzaj xobʼa?

⁷ ¿Tiʼ jaku bʼant kyuʼn kuʼxin tuʼn miʼn kytzaj xobʼ ik tzeʼn te Jesús toj tja xnaqʼtzbʼil? Ateʼ nim kuʼxin testigo de Jehová, mintiʼ in che tzaj xobʼ toj  tja xnaqʼtzbʼil ex in xi kyqʼamaʼn kye kyukʼil ex kye qeju aj xnaqʼtzal qa testigo de Jehová qeʼ. Qa kuʼxin teya, jaku kubʼ tyekʼuna qa mintiʼ in tzaj xobʼa aj t-xi tqʼamaʼna toj tja xnaqʼtzbʼil qa testigo de Jehová teya maske ma che ok ten txqantl xmayil tiʼja. Iktzun tten kbʼel tyekʼuna qa in tzalaja tuʼnju testigo de Jehová teya (kjawil uʼjit Salmo 86:12). Atlo junjun aj xnaqʼtzal kyajbʼil tuʼn t-xi tnimana qa mintiʼ jun bʼinchal tkyaqilju at, noqtzun tuʼnj, jaku tzʼok qʼuqeʼ tkʼuʼja qa axix tok tkyaqilju in tzaj tqʼamaʼn Tyol Dios. Qa at jun ma tzaj tqanin teya tiquʼn in kubʼ t-ximana qa at jun bʼinchal tkyaqil, jaku tzʼajbʼen tuʼna aju uʼj El origen de la vida tuʼn ttzaqʼwet aju in tzaj qanin teya (1 Pedro 3:15). Iktzun tten ok ktzalajela tuʼnju in kolina tiʼjju in tzaj tqʼamaʼn Tyol Dios.

8. ¿Tiquʼn mintiʼ tuʼn qtzaj xobʼ aj qpakbʼan?

⁸ Ax ikx mintiʼ in qo tzaj xobʼ aj qpakbʼan (Hechos 14:3). ¿Tiquʼn mintiʼ tuʼn qtzaj xobʼ aj qpakbʼan? Tnejel, tuʼnju in qo pakbʼan tiʼjju in tzaj tqʼamaʼn Tyol Dios, ex ax tok aju in tzaj tqʼamaʼn Tyol Dios (Juan 17:17). Tkabʼ, tuʼnju in qo aqʼunan ex in qo ajbʼen te Dios, ex in qo tzaj tonin tukʼil xewbʼaj xjan (1 Corintios 3:9; Hechos 4:31). Ex toxin, tuʼnju kʼujlaʼn Jehová ex qe xjal quʼn. Atzun jlu in nonin qiʼj tuʼn tok tilil quʼn tuʼn qpakbʼan (Mateo 22:37-39). Tuʼnju mintiʼ in qo tzaj xobʼ, mintiʼ in xi qqʼoʼn ambʼil tuʼn tkyaj qtzaqpiʼn tuʼn qpakbʼan. Qajbʼil tuʼn t-xi qyekʼun aju axix tok kye qeju in che kubʼ sbʼuʼn kyuʼn nejenel kye okslabʼil (2 Corintios 4:4). Kukx qo pakbʼal maske nya kyajbʼil xjal tuʼn tok kybʼiʼn Tyol Dios ex maske ma qo el ikʼun kyuʼn (1 Tesalonicenses 2:1, 2).

9. ¿Alkye tten jaku kubʼ qyekʼun qa mintiʼ in qo tzaj xobʼ aj qok weʼ twitz nya bʼaʼn?

⁹ Ax ikx in kubʼ qyekʼun qa mintiʼ in qo tzaj xobʼ aj qok weʼ twitz nya bʼaʼn. Qa ma tzʼok qeʼ qkʼuʼj tiʼj Jehová, tzul tqʼoʼn qipun ex qʼuqbʼil qkʼuʼj tuʼn tikʼx nya bʼaʼn quʼn. Jun techel, qa ma kyim jun toj qja moqa jun qamiw, in qnaʼn bʼis, noqtzun tuʼnj, mintiʼ in naj qʼuqbʼil qkʼuʼj at. Ojtzqiʼn quʼn qa tzul tqʼoʼn Jehová qipun tuʼnju ate «Diosju kukx in tqʼuqbʼaʼn qkʼuʼj» (2 Corintios 1:3, 4; 1 Tesalonicenses 4:13). Qa yabʼ qoʼ, maske in qnaʼn nim kʼixkʼoj, mintiʼ in tzaj qkʼamoʼn jun qʼanbʼil aju in tzaj tqʼamaʼn Tyol Dios qa nya bʼaʼn tuʼn tajbʼen quʼn (Hechos 15:28, 29). Qatzun qa in qo bʼisun, atlo maj in kubʼ qnaʼn nya bʼaʼn qiʼjx, noqtzun tuʼnj, mintiʼ in xi qqʼoʼn ambʼil tuʼn qkubʼ tuʼn bʼis. Ojtzqiʼn quʼn qa tkyaqil maj in nonin Jehová kyiʼj qeju ateʼ toj kʼixkʼoj (1 Juan 3:19, 20; Salmo 34:18). * (Qʼonka twitza tiʼj tqanil t-xe t-xaq uʼj.)

10. a) ¿Tiʼ kbʼantel quʼn tuʼn tjaw qjyoʼn aju mas bʼaʼn tuʼn tbʼant? b) ¿Alkye tten jaku kubʼ qyekʼun qa ma jaw qjyoʼn aju mas bʼaʼn?

¹⁰ Tuʼn qximen tiʼjju alkye mas bʼaʼn tuʼn tbʼant, il tiʼj tuʼn tel qnikʼ tiʼj alkye bʼaʼn ex alkye nya bʼaʼn ex tuʼn tjaw qjyoʼn aju bʼaʼn (Proverbios 15:21; Hebreos 5:14). Qa ma jaw qjyoʼn aju mas bʼaʼn, in kubʼ qyekʼun aj tjaw qskʼoʼn qe tbʼanel qyol tuʼn tonin kyiʼj txqantl ex nya tuʼn t-xi qqʼamaʼn jun tkʼayil yol kye. Ex atzun jlu tajbʼil Dios (Proverbios 11:12, 13). Ax ikx in kubʼ qyekʼun qa ma jaw qjyoʼn aju mas bʼaʼn, qa mintiʼ in tzaj naj qqʼoj (Proverbios 14:29). Qa ma jaw qjyoʼn aju mas bʼaʼn, tuʼn jlu in nok qamiwin mastl qibʼ tukʼe Dios. ¿Tiʼ jaku bʼant quʼn tuʼn tjaw qjyoʼn aju mas bʼaʼn? Il tiʼj tuʼn qxnaqʼtzan tiʼj Tyol Dios ex tuʼn tkubʼ qbʼinchaʼn aju in tzaj tqʼamaʼn (Proverbios 2:1-5, 10, 11). Ax ikx jaku tzʼel qkanoʼn tiʼj alkye tten jaw t-skʼoʼn Jesús aju mas bʼaʼn tuʼn tbʼant.

11. ¿Alkye tten jaw tjyoʼn Jesús aju mas bʼaʼn tuʼn tbʼant?

¹¹ ¿Alkye tten jaw tjyoʼn Jesús aju mas bʼaʼn tuʼn  tbʼant? Qo xnaqʼtzan tiʼj oxe tten. Tnejel, tej tyolin. Etz kywitz xjal tiʼj tyol Jesús tej tpakbʼan tuʼnju tojxix tumel xi tqʼoʼn xnaqʼtzbʼil kye (Mateo 7:28; Lucas 4:22). Ax ikx xi tqʼamaʼn ex jaw tuʼjin aju Tyol Dios nim maj kye xjal. Ojtzqiʼntoq tuʼn Jesús alkye taqikʼ Tyol Dios tuʼn tajbʼen tuʼn tiʼj junjun tiʼchaq (Mateo 4:4, 7, 10; 12:1-5; Lucas 4:16-21). Nya oʼkxju, ax ikx kuʼpin toj kyanmi xjal tej t-xi tchikʼbʼaʼn Tyol Dios kye. Jun techel, tej otoq jaw anqʼin Jesús, ok ten yolil kyukʼil qe t-xnaqʼtzbʼen tej in che bʼettoq ex xi tchikʼbʼaʼn kye alkye t-xilen junjun taqikʼ tyol Dios in yolin tiʼjx. Tuʼn jlu ok tqʼuqbʼaʼn kykʼuʼj t-xnaqʼtzbʼen ex kyqʼama jlu: «Ax tok ma qnaʼ jun tzalajbʼil tuj qanmi tej matoq in yolin qukʼil tuj bʼe» (Lucas 24:27, 32).

12, 13. ¿Tiquʼn in xi qqʼamaʼn qa mintiʼ tzaj naj tqʼoj Jesús ex qa ximen kyiʼj txqantl?

¹² Tkabʼ, kubʼ tyekʼin Jesús qa otoq jaw tjyoʼn aju bʼaʼn tuʼn tbʼant tukʼil tmod. Mintiʼ tzaj naj tqʼoj Jesús (Proverbios 16:32). Ok t-xqʼuqin aju tnaʼ ex ok te mans (Mateo 11:29). Tej i el txalpaj qe t-xnaqʼtzbʼen, ten nim tpasens kyiʼj (Marcos 14:34-38; Lucas 22:24-27). Ax ikx, mintiʼ jaw kyaqpaj axpe ikx tej tok bʼinchaʼn nya bʼaʼn tiʼj (1 Pedro 2:23).

¹³ Ax ikx ximen Jesús kyiʼj txqantl xjal. Jun techel, qo ximen tiʼj xuʼj aju toktoq jun yabʼil tiʼj aju in naj nim tchkʼel tuʼn (kjawil uʼjit Marcos 5:25-34). Bʼet xuʼj lu kyxol nim xjal tuʼn tok tmakoʼn t-xbʼalun Jesús. Otoq tzaj tqʼamaʼn Ley qa at jun xuʼj at tyabʼ ik tzeʼn jlu, mintiʼ tuʼn tok tmakoʼn jun xjal, tuʼntzunju, aju xuʼj pon makol t-xbʼalun Jesús mintiʼtoq tuʼn tbʼant jlu tuʼn (Levítico 15:25-27). Noqtzun tuʼnj, mintiʼ tzaj tqʼoj Jesús tiʼj xuʼj. Ojtzqiʼn tuʼn Jesús tiquʼn otoq tzaj tqʼoʼn Dios Ley. Kyjuʼtzun, xiʼ tyekʼun tkʼujlabʼil ex tzaj qʼaqʼin tkʼuʼj tiʼj xuʼj. Ojtzqiʼn tuʼn qa mas nim toklen tuʼn t-xi yekʼit jlu twitzju tuʼn tjapun tkyaqil Ley (Mateo 23:23). Tuʼntzunju, xi tqʼamaʼn Jesús jlu te xuʼj: «Nmeʼjel, tuʼn tokslabʼla ma bʼanta; txiʼya, txubʼtxaj taʼya jaʼlo, bʼiʼx ma kyaj bʼanixa, ma tzʼel tyabʼila». ¡Jun tbʼanelxix techel jlu!

14. a) ¿Alkye mas nimtoq toklen toj twitz Jesús tej tten twitz Txʼotxʼ? b) ¿Tiʼchaq bʼant tuʼn Jesús tuʼn tkubʼ tyekʼun qa otoq jaw tjyoʼn aju bʼan tuʼn tbʼant?

¹⁴ Toxin, kubʼ tyekʼun Jesús qa otoq jaw tjyoʼn aju bʼaʼn tuʼn tbʼant tukʼilju alkye tten anqʼin. Aju mas nimtoq toklen tuʼn tbʼant toj twitz Jesús aju tuʼn tpakbʼan (Lucas 4:43). Kyjuʼtzun, bʼaj t-ximen tuʼn tonin kyiʼj txqantl xjal toj pakbʼabʼil. Junjun techel tiʼj jlu aju tej tbʼaj t-ximen tuʼn miʼn tten nim tiʼchaq te tuʼntzun tok tqʼoʼn ambʼil ex tipumal tiʼj pakbʼabʼil (Lucas 9:58). Ax ikx e bʼaj t-xnaqʼtzaʼn Jesús aqeju e ok lepeʼ tiʼj tuʼn kukx kypakbʼan, axpe ikx otoqxi kyim (Lucas 10:1-12; Juan 14:12). Nya oʼkxju, ax ikx xi ttziyen kye qa kukx kʼonil kyiʼj tzmaxi aj tul xitbʼil (Mateo 28:19, 20).

15. ¿Tiʼ jaku bʼant quʼn tuʼn tjaw qjyoʼn aju mas bʼaʼn tuʼn tbʼant aj qyolin?

¹⁵ ¿Tiʼ jaku bʼant quʼn tuʼn tjaw qjyoʼn aju mas bʼaʼn tuʼn tbʼant, ik tzeʼn te Jesús, aj qyolin? Aj qyolin kyukʼil qerman, in che ajbʼen yol quʼn aju jaku tzʼok tqʼuqbʼaʼn kykʼuʼj ex nya aju jaku tzaj kybʼis tuʼn (Efesios 4:29). Ax ikx aj qpakbʼan, il tiʼj tuʼn tok tilil quʼn tuʼn tten «tchyaʼl» qyol kyukʼil xjal, toj juntl yol, il tiʼj tuʼn qyolin toj tumel kyukʼil (Colosenses 4:6). Qa ma qo ximen tiʼj alkye qyol kxel qqʼamaʼn, ok kʼokel tilil quʼn tuʼn tel qnikʼ tiʼj alkye kyajbʼil xjal ex alkye in che ximen tiʼj. Qa ma qox yolin kye xjal toj tumel, jaku tzʼonin kyiʼj tuʼn tkubʼ kybʼiʼn Tyol Dios ex jaku tzʼonin kyiʼj tuʼn tkuʼpin toj kyanmi. Nya oʼkxju, ax ikx in nok tilil quʼn tuʼn tajbʼen Tyol Dios tuʼn t-xi qchikʼbʼaʼn aju in nok qʼuqeʼ qkʼuʼj tiʼj. In bʼant jlu quʼn tuʼnju mas at tipumal aju in tzaj tqʼamaʼn Tyol Dios twitz alkyexku juntl qyol (Hebreos 4:12).

16, 17. a) ¿Tiʼ jaku tzʼonin qiʼj tuʼn miʼn ttzaj naj qqʼoj? b) ¿Alkye tten jaku kubʼ qyekʼun qa in qo ximen kyiʼj txqantl xjal? c) ¿Tiʼ jaku tzʼonin qiʼj tuʼn tok qqʼoʼn qwiʼ tiʼj pakbʼabʼil?

¹⁶ Ax ikx jaku kubʼ qyekʼun tukʼe qmod qa in jaw qjyoʼn aju mas bʼaʼn tuʼn tbʼant. Qa ma tzʼok qxqʼuqin aju in qnaʼn. ¿Tiʼ jaku tzʼonin qiʼj tuʼn miʼn ttzaj naj qqʼoj? (Santiago 1:19.) Qa ma tzaj qʼamaʼn jun yol qe tuʼn juntl aju jaku tzaj naj qqʼoj tuʼn, qqʼonk tilil tuʼn tel qnikʼ tiʼj tiquʼn xbʼant tuʼn, tuʼntzun nya kwest kʼelel toj qwitz tuʼn tkubʼ qnajsaʼn aju sok bʼinchaʼn qiʼj (Proverbios 19:11). Ax ikx il tiʼj tuʼn tkubʼ qyekʼun qa in qo ximen kyiʼj txqantl xjal. ¿Alkye tten? Miʼn kubʼ qximen qa tzʼaqli qe qerman. Bʼaʼn tuʼn ttzaj qnaʼn qa at maj at junjun tiʼchaq in nikʼ toj kyanqʼibʼil aju mintiʼ ojtzqiʼnxix quʼn. Juntl tten tuʼn tkubʼ qyekʼun qa in qo ximen kyiʼj txqantl aju qa ma kubʼ qbʼiʼn aju kyximbʼetz. Miʼn qo ok ten jyol tumel tuʼn tkubʼ bʼinchet aju qe qajbʼil (Filipenses 4:5).

¹⁷ Nya oʼkxju, ax ikx qa in jaw qjyoʼn aju mas bʼaʼn tuʼn tbʼant, in kubʼ qyekʼun tukʼe alkye tten in qo anqʼin. Aju mas nim toklen toj qwitz aju tuʼn qpakbʼan. ¿Tiʼ jaku tzʼonin qiʼj tuʼn tok qqʼoʼn qwiʼ tiʼj pakbʼabʼil? Aju qa tnejel xkubʼ qqoʼn qajbʼebʼil te Jehová toj qanqʼibʼil ex qa ma bʼaj qximen tuʼn miʼn tten nim tiʼchaq qe. A jlu kʼonil qiʼj tuʼn tok qqʼoʼn ambʼil ex qipumal tiʼj pakbʼabʼil naʼmxtoq tul xitbʼil (Mateo 6:33; 24:14).

18. ¿Tiʼ il tiʼj tuʼn tbʼant quʼn tuʼn qanqʼin te jumajx?

¹⁸ Tbʼanelxixlo ma tzʼela toj qwitz aju alkye tten kubʼ tyekʼun Jesús qa mintiʼ jaw tnimsan tibʼ, qa tzaj qʼaqʼin tkʼuʼj, qa mintiʼ tzaj xobʼ ex qa jaw tjyoʼn aju mas bʼaʼn tuʼn tbʼant. Qa ma qo xnaqʼtzan tiʼj junjuntl tmod, ax ikx jaku tzʼonin qiʼj. Tuʼntzunju, kukx qkanoʼmel qeju tmod Jesús. Iktzun tten qo okel laqʼeʼ mastl ttxlaj Jehová ex jaku qo anqʼin te jumajx.