1. ¿Tiquʼn in qo ok laqʼeʼ ttxlaj Jehová qa ma tzʼel qkanoʼn tmod Jesús?

CHʼIXMI tkyaqil maj in nel qkanoʼn kymod xjal aʼyeju tbʼanel qe toj qwitz. A Jesús jun xjal mas tbʼanel jaku tzʼel qkanoʼn tiʼj. ¿Tiquʼn? Tuʼnju tqʼama Jesús lu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Tqʼama Jesús jlu tuʼnju in nel tkanoʼnxix tkyaqilju tmod Jehová. Tuʼntzunju, qa ma tzʼel qnikʼ tzeʼn tmod Jesús ax ikx kʼelel qnikʼ tiʼj tmod Jehová. Ex qa ma tzʼel qkanoʼn tmod Jesús, qo okel laqʼeʼ mastl ttxlaj Jehová, aju xjal mas nim toklen tibʼaj tkyaqil. ¡Jun tbʼanelxix qoklen jlu!

2, 3. a) ¿Tiquʼn in yolinxix Tyol Dios tiʼj tanqʼibʼil Jesús? b) ¿Tiʼ tajbʼil Jehová tuʼn tbʼant quʼn? c) ¿Tiʼ kʼelel qnikʼ tiʼj toj xnaqʼtzbʼil lu ex toj juntl tzul?

² In yolinxix Tyol Dios tiʼj tanqʼibʼil Jesús. ¿Tiquʼn? Tuʼnju tajbʼil Jehová tuʼn telxix qnikʼ tiʼj Jesús ex tuʼn tel qkanoʼn tmod (kjawil uʼjit 1 Pedro 2:21). In tzaj tqʼamaʼn Tyol Dios qa il tiʼj tuʼn qok lepeʼ tiʼj Jesús. ¿Tiʼ kyxilen qe yol lu? A t-xilen jlu qa il tiʼj tuʼn tel qkanoʼn techel kyaj tqʼoʼn Jesús qwitz. Ax tok tzʼaqli te Jesús. Noqtzun tuʼnj, mintiʼ in tzaj tqanin Jehová tuʼn qok tzʼaqli ik tzeʼnxix Jesús. Oʼkx tajbʼil Jehová tuʼn tok tilil quʼn tuʼn tel qkanoʼn qe tbʼanel tmod Jesús.

 ³ Qo xnaqʼtzan tiʼj junjun tbʼanel tmod Jesús aju il tiʼj tuʼn tel qkanoʼn. Toj xnaqʼtzbʼil lu, ok kʼelel qnikʼ tiʼj alkye tten kubʼ tin tibʼ Jesús ex alkye tten in tzaj qʼaqʼin tkʼuʼj kyiʼj xjal. Ex toj juntl xnaqʼtzbʼil, ok qo xnaqʼtzal tiʼj alkye tten mintiʼ tzaj xobʼ Jesús ex alkye tten in nel tnikʼ tiʼjju bʼaʼn. Che tzajel tzaqʼweʼn oxe xjel tiʼj teyele junjun tmod Jesús, aju: ¿Tiʼ t-xilen? ¿Alkye tten kubʼ tyekʼun Jesús? Ex ¿alkye tten jaku kubʼ qyekʼun?

4. ¿Tiʼ t-xilen aju tuʼn tkubʼ qin qibʼ?

⁴ Aqeju xjal in jaw kynimsan kyibʼ, in kubʼ kyximen qa aqeju xjal in kubʼ kyin kyibʼ mintiʼx kyipumal ex mintiʼ qʼuqli kykʼuʼj tiʼj junjun tiʼchaq. ¿Axpe tok jlu? Nya ax tok. Tuʼnju il tiʼj tuʼn tten qipumal ex tuʼn miʼn qtzaj xobʼ tuʼn tkubʼ qin qibʼ, moqa tuʼn qok te mans. ¿Tiʼ t-xilen aju tuʼn tkubʼ qin qibʼ? A t-xilen qa mintiʼ tuʼn tjaw qnimsan qibʼ ex tuʼn miʼn tkubʼ qximen qa mas nim qoklen kywitz txqantl. Tuʼn tkubʼ qin qibʼ, tnejel il tiʼj tuʼn tten qxim toj tumel qiʼjx. Jun techel, in tzaj tqʼamaʼn jun uʼj pujbʼil yol tiʼj Tyol Dios qa aju xjal in kubʼ tin tibʼ, in nel tnikʼ tiʼj qa tal chʼin toklen twitz Dios. Ax ikx, qa in kubʼ qin qibʼ, mlay kubʼ qximen qa mas nim qoklen kywitz txqantl xjal (Romanos 12:3; Filipenses 2:3). Ax tok, aj il xjal qoʼ ex at maj kwest in nela toj qwitz tuʼn tkubʼ qin qibʼ. Noqtzun tuʼnj, jaku kubʼ qin qibʼ, ex tuʼn tbʼant jlu quʼn, il tiʼj tuʼn qximen tiʼj nimxix toklen Jehová ex tiʼj techel kyaj tqʼoʼn Jesús qwitz.

5, 6. a) ¿Alkye nejenel kye anjel aju Miguel tbʼi? b) ¿Alkye tten kubʼ tyekʼun Miguel qa kubʼ tin tibʼ?

⁵ Kukx o kubʼ tin tibʼ Tkʼwaʼl Dios. Tej tten toj kyaʼj, kubʼ tin tibʼ. Ex tej tten te xjal tzʼaqli twitz Txʼotxʼ, ax ikx kubʼ tin tibʼ. ¿Alkye tten kubʼ tyekʼun qa kubʼ tin tibʼ? Qo xnaqʼtzan tiʼj junjun techel.

⁶ Kubʼ tyekʼun Jesús tukʼil tmod qa mintiʼ jaw tnimen tibʼ. Tej naʼmxtoq tul twitz Txʼotxʼ, jun nejenel te kye anjel toj kyaʼj. In tzaj tqʼamaʼn Tyol Dios qa Miguel tbʼi. In tzaj tqʼamaʼn Tyol Dios, toj Judas, qa e ok ten Miguel ex Satanás qawil, moqa wulil (kjawil uʼjit Judas 9). ¿Tiquʼn e qawin? Tuʼnju otoq kux tmuquʼn Jehová t-xmilal Moisés toj jun lugar aju mix aʼl jun xjal jaku kanet tuʼn (Deuteronomio 34:5, 6). Noqtzun tuʼnj, tajbʼiltoq Satanás tuʼn t-xi tiʼn t-xmilal Moisés, tuʼnlo tok kykʼulin aj Israel. At jun uʼj in tzaj tqʼamaʼn qa xilo tqʼamaʼn Jesús te Satanás qa mintiʼ toklen tuʼn t-xi tiʼn t-xmilal Moisés. Maqet Satanás tuʼn Jesús ex mintiʼ tzaj xobʼ te, noqtzun tuʼnj, ojtzqiʼntoq tuʼn Jesús qa at jatumel in pon kanin toklen. Kyjuʼtzun kubʼ tin tibʼ ex kyaj tqʼoʼn toj tqʼabʼ Jehová tuʼn t-xi tbʼinchaʼn tiʼj. Oʼkxtoq Jehová attoq toklen tuʼn t-xi tbʼinchaʼn tiʼj jlu.

7. ¿Alkye tten kubʼ tyekʼun Jesús kyukʼe tyol ex tukʼe aju kubʼ tbʼinchaʼn qa mintiʼ jaw tnimen tibʼ?

⁷ Tej tten Jesús twitz Txʼotxʼ, kubʼ tyekʼun kyukʼe tyol qa in kubʼ tin tibʼ. Nyatoq tajbʼil tuʼn tok bʼaj kywitz xjal tiʼj. Tajbʼiltoq tuʼn t-xi kyqʼoʼn xjal tkyaqil nimbʼil te Jehová (Marcos 10:17, 18; Juan 7:16). Ax ikx, mintiʼ xi tqʼamaʼn jun tyol aju jakutoq kynaʼ t-xnaqʼtzbʼen jun nya bʼaʼn moqa jakutoq kynaʼ qa mintiʼx kyoklen tuʼn. Yolin kyukʼil toj tumel ex xi tqʼamaʼn kye qa in tzalaj kyiʼj tuʼnju attoq tbʼanel kymod. Tukʼe jlu kubʼ tyekʼun qa qʼuqlitoq tkʼuʼj kyiʼj (Lucas 22:31, 32; Juan 1:47). Ax ikx kubʼ tyekʼun Jesús tukʼe aju kubʼ tbʼinchaʼn qa kubʼ tin tibʼ. Bʼaj t-ximen tuʼn miʼn tten tqʼinumabʼil ex tuʼn miʼn tten junjun tiʼchaq te (Mateo 8:20). Ax ikx tajbʼiltoq tuʼn tkubʼ tbʼinchaʼn junjun aqʼuntl aju mix aʼlx jun tajbʼiltoq tuʼn tkubʼ tbʼinchaʼn (Juan 13:3-15). Nya oʼkxju, ax ikx xi tbʼiʼn aju tzaj qʼamaʼn te (kjawil uʼjit Filipenses 2:5-8). Aʼyeju xjal in jaw kynimsan kyibʼ nya kygan tuʼn tkubʼ kybʼinchaʼn aju in tzaj qʼamaʼn kye. Nya ik ok te Jesús, ok te Jesús te mans ex kubʼ tbʼinchaʼn tkyaqilju tzaj tqʼamaʼn Jehová te. ¡Axpe ikx xi tqʼoʼn ambʼil tuʼn tkubʼ bʼiyoʼn! Tkyaqil jlu in tzaj tyekʼun qa ax tok aju tqʼama tej tqʼama jlu: «Mans wanmiye» (Mateo 11:29).

8, 9. ¿Alkye tten in kubʼ qyekʼun qa in kubʼ qin qibʼ?

⁸ Kubʼ tin tibʼ Jesús, ¿alkye tten jaku tzʼel qkanoʼn tmod lu? Qa in kubʼ qin qibʼ, in nel qnikʼ qa at jatumel in pon kanin jun qoklen. Mintiʼ qoklen tuʼn qyolin nya bʼaʼn kyiʼj txqantl. Tuʼntzunju, mintiʼ in xi qqʼamaʼn qa nya bʼaʼn aju xbʼant tuʼn jun xjal ex mintiʼ in kubʼ qximen qa atlo jun nya bʼaʼn ma bʼant tuʼn xjal (Lucas 6:37; Santiago 4:12). Ax ikx mintiʼ in kubʼ qximen qa mas nim qoklen kywitz txqantl oʼkx tuʼnju at junjun tiʼchaq jaku bʼant quʼn moqa o tzaj qʼoʼn mastl qaqʼun kywitz txqantl (Eclesiastés 7:16). Ax ikx qeju ansyan in kubʼ kyin kyibʼ, mintiʼ in kubʼ kyximen qa mas nim kyoklen kywitz txqantl erman, quʼn in kubʼ kyximen qa mas nim kyoklen txqantl kywitz (Filipenses 2:3; Lucas 9:48).

⁹ Qqʼonk qwiʼ tiʼjju ikʼ tiʼj Walter Thorn. Xi tzyet tuʼn tajbʼen te ansyan in bʼent kyojele Ja te Chmabʼil toj abʼqʼi 1894. Noqtzun tuʼnj, tej tikʼ nim ambʼil, xi qʼoʼn toklen te xqʼuqil ekʼ moqa qʼol kywa ekʼ kye testigos de Jehová atz Nueva York. Qa in kubʼtoq t-ximen qa at juntl aqʼuntl mas nim toklen jakutoq kubʼ tbʼinchaʼn toj ambʼil aju twitzju oʼkx tuʼn t-xqʼuqin kyiʼj ekʼ, in xi tqʼamaʼn jlu tex: «Aya tikʼlen quq, ¿tiʼtzun teya in kubʼ t-ximen?» (kjawil uʼjit Isaías 40:12-15). ¡Iltoq tiʼj tuʼn tkubʼ tin tibʼ nimxix wen!

10. a) ¿Alkye tten in kubʼ qyekʼun tukʼe qyol qa mintiʼ in jaw qnimsan qibʼ? b) ¿Alkye tten in kubʼ qyekʼun tukʼe qbʼinchbʼen qa in kubʼ qin qibʼ?

¹⁰ Qa mintiʼ in jaw qnimsan qibʼ, in kubʼ qyekʼun tukʼe alkye tten in qo yolin (Lucas 6:45). Aj qyolin kyukʼil txqantl, mintiʼ in nok tilil quʼn tuʼn qjaw nimsaʼn tuʼnju in kambʼet quʼn moqa tuʼnju in kubʼ qbʼinchaʼn (Proverbios 27:2). Aqoʼ in nok tilil quʼn tuʼn t-xi qqʼamaʼn kye qa in qo tzalaj kyiʼj tuʼnju junjun tbʼanel tiʼchaq in bʼant kyuʼn ex tuʼnju at junjun tbʼanel kymod (Proverbios 15:23). Ax ikx in kubʼ qyekʼun qa in kubʼ qin qibʼ tukʼe aju in kubʼ qbʼinchaʼn. Mintiʼ in nok tilil quʼn tuʼn tok qʼoʼn qoklen kyxol xjal. Mintiʼ in ten nim tiʼchaq qe tuʼn qajbʼen mastl te Jehová. Axpe ikx qajbʼil tuʼn tbʼant junjun aqʼuntl quʼn aju nya nim toklen (1 Timoteo 6:6, 8). Nya oʼkxju, ax ikx in kubʼ qyekʼun qa in kubʼ qin qibʼ qa in xi qbʼiʼn aju in tzaj qʼamaʼn qe. Tuʼntzunju, in xi qbʼiʼn aju in tzaj tqʼamaʼn ttnam Jehová ex aju in tzaj kyqʼamaʼn ansyan qe (Hebreos 13:17).

11. ¿Tiʼ t-xilen aju in tzaj qʼaqʼan tkʼuʼj jun xjal?

¹¹ ¿Tiʼ t-xilen aju in tzaj qʼaqʼan tkʼuʼj jun xjal? A t-xilen jlu qa at tkʼuʼj xjal tiʼj juntl ex qa in ximen tiʼj tuʼn tten juntl toj bʼaʼn. In tzaj qʼaqʼin tkʼuʼj tiʼj juntl xjal tuʼnju kʼujlaʼn tuʼn ex in xi tyekʼun tbʼanel tmod te ex in xi tbʼinchaʼn xtalbʼil te. In tzaj tqʼamaʼn Tyol Dios qa «nim in qʼaqʼan tkʼuʼj» Jehová ex Jesús ex qa «nimxix» kykʼujlabʼil (Lucas 1:78; 2 Corintios 1:3; Filipenses 1:8). At jun uʼj in tzaj tqʼamaʼn qa aju jun xjal in tzaj qʼaqʼan tkʼuʼj nya oʼkx in tzaj tbʼis tiʼjju xjal in tzaj nya bʼaʼn tiʼj. In tzaj tqʼamaʼn uʼj lu qa tuʼnju in tzaj qʼaqʼan tkʼuʼj xjal in nok tilil tuʼn, tuʼn tonin tiʼjju in tzaj nya bʼaʼn tiʼj. Tuʼntzunju, qa in tzaj qʼaqʼan qkʼuʼj kyiʼj xjal, ok kʼokel tilil quʼn tuʼn qonin kyiʼj tuʼn kyanqʼin mas bʼaʼn.

12. a) ¿Alkye tten kubʼ tyekʼun Jesús tukʼil aju in tnaʼn qa tzaj qʼaqʼin tkʼuʼj? b) ¿Alkye tten kubʼ tyekʼun Jesús tukʼe aju kubʼ tbʼinchaʼn qa tzaj qʼaqʼin tkʼuʼj?

¹² ¿Alkye tten kubʼ tyekʼun Jesús qa tzaj qʼaqʼin tkʼuʼj? Ok kʼelel qnikʼ tiʼj oxe tumel. Tnejel, kubʼ tyekʼun tukʼil aju in tnaʼn. Tej tok tqʼoʼn twitz tiʼj María, aju tamiw, ex qeju txqantl xjal in che oqʼ tiʼj Lázaro tuʼnju otoq kyim, ok ten oqʼil kyukʼil (kjawil uʼjit Juan 11:32-35). Ax ikx in tzaj tqʼamaʼn Tyol Dios qa tzaj qʼaqʼin tkʼuʼj Jesús kyiʼj jun kʼloj xjal aʼyeju e pon jyolte (Marcos 6:34). Tkabʼ, kubʼ tyekʼun Jesús tukʼe aju kubʼ tbʼinchaʼn qa tzaj qʼaqʼin tkʼuʼj. Jun techel, bʼant junjun tiʼchaq tuʼn, tuʼn tonin kyiʼj txqantl tuʼnju tzaj qʼaqʼin tkʼuʼj. Kyjuʼtzun, jaw anqʼin tal jun xuʼj viud tuʼn ex jaw anqʼin Lázaro tuʼn (Lucas 7:11-15; Juan 11:38-44). Iktzun tten xi  tqʼoʼn Jesús ambʼil te Lázaro tuʼn t-xiʼ yajxitl toj kyaʼj. Ex tej kyxiʼ jun kʼloj xjal jyolte Jesús, tzaj qʼaqʼin tkʼuʼj Jesús kyiʼj ex ok ten «qʼol nimku xnaqʼtzbʼil kye». Chʼixpuj kyanqʼibʼil xjal tuʼn xnaqʼtzbʼil lu. Ik tzeʼn in nel qnikʼ tiʼj, tej ttzaj qʼaqʼin tkʼuʼj Jesús kyiʼj xjal, nya oʼkx kubʼ tnaʼn bʼis. Ax ikx onin kyiʼj xjal kyajbʼiltoq onbʼil (Mateo 15:32-38; 20:29-34; Marcos 1:40-42).

13. ¿Alkye tten kubʼ tyekʼun Jesús kyukʼe tyol qa tzaj qʼaqʼin tkʼuʼj? (Qʼonka twitz tiʼj tnejel tilbʼilal.)

¹³ Ex aju toxin tumel kubʼ tyekʼun Jesús qa tzaj qʼaqʼin tkʼuʼj aju kyuʼn qe tyol. Tuʼnju tzaj qʼaqʼin tkʼuʼj kyiʼj xjal, yolin tukʼe kʼujlabʼil kyukʼil, ex mas kyukʼil qeju in noktoq bʼinchaʼn nya bʼaʼn kyiʼj. Tqʼama Mateo qa japun tuʼn Jesús aqeju tyol t-sanjel Dios Isaías tbʼi, aju in tqʼamaʼn: «Jun ajlaj potzʼjni, mlay kubʼ ttoqin, ex aju mech in qusin, mlay kubʼ tyuptzʼaʼn» (Isaías 42:3; Mateo 12:20). ¿Tiʼ kyxilen qeju yol lu? In tzaj kyyekʼun qa mintiʼ e ok tkʼixbʼisaʼn Jesús qe xjal kyukʼe qe tyol. Tej tyolin kyukʼil xjal, tbʼanel in kynaʼntoq xjal kyuʼn qe tyol. Nya oʼkxju, ax ikx xi tpakbʼaʼn tbʼanel tqanil «tuʼn kybanix qeju bʼis taʼ kyanmi» (Isaías 61:1). Xi tqʼamaʼn kye xjal aqeju in noktoq bʼinchaʼn nya bʼaʼn kyiʼj qa jaku chewix kyanmi tukʼil (Mateo 11:28-30). Xi tqʼamaʼn kye t-xnaqʼtzbʼen qa kʼujlaʼn qe tuʼn Jehová, axpe ikx qeju nya nim kyoklen toj kywitz txqantl xjal (Mateo 18:12-14; Lucas 12:6, 7).

14. ¿Alkye tten jaku txi qyekʼun kye txqantl qa in tzaj qʼaqʼin qkʼuʼj kyiʼj?

¹⁴ Qa qajbʼil tuʼn ttzaj qʼaqʼan qkʼuʼj kyiʼj xjal ik tzeʼn te Jesús, ok kbʼel qyekʼun tukʼe aju in qnaʼn. Atlo maj kwest jaku tzʼela toj qwitz tuʼn t-xi qyekʼun qkʼujlabʼil kye txqantl, noqtzun tuʼnj, in tzaj tqʼamaʼn Tyol Dios qa il tiʼj tuʼn tok tilil quʼn tuʼn tkubʼ qyekʼun. Aju qkʼujlabʼil in xi qyekʼun kye xjal at toklen tukʼe akʼaj mod aju il tiʼj tuʼn tkubʼ kyyekʼun okslal (kjawil uʼjit Colosenses 3:9, 10, 12). ¿Alkye tten jaku kubʼ qyekʼun? In tzaj tqʼamaʼn Tyol Dios qa il tiʼj tuʼn tjaw qjaqoʼn qanmi ex tuʼn t-xi qqʼamaʼn aju in qnaʼn kyiʼj (2 Corintios 6:11-13). Qa at jun tajbʼil tuʼn ttzaj tqʼamaʼn qe aju in tnaʼn ex aju in tzaj bʼaj tkʼuʼj tuʼn, il tiʼj tuʼn tkubʼ qbʼiʼnxix (Santiago 1:19). Ex yajxitl, jaku qo ximen tiʼj jlu: «Noqwit aqine in nikʼ jlu wiʼje, ¿tiʼwtlo weye in nnaʼn? ¿Alkyewtlo weye onbʼil waj?» (1 Pedro 3:8).

15. ¿Tiʼ jaku bʼant quʼn tuʼn qonin kyiʼj qeju in tzaj nya bʼaʼn kyiʼj moqa kyiʼj qe o kyim jun toj kyja?

¹⁵ Qa in tzaj qʼaqʼin qkʼuʼj kyiʼj xjal, ax ikx in kubʼ qyekʼun tukʼe aju in kubʼ qbʼinchaʼn. Ok qo onil kyiʼj txqantl, ex mas kyiʼj qeju in tzaj nya  bʼaʼn kyiʼj moqa o kyim jun toj kyja. ¿Tzeʼn jaku chex qonin? In tzaj tqʼamaʼn Romanos 12:15 jlu: «Che oqʼe kyukʼil qeju in che oqʼ». Chʼixmi toj tkyaqil maj, kyajbʼil xjal tuʼn tok qqʼuqbʼaʼn kykʼuʼj, ex nya tuʼn t-xi qqʼamaʼn kye alkye tumel tuʼn tkyaj nya bʼaʼn kyuʼn toj ttxolil. Kyajbʼil tuʼn tkubʼ qbʼiʼn aju in tzaj kyqʼamaʼn ex tuʼn tok kybʼiʼn qa kʼujlaʼn qe. At jun xuʼj testigo de Jehová, aju kyim jun tal ex ok qʼuqbʼaʼn tkʼuʼj, tqʼama jlu: «Nimxix xi nqʼoʼne chjonte tuʼnju e ul oqʼel wukʼile atz njaye». Ax ikx qa in tzaj qʼaqʼin qkʼuʼj kyiʼj txqantl, ok kbʼel qbʼinchaʼn junjun tiʼchaq tuʼn qonin kyiʼj. Qape at junjun viud tajbʼil onbʼil tuʼn tbʼaj bʼinchet chʼintl tja. Qape at jun erman ma tijen ex tajbʼil tuʼn t-xi qʼibʼaj tuʼn t-xiʼ kyoj chmabʼil, tuʼn tex pakbʼal moqa tuʼn t-xiʼ kyukʼil qʼanil. Jaku qo onin nim kyiʼj qa ma bʼant junjun tal tiʼchaq quʼn tuʼn qonin kyiʼj (1 Juan 3:17, 18). Nya oʼkxju, mas kbʼel qyekʼun qa in tzaj qʼaqʼin qkʼuʼj kyiʼj xjal qa ma tzʼok tilil quʼn tuʼn t-xi qpakbʼan Tyol Dios kye kykyaqil xjal. A mas tbʼanel jlu jaku bʼant quʼn tuʼn qonin kyiʼj xjal at jun tbʼanel kyanmi.

16. ¿Tiʼ qyol jaku txi qqʼamaʼn kye qeju in che bʼisun ex in bʼaj kykʼuʼj?

¹⁶ Ax ikx jaku kubʼ qyekʼun kyukʼe qyol qa in tzaj qʼaqʼin qkʼuʼj kyiʼj txqantl. In tzaj tqʼamaʼn Tyol Dios qe tuʼn tok qqʼuqbʼaʼn kykʼuʼj qeju in che bʼisen ex in bʼaj kykʼuʼj (1 Tesalonicenses 5:14). ¿Tiʼ jaku txi qqʼamaʼn kye? Jaku txi qqʼamaʼn kye qa nim in qo ximen kyiʼj. Ax ikx jaku chex qonin tuʼn tel kynikʼ alkye qe tbʼanel kymod at ex jaku txi qqʼamaʼn kye qa in qo tzalaj kyiʼj aj tkubʼ kybʼinchaʼn junjun tiʼchaq bʼaʼn. Jaku txi qnaʼn kye qa nimxix kyoklen toj twitz Jehová tuʼnju o che oktz tiʼn Jehová toj ttnam (Juan 6:44). Jaku txi qqʼamaʼn kye qa at tkʼuʼj Jehová kyiʼj qeju tmajen in tzaj nya bʼaʼn kyiʼj ex in che bʼisun (Salmo 34:18). Qa ma tzaj qʼaqʼin qkʼuʼj kyiʼj qeju kyajbʼil tuʼn tok qʼuqbʼet kykʼuʼj ex qa ma kubʼ qyekʼun kyukʼil tbʼanel qyol, jaku che oninxix qyol kyiʼj qeju in che bʼisun (Proverbios 16:24).

17, 18. a) ¿Tiʼ kymod ansyan tajbʼil Jehová tuʼn tten kyukʼe erman? b) ¿Tiʼ kbʼel qxnaqʼtzaʼn toj juntl xnaqʼtzbʼil?

¹⁷ Tajbʼil Jehová tuʼn ttzaj qʼaqʼin kykʼuʼj ansyan kyiʼj erman (Hechos 20:28, 29). O txi qʼoʼn kyoklen ansyan tuʼn t-xi kyxnaqʼtzaʼn erman ex tuʼn t-xi kyqʼuqbʼaʼn kykʼuʼj (Isaías 32:1, 2; 1 Pedro 5:2-4). Mintiʼ in kubʼ kyqʼoʼn junjun kawbʼil kyibʼaj aju mlay bʼant kyuʼn erman. Ax ikx qa at jun erman mintiʼ tumel tuʼn tbʼant mastl tuʼn, mintiʼ in xi kyqʼamaʼn ansyan te qa ax at tpaj tiʼj jlu. In nok qeʼ kykʼuʼj ansyan kyiʼj erman qa kʼujlaʼn Jehová kyuʼn ex qa in nok tilil kyuʼn tuʼn tbʼant aju mas tbʼanel jaku bʼant tuʼn kyajbʼen te Jehová (Mateo 22:37).

¹⁸ Qa ma qo ximin tiʼj qa kubʼ tin tibʼ Jesús ex qa tzaj qʼaqʼin tkʼuʼj, a jlu kʼonil qiʼj tuʼn tel qkanoʼn techel kyaj tqʼoʼn. Toj juntl xnaqʼtzbʼil ok kbʼel qxnaqʼtzaʼn alkye tten mintiʼ tzaj xobʼ Jesús ex alkye tten el tnikʼ tiʼj bʼaʼn.