Eric: Bʼiʼx kxel nqʼamaʼne teya qa mintiʼ jun weye wokslabʼil at. Mintiʼxixlo jun tiʼ jaku qo yolin tiʼj.

Brayan: Chjonte teya tuʼnju bʼiʼx in tzaj tqʼamaʼna weye. Ah, awe nbʼi Brayan, ¿yajtzun teya tiʼ tbʼiya?

Eric: Eric weye nbʼi.

Brayan: In chin tzalaje, Eric.

Eric: Ax ikx weye.

Brayan: Qa ma tzaj tqʼoʼna ambʼil weye tuʼn t-xi nqanine teya, ¿o ten jun teya tokslabʼil ojtxe?

Eric: O tenxi, tej kʼwaʼl qine. Atzun tej wikʼ bʼete njaye tej nxiʼye toj universidad, ya mintiʼ in xiʼtle toj iglesia.

Brayan: Aaah, ¿tiʼtzun teya o xnaqʼtzan tiʼj toj universidad?

Eric: O chin xnaqʼtzaʼne tiʼj aju ikʼ kyiʼj xjal ojtxe ex aju in bʼaj kyiʼj toj ambʼil jaʼlo. Ngan weye tuʼn nxnaqʼtzane tiʼj aju, ex aju o bʼant kyuʼn xjal twitz Txʼotxʼ.

Brayan: Tbʼanel te aju. Qape o tzʼok tbʼiʼn teya qa ax ikx te Tyol Dios in yolin tiʼjju ikʼ kyiʼj xjal toj ambʼil ojtxe. ¿O bʼant-xi tuʼn t-xnaqʼtzana tiʼj uʼj aju?

Eric: Mintiʼ. Oʼkx ojtzqiʼn wuʼne qa jun tbʼanel uʼj aju Tyol Dios, noqtzun tuʼnj, bʼajx kubʼ nximene qa in yolin uʼj lu tiʼjju o tzikʼ kyiʼj xjal.

Brayan: Jun tbʼanel xjal teya toj nwitze. Qa at chʼin ambʼil tiʼja, kxel nyekʼune junjun techel teya aju in tzaj tyekʼun qa tzʼaqli Tyol Dios aj tyolin tiʼjju ikʼ ojtxe.

Eric: Bʼaʼn, noqtzun tuʼnj, mintiʼ jun Tuʼjil Tyol Dios iqʼin wuʼne.

Brayan: Miʼn bʼaj tkʼuʼja. At jun weye iqʼin wuʼn. Tnejel, kʼokel qqʼoʼn qwitz tiʼj jun techel aju tkuʼx toj 1 Crónicas capítulo 29, versículo 26 ex 27. Chi kyjalu: «Ate David aju tkyʼajal Isaí o kawin kyibʼaj kykyaqil aj Israel. O kawin 40 abʼqʼi kyibʼaj aj Israel; wuq abʼqʼi o kawin tuj Hebrón ex 33 abʼqʼi tuj Jerusalén».

Eric: ¿Atzun tnejel techel lu?

Brayan: Ikju. Ten jun ambʼil atz jatumel kyqʼama jun kʼloj xjal qa nya ax tok aju in tzaj tqʼamaʼn Tyol Dios aj tyolin tiʼj David.

Eric: ¿Ax tok? ¿Tiquʼntzun?

Brayan: Tuʼnju oʼkxtoq Tyol Dios in yolin tiʼj xjal lu ex junjuntl tqanil. Noqtzun tuʼnj, tej tjapun 1993, at jun kʼloj xjal, aqeju in che xnaqʼtzan tiʼjju ikʼ kyiʼj xjal ojtxe, kanet jun abʼj kyuʼn aju tzʼibʼin qe yol tiʼj aju, qa ma kubʼ qqʼoʼn toj qyol, in tqʼamaʼn: «Aju tja David» ex «kawil te Israel».

Eric: Aaah. Naʼmx tok nbʼiʼn weye jlu.

Brayan: Ax ikx kyqʼama xjal qa mintiʼ o ten aju Poncio Pilato, aju jun aj kawil ten toj tqʼijlal Jesús. In yolin Lucas capítulo 3, versículo 1 tiʼj ex kyiʼj txqantl kawil toj ambʼil aju.

 Eric: Ikju, chi kyjalu: tej «Toktoq Ponsio Pilat te gobernador tuj txʼotxʼ Judey, ex toktoq Herodes te gobernador tuj txʼotxʼ Galiley».

Brayan: Ikju. Toj nimku ambʼil kubʼ kyximen qe aj xnaqʼtzal qa mintiʼ o ten Poncio Pilato. Noqtzun tuʼnj, ma bʼant jun 50 abʼqʼi, kanet juntl abʼj toj tnam te Oriente Medio atz jatumel tzʼibʼin tbʼi xjal lu tiʼj.

Eric: Bʼajxtoq tzʼok nbʼiʼn weye jlu.

Brayan: In chin tzalaj weye tuʼnju aqine in chinx qʼamante jlu teya.

Eric: Ax tok tbʼanel te Tuʼjil Tyol Dios, atlo junjun tqanil tkuʼx toj aju in yolin tiʼjju ikʼ ojtxe, noqtzun tuʼnj, aweye toj nwitz, mlay tzʼonin qiʼj toj ambʼil jaʼlo.

Brayan: At nim xjal in kubʼ kyximen ik tzeʼn teya. Atzun weye, junxitl weye nxim. Wajbʼile tuʼn t-xi nqʼamaʼne teya tiquʼn. Tuʼnju atxix ojtxe, kukx qajbʼil onbʼil tiʼj alkye tten jaku kanet qwa, alkye tten jaku kanet qxbʼalun, alkye tten jaku ten jun qja, alkye tten tuʼn qyolin qxolx ex alkye tten jaku qo tzalaj kyukʼe toj qja. ¿Moqa tzeʼn teya toj twitz?

Eric: Ikju, ax tok aju in tzaj tqʼamaʼna.

Brayan: Aju Tyol Dios in nok te jun tbʼanel onbʼil te qe tiʼj tkyaqil jlu. Ax tok ojtxe tkubʼlen tzʼibʼin uʼj lu, noqtzun tuʼnj, kukx at tajbʼen qe toj ambʼil jaʼlo.

Eric: ¿Ik teya t-ximju?

Brayan: Ikju. Toj juntl yol, aju nabʼil tkuʼx toj Tyol Dios nya oʼkx onin kyiʼj xjal tej tkubʼ tzʼibʼen, ax ikx in nonin toj ambʼil jaʼlo.

Eric: Aaah, ¿jaku tzaj tqʼoʼna junjun techel tiʼj lu?

Brayan: Jaku, aju junjun techel tiʼj jlu: jaku tzʼonin Tyol Dios qiʼj tuʼn tel qnikʼ tiʼj alkye tten tuʼn tajbʼen pwaq quʼn, alkye tten tuʼn qtzalaj kyukʼil toj qja ex alkye tten tuʼn qok te jun tbʼanel amiw. Ik tten Tyol Dios ik tzeʼn jun onbʼil aju in tzaj tyekʼun qbʼe tiʼj alkye tten tuʼn qtzalaj. ¿Tiʼ teya t-ximbʼetz tiʼj jlu? ¿Kwestpe tuʼn qok te jun tbʼanel mambʼaj ex te jun tbʼanel chmilbʼaj, moqa nya kwest?

Eric: Ax tok kwest. Ik tzeʼn weye tukʼil nxuʼjile ma bʼent jun abʼqʼi qkubʼlen mojeʼye ex kwest tuʼn tmujeʼ qximbʼetze.

Brayan: Ateʼkux tbʼanel nabʼil toj Tyol Dios aju nya kwest tuʼn kyjapun quʼn ex in che onin qiʼj, qjyonkux jun techel toj Efesios capítulo 5, versículo 28. Qape jaku tzaj tuʼjina.

Eric: Jaku, chi taqikʼ Tyol Dios kyjalu: «Ax ikx qe chmilbʼaj kykʼujlam kyxuʼjil ik tzaʼn in kykʼujlaʼn kyximlal. Aju xjal in tkʼujlaʼn t-xuʼjil in tkʼujlan tibʼ».

Brayan: Chjonte. Qa ma japun twiʼ yol lu tuʼn chmilbʼaj toj tja, ok kʼonil nim tiʼj.

Eric: Jakulo tzʼonin, noqtzun tuʼnj, mas kwest tuʼn tkubʼ bʼinchet twitz tuʼn t-xi qʼamet.

Brayan: Ax tok, tuʼnju mix aʼlx jun xjal tzʼaqli. Axpe ikx at jun versículo tojx capítulo lu aju in yolin tiʼj alkye tten tuʼn tten qximbʼetz toj tumel. * Toj tkyaqil mejebʼleʼn, ilxix tiʼj tuʼn tten qximbʼetz toj tumel tuʼntzun tel qnikʼ tiʼj alkye mas bʼaʼn te juntl. Aweye tukʼil nxuʼjile, ma tzʼonin Tyol Dios qiʼje tuʼn tten qximbʼetze toj tumel.

Eric: Tbʼanel tbʼinx.

Brayan: Aqoʼye testigos de Jehová, at jun qtembʼile toj Internet atz jatumel jaku kanet junjun nabʼil quʼn aju jaku tzʼonin qiʼj toj qmejebʼleʼn ex toj qja. Toj chʼin ambʼil jaku txi nyekʼune junjun xnaqʼtzbʼil teya aju tokx toj tembʼil lu. ¿Bʼaʼn toj twitza?

Eric: Bʼaʼn, jaku tzaj tyekʼuna weye.

Brayan: Tuʼn qokx toj tembʼil lu in nokx qqʼoʼn jw.org. Ex atz tzalu in xi tzyet.

Eric: Tbʼanel qe foto tokx toj.

Brayan: Ikju, aʼyeqe qukʼile in che pakbʼan kyoj junjuntl tnam. At jun kʼloj xnaqʼtzbʼil lu, aju tok tbʼi: «Matrimonios y padres». Atz tzalu, in kanet nimku xnaqʼtzbʼil aju chʼin kyqan ex aju in che yolin tiʼj nimku tiʼchaq in tzaj qiʼj. ¿Alkye jun kyxol xnaqʼtzbʼil mas tbʼanel in nela toj twitza?

 Eric: Aju in tqʼamaʼn: «Cómo solucionar problemas en el matrimonio». ¡Atzun jlu in chin jyone tiʼj!

Brayan: Aju xnaqʼtzbʼil lu in yolin tiʼj kyaje tumel tuʼn qex kywitz nya bʼaʼn. Jun techel, qqʼoʼnk qwitz tiʼj taqikʼ lu. ¿Jaku tzaj tuʼjina, Eric?

Eric: Jaku, chi: «Así como la sangre cumple un papel fundamental en mantenernos vivos, así de vital es la comunicación. Pero para que esta fluya debidamente, hacen falta dos cualidades comparables al corazón y los pulmones: el amor y el respeto». Tbʼanel aju techel in kubʼ qʼoʼn tzalu.

Brayan: Chjonte tuʼnju ma tzaj tuʼjina. Ax ikx tok jun taqikʼ Tyol Dios ttxlaj, ex jaku tzʼok qqʼoʼn qwitz tiʼjju in tzaj tqʼamaʼn qa ma t-xi tyaqʼoʼna tiʼj texto aju tkuʼx toj pantalla.

Eric: Aaah, ma jatz tyekʼun aju Efesios 5:33, aju in tzaj tqʼamaʼn: «Teyle junjun kyeye, kʼujlam t-xuʼjil ik tzaʼn in tkʼujlan tibʼ, ax ikx te xuʼj nimanx tchmil».

Brayan: ¿Ma tzʼok tqʼoʼn twitza tiʼjju nabʼil saj tqʼamaʼn? Ma yolin tiʼj tuʼn t-xi qqʼoʼn aju qajbʼil tuʼn ttzaj qʼoʼn qe.

Eric: Mintiʼxix in nel nnikʼe tiʼj.

Brayan: Qa ma qo ximen tiʼj, ¿nyape ax tok qa kykyaqil xinaq, moqa ichan, in nok tilil kyuʼn tuʼn kyxi niman tuʼn kyxuʼjil? ¿Ex nyape ax tok qa kykyaqil xuʼj in nok tilil kyuʼn tuʼn kyok kʼujlaʼn tuʼn kychmil?

Eric: Ikju, ax tok.

Brayan: Qa ma tzʼok ten chmilbʼaj jyol tumel tuʼn t-xi tyekʼun te t-xuʼjil qa kʼujlaʼn tuʼn, mas nya kwest kʼelel toj twitz t-xuʼjil tuʼn tnimen te, ¿moqa tzeʼn teya toj twitz?

Eric: Iklo ttenju.

Brayan: Aju nabʼil lu, chʼix tikʼ kabʼe mil abʼqʼi tkubʼlen tzʼibʼin ex kukx at tajbʼen qe toj ambʼil jaʼlo. Qa ma japun quʼn, kʼonil qiʼj tuʼn qtzalaj ex tuʼn tten kʼujlabʼil ex mujbʼabʼil qxol tukʼil qxuʼjil.

Eric: Il tiʼj tuʼn tjatz nqʼamaʼne qa at nim tbʼanel nabʼil tkuʼx toj Tyol Dios twitzju otoq kubʼ nximane.

Brayan: In chin tzalaje tuʼnju junxitl t-ximbʼetza tiʼj Tyol Dios jaʼlo. ¿Yajtzun qa ma qo yolin toj juntl maj? Qape jaku kubʼ qxnaqʼtzaʼn aju xnaqʼtzbʼil tok tbʼi: «Cuatro pasos para solucionar los problemas». * ¿Tiʼ teya t-ximbʼetz tiʼj?

Eric: Bʼaʼn. Kxel nqʼamaʼne te nxuʼjile tuʼn tkubʼ quʼjine junx.