In nul itzʼje toj jun tnam te Hungría, aju Székesfehérvár tbʼi ex aju at nim txʼolbʼabʼil tiʼj tuʼnju ma tzikʼ mas te jun mil abʼqʼi at tnam lu. Noqtzun tuʼnj, bʼisbʼajilxix tuʼnju kukx in tzaj nnaʼne aju nya bʼaʼn tzaj tzalu tuʼn Tkabʼ Nimaq Qʼoj twitz Tkyaqil Txʼotxʼ.

In jaw chʼiye tukʼil nchmane ex tukʼil nyaʼye. Kukx in che tzaj nnaʼne tukʼil kʼujlabʼil, mas a nyaʼye, aju Elisabeth tbʼi. Tzaj t-xnaqʼtzaʼn nyaʼye weye tuʼn tok qeʼ nkʼuʼje tiʼj Dios. In tzaj xnaqʼtzaʼne tuʼn tej qʼiʼntoq oxe abʼqʼi wuʼne tuʼn t-xi nqʼamaʼne junx tukʼil toj tkyaqil qonikʼan aju naʼj Dios kyaj t-xnaqʼtzaʼn Jesús, aju Padrenuestro tbʼi. Noqtzun tuʼnj, tzmaxi el nnikʼe tiʼj tiʼ t-xilen naʼj Dios lu tej njapune twiʼ chʼixmilo 30 abʼqʼi.

In nok xqʼuqine kyuʼn nchmane tej tzmatoq tal kʼwaʼl qine, tuʼnju in che aqʼunan ntate qʼijtl ex qonikʼan tuʼn tchmet pwaq kyuʼn tuʼn tlaqʼet jun qjaye bʼaʼn chʼintl. Noqtzun tuʼnj, toj kakabʼ sábado in nok qchmon qibʼe qkyaqilxe toj qjaye tuʼn qwaʼne junx. Kukx in tzaj nnaʼne tukʼil kʼujlabʼil aqeju ambʼil lu.

Toj abʼqʼi 1958, japun twiʼ kyxim nmane. Tzaj kylaqʼoʼn jun ja. Tzmaxi toj ambʼil aju jakutoq chin anqʼine junx kyukʼil. ¡Nim in jaw tzalaje! Noqtzun tuʼnj, nya nim ambʼil in tzalaje, tuʼnju oʼkx qaq xjaw ikʼ tej tkyim nmane tuʼn cáncer.

Otoq chin kubʼ bʼaje tuʼn bʼis. In tzaj nnaʼne tej t-xi nqʼamaʼne jlu toj naʼj Dios: «Aya Dios, o chin kubʼsane twitza tuʼn miʼn tkyim nmane. ¡Nimxix wajbʼile tuʼn tten nmane wukʼile! ¿Tiquʼn mintiʼ o chin tzaj tbʼiʼna?». Wajxixe tuʼntoq tel nnikʼe tiʼj jatumel at nmane. In kubʼtoq nximane jlu: «¿Mape txiʼ toj kyaʼj, moqa ma kyim te jumajx?». Tej noktoq nqʼoʼne nwitze kyiʼj kʼwaʼl attoq kytat, in tzaj nbʼise tuʼnju mintiʼ weye ntat.

Chʼixmilo tkyaqil qʼij in bʼete tuʼn nxiʼye toj muqbʼil toj nimku abʼqʼi. In chin kubʼtoq ẍmejeʼye jatumel kux muquʼn nmane ex in chin naʼntoqe Dios kyjalu: «Najsama, Qman Dios, wajxixe tuʼn tel nnikʼe tiʼj jatumel taʼ nmane». Ax ikx xi nqanine onbʼil te tuʼntzun tel nnikʼe tiʼj tiquʼn otoq qo kubʼ tbʼinchaʼn.

 Tej qʼiʼntoq 13 abʼqʼi wuʼne kubʼ nximane tuʼn tbʼant yol alemán wuʼne tuʼnju kubʼ nximane qa jaku che kanet tzaqʼwebʼil wuʼne kyoj nimku uʼj at toj yol alemán. Toj abʼqʼi 1967 kubʼ bʼe wuʼne tuʼn nxiʼye xnaqʼtzal toj tnam Jena, aju attoq toklen tukʼilju tnam Alemania oriental aju o kubʼ naj. Kubʼ wuʼjine nimku uʼj bʼinchaʼn kyuʼn xjal at nim kynabʼil te Alemania, mas aqeju in che yolin tiʼj tiquʼn itzʼ xjal. Kanet junjun tbʼanel ximbʼetz wuʼne, noqtzun tuʼnj, ni jun onin wiʼje tuʼn kykanet tzaqʼwebʼil kyiʼj xjel in chin ximane kyiʼj. Kukx xi nqanine te Dios tuʼn kytzaj ttzaqʼweʼn qe nxjele.

Toj 1970 in meltzʼaje toj Hungría ex atz ok wojtzqiʼne Rose aju kʼokeltoq te nxuʼjile. Toj ambʼil aju, attoq tnam Hungría tjaqʼ tkawbʼil comunismo tbʼi, tuʼntzun aju, noq chʼin ambʼil tikʼlen tej qkubʼ mojeʼye, o ex oqe tukʼil Rose tuʼn qxiʼye Austria. Kubʼ qximane tuʼn qxiʼye Sydney, Autralia atz jatumel in nanqʼintoq jun ntiye.

Tej tikʼ chʼin ambʼil, kanet jun waqʼune toj tnam Austria. Toj jun qʼij, tzaj tqʼamaʼn jun wukʼile toj aqʼuntl qa jaku tzaj ttzaqʼweʼn Tyol Dios tkyaqil nxjele ex tzaj tqʼoʼn kabʼe uʼj in che yolin tiʼj Tyol Dios weye. Kubʼ wuʼjine jun majx, noqtzun tuʼnj, wajtoqe tuʼn tel mas nnikʼe, tuʼntzun jlu, xi ntzʼibʼane kye testigos de Jehová aʼyeju tzʼibʼil uʼj lu, ex xi nqanine mas uʼj kye.

Tojxix qʼij tej tjapun jun abʼqʼi qkubʼlen mojeʼye pon jun qʼa testigo de Jehová visitaril qeye. E tzaj tiʼn qe uʼj otoq chex nqanine ex tzaj tqʼamaʼn weye qa jakutoq qo xnaqʼtzan tiʼj Tyol Dios. Toj ambʼil aju xi nqʼamaʼne te qa jaku. Attoq nim wajbʼile tuʼn nxnaqʼtzane, kyjuʼtzun, in xnaqʼtzane kabʼe maj toj seman, ¡ex kyaje or o xnaqʼtzane toj junjun xnaqʼtzbʼil!

In chin tzalaje tiʼjju in tzajtoq xnaqʼtzaʼn weye tiʼj Tyol Dios kyuʼn testigo de Jehová. Tej ttzaj yekʼun tbʼi Dios weye, aju Jehová, tojxju Tyol Dios qʼiʼn wuʼne toj yol húngaro, mintiʼ xi nnimane jlu. Tuʼnju otoq tzikʼ 27 abʼqʼi in chinxe toj mis ex ni jun maj ok nbʼiʼne tbʼi Dios toj. In jaw labʼine, moqa etz nwitze, kyiʼj tbʼanel tzaqʼwebʼil tzaj tqʼoʼn Tyol Dios ex nya kwest tuʼn tel qnikʼ kyiʼj. Jun kyxol qeju xnaqʼtzbʼil el nnikʼe tiʼj aju qa mintiʼ jun tiʼ in kynaʼn kyimni, ex qa ik kyten ik tzeʼn qe xjal in che jtan (Eclesiastés 9:5, 10; Juan 11:11-15). Ax ikx el nnikʼe tiʼj yol kyaj tziyen qa tzul jun tbʼanel najbʼil atz jatumel «mintiʼtl kamik» ktel (Apocalipsis 21:3, 4). Waje tuʼn tok nkeʼyine nmane toj chʼintl ambʼil, tuʼnju qʼuqli nkʼuʼje «qa ok che jawil anqʼin qe kyimni» toj tbʼanel najbʼil (Hechos 24:15).

Tuʼn tkyaqil tkʼuʼj Rose onin wiʼje. Jun rat naj el qnikʼe tiʼj Tyol Dios ex kubʼ bʼaj qxnaqʼtzbʼile toj kabʼe xjaw. O bʼete toj tkyaqil kychmabʼil testigos de Jehová. Tbʼanel el toj qwitze aju kykʼujlabʼil, aju mujbʼabʼil at kyxol ex aju bʼant kyuʼn qiʼje (Juan 13:34, 35).

Toj abʼqʼi 1976 tzaj qʼoʼn ambʼil qeye tuʼn qxiʼye toj tnam Australia. Tej qpone, o jyone kyiʼj testigos de Jehová ex e tzalaj qiʼje ex qnaʼye ik tzeʼn atoʼye qjaye. Toj abʼqʼi 1978 o oke te testigo de Jehová.

E kanet tzaqʼwebʼil kyiʼj xjel nim tzaj bʼaj nkʼuʼje kyuʼn toj nimku ambʼil. Ax ikx kanet aju mas tbʼanel mambʼaj at: aju Jehová (Santiago 4:8). Nya oʼkxju, ax ikx qʼuqli nkʼuʼje jaʼlo tuʼn nlonteye nmane toj tbʼanel najbʼil o tzaj ttziyen Dios (Juan 5:28, 29).

Toj abʼqʼi 1989 kubʼ qximane tuʼn qmeltzʼaje toj tnam Hungría tuʼn t-xi qqʼamaʼne kye toj qjaye, kye qamiwe ex kye junjun xjal aju qʼuqbʼil qkʼuʼje at. At jun tbʼanel qoklene at tuʼnju o txi qqʼoʼne xnaqʼtzbʼil kye nim syent xjal. Kyxol qe jlu, o che ok mas te 70 te testigo de Jehová ax ikx at ntxuʼye kyxol jlu.

Ikʼ 17 abʼqʼi in naʼne Dios ex xi nqanine te Dios tuʼn ttzaj ttzaqʼweʼn qe nxjele, ex ma tzikʼ 39 abʼqʼi atxix kytzajlen ttzaqʼweʼn. Kukx in chin nnaʼne Dios toj ambʼil jaʼlo, noqtzun tuʼnj, in xi nqʼamaʼne jlu te: «Chjonte Qman Dios, aya at toj kyaʼj, tuʼnju o tzaj ttzaqʼwena qe nnaʼj Diose te nkuxumale»”.