Qa nim in sikti twiʼya tiʼj aqʼuntl moqa nim in sikti t-xmilala tiʼj, bʼaʼn tuʼn ttzaj tnaʼna qa «aju xjal in aqʼnan [‹kyuw›, TNM], at tkambʼabʼl tiʼj jlu» (Proverbios 14:23). ¿Alkye qkambʼabʼil in tzaj tqʼoʼn aqʼuntl? Tnejel, qa ma qo aqʼunan kyuw, in qo tzaj tonin tuʼn tten aju at tajbʼen qe. Ax tok o tzaj ttziyen Dios kye qeju in che ajbʼen te tuʼn tkyaqil kykʼuʼj qa ok tzul tqʼoʼn aju at tajbʼen kye (Mateo 6:31, 32). Noqtzun tuʼnj, ax ikx o tzaj tqʼamaʼn qa il tiʼj tuʼn tok tilil quʼn tuʼn qaqʼunan toj tumel tuʼn qwaʼn (2 Tesalonicenses 3:10).

Tuʼntzunju, qo ximen alkye tten tuʼn qaqʼunan toj tumel. Qa ma qo aqʼunan, atzun jun tumel tuʼn qanqʼin ex tuʼn tjapun quʼn aju il tiʼj tuʼn tbʼant quʼn. «Te qex in tzaj tiʼn tbʼanel», chi Josué, jun kuʼxin te 25 abʼqʼi. Ex tqʼamatl jlu: «Mas jaku txi tchjoʼna aju at tajbʼen teya, ex in kubʼ t-ximana qa il tiʼj tuʼn tbʼant aqʼuntl tuʼna».

Nya oʼkxju, ax ikx qa ma qo aqʼunan kyuw, in qo tzaj tonin tuʼn qtzalaj qiʼjx. ¿Tiquʼn? Tuʼnju maske kwest jun aqʼuntl ex jaku bʼaj qgan tiʼj, noqtzun tuʼnj, qa ma txi qxnaqʼtzan qibʼ ex qa kukx sok tilil quʼn, ok kxel qqʼoʼn tkyaqil qipumal tiʼj ex qo tzalajel tuʼnju ma jaw qjyoʼn aju bʼe mas kwest ex mas tbʼanel (Proverbios 26:14). Qa ma ten jun tbʼanel qximbʼetz tiʼj aqʼuntl, ok qo tzajel tonin tuʼn tkubʼ qnaʼn tzalajbʼil toj qanmi. «Ngan weye aj tex qʼij te jun aqʼuntl kyuw», chi Aaron, aju xqo yolin tiʼj toj tnejel xnaqʼtzbʼil. Ex tqʼamatl jlu: «Jaku chin sikti weye nim wen, ex jaku mix aʼlx jun xjal kʼokel tqʼoʼn twitz tiʼj waqʼune, noqtzun tuʼnj,  ojtzqiʼn wuʼne qa otoq japun wuʼne aju iltoq tiʼj tuʼn tbʼant».

In tzaj tqʼamaʼn Tyol Dios junjun tbʼanel tiʼchaq tiʼj jun «xjal bʼaʼn taqʼunbʼen» ex tiʼj jun xuʼj aju in naqʼunan «tukʼil tzalajbʼil» (Proverbios 22:29; 31:13). Tuʼn tok jun xjal te jun tbʼanel aqʼunal, il tiʼj tuʼn tok tilil tuʼn, tuʼn tbʼant taqʼunan. Ex mix aʼlx jun xjal tajbʼil tuʼn taqʼunan qa mintiʼxix tojtzqibʼil tiʼj aqʼuntl. Tuʼnlo jlu, at nim xjal nya kygan kyaqʼun; tuʼnju mintiʼ in nok tilil kyuʼn tuʼn tten kyojtzqibʼil tiʼj aqʼuntl.

Jaku txi qxnaqʼtzan qibʼ tuʼn qtzalaj tiʼj alkyexku aqʼuntl qa ma qo ximen tiʼj alkye tten jaku bʼant-xix aqʼuntl quʼn. At jun kuʼxin te 24 abʼqʼi, aju William tbʼi, tqʼama jlu: «Qa ma tzʼok tilil quʼn tuʼn tbʼant jun aqʼuntl, in qnaʼn nimxix tzalajbʼil». Ex tqʼamatl jlu: «Mlayx qnaʼ tzalajbʼil lu qa mintiʼ sok tilil quʼn, moqa oʼkx tal chʼin xbʼant quʼn».

Nya oʼkx ximana tiʼj jniʼ pwaq tuʼn tkambʼet tuʼna. Mas bʼaʼn tuʼn t-ximana kyiʼj xjel lu: «¿Tiquʼn il tiʼj tuʼn waqʼunane? ¿Tiʼ jaku bʼaj qa mintiʼ ẍin aqʼunane ex qa mintiʼ xbʼant wuʼne toj tumel? ¿Alkye tten in nonin waqʼune kyiʼj txqantl?»

Tbʼanel qa ma qo ximen tiʼj toxin xjel, tuʼnju mas in qo tzalaj qa ma qo ximen tiʼj alkye tten in qo onin kyiʼj txqantl tukʼe qaqʼun. Ax Jesús qʼamante jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hechos 20:35). Nya oʼkx bʼaʼn tuʼn qximen tiʼj alkye tten in qo aqʼunan kye qeju tajaw aqʼuntl, ax ikx bʼaʼn tuʼn qximen tiʼj alkye tten in qo onin kyiʼj txqantl xjal tukʼil qaqʼun kyuw. A jlu ax ikx in yolin kyiʼj qe toj qja ex qe txqantl aʼyeju atx chʼintl taj kye.

Aqeju toj qja. Qa ma tzʼok tilil tuʼn jun chmilbʼaj moqa jun xuʼjilbʼaj tuʼn t-xi tqʼoʼn aju at tajbʼen kye toj tja, in chex tonin te kabʼe tumel. Tnejel, qa ma tzʼaqʼunan, in nok tilil tuʼn, tuʼn t-xi tqʼoʼn aju at tajbʼen kye toj tja ik tzeʼn kywa, kyxbʼalun ex kyja. Iktzun tten in japun tuʼn aju o tzaj tqʼamaʼn Dios te, aju tuʼn kyok «tkwentin qeju ateʼ tuj tja» (1 Timoteo 5:8). Tkabʼ, in xi tyekʼun tukʼe techel qa nim toklen aju aqʼuntl kyuw. «In kubʼ tqʼoʼn nmane jun tbʼanel techel tiʼj jun xjal aju tbʼanel aqʼunal», chi Shane, aju xqo yolin tiʼj toj tnejel xnaqʼtzbʼil. Ex tqʼamatl Shane jlu: «Jun tbʼanel xjal ntate aju o tzʼaqʼunan toj tkyaqil tanqʼibʼil, chʼixmi toj tkyaqil tanqʼibʼil te karpinter. Tiʼj in nel nnikʼe qa nim toklen tuʼn qaqʼunan tukʼe qqʼabʼ ex tuʼn tkubʼ qbʼinchaʼn junjun tiʼchaq at tajbʼen kye xjal».

Aʼyeju mintiʼxix at kye. Xi tqʼamaʼn apóstol Pablo nabʼil lu kye okslal: «Noq oʼkx tuʼn taqʼnan tuʼn tqʼabʼ tuʼn tbʼinchante jun aqʼuntl tuj tumelxix, tuʼntzun tknet aju in ajbʼen te, ex tuʼn t-xi tqʼoʼn chʼin teju atx taj te» (Efesios 4:28). Ikju, qa ma qo aqʼunan tuʼn tten aju at tajbʼen kye toj qja, ax ikx jaku bʼant tuʼn qonin kyiʼj qeju mintiʼxix at kye (Proverbios 3:27). Tuʼntzunju, qa ma qo aqʼunan kyuw, jaku qo tzaj tonin tuʼn qtzalaj aj t-xi qqʼoʼn chʼin kye qeju mintiʼxix at kye.

Toj jun tbʼanel tchikʼbʼabʼil Jesús tqʼama: «Qa at jun xjal ma tzʼok jwersina tuʼn tuʼn t-xi tiʼna tiqatz tuʼn tbʼeta mey ojlabʼ tukʼil, txiʼya tuʼn tbʼeta jun ojlabʼ tukʼil» (Mateo 5:41). ¿Tzeʼn jaku japun lu quʼn? Aj tkubʼ qbʼinchaʼn mastl twitzju aqʼuntl in tzaj qanin qe. Jaku qo ok ten ximel tiʼj alkye tten jaku kubʼ qbʼinchaʼn qaqʼun mas bʼaʼn moqa mas jurat. Qqʼonk tilil tuʼn qtzalaj tiʼj junjun tal tiʼchaq in kubʼ qbʼinchaʼn toj aqʼuntl.

Qa ma kubʼ qbʼinchaʼn jlu, mas qo tzalajel tiʼj qaqʼun. ¿Tiquʼn? Tuʼnju tkyaqilju in kubʼ qbʼinchaʼn tbʼanel in nela. In kubʼ qbʼinchaʼn mas twitzju in tzaj qanin qe tuʼnju qajbʼil ex nya tuʼnju in tzaj qʼamaʼn qe (Filemón 14). Qa ma bʼant jlu quʼn, in japun quʼn aju in tzaj tqʼamaʼn Proverbios 12:24, aju in tqʼama jlu: «Aju xjal puro sekʼ tiʼj taqʼun kʼokel te nejenel kye mastl; atzunju xjal kyʼaj kukx kyjel tjaqʼ tkawbʼil juntl». Chʼixmi qkyaqilx nya qajbʼil tuʼn qokx tjaqʼ kykawbʼil txqantl ex nya qajbʼil tuʼn qok obligarin tiʼj jun aqʼuntl. Noqtzun tuʼnj, qa at jun xjal mintiʼ in nok tilil tuʼn toj taqʼun ex qa oʼkx tal chʼin in kubʼ tbʼinchaʼn, jaku tnaʼ qa jun majen te kye txqantl. Atzunte xjal in kubʼ tbʼinchaʼn mastl twitzju in tzaj qanin te tuʼnju in kubʼ t-ximen tuʼn tbʼant tuʼn, in tnaʼn qa a tajaw tanqʼibʼil ex ax tajaw aju in kubʼ tbʼinchaʼn.

Nim toklen tuʼn qaqʼunan kyuw ex in tzaj tqʼamaʼn Tyol Dios qa il tiʼj tuʼn tok tilil quʼn toj aqʼuntl (Proverbios 13:4). Noqtzun tuʼnj, mintiʼ in tzaj tyekʼun jlu qa oʼkx qo ximel tiʼj aqʼuntl tuʼnju at juntl mas nim toklen twitz jlu. In tzaj tqʼamaʼn Eclesiastés 4:6 jlu: «Mas bʼaʼn qa noq chʼin at qe ex in qo anqʼin tuj txubʼtxaj, twitzju tuʼn tten nim at qe ex mintiʼ in qo anqʼin tuj txubʼtxaj; ik tten jlu ik tzaʼn jun xjal taj tzaj ttzyuʼn kyqʼiqʼ tuʼn tqʼabʼ». ¿Tiʼ in tzaj tyekʼun jlu qe? In tzaj tyekʼun qa aju xjal oʼkx in ximen tiʼj taqʼun ex oʼkx in nok tqʼoʼn ambʼil ex tipumal tiʼj, mlay tzalaj tiʼjju taqʼun. In nok aqʼuntl te mintiʼx tajbʼen toj twitz ex in nok ik tzeʼn in «tzaj ttzyuʼn kyqʼiqʼ tuʼn tqʼabʼ».

In qo tzaj tonin Tyol Dios tuʼn tten qxim toj tumel tiʼj aqʼuntl ex tuʼn tkubʼ qqʼoʼn toj tlugar. In tzaj tqʼamaʼn qe tuʼn qaqʼunan ex in tzaj tqʼoʼn nabʼl lu qe: «Tuʼntzun tbʼant kyskʼone tiʼj alkyeju mas bʼaʼn [moqa ‹mas nim toklen›, TNM]» (Filipenses 1:10). ¿Alkyetzun mas nim toklen? Aju tuʼn tel qpaʼn ambʼil tuʼn qten kyukʼil toj qja ex qe qamiw. Noqtzun tuʼnj, aju mas nim toklen aju tuʼn tel qpan ambʼil tuʼn tbʼant junjun tiʼchaq quʼn tuʼn tchʼiy qamiwbʼil tukʼil Dios, ik tzeʼn tuʼn tkubʼ quʼjin Tyol ex tuʼn qximen tiʼjju in kubʼ quʼjin.

Aqeju in kubʼ kyqʼoʼn aqʼuntl toj tlugar, mas in che tzalaj tiʼj kyaqʼun. Tqʼama William jlu, aju ma qo yolin tiʼj: «Aju tnejel npatróne, jun tbʼanel techel tiʼj jun xjal aju at jun t-xim toj tumel tiʼj aqʼuntl. Nim in naqʼunan, ex at jun tbʼanel kyxim xjal tiʼj aʼyeju in che aqʼunan tukʼil tuʼnju in nok tilil tuʼn toj aqʼuntl. Noqtzun tuʼnj, aj tex qʼij, otoqxi kubʼ bʼaj aqʼuntl, in nel tnikʼ tiʼj alkye or tuʼn tkyaj ttzaqpiʼn taqʼun ex tuʼn tok tqʼoʼn ambʼil kyiʼj toj tja ex tiʼj tajbʼebʼil te Dios. Ex nya oʼkxju, ax ikx a jun xjal jlu mas in tzalaj kywitz txqantl».