Aju tkyimlen Jesús, atzun jun mas nim toklen in kubʼ ikʼset atxix ojtxi, ex tuʼn jaku tzaj qʼoʼn juntl maj kye xjal aju xi tnajsaʼn Adán. Mintiʼ e kubʼ bʼinchaʼn qe xjal tuʼn kybʼinchante il, nix tuʼn ttzaj kyyabʼ nix tuʼn kykyim (Génesis 1:31). Noqtzun tuʼnj, oktz il twitz Txʼotxʼ noq tuʼn tlaj tnejel xjal, aju Adán tbʼi. Xi tqʼoʼn Jesús tchwinqlal tuʼntzun qetz tjaqʼ il ex kamik. (Uʼjinxa Mateo 20:28 ex Romanos 6:23.)

Tzaj tyekʼun Jehová nimxix tkʼujlabʼil kyiʼj xjal tej ttzaj t-samaʼn aju Tkʼwaʼl tzalu twitz Txʼotxʼ tuʼn tkyim tuʼn qpaj (1 Juan 4:9, 10). Kyaj tqʼamaʼn Jesús kye qeju t-xnaqʼtzbʼen tuʼn tkubʼ kynaʼn aju tkyimlen tukʼe jun ikʼsabʼil nya nim tiʼ in najbʼen toj, oʼkx in najbʼen chʼin pan ex chʼin vino. Qa ma kubʼ ikʼset jlu tkyaqil abʼqʼi a jlu jun tten tuʼn t-xi qʼet chjonte te Dios ex te Tkʼwaʼl tuʼnju o kubʼ kyyekʼun kykʼujlabʼil. (Uʼjinxa Lucas 22:19, 20.)

Tej t-xi tqʼamaʼn Jesús tnejil maj kye t-xnaqʼtzbʼen tuʼn tkubʼ kynaʼn tkyimlen, yolin tiʼj jun yol in kyaj bʼant tiʼj (Mateo 26:26-28). Tuʼnju yol kyaj bʼant tiʼj jaqet bʼe tuʼn, tuʼn kyok t-xnaqʼtzbʼen Jesús ex txqantl xjal te kawil ex te pal tukʼil toj kyaʼj. Nimxix xjal kbʼel kynaʼn aju tkyimlen Jesús, noqtzun tuʼnj, oʼkx qe che xeʼl toj kyaj che waʼl tiʼj pan ex che kʼal tiʼj vino, aʼyeju nya nim kybʼet. (Uʼjinxa Apocalipsis 5:10.)

Toj chʼixmi kabʼe mil abʼqʼi, o che jaw tjyoʼn Jehová qeju che okel te kawil tukʼil Tkʼwaʼl (Lucas 12:32). Nya nim kybʼaj qe jlu qa ma tzʼok qmojbʼan kyukʼe qeju che anqʼil te jumajx tzalu twitz Txʼotxʼ. (Uʼjinxa Apocalipsis 7:4, 9, 17.)