1, 2. a) ¿Tiʼ tzaj tchikʼbʼaʼn Jesús tiʼjju kbʼajel kyoj bʼajsbʼil qʼij? b) ¿Tiʼ qo xnaqʼtzal tiʼj toj xnaqʼtzbʼil lu?

QʼUQLITOQ Jesús twiʼ witz Olivos tukʼil Pedro, Andrés, Santiago ex Juan, aqeju t-apóstol, atz jatumel qʼanchaʼltoq tja Dios toj Jerusalén. Toj ambʼil aju, ok ten chikʼbʼal aju tbʼanel kʼikʼel kyoj bʼajsbʼil qʼij te nya bʼaʼn ex ajtoq tok te aj kawil toj Tkawbʼil Dios. Tqʼama Jesús toj ambʼil aju qa ktel jun «majen in bʼant taqʼun [...] ex at tnabʼl» aju ktel te t-xel (tchʼixel) tzalu twitz Txʼotxʼ. Aju majen lu oktoq kʼaqʼunal tuʼn t-xi tqʼoʼn kywa okslal, toj juntl yol, tuʼn ttzaj tqʼoʼn xnaqʼtzbʼil kye okslal toj ambʼil bʼantni tiʼj (Mateo 24:45-47).

² Tej tzmatoq tbʼaj yolin Jesús tiʼj jlu, tzaj tqʼamaʼn jun txʼolbʼabʼil aju in yolin kyiʼj lajaj txin naʼmxtoq kykubʼ mojeʼ (kjawil uʼjit Mateo 25:1-13). Toj xnaqʼtzbʼil lu, ok che tzajel tzaqʼweʼn qe xjel lu: tnejel, ¿alkye xnaqʼtzbʼil tajbʼiltoq Jesús tuʼn ttzaj tqʼamaʼn tukʼil txʼolbʼabʼil kyiʼj lajaj txin naʼmxtoq kykubʼ mojeʼ?, tkabʼ, ¿alkye tten in japun xnaqʼtzbʼil tqʼama Jesús kyuʼn okslal skʼoʼn maj? ¿Ex tiʼ tbʼanel tzul kye tuʼnju in japun xnaqʼtzbʼil kyuʼn? Toxin, ¿alkye tten jaku  tzʼonin tiʼj teyele junjun qe aju txʼolbʼabʼil tqʼama Jesús?

3. a) ¿Alkye chikʼbʼabʼil in tzajtoq tqʼoʼn majen in bʼant taqʼun tiʼj txʼolbʼabʼil in yolin kyiʼj lajaj txin naʼmxtoq kymojeʼ? b) Qa mas ma qo ximen kyiʼj junjun tiʼchaq in tzaj tqʼamaʼn jun txʼolbʼabʼil, ¿tiʼ jaku bʼaj?

³ Toj xnaqʼtzbʼil tzma sikʼ, o qo xnaqʼtzan tiʼj qa o chʼexpaj tumel tuʼn majen tiʼj alkye tten in tzaj tchikʼbʼaʼn junjun txʼolbʼabʼil ateʼkux toj Tyol Dios. Tnejel, oʼkx in yolintoq majen tiʼj alkye kyxilen teyele junjun txʼolbʼabʼil. Atzun toj ambʼil jaʼlo mas in yolin majen tiʼj alkye xnaqʼtzbʼil in tzaj tqʼoʼn qe. Jun techel, aju txʼolbʼabʼil in yolin kyiʼj lajaj txin naʼmxtoq kymojeʼ. Mas in che yolintoq quʼj tiʼj t-xilen junjun tiʼchaq ik tzeʼn kandil, aseyt ex tkubʼil aseyt. Noqtzun tuʼnj, qa mas ma qo ximen kyiʼj junjun tiʼchaq ik tzeʼn jlu, jaku miʼn qo ximentl tiʼjju xnaqʼtzbʼil tajbʼil txʼolbʼabʼil tuʼn ttzaj tqʼoʼn. Tuʼntzunju, toj xnaqʼtzbʼil lu, mas qo yolil tiʼj xnaqʼtzbʼil in tzaj tqʼoʼn txʼolbʼabʼil ex alkye tten in nonin qiʼj qkyaqilx.

4. a) ¿Alkye aju kʼokel te chmilbʼaj, ex tiquʼn in xi qqʼamaʼn ikju? b) ¿Alkyeqe txin naʼmx kykubʼ mojeʼ, ex tiquʼn in xi qqʼamaʼn ikju?

⁴ Tuʼn tel qnikʼ tiʼj alkye xnaqʼtzbʼil tajbʼiltoq Jesús tuʼn ttzaj tqʼamaʼn, tnejel kʼelel qnikʼ tiʼj alkye qe xjal in yolin txʼolbʼabʼil tiʼj. ¿Alkye kʼokel te chmilbʼaj? A Jesús. ¿Tiquʼn in xi qqʼamaʼn jlu? Tuʼnju toj juntl maj, ax qʼamante qa ik te tten ik tzeʼn jun xjal kʼokel te chmilbʼaj (Lucas 5:34, 35). Yajtzun qe qʼapoj, moqa qe txin, naʼmx kykubʼ mojeʼ, ¿alkyeqe? Aʼye qe ẍneʼl nya nim kybʼet, toj juntl yol, aʼyeqe okslal skʼoʼn maj. ¿Tiquʼn in xi qqʼamaʼn jlu? Tuʼnju toj juntl maj, tqʼama Jesús qa che okel okslal skʼoʼn maj ik tzeʼn qe majen in che ayon tiʼj kypatrón tukʼil kykandil txqoʼn aj tmeltzʼaj kypatrón toj jun mejebʼleʼn (Lucas 12:32, 35, 36). Ex ik tzeʼn qe txin in yolin txʼolbʼabʼil kyiʼj, ya bʼantni kyten tukʼil kykandil txqoʼn maj aj tpon aju kʼokel te chmilbʼaj. Ax ikx tqʼama apóstol Pablo tukʼil apóstol Juan qa ik kyten okslal skʼoʼn maj ik tzeʼn qe txin naʼmxtoq kykubʼ mojeʼ (2 Corintios 11:2; Apocalipsis 14:4). Tuʼn tkyaqil jlu in nel qnikʼ qa atz kye okslal skʼoʼn maj tajbʼiltoq Jesús tuʼn ttzaj tqʼoʼn xnaqʼtzbʼil tej ttzaj tqʼamaʼn txʼolbʼabʼil kyiʼj lajaj txin naʼmxtoq kymojeʼ.

5. a) ¿Toj alkye ambʼil in japun twiʼ aju txʼolbʼabʼil kyiʼj txin naʼmx kykubʼ mojeʼ? b) ¿Tiquʼn in xi qqʼamaʼn jlu?

⁵ ¿Toj alkye ambʼil in japun twiʼ aju tqʼama Jesús? Kyoj bʼajsbʼil tqʼijlalil, ex chʼixtoq tkubʼ bʼaj nimxix yajbʼil. ¿Tiquʼn in xi qqʼamaʼn jlu? Tuʼnju tej chʼixtoq tkubʼ bʼaj txʼolbʼabʼil tqʼama Jesús qa ‹ul› aju kʼokel te chmilbʼaj (Mateo 25:10). Toj uʼj Aju Xqʼuqil, aju etz toj kastiy toj 15 te julio te 2013, el qnikʼ tiʼj qa aju tkuʼx toj Mateo 24 ex 25 in yolin wajxaq maj tiʼj aju tuʼn tul Jesús. Ex el qnikʼ tiʼj qa chʼixtoq tkubʼ bʼaj nimxix yajbʼil, tzul Jesús bʼinchal tiʼj tkyaqil nya bʼaʼn ex tzul tuʼn tkubʼ tnajsaʼn tkyaqil nya bʼaʼn. Kyjuʼtzun, in xi qqʼamaʼn qa aju txʼolbʼabʼil in yolin kyiʼj lajaj txin in japun twiʼ kyoj bʼajsbʼil tqʼijlalil, ex mas toj nimxix yajbʼil.

6. ¿Alkye xnaqʼtzbʼil tajbʼiltoq Jesús tuʼn ttzaj tqʼamaʼn tukʼil txʼolbʼabʼil aju in yolin kyiʼj lajaj txin?

⁶ ¿Alkye xnaqʼtzbʼil tajbʼiltoq Jesús tuʼn ttzaj tqʼamaʼn tukʼil txʼolbʼabʼil lu? Tnejel qo xnaqʼtzan kyiʼj qe yol ateʼk ttxlaj jlu. Toj capítulo 24 te uʼj Mateo, yolin Jesús tiʼj majen in bʼant taqʼun ex at tnabʼl, aqeju jun kʼloj okslal skʼoʼn maj qʼil twitz aqʼuntl kyoj bʼajsbʼil tqʼijlalil. Xi tqʼoʼn Jesús jun  xnaqʼtzbʼil kye okslal lu aju in yolin tiʼj tuʼn kukx kyajbʼen te Dios. Chʼixmi ax xnaqʼtzbʼil lu tajbʼiltoq Jesús tuʼn t-xi tqʼamaʼn tej tkubʼ tqʼoʼn txʼolbʼabʼil aju in yolin kyiʼj lajaj txin naʼmx kykubʼ mojeʼ. Noqtzun tuʼnj, tajbʼiltoq tuʼn t-xi t-xnaqʼtzaʼn jlu kye kykyaqil okslal skʼoʼn maj kyoj bʼajsbʼil tqʼijlalil. ¿Alkye xnaqʼtzbʼil? Aju qa kykyaqil qe skʼoʼn maj iltoq tiʼj tuʼn kyxqʼuqin qa nya kyajbʼil tuʼn tel qʼiʼn oyaj kye aju tuʼn kyoklen tuʼn kyxiʼ toj kyaʼj (Mateo 25:13). ¿Alkye tten o japun xnaqʼtzbʼil lu kyuʼn okslal skʼoʼn maj? Qo xnaqʼtzan tiʼj.

7, 8. a) ¿Tiʼ onin kyiʼj txin at kynabʼil tuʼn tbʼant kyten? b) ¿Alkye tten o kubʼ kybʼinchan kyibʼ okslal skʼoʼn maj?

⁷ Tqʼama Jesús toj txʼolbʼabʼil qa at jweʼ txin «mintiʼ kynabʼl» tuʼnju nyatoq bʼantni kyten tej tpon aju kʼokel te chmilbʼaj. Ex tqʼama qa at jweʼtl txin «at kynabʼl» tuʼnju otoq bʼant kyten tej tpon aju kʼokel te chmilbʼaj. ¿Tiʼ onin kyiʼj? Aju kubʼ bʼinchaʼn kyten ex e xqʼuqin. Kykyaqil txin lu, iltoq tiʼj tuʼn kyxqʼuqin tuʼn tel kynikʼ toj alkye or kpoltoq aju kʼokel te chmilbʼaj ex iltoq tiʼj tuʼn tok kytxqoʼn kykandil toj qonikʼan. Aqeju jweʼ txin at kynabʼil xi kyiʼn chʼintl aseyt, atzun qe txin mintiʼ kynabʼil mintiʼ xi kyiʼn. ¿Alkyetzun tten o kubʼ kybʼinchan kyibʼ tbʼanel okslal skʼoʼn maj tuʼn tul Jesús?

⁸ O kubʼ kybʼinchan kyibʼ okslal skʼoʼn maj tuʼn tkubʼ kybʼinchaʼn tkyaqilju in tzaj tqʼamaʼn Jehová toj tkyaqil kyanqʼibʼil twitz Txʼotxʼ. O kubʼ kybʼinchan kyibʼ te nimku tten. Tnejel, mintiʼ in ten nim tiʼchaq kye tuʼntzun kyajbʼenxix te Jehová, ex in bʼant kyuʼn tuʼn tkyaqil kykʼuʼj. Tkabʼ, o bʼaj kyximen tuʼn kukx kyajbʼen te Dios noq toj alkyexku ambʼil tzul xitbʼil, tuʼnju kʼujlaʼn Jehová ex Jesús kyuʼn. Ex toxin, mintiʼ in nok kykʼujlaʼn qʼinumabʼil, mintiʼ in che yaẍin ex nya oʼkx in che ximen kyiʼjx ik tzeʼn in bʼant kyuʼn xjal. Ik kyten okslal skʼoʼn maj ik tzeʼn qe txin at kynabʼil, aqeju kukx txqoʼn kykandil. Bʼantnitl kyten ex in che ayon tukʼil pasens tiʼjju kʼokel te chmilbʼaj, maske at junjun jaku kubʼ kyximen qa atx nim ambʼil tuʼn tul (Filipenses 2:15).

9. a) ¿Tiʼ xi tqʼamaʼn Jesús kye okslal skʼoʼn maj? b) ¿Tiʼ o bʼant kyuʼn okslal skʼoʼn maj tej t-xi kybʼiʼn tqʼajqʼajel wibʼaj lu: «Lu tzul ju chmilbʼaj»? (Qʼonka twitza tiʼj tqanil t-xe t-xaq uʼj.)

⁹ Aju juntl tiquʼn otoq bʼant kyten txin at kynabʼil aju otoq che xqʼuqin. Qa ikju, ¿tiquʼn tqʼama Jesús qa e ikʼ tan qe txin tuʼnju yaj bʼant tten xinaq? Tqʼama jlu tuʼn t-xi tqʼamaʼn kye okslal skʼoʼn maj toj ambʼil jaʼlo qa jaku che kyaj wtan, toj juntl yol, jaku tzʼok kyqʼoʼn kywiʼ tiʼj junjuntl tiʼchaq akux in che ayon tiʼj Jesús. Ojtzqiʼntoq tuʼn Jesús qa axpe ikx aju tajbʼil tuʼn t-xqʼuqin jaku txi tqʼoʼn twiʼ tiʼj junjuntl tiʼchaq. Tuʼntzunju, o tzʼokxix tilil kyuʼn tuʼn kukx kyxqʼuqin. ¿Tzeʼn o bʼant kyuʼn? Qa ma tzaj qnaʼn txʼolbʼabʼil, tqʼama Jesús qa aqeju lajaj txin kybʼi tqʼajqʼajel wibʼaj lu: «Lu tzul ju chmilbʼaj». Noqtzun tuʼnj, oʼkx qeju at kynabʼil e xqʼuqin (Mateo 25:5, 6; 26:41). Ax ikx toj ambʼil jaʼlo, kyoj bʼajsbʼil qiʼj, o txi kybʼiʼn okslal skʼoʼn maj aju tqʼajqʼajel wibʼaj lu: «Lu tzul ju chmilbʼaj». ¿Ex tiʼ o bʼant kyuʼn? O tzʼel kynikʼ tiʼj junjun tbʼanel yekʼbʼil at qa chʼix tul Jesús ex o bʼant kyten tuʼn tul. * (Qʼonka twitza tiʼj tqanil t-xe t-xaq uʼj.) Atzun jaʼlo, qo yolin tiʼjju in bʼaj aj tkubʼ bʼaj txʼolbʼabʼil aju in yolin tiʼjxix jun ambʼil.

10. ¿Tiʼ jaku kubʼ qximen tiʼjju in bʼaj aj kyyolin qeju txin mintiʼ kynabʼil kyukʼil qeju at kynabʼil?

¹⁰ Tej chʼixtoq tpon aju kʼokel te chmilbʼaj, e yolin qeju txin mintiʼ kynabʼil kyukʼil qeju at kynabʼil. Aqeju mintiʼ kynabʼil xi kyqanin aseyt te kykandil kye qeju at kynabʼil. Noqtzun tuʼnj, aqeju at kynabʼil mintiʼ e onin kyiʼj (kjawil uʼjit Mateo 25:8, 9). Atzlo in yolin jlu tiʼjju kbʼajel chʼixtoq tul Jesús ex chʼixtoq tkubʼ bʼaj nimxix yajbʼil. Noqtzun tuʼnj, jakulo kubʼ qximen jlu: «¿Tiquʼn melay che onin qeju okslal skʼoʼn maj tiʼj jun okslal skʼoʼn maj aju mintiʼ in xqʼuqin?». Tuʼn tel qnikʼ tiʼj jlu, bʼaʼn tuʼn ttzaj qnaʼn qa toj ambʼil aju, otoq tzʼok sey te jumajx kyiʼj okslal skʼoʼn maj.

11. a) ¿Tiʼ kbʼajel chʼixtoq t-xi tzyet nimxix yajbʼil? b) Tej t-xi kyqʼamaʼn txin at kynabʼil kye txin mintiʼ kynabʼil tuʼn kyxiʼ laqʼol aseyt, ¿tiʼ kyaj tuʼn t-xi kyqʼamaʼn tukʼe jlu?

¹¹ Chʼixtoq t-xi tzyet nimxix yajbʼil, kykyaqil tbʼanel okslal skʼoʼn maj twitz Txʼotxʼ otoq tzʼok aju sey kyiʼj te jumajx (Apocalipsis 7:1-4). A jlu tzul tyekʼun qa ax tok che xeʼl toj kyaʼj. Noqtzun tuʼnj, ¿tiʼ kbʼajel kyiʼj qe mintiʼ ẍe xqʼuqin ex nya bʼantni kyten naʼmxtoq t-xi tzyet nimxix yajbʼil? Mlay tzʼok sey kyiʼj. Aj t-xi tzyet nimxix yajbʼil ex aj tok kyqʼoʼn kywitz kyiʼj kykyaqil nya ax tok okslabʼil in che bʼaj xiten, aqeju nya bʼaʼn okslal lu, noq che jawil labʼin. Tojlo ambʼil lu, kʼelel kynikʼ tiʼj qa nya bʼantni kyten tuʼn tul Jesús. Qa ma che jyon onbʼil toj ambʼil lu, ¿tiʼ kbʼajel? In kanet tzaqʼwebʼil quʼn toj txʼolbʼabʼil kyiʼj lajaj txin. Aqeju txin at kynabʼil nya kyajbʼil tuʼn t-xi kyqʼoʼn aseyt kye qeju mintiʼ kynabʼil ex in xi kyqʼamaʼn kye tuʼn kyxiʼ laqʼolte. Ex tuʼnju otoq tzaj tmij aqʼbʼil, mix aʼl jun xjal jaku tzaj kʼayinte aseyt kye. Toj juntl yol, aju kyaj qe at kynabʼil tuʼn t-xi kyqʼamaʼn kye qe mintiʼ kynabʼil aju qa ya ma tzikʼ ambʼil kye tuʼn kyjyon onbʼil.

12. a) Toj nimxix yajbʼil, ¿tiʼ kbʼajel tiʼj alkyexku okslal skʼoʼn maj aju otoq tzʼok te nya bʼaʼn ex aju miʼn tzʼok sey tiʼj? b) ¿Tiʼ kbʼajel kyiʼj qeju ik kyten ik tzeʼn qe txin mintiʼ kynabʼil?

¹² Toj nimxix yajbʼil, mlay bʼant kyonin okslal skʼoʼn maj kyiʼj qeju otoq che ok te nya bʼaʼn. Otoq bʼaj ambʼil kye. ¿Tiʼtzun kbʼajel kyiʼj qeju otoq che ok te nya bʼaʼn? Ax kbʼajel kyiʼj ik tzeʼn bʼaj kyiʼj txin mintiʼ kynabʼil aqeju tej kyxiʼ laqʼol aseyt ul aju kʼokel te «chmilbʼaj, atzun qe qʼapoj bʼanin kyten, e okx tuja tukʼil chmilbʼaj tuj mejebʼleʼn ex bʼiʼxtzun lamet ttzi ja». Aj tul Jesús, chʼixtoq tkubʼ bʼaj aju nimxix yajbʼil, ok che okel tchmoʼn Jesús toj kyaʼj aqeju tbʼanel okslal skʼoʼn maj (Mateo 24:31; 25:10; Juan 14:1-3; 1 Tesalonicenses 4:17). Atzun qeju mintiʼ ẍe xqʼuqin, ok che elel tikʼun. Oklo kxel kyqʼamaʼn ik tzeʼn xi kyqʼamaʼn txin mintiʼ kynabʼil: «Tat, tat, jaqon okxa ja qwitze». Atzunte Jesús kxel ttzaqʼweʼn aju ok kxel ttzaqʼweʼn kye txqantl nya bʼaʼn xjal: «Ax tok kxel nmaʼne kyeye, mintiʼ ojtzqiʼn qeye wuʼne» (Mateo 7:21-23; 25:11, 12).

13. a) ¿Tiquʼn in xi qqʼamaʼn qa mintiʼtoq in tzaj tqʼamaʼn Jesús qa nimku okslal che okel te nya bʼaʼn? b) ¿Tiquʼn jaku txi qqʼamaʼn qa aju txʼolbʼabʼil in yolin kyiʼj txin in tzaj tyekʼun qa qʼuqli tkʼuʼj Jesús kyiʼj okslal skʼoʼn maj? (Qʼonka twitza tiʼj tnejel tilbʼilal.)

¹³ ¿Tqʼamape Jesús tukʼe jlu qa at nim okslal skʼoʼn maj che okel te nya bʼaʼn ex che tzajel jyet kyxel? Miʼn. Tuʼn tel qnikʼ tiʼj, qo ximen tiʼj capítulo 24 te Mateo. Tej t-xi tqʼamaʼn Jesús tuʼn miʼn tok majen te nya bʼaʼn, mintiʼ in tzaj tyekʼun jlu qa ik kbʼajelju. Noq jun kawbʼil xi tqʼoʼn kye tiʼjju jakutoq bʼaj kyiʼj. Chʼixmi ax in bʼaj tukʼil txʼolbʼabʼil in yolin kyiʼj lajaj txin. In tzaj tqʼoʼn Jesús  jun kawbʼil kye okslal skʼoʼn maj. Ik tzeʼn qe jweʼ txin ten kynabʼil ex jweʼtl mintiʼ ten kynabʼil, ax ikx teyele junjun okslal skʼoʼn maj, il tiʼj tuʼn tbʼaj t-ximen qa kxqʼuqil moqa kʼokel te nya bʼaʼn. Chʼixmi ax kawbʼil lu xi tqʼamaʼn apóstol Pablo kye okslal skʼoʼn maj (kjawil uʼjit Hebreos 6:4-9; chʼixmi ax ximbʼetz lu kkanetel tuʼna toj Deuteronomio 30:19). Nya nyaqin apóstol Pablo tej t-xi tqʼamaʼn kawbʼil kye okslal, noqtzun tuʼnj, ax ikx tqʼama kye qa qʼuqlitoq tkʼuʼj qa kukx che ajbʼel te Dios. Aju kawbʼil xi tqʼoʼn Jesús tukʼil txʼolbʼabʼil kyiʼj lajaj txin in tzaj tyekʼun qa ax ikx te qʼuqli tkʼuʼj kyiʼj okslal skʼoʼn maj. Ojtzqiʼn tuʼn qa teyele te junjun kye jaku che ajbʼen te Dios ex jaku che tzaj kʼiwlaʼn.

14. ¿Tiquʼn jaku tzʼonin txʼolbʼabʼil tqʼama Jesús kyiʼj «txqantl» ẍneʼl?

¹⁴ Aju txʼolbʼabʼil tqʼama Jesús, in tzaj tyekʼun jun xnaqʼtzbʼil, aju: «Che xqʼuqine». Ax tok aju txʼolbʼabʼil, tzaj qʼamaʼn kye okslal skʼoʼn maj, ax ikx qeju «txqantl» ẍneʼl jaku tzʼonin kyiʼj (Juan 10:16). ¿Tiquʼn? Tuʼnju tqʼama Jesús jlu: «Aju in xi nmaʼne kyeye, kye kykyaqil in xi nmaʼne: Che xqʼuqine» (ma tzʼok qqʼoʼne qʼeq tiʼj; Marcos 13:37). Tajbʼil Jesús tuʼn tkubʼ kybʼinchaʼn kyten kykyaqil okslal ex tuʼn kyxqʼuqin. Ex tuʼn tel kykanoʼn kyiʼj okslal skʼoʼn maj ex tuʼn tkubʼ kyqʼoʼn pakbʼabʼil tnejel toj kyanqʼibʼil. Ax ikx, qa ma tzaj qnaʼn, xi kyqanin txin mintiʼ kynabʼil aseyt kye qe at kynabʼil. Miʼn qo ok ik tzeʼn kye. Miʼn kubʼ qximen qa jaku che ajbʼen txqantl xjal te qxel, qa ok kbʼel kybʼinchaʼn kyten te qxel ex qa che xqʼuqil te qxel. Oʼkx qe jaku bʼant tkyaqil jlu quʼn. Chʼix tul Jesús qanil tajlal kye kykyaqil, ex teyele te junjun kxel tqʼoʼn tajlal te. Tuʼntzunju, tzʼelx qnikʼ tiʼj qa bʼinchaʼn qten.

15. ¿Tiquʼn qkyaqilx aqoʼ okslal in qo tzalaj tiʼj tmejebʼleʼn Jesús tukʼilju kʼokel te t-xuʼjil?

¹⁵ Qkyaqilx aqoʼ okslal in qo tzalaj tiʼj mejebʼleʼn yolin Jesús tiʼj toj txʼolbʼabʼil. Aj tkubʼ bʼaj Armagedón, ik che okel okslal skʼoʼn maj ik tzeʼn jun txin chʼix tkubʼ mojeʼ, aju kbʼel mojeʼ tukʼil Jesucristo toj kyaʼj (Apocalipsis 19:7-9). Ax ikx qeju che anqʼil twitz Txʼotxʼ ok che tzajel kʼiwlaʼn. ¿Tiquʼn? Tuʼnju aju mejebʼleʼn lu in tzaj tqʼuqbʼaʼn kykʼuʼj qa ok ktel jun kawbʼil tzʼaqli kyibʼaj. Kyjuʼtzun, qa skʼoʼn maj qoʼ ex qa nya, qqʼonk tilil tuʼn tkubʼ qbʼinchaʼn qten ex tuʼn qxqʼuqin. Iktzun tten ok ktzajel qkʼamoʼn kʼiwlabʼil o tzaj ttziyen Jehová toj ambʼil tzul.