TBʼI XNAQʼTZBʼIL TOK TIʼJ T-XKʼOMIL: ¿TIQUʼN IL TIʼJ TUʼN QKLET TUʼN JESÚS?
¿Tiquʼn il tiʼj tuʼn qklet?
«Aju xjal itzʼjni tiʼj xuʼj chʼin tuj tanqʼibʼl ex nimku yajbʼil in tzaj tiʼj. Ik tten ik tzaʼn bʼech ok in poqʼchaj, jurat naj in tzqij ex mintiʼ in kyaj ten, ik tten ik tzaʼn jun xlekun in kubʼ naj.» (Job 14:1, 2)
Atxix tej ttzaj tzyet kyanqʼibʼil xjal, in che ximen xjal tiʼj tzeʼntzulo qanqʼibʼil at noqwit in qo anqʼin te jumajx ex miʼn in qo tijen. Noqtzun tuʼnj, bʼisbʼajilxix tuʼnju qkyaqilx in qo kyim. Aqeju yol ateʼ jawni a Job tzaj qʼamante. Ma tzikʼ mas te oxe mil abʼqʼi tkubʼlen tzʼibʼin ex kukx ax tok qe yol lu toj ambʼil jaʼlo.
Qkyaqilx qajbʼilxix tuʼn qanqʼin ex nya tuʼn qkyim. In tzaj tqʼamaʼn Tyol Dios qa kubʼ tqʼoʼn Dios qajbʼil lu toj qanmi, ex kubʼ tqʼoʼn aju qajbʼil tuʼn tel qnikʼ tiʼjju at te jumajx (Eclesiastés 3:11). Qa ikju, ¿bʼaʼnpe aju ximbʼetz qa noqx gan kubʼ tqʼoʼn Dios jun qajbʼil aju mlayx tzaj qʼoʼn qe, ex kʼujlaʼn qoʼ tuʼn? Qa ma tzaj ttzaqʼweʼna qa nya bʼaʼn, bʼaʼn aju ttzaqʼwebʼila. Quʼn in tzaj tqʼamaʼn Tyol Dios qa jun aj qʼoj aju kamik, moqa kyimen, ex in tzaj ttziyen qa kbʼel «xitj» aj qʼoj lu (1 Corintios 15:26).
Ax tok jun aj qʼoj aju kamik. Mix aʼlx jun xjal aju bʼaʼn taʼ twiʼ tajbʼil tuʼn tkyim. Quʼn qa ma txi qqʼoʼn qwitz tiʼj jun nya bʼaʼn chʼix ttzaj qiʼj, in nok tilil quʼn tuʼn qel ok tiʼj. Ex qa ma tzaj qyabʼ, in xi qqʼanin qibʼ. In bʼant alkyexku quʼn tuʼn miʼn qkyim.
¿Axpe tok qa jaku kubʼ najset aj qʼoj lu aju ma bʼent nim mil abʼqʼi at? Jaku. Mintiʼ o qo kubʼ tbʼinchaʼn Jehová, aju Bʼinchal qe, tuʼn qanqʼin toj chʼin ambʼil. Nya tajbʼiltoq tuʼn toktz kamik qibʼaj. Tajbʼiltoq tuʼn qanqʼin te jumajx twitz Txʼotxʼ, ex aju in kubʼ t-ximen, in japun twiʼ tuʼn (Isaías 55:11).
¿Alkyexix tten kbʼel xitj kamik tuʼn Dios? Atxix ojtxe, o tzʼok tilil kyuʼn xjal tuʼn tkubʼ naj kamik, noqtzun tuʼnj, mintiʼx o kubʼ naj kyuʼn. Kukx in nok tilil kyuʼn toj ambʼil jaʼlo. Aqeju xjal in che xnaqʼtzan tiʼj qʼanbʼil, o che etz junjun qʼanbʼil ex junjun vakun kyuʼn tuʼn tnaj junjun yabʼil. In che xnaqʼtzaʼn tiʼj alkye tten bʼinchaʼn kykyaqil qeju itzʼ. Kyoj nimku tnam, mas in che anqʼin xjal toj ambʼil jaʼlo twitzju tzma sikʼ jun syent abʼqʼi. Noqtzun tuʼnj, naʼmx tkubʼ tiʼj kamik kyuʼn xjal. Ik tten in tzeʼn in tzaj tqʼamaʼn Tyol Dios qa kykyaqil in che ok te «tquqil txʼotxʼ» (Eclesiastés 3:20).
Noqtzun tuʼnj, at tbʼanel tqanil: nya tuʼn tnabʼil xjal kbʼel naj kamik. O bʼant junjun tiʼchaq tuʼn Jehová tuʼn qklet tuʼn tjaqʼ tipumal kamik, ex o tzʼajbʼen Jesús tuʼn, tuʼn tbʼant jlu.
