Chʼixmi aqe yol lu o kyqʼama junjun testigos de Jehová aʼyeju naʼmx kykubʼ mojeʼ. Noqtzun tuʼnj, ojtzqiʼn kyuʼn qa tajbʼil Jehová tuʼn kykubʼ mojeʼ tmajen oʼkx «tukʼil jun okslal tiʼj Qajaw». A jlu in tzaj tyekʼun qa oʼkx qo kbʼel mojeʼ tukʼil jun testigo de Jehová o jaw aʼ twiʼ (1 Corintios 7:39). Qa ikju, ¿tiquʼn in kyqʼamaʼn junjun okslal aju ik tzeʼn ma qbʼi?

At junjun in kyqʼamaʼn ikju tuʼnju in kubʼ kyximen qa at mas ermana naʼmx kykubʼ mojeʼ kywitz ermano. Ex ax tok in bʼaj jlu toj nimku ttnam. Jun techel, toj tnam Corea kyxol 100 testigos de Jehová at 57 ermana ex 43 ermano. Ex toj tnam Colombia kyxol 100 testigos de Jehová at 66 ermana ex 34 ermano.

Toj junjuntl tnam at kycostumbr xjal atz jatumel il tiʼj tuʼn t-xi tqʼoʼn kuʼxin pwaq moqa oyaj kye tman txin tuʼn tkubʼ mojeʼ txin tukʼil. Qa nya testigo de Jehová qe tman txin, jakulo tzaj kyqanin nim pwaq moqa oyaj aju jaku txi tiʼn nim pwaq. Noqtzun tuʼnj, at nim kuʼxin mlay laqʼet qe oyaj lu kyuʼn. Tuʼntzunju, at junjun ermana kyoj qe tnam lu in kubʼ kyximen qa mlayx che kubʼ mojeʼ tukʼil jun testigo de Jehová. * (Qʼonka twitza tiʼj tqanil t-xe t-xaq uʼj.)

Qa o bʼaj jun maj tiʼja ikju, bʼaʼn tuʼn ttzaj tnaʼna qa ojtzqiʼn tuʼn Jehová aju in tnaʼna (2 Crónicas 6:29, 30).

Noqtzun tuʼnj, tajbʼil Jehová tuʼn qkubʼ mojeʼ oʼkx tukʼil jun ajbʼel te. ¿Tiquʼn? Tuʼnju ojtzqiʼn tuʼn alkyeju mas bʼaʼn te qe ex tajbʼil tuʼn qok tkwentin. Nya tajbʼil tuʼn tkubʼ qximen jun tiʼ aju jaku tzaj tiʼn nya bʼaʼn qiʼj. Toj tqʼijlalil Nehemías, nim Judiy e kubʼ mojeʼ kyukʼil xuʼj mintiʼ in che ajbʼen te Jehová. Tuʼntzunju, xi tqʼamaʼn Nehemías aju otoq bʼaj tiʼj aj kawil Salomón. Tqʼama qa kʼujlaʼntoq Salomón tuʼn Dios ex ok tqʼoʼn te aj kawil kyibʼaj aj Israel. Noqtzun tuʼnj, kubʼ mojeʼ Salomón kyukʼil xuʼj mintiʼ in che ajbʼen te Jehová ex kyuʼn qe xuʼj lu kubʼ tbʼinchaʼn il (Nehemías 13:23-26). Oʼkx tajbʼil Jehová tuʼn qtzalaj. Kyjuʼtzun, o tzaj tqʼamaʼn kye tmajen tuʼn qkubʼ mojeʼ oʼkx kyukʼil qeju in che ajbʼen te (Salmo 19:7-10; Isaías 48:17, 18). Ojtzqiʼn quʼn qa at toklen Jehová tuʼn ttzaj tqʼamaʼn qe aju kbʼel qbʼinchaʼn ex aju miʼn kubʼ qbʼinchaʼn. Atzun qe in xi qqʼoʼn chjonte kyiʼj tkawbʼil tuʼnju in tzaj tyekʼun tkʼujlabʼil ex in tzaj kyiʼn tbʼanel qe (Proverbios 1:5).

Qa ma kubʼ mojeʼya tukʼil jun xjal nya kʼujlaʼn Jehová tuʼn, jakulo tzʼel paʼna tiʼj Dios tuʼn xjal lu. Nyalo tajbʼila tuʼn bʼaj jlu tiʼja (2 Corintios 6:14). Bʼaʼn tuʼn ttzaj tnaʼna qa aʼyeju tkawbʼil Dios o che tzaj qʼoʼn te onbʼil qe. Ateʼ nimku tmajen Dios toj ambʼil jaʼlo o txi kynimen qe kawbʼil lu aj tjaw kyjyoʼn jun kyukʼil, noqtzun tuʼnj, ateʼ junjuntl mintiʼ o txi kynimen.

Jun ermana te Australia aju tok tbʼi Maggy aju ok ten yolil tukʼil jun xinaq, moqa ichan, nya testigo de Jehová. * (Qʼonka twitza tiʼj tqanil t-xe t-xaq uʼj.) In tzaj tqʼamaʼn ermana lu qa nim maj mintiʼ xiʼ kyoj chmabʼil noq tuʼn tten tukʼil xjal lu. Tuʼn jlu, tzaj nim nya bʼaʼn tiʼj tamiwbʼel tukʼil Jehová. At juntl txin te tnam India ax ikx ok ten yolil tukʼil jun tukʼil toj tja xnaqʼtzbʼil. Ok ten tukʼil xnaqʼtzal tiʼj Tyol Dios, noq tuʼn tten tukʼil txin. Tej tbʼet ambʼil, kyaj ttzaqpiʼn txin tuʼn tajbʼen te Jehová ex bʼaj tchʼexpuʼn tokslabʼil tuʼn tkubʼ mojeʼ tukʼil xjal.

Juntl ermana te tnam Camerún, kubʼ mojeʼ tej qʼiʼntoq 19 abʼqʼi tuʼn tukʼil jun xjal nya testigo de Jehová. Otoq txi ttziyen xjal te qa jakutoq txi tqʼoʼn ambʼil te tuʼn kukx tok te testigo de Jehová. Noqtzun tuʼnj, tej tikʼ kabʼe seman kykubʼlen mojeʼ, xi tqʼamaʼn xjal te ermana qa ya mlay txiʼtl kyoj chmabʼil. In tzaj tqʼamaʼn ermana qa kubʼ tnaʼn qa tjunalx taʼ ex kukxtoq in noqʼ. Tnaʼ qa ya mintiʼxtoq jun tiʼ jakutoq bʼant tuʼn. Ax ikx, tkyaqil ambʼil in kubʼtoq ten ximel tiʼjju nya bʼaʼn otoq bʼant tuʼn.

Ax tok jaku kanet jun xjal nya testigo de Jehová tuʼna, aju at tbʼanel tmod. Noqtzun tuʼnj, qa ma kubʼ mojeʼya tukʼil xjal lu, ¿tiʼ jaku tzaj tiʼj tamiwbʼila tuʼn tukʼil Jehová? ¿Tiʼ t-ximbʼetza ktzajel tuʼnju mintiʼ ma txi tnimana tkawbʼil Jehová aju ma tzaj tqʼoʼn tuʼn ttena toj bʼaʼn? Ex aju mas nim toklen, ¿tiʼ t-ximbʼetz Jehová ktel tiʼj? (Proverbios 1:33.)

Nim erman in xi kynimen aju tkawbʼil Jehová ex in che kubʼ mojeʼ oʼkx tukʼil jun testigo de Jehová. Qʼuqli kykʼuʼj qa atzun mas tbʼanelju tuʼn tbʼant. In xi kynimen tuʼnju kyajbʼil tuʼn ttzalaj Jehová. Jun techel, jun ermana te tnam Japón aju tok tbʼi Michiko tajbʼiltoq tuʼn t-xi tnimen Dios, noqtzun tuʼnj, kyajbʼil qe toj tja tuʼn tkubʼ mojeʼ tukʼil jun xjal nya testigo de Jehová. Ax ikx, ok tqʼoʼn twitz kyiʼj tamiw in che kubʼ mojeʼ kyukʼil testigos de Jehová atzunte naʼmxtoq tkubʼ mojeʼ. Tzaj nim tbʼis tuʼn jlu. Aju onin tiʼj aju in tzaj tnaʼn qa nya tuʼnju ma kubʼ mojeʼ jun xjal jaku tzalaj. Aju mas nim toklen aju tuʼn qajbʼen te Jehová, aju Dios in tzalaj (1 Timoteo 1:11). Qʼuqli tkʼuʼj Michiko qa in tzaj tqʼoʼn Jehová aju at tajbʼen qe. Tuʼntzunju, in tzaj tqʼamaʼn qa qajbʼil tuʼn qkubʼ mojeʼ, noqtzun tuʼnj, qa mintiʼ in kanet jun ajbʼel te Jehová, mas bʼaʼn tuʼn miʼn qkubʼ mojeʼ toj ambʼil aju. Tej tikʼ ambʼil, kubʼ mojeʼ Michiko tukʼil jun tbʼanel testigo de Jehová. Ex in tzalaj tuʼnju nimen te Jehová.

Ax ikx ateʼ ermano in kubʼ kyyoʼn ajxi tkanet jun xjal kyuʼn aju jaku che kubʼ mojeʼ tukʼil. Jun techel, jun ermano te Australia aju tok tbʼi Bill, in tzaj  tqʼamaʼn qa at junjun maj tbʼanel i ela junjun xuʼj toj twitz aʼyeju nya testigo de Jehová qe. Noqtzun tuʼnj, mintiʼ kubʼ tyekʼun tkʼujlabʼil kyiʼj tuʼnju nya taj tuʼn tyolin tukʼil jun xuʼj nya testigo de Jehová. Tej tbʼet ambʼil, ax ikx tzaj tgan Bill kyiʼj junjun ermana. Noqtzun tuʼnj, mintiʼ kygan ermana tiʼj. Kubʼ tyoʼn Bill 30 abʼqʼi tuʼn tkanet jun ermana tuʼn aju ax t-ximbʼetz ik tzeʼn te. In tqʼamaʼn Bill qa in tzalaj tiʼjju bʼant tuʼn, tuʼnju junx tukʼil t-xuʼjil in che pakbʼan, in che xnaqʼtzan junx ex in che ajbʼen te Jehová junx. Ax ikx in tzalaj aj tten kyukʼil qe tamiw t-xuʼjil tuʼnju ax ikx in che ajbʼen te Jehová. In tzaj tqʼamaʼn Bill qa tuʼnju in xi kybʼiʼn qe kawbʼil tkuʼx toj Tyol Dios mas in chʼiy kykʼujlabʼil toj kymejebʼleʼn.

Qa naʼmx tkubʼ mojeʼya tuʼnju tajbʼila tuʼn t-xi tnimana tkawbʼil Jehová, ¿tiʼ jaku tzʼonin tiʼja akux in yona? Jaku ximana tiʼj nimxix tzalajbʼil in tnaʼn Jehová tuʼnju in bʼina te (1 Samuel 15:22; Proverbios 27:11). Ax ikx, jaku tzʼonin tiʼja qa ma naʼna Dios tkyaqil qʼij tuʼn t-xi tqʼamaʼna te aju in tnaʼna (Salmo 62:8). Ex qa ma tzʼok tilil tuʼna tuʼn miʼn tkubʼ tzʼaqa toj junjun nya bʼaʼn, a jlu kʼonil tiʼja tuʼn tchʼiy mas tamiwbʼila tukʼil Jehová. Naʼntza qa nim toklena toj twitz. Bʼaʼn tuʼn tzaj tnaʼna qa nim toklen toj twitz Dios aju in bʼaj tkʼuʼja tiʼj. Mintiʼ in tzaj ttziyen Jehová jun tchmila moqa jun t-xuʼjila, noqtzun tuʼnj, qa jun tchmila moqa jun t-xuʼjila tajbʼila, ojtzqiʼn tuʼn Jehová alkye tten tzul onina tuʼn (Salmo 145:16; Mateo 6:32).

Atlo maj jaku tnaʼya ik tzeʼn te David. Toj jun maj tzaj nimxix tbʼis David, tuʼntzunju, xi tqanin te Jehová tuʼn tzaj onin tuʼnju ya mintiʼtl tipun (Salmo 143:5-7, 10). Kukx qʼonka tilil. Qʼonxa ambʼil te Jehová tuʼn ttzaj ttzaqʼweʼn tnaʼj Diosa. Uʼjina tiʼj Tyol Dios ex ximana tiʼjju in kubʼ tuʼjina. Iktzun tten, kʼelel tnikʼa tiʼjju tajbʼil Jehová tuʼn tbʼant tuʼna ex kʼelel tnikʼa tiʼj alkye tten onin Jehová kyiʼj qe tmajen ojtxe. A jlu kʼonil tiʼja tuʼn tok qeʼ tkʼuʼja tiʼj ex tuʼn tjapun qe tkawbʼil tuʼna.

¿Tiʼ mastl jaku bʼant tuʼna akux in yona? Bʼaʼn tuʼn tok tilil tuʼna tuʼn tchʼiy tamiwbʼila tukʼil Jehová ex tuʼn tyolinjtz bʼaʼn tiʼja. Ax ikx, bʼaʼn tuʼn tok tilil tuʼna tuʼn tten jun tbʼanel tmoda kyukʼil txqantl, tuʼn tkubʼ tbʼinchaʼna xtalbʼil kye txqantl, tuʼn toka te jun tbʼanel aqʼunal ex jun tbʼanel ajbʼel te Jehová. Aʼyeju mod lu, nim kyoklen tuʼn kytzalaj kabʼe xjal toj jun mejebʼleʼn (Génesis 24:16-21; Rut 1:16, 17; 2:6, 7, 11; Proverbios 31:10-27). Bʼaʼn tuʼn tok tilil tuʼna tuʼn taqʼunana toj pakbʼabʼil ex toj Ja te Chmabʼil. A jlu kʼonil tiʼja tuʼn miʼn tjaw tjyoʼna jun nya bʼaʼn ximbʼetz. In tzaj tqʼamaʼn Bill qa jurat naj ikʼ ambʼil tej tten tjunalx tuʼnju ajbʼen te precursor.

Aju tkawbʼil Jehová tuʼn qkubʼ mojeʼ oʼkx «tukʼil jun okslal tiʼj Qajaw» kukx jaku bʼant. Qa ma qo kubʼ mojeʼ tukʼil jun testigo de Jehová kjawil qnimsaʼn Dios tuʼn jlu ex qo tzalajel. In tzaj tqʼamaʼn Tyol Dios qa aju xjal in xi tnimen Jehová tuʼn tkyaqil tkʼuʼj, ok kʼanqʼil toj tzalajbʼil te jumajx (Salmo 112:1, 3). Tuʼntzunju, miʼn tzʼel naj tiʼj tkʼuʼja aju tkawbʼil Jehová tuʼn tkubʼ mojeʼya oʼkx «tukʼil jun okslal tiʼj Qajaw».