1, 2. a) ¿Alkyeqe techel xi tqʼamaʼn Jesús kye tamiw? (Qʼonka twitza tiʼj tnejel tilbʼilal.) b) ¿Tiʼ il tiʼj tuʼn tel qnikʼ tiʼj techel in yolin kyiʼj ẍneʼl ex kyiʼj chip?

TOJ jun maj, in yolintoq Jesús tiʼj jun tqanil nim toklen kyukʼe tamiw a Pedro, Andrés, Santiago ex Juan. Xi tqʼamaʼn kye aʼyeju techel tiʼj majen in bʼant taqʼun, tiʼj lajaj qʼapoj, moqa txin, ex kyiʼj talento. Ex yajxitl, xi tqʼamaʼn juntl techel kye aju in yolin tiʼj jun xjal skʼoʼn maj tuʼn Dios ex aju tzul tuʼn kyok xjal tuʼn toj xjel. Toj techel lu, aju skʼoʼn maj tuʼn Dios in che kubʼ tpaʼn «qe xjal kyuj kykyaqil nasyon» te kabʼe kʼloj. In nok tqʼoʼn Jesús tbʼi jun kʼloj te «ẍneʼl», moqa rit, ex atzun juntl kʼloj in nok tqʼoʼn tbʼi te «chip», moqa chiv. Toj techel lu ax ikx at juntl toxin kʼloj nim toklen: aʼyeju terman «rey» (kjawil uʼjit Mateo 25:31-46).

² Ax ikx nimxix toklen techel lu qe. ¿Tiquʼn? Tuʼnju tqʼama Jesús qa ateʼ junjun xjal tzul kykʼamoʼn kychwinqlal te jumajx, ex atzun junjuntl che kbʼel najsaʼn. Tuʼntzunju, nim toklen tuʼn tel qnikʼ tiʼj tiʼ t-xilen techel lu ex aju kbʼantel quʼn tuʼn ttzaj qkʼamoʼn qchwinqlal te jumajx. Ax ikx nim toklen tuʼn tel qnikʼ kyiʼj tzaqʼwebʼil kyiʼj xjel lu: ¿Alkye tten o qo tzaj tonin Jehová tuʼn tel qnikʼ tiʼj techel lu? ¿Tiquʼn in xi qqʼamaʼn qa aju techel lu at toklen tukʼil pakbʼabʼil? ¿Alkye qe il tiʼj tuʼn kypakbʼan? ¿Tiquʼn nim toklen tuʼn kukx qajbʼen  qkyaqil te Dios ex tuʼn qonin tiʼj rey ex kyiʼj terman?

3, 4. a) ¿Alkyeqe oxe tiʼ il tiʼj tuʼn kyok qojtzqiʼn tuʼn tel qnikʼ tiʼj techel in yolin kyiʼj ẍneʼl ex kyiʼj chip? b) ¿Tiʼ tzaj tqʼamaʼn uʼj lu toj abʼqʼi 1881 tiʼj techel in yolin kyiʼj ẍneʼl ex kyiʼj chip?

³ Tuʼn tel qnikʼ tiʼ t-xilen techel kyiʼj ẍneʼl ex kyiʼj qe chip il tiʼj tuʼn tok qojtzqiʼn oxe tiʼ. Tnejel, ¿alkye aju skʼoʼn maj tuʼn Dios, aju rey, aʼyeju terman rey, aʼyeju ẍneʼl ex aʼyeju chip? Tkabʼ, ¿toj alkye ambʼil che elel tpaʼn aju skʼoʼn maj tuʼn Dios qe ẍneʼl kyiʼj chip? Ex toxin, ¿tiquʼn at junjun ik kyten ik tzeʼn ẍneʼl ex junjuntl ik kyten ik tzeʼn chip?

⁴ Toj abʼqʼi 1881, aju uʼj lu tzaj tqʼamaʼn qa aju skʼoʼn maj tuʼn Dios ex aju rey atz in yolin tiʼj Jesús. Ex qa aʼyeju terman rey in yolin kyiʼj qeju che kawil tukʼil Jesús toj kyaʼj ex ax ikx qeju xjal che anqʼil tzalu twitz Txʼotxʼ aj kyok te tzʼaqli. Ex tqʼama uʼj lu qa oklo che kbʼel paʼn ẍneʼl kyiʼj chip aj tkawin Jesús toj mil abʼqʼi. Ex tqʼama qa aqeju in nel kykanoʼn tkʼujlabʼil Dios toj tkyaqil in bʼant kyuʼn, ok kʼokel qʼoʼn kybʼi te ẍneʼl.

5. ¿Tiʼ tzaj tqʼamaʼn uʼj lu toj 1923 tiʼj techel in yolin kyiʼj ẍneʼl ex kyiʼj qe chip?

⁵ Tej tbʼet ambʼil, onin Jehová kyiʼj tmajen tuʼn telxix kynikʼ tiʼj techel lu. Toj abʼqʼi 1923, tojx uʼj lu, aju etz toj 15 te octubre, e ajbʼen qeju taqikʼ Tyol Dios tuʼn, tuʼn ttzaj tqʼamaʼn juntl akʼaj ojtzqibʼil tiʼj. ¿Alkye aju skʼoʼn maj tuʼn Dios? A Jesús. ¿Alkyeqe terman rey? Oʼkx qeju che kawil tukʼil Jesús toj kyaʼj. ¿Alkyeqe ẍneʼl? Aʼyeju xjal che anqʼil twitz Txʼotxʼ tjaqʼ kawbʼil lu. ¿Toj alkye ambʼil kʼokel tqʼoʼn Jesús kybʼi te ẍneʼl? Tojlo jun ambʼil kukx ateʼx terman Jesús tzalu twitz Txʼotxʼ, ex naʼmxtoq t-xi tzyet kawbʼil te mil abʼqʼi. ¿Tiquʼn? Tuʼnju aju techel in tqʼamaʼn qa aʼye xjal che anqʼil tzalu twitz Txʼotxʼ che onil kyiʼj terman Jesús, ex oʼkx jaku bʼant jlu qa kukx ateʼ terman Jesús tzalu twitz Txʼotxʼ junx kyukʼe xjal che anqʼil tzalu twitz Txʼotxʼ. ¿Ex tiquʼn kʼokeltoq kybʼi te ẍneʼl? Tzaj tqʼamaʼn uʼj qa tuʼnju qʼuqli kykʼuʼj tiʼj Jesús ex qa aju Tkawbʼil Dios tzul tqʼoʼn jun tbʼanelxix qanqʼibʼil.

6. ¿Alkye chʼixpubʼil tzaj qʼamaʼn tiʼj techel toj abʼqʼi 1995?

⁶ Toj nimku abʼqʼi, kubʼ qximin qa ẍneʼl jun xjal qa tbʼanel in nel Tyol Dios toj twitz toj pakbʼabʼil, ex kubʼ qximin qa chip jun xjal qa nya tbʼanel in nel Tyol Dios toj twitz toj bʼajsbʼil tqʼijlalil. Noqtzun tuʼnj, toj abʼqʼi 1995 kubʼ qchʼexpuʼn aju tten tuʼn t-xi chikʼbʼet aju techel lu. Kubʼ tmojbʼaʼn uʼj lu qe taqikʼ Tyol Dios tkuʼx toj Mateo 24:29-31 tukʼe Mateo 25:31, 32 (che kjawil uʼjit). Ex tzaj tqʼamaʼn qa che okel xjal tuʼn Jesús toj xjel aj tul aju skʼoʼn maj tuʼn Dios, aju otoq tzʼok te «rey», toj ambʼil te nimxix yajbʼil. * (Qʼonka twitza tiʼj tqanil t-xe t-xaq uʼj.)

7. Chikʼbʼantza techel in yolin kyiʼj qe ẍneʼl ex qe chip.

⁷ Jaʼlo in nelxix qnikʼ tiʼj techel lu. ¿Alkye aju skʼoʼn maj tuʼn Dios ex aju rey? A Jesús. ¿Alkyeqe terman rey? Aʼyeju okslal o che jaw t-skʼoʼn Jehová tuʼn xewbʼaj xjan ex che kawil tukʼil Jesús toj kyaʼj (Romanos 8:16, 17). ¿Alkyeqe ẍneʼl ex qe chip? Aqeju xjal toj tkyaqil tnam. ¿Toj alkye ambʼil che okel toj xjel? Chʼixtoq tkubʼ bʼaj nimxix yajbʼil, aju chʼix t-xi tzyet. ¿Ex tiquʼn kʼokel kybʼi te ẍneʼl moqa chip? Tuʼnju kymod in ten kyukʼil qeju o che jaw skʼoʼn tuʼn xewbʼaj xjan ex ateʼx tzalu twitz Txʼotxʼ. In xi qqʼoʼn chjonte te Jehová tuʼnju in qo tzaj tonin tuʼn tel qnikʼ tiʼj techel lu ex kyiʼj txqantl techel tkuʼx toj Mateo 24 ex 25.

8, 9. ¿Tiquʼn ok tqʼoʼn Jesús kybʼi qeju xjal che okel te ẍneʼl te «tzʼaqlxix»?

⁸ Mintiʼ ajbʼen yol pakbʼabʼil tuʼn Jesús toj techel in yolin kyiʼj ẍneʼl ex chip. Noqtzun tuʼnj, ojtzqiʼn quʼn qa aju techel lu in tzaj t-xnaqʼtzaʼn qe qa nim toklen pakbʼabʼil. ¿Tiquʼn in xi qqʼamaʼn qa ik ttenju?

⁹ Tuʼn tel qnikʼ tiʼj, bʼaʼn tuʼn ttzaj qnaʼn qa aju tqʼama Jesús noq jun techel. Ik tzeʼn mintiʼtoq in yolin Jesús kyiʼj axix tok ẍneʼl ex axix tok chip. Ax ikx, mintiʼ tqʼama Jesús qa tuʼn kyok xjal te ẍneʼl, il tiʼj tuʼn t-xi kyqʼoʼn axix tok xbʼalin ex axix tok wabʼj kye qeju okslal skʼoʼn maj ex qa il tiʼj tuʼn tok kywentin aj ttzaj kyyabʼ moqa tuʼn kyxiʼ visitaril kye aj kyokx qʼoʼn toj carcel. Qa ikju, ¿tiʼtzun tajtoq Jesús tuʼn ttzaj tqʼamaʼn? Qa oʼkx kʼokel kybʼi qe xjal te ẍneʼl qa ma tzʼel kynikʼ kyiʼj terman Jesús o che jaw skʼoʼn ex qa ma che onin kyiʼj toj bʼajsbʼil tqʼijlal. Kyjuʼtzun, ax ikx ok tqʼoʼn Jesús kybʼi te «tzʼaqlxix» (Mateo 10:40-42; 25:40, 46; 2 Timoteo 3:1-5).

10. ¿Tzeʼn jaku che onin qe ẍneʼl kyiʼj terman Jesús?

¹⁰ Noqtzun tuʼnj, ¿tiquʼn kyajtoq terman Jesús onbʼil? Qo xnaqʼtzan tiʼj. Tej naʼxmtoq tyolin Jesús tiʼj techel kyiʼj ẍneʼl ex chip, in yolintoq kyukʼe t-xnaqʼtzbʼen tiʼjju kbʼajel kyoj bʼajsbʼil qʼij (Mateo 24:3). Xi tqʼamaʼn kye qa toj ambʼil aju kxel pakbʼet Tkawbʼil Dios twitz tkyaqil Txʼotxʼ (Mateo 24:14). Ax ikx xi tqʼamaʼn kye aju techel in yolin kyiʼj talento. Tukʼe techel lu xi tqʼamaʼn kye qeju o che jaw skʼoʼn qa iltoq tiʼj tuʼn tok tililxix kyuʼn tuʼn kypakbʼan. Noqtzun tuʼnj, qa toj ambʼil jaʼlo oʼkx chʼin kybʼet qeju o che jaw skʼoʼn at, ¿tzeʼn tten jaku txi kypakbʼaʼn Tyol Dios twitz tkyaqil Txʼotxʼ naʼmxtoq tul xitbʼil? Toj techel in yolin kyiʼj ẍneʼl ex kyiʼj chip, tqʼama Jesús qa che onil qe ẍneʼl kyiʼj. ¿Tzeʼn tten? Aju aj kyonin kyiʼj toj pakbʼabʼil. ¿Oʼkxpe tuʼn kyonin tukʼe tbʼanel kyyol moqa oʼkxpe tuʼn t-xi kyqʼoʼn pwaq tuʼn t-xi pakbʼet Tyol Dios?

11. ¿Tiʼ jaku kubʼ qximin?

¹¹ Toj ambʼil jaʼlo at 8 millón t-xnaqʼtzbʼen Jesús. Ex chʼixmi kykyaqil nya skʼoʼn qe. Mintiʼ xi tqʼoʼn Jesús talento kye, moqa aju kyoklen tuʼn kypakbʼan. Oʼkx xi tqʼoʼn talento kye qeju o che jaw skʼoʼn (Mateo 25:14-18). Noqtzun tuʼnj, jaku kubʼ qximin: «Qa xi tqʼoʼn Jesús talento kye qeju o che jaw skʼoʼn, ¿ilpe tiʼj tuʼn kypakbʼan qe ẍneʼl?». Il tiʼj. Qo xnaqʼtzan tiʼj kyaje yekʼbʼil tiquʼn.

12. ¿Tiʼ xnaqʼtzbʼil in tzaj tqʼoʼn qe aju tqʼama Jesús toj Mateo 28:19, 20?

¹² Tnejel, i ex t-samaʼn Jesús kykyaqil qe t-xnaqʼtzbʼen pakbʼal. Tej otoqxi jaw anqʼin Jesús, xi tqʼamaʼn kye t-xnaqʼtzbʼen tuʼn kypakbʼan ex tuʼn t-xi kyqʼoʼn xnaqʼtzbʼil kye xjal tuʼn tjapun kyuʼn tkyaqilju otoq txi tqʼamaʼn kye. Tuʼntzunju, aqeju che okel te t-xnaqʼtzbʼen Jesús, il tiʼj tuʼn tokx kybʼiʼn kawbʼil tuʼn kypakbʼan (kjawil uʼjit Mateo 28:19, 20). ¿Tiʼ xnaqʼtzbʼil in tzaj tqʼoʼn jlu qe? Qa qkyaqil il tiʼj tuʼn qpakbʼan, qa o qo jaw skʼoʼn ex qa mintiʼ (Hechos 10:42).

13. ¿Tiʼ xnaqʼtzbʼil in tzaj tqʼoʼn Apocalipsis qe?

¹³ Tkabʼ, in tzaj tyekʼun Apocalipsis qa nya oʼkx qeju o che jaw skʼoʼn che pakbʼal. Toj jun witzikʼj, ok tqʼoʼn twitz Juan tiʼjju kʼokel te t-xuʼjil tal ẍneʼl aju in txokin kyiʼj xjal tuʼn kykʼan tiʼj «aʼ te chwinqlal». Aju kʼokel te t-xuʼjil tal ẍneʼl atz in yolin kyiʼj qeju 144,000 o che jaw skʼoʼn tuʼn kykawin tukʼe Jesús toj kyaʼj (Apocalipsis  14:1, 3; 22:17). Aju aʼ atz in yolin tkyimlen Jesús, aju kkolil kyiʼj xjal tiʼj il ex kamik (Mateo 20:28; Juan 3:16; 1 Juan 4:9, 10). Aʼyeju o che jaw skʼoʼn in chex kyxnaqʼtzaʼn xjal tiʼ tbʼanel jaku tzaj kye tuʼnju chojbʼil (1 Corintios 1:23). Noqtzun tuʼnj, ax ikx in yolin witzikʼj tiʼj juntl kʼloj xjal nya skʼoʼn maj qe ex in che ayon tuʼn kyanqʼin tzalu twitz Txʼotxʼ. Ax ikx in xi qʼamaʼn te kʼloj lu tuʼn kytzaj kytxkoʼn qe txqantl xjal tuʼn kykʼan tiʼj aʼ te chwinqlal. ¿Alkye tten in bʼant kyuʼn? Aj kypakbʼan. Ik tzeʼn ma qo xnaqʼtzan tiʼj, aju witzikʼj in tzaj tyekʼun qa kykyaqil qeju in xi kybʼiʼn tqanil il tiʼj tuʼn kypakbʼan.

14. ¿Tiʼ il tiʼj tuʼn tbʼant quʼn tuʼn tjapun «tley Crist»?

¹⁴ Toxin, kykyaqil qeju in japun «tley Crist» kyuʼn il tiʼj tuʼn kypakbʼan (Gálatas 6:2). Taj Jehová tuʼn tjapun aʼyex qe ley kyuʼn qeju in che ajbʼen te. Toj ambʼil ojtxe, tajtoq Jehová tuʼn kyjapun qe tkawbʼil kyuʼn aj Israel ex kyuʼn qeju xjal in che anqʼintoq kyxol ex nya aj Israel qe (Éxodo 12:49; Levítico 24:22). Ax tok, toj ambʼil jaʼlo nya il tiʼj tuʼn kyjapun qe kawbʼil quʼn aʼyeju xi tqʼoʼn Jehová kye aj Israel. Noqtzun tuʼnj, il tiʼj tuʼn tjapun «tley Crist» quʼn, qa atoʼ kyxol qeju o che jaw skʼoʼn moqa mintiʼ. Ex jun kyxol qeju ley nimxix toklen kyaj t-xnaqʼtzaʼn Jesús aju kʼujlabʼil (Juan 13:35; Santiago 2:8). Il tiʼj tuʼn tok qkʼujlaʼn Jehová, Jesús ex qe xjal. Ex jun tten tuʼn tkubʼ qyekʼun kʼujlabʼil kyiʼj xjal aju qa ma txi qqʼamaʼn Tkawbʼil Dios kye (Juan 15:10; Hechos 1:8).

15. ¿Tiquʼn ojtzqiʼn quʼn qa taj Jesús tuʼn kypakbʼan kykyaqil t-xnaqʼtzbʼen?

¹⁵ Tkyajin, at junjun tiʼchaq xi tqʼamaʼn Jesús kye junjunx t-xnaqʼtzbʼen ax ikx iltoq tiʼj tuʼn tjapun kyuʼn txqantl. Jun techel, kyaj bʼant tiʼj  jun yol tuʼn Jesús kyukʼe 11 t-xnaqʼtzbʼen tuʼn kykawin tukʼil toj kyaʼj. Noqtzun tuʼnj, tuʼn tkyaqil 144,000 che kawil tukʼe Jesús (Lucas 22:29, 30; Apocalipsis 5:10; 7:4-8). Ex tej otoqxi jaw anqʼin Jesús, xi tqʼamaʼn oʼkx te junjun t-xnaqʼtzbʼen tuʼn kypakbʼan (Hechos 10:40-42; 1 Corintios 15:6). Noqtzun tuʼnj, toj tnejel syent abʼqʼi, kykyaqil qe t-xnaqʼtzbʼen e pakbʼan (Hechos 8:4; 1 Pedro 1:8). Tuʼntzun jlu, ax ikx qe il tiʼj tuʼn qpakbʼan, maske mintiʼ o qo ten toj ambʼil aju tej tkyaj tqʼamaʼn Jesús. Toj ambʼil jaʼlo, chʼixmi 8 millón testigos de Jehová in qo pakbʼan ex tuʼn jlu in kubʼ qyekʼun qa at qʼuqbʼil qkʼuʼj tiʼj Jesús (Santiago 2:18).

16-18. a) ¿Alkye tten jaku qo onin kyiʼj qeju skʼoʼn maj? b) ¿Tiquʼn il tiʼj tuʼn qonin jaʼlo kyiʼj qeju skʼoʼn maj?

¹⁶ Kukx in qʼojin Satanás kyiʼj qeju o che jaw skʼoʼn aqeju ateʼx tzalu twitz Txʼotxʼ. Ax ikx, ojtzqiʼn tuʼn qa chʼinx ambʼil at te (Apocalipsis 12:9, 12, 17). Noqtzun tuʼnj, mlay bʼant tuʼn kymayet okslal skʼoʼn maj tuʼn, tuʼn kukx kykubʼ nej toj pakbʼabʼil. Toj ambʼil jaʼlo, in xi pakbʼet Tyol Dios kye nimxix xjal twitzju ojtxe. Qʼanchaʼlxix qa nejni ex in nonin Jesús kyiʼj qeju o che jaw skʼoʼn (Mateo 28:20).

¹⁷ O tzaj qʼoʼn jun tbʼanelxix qoklen tuʼnju in qo onin toj pakbʼabʼil kyiʼj qeju skʼoʼn maj. ¿Ex alkye junjuntl tten jaku qo onin kyiʼj? Jaku qo onin tukʼe pwaq ex tukʼe aqʼuntl tuʼn kyjaw bʼinchet Ja te Chmabʼil ex qe ninja qʼil twitz aqʼuntl. Ax ikx in qo onin kyiʼj qeju o che jaw skʼoʼn qa ma che okx qbʼiʼn qe ansyan ex txqantl qerman o txi qʼoʼn kyoklen tuʼn «majen in bʼant taqʼun [...] ex at tnabʼl» (Mateo 24:45-47; Hebreos 13:17).

¹⁸ Chʼixtl tpon ambʼil tuʼn tok sey kyiʼj qeju o che jaw skʼoʼn ex ateʼx tzalu twitz Txʼotxʼ. Oktzun kxel tzyet nimxix yajbʼil (Apocalipsis 7:1-3). Naʼmxtoq t-xi tzyet Armagedón, ok che xel tiʼn Jesús toj kyaʼj aʼyeju o che jaw skʼoʼn (Mateo 13:41-43). Tuʼntzunju, qa qaj tuʼn qok tqʼoʼn Jesús te ẍneʼl, qo onin jaʼlo kyiʼj terman.