¿Tiʼ in tzaj tyekʼun qe aju techel tiʼj talento?
«Xi tqʼoʼn jweʼ mil saq pwaq te jun tmajen, atzun te juntl xi tqʼoʼn kabʼe mil ex xi tqʼoʼn jun mil te juntl.» (MATEO 25:15)
1, 2. ¿Tiquʼn yolin Jesús tiʼj talento?
YOLIN Jesús tiʼj talento tuʼn tel kynikʼ qeju t-xnaqʼtzbʼen skʼoʼn maj alkye aqʼuntl kbʼantel kyuʼn. Noqtzun tuʼnj, qa skʼoʼn maj qoʼ moqa nya, qkyaqilx jaku tzʼel qiʼn xnaqʼtzbʼil tiʼj txʼolbʼabʼil lu. Tuʼntzunju, kʼelel qnikʼ tiʼ t-xilen aju yolin Jesús tiʼj.
2 ¿Alkye ambʼil yolin Jesús tiʼj talento? Tej tkyaj tqʼamaʼn qe yol tuʼn tjapun kywiʼ aj tok te aj kawil ex aj t-xi tzyet bʼajsbʼil tqʼijlal (Mateo 24:3). Kyjuʼtzun, in nel qnikʼ qa aju txʼolbʼabʼil tiʼj talento at toklen tukʼilju yol kyaj qʼamaʼn tuʼn tjapun twiʼ kyoj bʼajsbʼil tqʼijlal ex toj jun ambʼil te nimxix yajbʼil.
3. ¿Tiʼ in tzaj kyxnaqʼtzaʼn qeju txʼolbʼabʼil ateʼkux toj Mateo 24 ex 25?
3 Tej tyolin Jesús kyiʼj bʼajsbʼil tqʼijlal, tzaj tqʼamaʼn kyaje txʼolbʼabʼil tuʼn tel kynikʼ t-xnaqʼtzbʼen tiʼj alkyeqe kymod tuʼn tten toj ambʼil aju. Aʼyeju txʼolbʼabʼil lu ateʼkux toj Mateo 24:45 in pon toj 25:46. Aju tnejel, atz in yolin tiʼj majen in bʼant taqʼun, aju jun kʼloj okslal skʼoʼn maj ex at toklen tuʼn ttzaj tqʼoʼn xnaqʼtzbʼil kye txqantl okslal. Tqʼama Jesús jlu tuʼn tbʼant-xix taqʼun ex tuʼn tten tnabʼil majen lu. * (Qʼonka twitza tiʼj tqanil t-xe t-xaq uʼj.) Aju tkabʼ txʼolbʼabʼil in yolin kyiʼj lajaj txin naʼmxtoq kykubʼ mojeʼ. Tukʼil jlu tqʼama Jesús qa il tiʼj tuʼn tbʼaj kybʼinchen kyten qeju skʼoʼn maj ex tuʼn kyxqʼuqin tuʼnju mintiʼ ojtzqiʼn kyuʼn alkye qʼij jakutoq tzul Jesús. * (Qʼonka twitza tiʼj tqanil t-xe t-xaq uʼj.) Aju toxin txʼolbʼabʼil in yolin tiʼj talento. Tukʼe jlu tajbʼil Jesús tuʼn t-xi tqʼamaʼn kye kykyaqil skʼoʼn maj tuʼn tok tilel kyuʼn tuʼn kyaqʼunan kyuw tiʼjju aqʼuntl kyaj qʼamaʼn kye. Atzun tkyajin txʼolbʼabʼil yolin Jesús tiʼj, aju kyiʼj ẍneʼl ex kyiʼj chip, moqa chiv. A jlu in tzaj t-xnaqʼtzaʼn kye txqantl okslal che anqʼil tzalu twitz Txʼotxʼ qa il tiʼj tuʼn kyajbʼenxix te Jehová ex tuʼn kyonin kyiʼj qeju skʼoʼn maj. * (Qʼonka twitza tiʼj tqanil t-xe t-xaq uʼj.) Toj xnaqʼtzbʼil lu qo yolin tiʼj talento.
JUN XJAL IN XI TQʼOʼN NIM PWAQ KYE TMAJEN
4, 5. a) ¿Alkye in nok te xjal toj txʼolbʼabʼil in yolin tiʼj talento? b) ¿Tiʼtoq jun talento? (Qʼonka twitza tiʼj tqanil t-xe t-xaq uʼj.)
4 Kjawil uʼjit Mateo 25:14-30.) Tej tyolin Jesús tiʼj talento, yolin tiʼj jun xinaq aju xiʼ toj jun tbʼe. Toj juntl maj chʼixmi ax tqʼama tej tyolin tiʼj juntl xinaq aju xiʼ toj tbʼe tuʼn tok te aj kawil (Lucas 19:12). * (Qʼonka twitza tiʼj tqanil t-xe t-xaq uʼj.) Toj nimku ambʼil o tzaj tqʼamaʼn quʼj qa aju xjal in che yolin kykabʼil txʼolbʼabʼil tiʼj, atz in yolin tiʼj Jesús aju meltzʼaj toj kyaʼj toj abʼqʼi 33. Noqtzun tuʼnj, mintiʼ ok Jesús te aj kawil toj ambʼil aju. Kubʼ tyoʼn tejxi tjapun abʼqʼi 1914 tej «tkubʼ kyiʼj aj qʼoj tiʼj» (Hebreos 10:12, 13).
5 Tej naʼmxtoq tikʼ bʼet aju xinaq, tzaj txkoʼn qe tmajen ex xi tqʼoʼn wajxaq talento kye. Nimxix tajlal pwaq lu. * (Qʼonka twitza tiʼj tqanil t-xe t-xaq uʼj.) Xi tqʼamaʼn kye tuʼn kyaqʼunan tiʼj wajxaq talento tuʼn tchʼiy twitz pwaq lu. Nim toklen qeju wajxaq talento te xjal. Ax ikx nim toklen toj twitz Jesús aju aqʼuntl bʼant tuʼn tej tten tzalu twitz Txʼotxʼ.
«Kykeʼyinxe awal ma tzqij tuʼn tjaw»
6, 7. ¿Tiʼ in nok te techel talento?
6 Nimxixtoq toklen pakbʼabʼil toj twitz Jesús. Tuʼnju pakbʼan, nim xjal e ok te t-xnaqʼtzbʼen (kjawil uʼjit Lucas 4:43). Noqtzun tuʼnj, ojtzqiʼntoq tuʼn qa attoq mastl xjal tbʼanel kʼelel Tyol Dios toj kywitz. Tuʼntzunju, xi tqʼamaʼn jlu kye t-xnaqʼtzbʼen: «Kykeʼyinxe awal ma tzqij tuʼn tjaw» (Juan 4:35-38). Ik tzeʼn jun tbʼanel awal aju in nok tilil tuʼn, tuʼn tjaw twitz tawal, ikxtzun te Jesús. Tej naʼmxtoq tmeltzʼaj toj kyaʼj, xi tqʼamaʼn jlu kye t-xnaqʼtzbʼen: «Kyxiʼye, kymanxe kye xjal tuʼn kyok te nxnaqʼtzbʼene» (Mateo 28:18-20). Iktzun tten kyaj tqʼoʼn Jesús jun tbʼanel qoklen, aju tuʼn qpakbʼan (2 Corintios 4:7).
7 Ik tzeʼn xjal xi tqʼoʼn aqʼuntl kye tmajen tiʼj talento, ax ikx te Jesús xi tqʼoʼn aqʼuntl kye okslal skʼoʼn maj tuʼn kypakbʼan (Mateo 25:14). Iktzun tten, in nok talento te techel aqʼuntl tuʼn tpakbʼet Tyol Dios ex tuʼn kyok xjal te t-xnaqʼtzbʼen Jesús.
8. Nya junx tajlal talento xi qʼoʼn teyele junjun majen, ¿tiʼ tajbʼil xjal tuʼn tbʼant kyuʼn tmajen?
8 Tqʼama Jesús toj txʼolbʼabʼil qa xi tqʼoʼn xjal jweʼ talento te tnejel majen, kabʼe talento te tkabʼ majen ex jun talento te toxin majen (Mateo 25:15). Nya junx tajlal talento xi qʼoʼn teyele junjun majen. Noqtzun tuʼnj, tajbʼiltoq xjal tuʼn kyaqʼunan kyoxil majen tuʼn tchʼiy twitz tpwaq. Ax ikx te Jesús tajbʼil tuʼn tok tilil kyuʼn okslal skʼoʼn maj tuʼn kypakbʼan (Mateo 22:37; Colosenses 3:23). E ok ten t-xnaqʼtzbʼen Jesús pakbʼal toj ninqʼij Pentecostés te abʼqʼi 33 kye xjal te nimku tnam. Ex aju uʼj tkuʼx toj Tyol Dios, aju Hechos, in tzaj tyekʼun qa e aqʼunan qe t-xnaqʼtzbʼen Jesús kyuw (Hechos 6:7; 12:24; 19:20). * (Qʼonka twitza tiʼj tqanil t-xe t-xaq uʼj.)
IN CHE AQʼUNAN MAJEN TIʼJ TALENTO XI QʼOʼN KYE
9. a) ¿Tiʼ bʼant kyuʼn kabʼe tbʼanel majen? b) ¿Tiʼ in tzaj tyekʼun qe aju bʼant kyuʼn? c) ¿Tiʼ il tiʼj tuʼn tbʼant kyuʼn qeju che anqʼil toj Tbʼanel Najbʼil?
9 Aqeju kabʼe majen xi qʼoʼn talento kye ex e aqʼunan tuʼn tchʼiy twitz pwaq kyuʼn, in nok te kyechel tbʼanel okslal skʼoʼn maj toj bʼajsbʼil tqʼijlalil. O tzʼok tilil kyuʼn toj pakbʼabʼil, ex tzaj tzyet tuʼn tok tilil mastl kyuʼn toj abʼqʼi 1919. Nya junx tajlal talento xi qʼoʼn te junjun majen, aju yolin Jesús tiʼj, noqtzun tuʼnj, mintiʼ in tzaj tyekʼun jlu qa at kabʼe kʼloj okslal skʼoʼn maj. Qa ma tzaj qnaʼn txʼolbʼabʼil, kykabʼil majen e aqʼunan kyuw ex xi kyqʼoʼn tkabʼin maj pwaq tiʼjju tzaj qʼoʼn kye. ¿In tzajpe tyekʼun jlu qa oʼkx kabʼe okslal skʼoʼn maj in che aqʼunan wen toj pakbʼabʼil? Mintiʼ. Aju txʼolbʼabʼil in yolin kyiʼj ẍneʼl ex kyiʼj chip in tzaj tyekʼun qa aqeju che anqʼil toj Tbʼanel Najbʼil il tiʼj tuʼn kyonin kyiʼj okslal skʼoʼn maj toj pakbʼabʼil. Nimxix oklenj jlu kye ẍneʼl. Kykyaqil in che ok te «jun peʼnx ẍneʼl» aqeju in nok tilil kyuʼn tuʼn kypakbʼan ex tuʼn kyok lepeʼ xjal tiʼj Jesús (Juan 10:16).
10. ¿Alkye jun yekʼbʼil at aju in tzaj tyekʼun qe qa in qo anqʼin kyoj bʼajsbʼil tqʼijlal?
10 Tajbʼil Jesús tuʼn kyaqʼunanxix kykyaqil t-xnaqʼtzbʼen tuʼn kyok lepeʼ mastl xjal tiʼj. A jlu bʼant kyuʼn okslal toj tnejel syent abʼqʼi. ¿Yajtzun toj ambʼil jaʼlo, atz jatumel in japun twiʼ techel tiʼj talento? ¿In che aqʼunanpe okslal kyuw? In che aqʼunan. Bʼajx bʼaj pakbʼet Tyol Dios ik tzeʼn toj ambʼil jaʼlo. Tuʼnju in nok tilil kyuʼn okslal, at nimxix xjal in jaw aʼ kywiʼ tkyaqil abʼqʼi. Ax ikx kye in che pakbʼan. ¡In tzalajlo Jesús! Tkyaqil jlu in tzaj tyekʼun qa aju pakbʼabʼil nimxix toklen tuʼn tjapun aju yol kyaj tqʼamaʼn Jesús tiʼj bʼajsbʼil tqʼijlal.
O txi tqʼoʼn Jesús jun aqʼuntl nim toklen kye qe t-xnaqʼtzbʼen, aju tuʼn t-xi pakbʼet Tyol Dios (Qʼonka twitza tiʼj taqikʼ 10)
TZULJU XJAL
11. ¿Tiquʼn in xi qqʼamaʼn qa tzul Jesús toj nimxix yajbʼil?
11 Tqʼama Jesús jlu: «Tbʼajlenxi nim qʼij ul kypatrón majen, ex tzaj kymaʼn tajlal kyaqʼunbʼen» (ma tzʼok qqʼoʼne qʼeq tiʼj; Mateo 25:19). ¿Jtoj tzul patrón, toj juntl yol, jtoj tzul Jesús? Tzul chʼixtoq tkubʼ bʼaj nimxix yajbʼil. ¿Tiquʼn in xi qqʼamaʼn jlu? Tuʼnju yol kyaj qʼamaʼn toj Mateo 24 ex 25, atz jatumel yolin Jesús nim maj tiʼj ambʼil aj tul. Jun techel, tqʼama jlu: «Ok kyilaʼ ok ntzaje tibʼaj muj twitz kyaʼj». Ok kbʼajel jlu toj nimxix yajbʼil, aj tul Jesús bʼinchal tiʼj nya bʼaʼn kyukʼil xjal. Ax ikx xi tqʼamaʼn Jesús kye okslal skʼoʼn maj toj bʼajsbʼil tqʼijlal tuʼn kyxqʼuqin. Xi tqʼamaʼn jlu: «Kyjaʼtzun che xqʼuqine, porque mintiʼ bʼiʼn kyuʼne alkye or tzul Kyajawe» (Mateo 24:30, 42, 44). A jlu in tzaj tyekʼun qa tej tyolin Jesús tiʼj talento, ax ikx atztoq in yolin tiʼj ambʼil aj tul bʼinchal tiʼj nya bʼaʼn kyukʼil xjal ex aj tul najsal nya bʼaʼn tokx tjaqʼ tkawbʼil Satanás. * (Qʼonka twitza tiʼj tqanil t-xe t-xaq uʼj.)
12, 13. a) ¿Tiʼ xi tqʼamaʼn xjal kye kabʼe majen? b) ¿Tiquʼn xi tqʼamaʼn tyol ikju kye tmajen? c) ¿Toj alkye ambʼil tzul kykʼamoʼn okslal skʼoʼn maj aju bʼajsbʼil sey? (Qʼonka twitz tiʼj aju « In tzaj kykʼamoʼn sey aj kykyim».) d) ¿Alkye oyaj tzul tqʼoʼn Jesús kye qeju che in che onin kyiʼj okslal skʼoʼn maj?
12 Tqʼama Jesús qa tej tul xjal toj tbʼe, xi tqʼamaʼn jlu kye kabʼe tmajen: «Ku, aya majen bʼaʼn ex ma japunxix tuʼna; chʼin xi nqʼoʼne teya ex ma tzʼaqʼnanxixa tiʼj; jaʼlo nimxix kxel nqʼoʼne teya» (Mateo 25:21, 23). ¿Tiquʼn tqʼama patrón jlu? Tuʼnju otoq kambʼet jweʼtl talento tuʼn tnejel majen ex otoq kambʼet kabʼetl talento tuʼn tkabʼ majen. ¿Tiʼ t-xilen tkyaqil jlu? Toj juntl yol, ¿tiʼ kbʼantel tuʼn Jesús aj tul?
13 Chʼixtoq t-xi tzyet nimxix yajbʼil, kxel tqʼoʼn Jehová bʼajsbʼil sey kye okslal skʼoʼn maj aqeju ateʼx twitz Txʼotxʼ toj ambʼil aju. A jlu tzul tyekʼun qa otoq txi tqʼoʼn Jehová kyoklen (Apocalipsis 7:1-3). Ex naʼmxtoq txi tzyet Armagedón, kxel tqʼoʼn Jesús oyaj kye aju tuʼn kyxi tiʼn toj kyaʼj. ¿Yajtzun qeju che anqʼil tzalu twitz Txʼotxʼ ex in che onin kyiʼj okslal skʼoʼn maj toj pakbʼabʼil? Kxel tbʼinchaʼn Jesús kyiʼj ex tzul tyekʼun qa ẍneʼl qe. Toj juntl yol, kxel tqʼoʼn ambʼil kye tuʼn kyanqʼin toj Tbʼanel Najbʼil tjaqʼ Tkawbʼil Dios (Mateo 25:34).
AJU MAJEN NYA BʼAʼN EX KYʼAJ
14, 15. ¿Tiquʼn in xi qqʼamaʼn qa mintiʼ tqʼama Jesús qa nim qe skʼoʼn maj che okel te nya bʼaʼn ex te kyʼaj?
14 Ax ikx in yolin Jesús tiʼj jun toxin majen aju mintiʼ ajbʼen talento tuʼn, tuʼn tchʼiy mas pwaq. Ax ikx mintiʼ xi tiʼn pwaq toj banco tuʼn ttzaj qʼoʼn tal pwaq te. Aju bʼant tuʼn, kux tmaquʼn aju talento. Xi tqʼamaʼn tpatrón te qa jun nya bʼaʼn majen te ex qa kyʼaj te. Tuʼntzunju, el qiʼn aju talento te ex xi qʼoʼn teju tnejel majen. Yajxitl, ex lajoʼn nya bʼaʼn majen lu toj tja tpatrón, ex xi qʼamaʼn jlu te, «kyqʼoʼmixe tiʼjxi tuj qlolj». Atz tiʼjxi ok ten majen lu oqʼil tuʼn bʼis (Mateo 25:24-30; Lucas 19:22, 23).
15 Tej tqʼama Jesús qa at jun nya bʼaʼn majen kyxol qeju oxe majen, ¿tqʼamape tukʼil jlu qa jun kyxol oxe okslal skʼoʼn maj kbʼel tbʼinchaʼn nya bʼaʼn? Mintiʼ. ¿Tiquʼn in xi qqʼamaʼn jlu? Tuʼnju txʼolbʼabʼil in yolin tiʼj majen in bʼant taqʼun ex at tnabʼil ex aju txʼolbʼabʼil kyiʼj lajaj txin naʼmxtoq kykubʼ mojeʼ. Toj txʼolbʼabʼil tiʼj majen bʼant taqʼun, yolin Jesús tiʼj jun majen nya bʼaʼn aju in nok tbʼinchaʼn nya bʼaʼn kyiʼj qe mastl majen. Mintiʼ tqʼama Jesús tukʼe jlu qa aju majen in bʼant taqʼun kʼokel te nya bʼaʼn. Aju tajbʼil Jesús tuʼn t-xi tqʼamaʼn aju tuʼn miʼn kyok ik tzeʼn majen nya bʼaʼn. Chʼixmi axju tqʼama Jesús tojju txʼolbʼabʼil kyiʼj qeju lajaj txin. Tqʼama qa at jweʼ txin mintiʼ kynabʼl. Noqtzun tuʼnj, mintiʼ tqʼama tukʼe jlu qa mij, moqa nikʼjan, okslal skʼoʼn maj mintiʼ in che xqʼuqin. Aju tajbʼiltoq tuʼn t-xi tqʼamaʼn kye aju qa iltoq tiʼj tuʼn tkubʼ kybʼinchaʼn kyten ex tuʼn kyxqʼuqin kykyaqilx. * (Qʼonka twitza tiʼj tqanil t-xe t-xaq uʼj.) Axju in bʼaj tiʼjju txʼolbʼabʼil kyiʼj qe talento. Mintiʼ tqʼama Jesús qa nim qe okslal skʼoʼn maj che okel te nya bʼaʼn toj bʼajsbʼil tqʼijlal. Aju tajbʼiltoq tuʼn t-xi tqʼamaʼn kye okslal skʼoʼn maj aju tuʼn kyaqʼunan kyuw ex tuʼn miʼn kyok ik tzeʼn aju majen nya bʼaʼn (Mateo 25:16).
Tzul tqʼoʼn Jesús jun oyaj te kye qeju in che aqʼunan kyuw toj pakbʼabʼil
16. a) ¿Tiʼ in tzaj tyekʼun txʼolbʼabʼil qe aju in yolin tiʼj talento? b) ¿Alkye tten ma tzʼonin qʼij aju xnaqʼtzbʼil lu tuʼn tel qnikʼ tiʼj tiʼ t-xilen aju txʼolbʼabʼil kyiʼj talento? (Qʼonka twitza tiʼj aju « ¿Tiʼ t-xilen techel tiʼj talento?».)
16 ¿Tiʼ in tzaj tyekʼun qe aju techel tiʼj talento? Tnejel, aju qa o txi tqʼoʼn Jesús jun aqʼuntl nim toklen tuʼn tbʼant kyuʼn okslal skʼoʼn maj. Aju tuʼn t-xi pakbʼet Tyol Dios ex tuʼn kyok xjal te t-xnaqʼtzbʼen Jesús. Tkabʼ, aju qa tajbʼil Jesús tuʼn qaqʼunan kyuw qkyaqilx tuʼn qpakbʼan. Qa ma tzʼok tilil quʼn tuʼn qpakbʼan ex qa ma bʼant tkyaqil quʼn aju o tzaj tqʼamaʼn Jesús, ok tzul tqʼoʼn jun oyaj qe (Mateo 25:21, 23, 34).
^ taqik' 3 Kkanetel chʼintl tqanil tuʼna tiʼj alkye majen in bʼant taqʼun toj uʼj La Atalaya te 15 te julio te 2013, t-xaq 21 ex 22, taqikʼ 8 a 10.
^ taqik' 3 Kkanetel chʼintl tqanil tuʼna tiʼj alkye qe txin naʼmx kykubʼ mojeʼ tojx uʼj lu, toj xnaqʼtzbʼil aju tok tbʼi: «¿Ok kxqʼuqil teya?».
^ taqik' 3 Tuʼn tel tnikʼa tiʼj alkyeqe in che ok te ẍneʼl ex te chip, bʼaʼn tuʼn tjaw tuʼjina juntl xnaqʼtzbʼil toj uʼj lu ex aju uʼj La Atalaya te 15 te octubre te 1995, t-xaq 23 a 28.
^ taqik' 4 Qʼonka twitza tiʼj aju tok tbʼi: «¿Tiquʼn chʼixmi ik tten techel in yolin tiʼj talento tukʼe juntl techel in yolin tiʼj mina?».
^ taqik' 5 Toj tkyaqil Tyol Dios toj qyol in tzaj tqʼamaʼn jweʼ mil saq pwaq, kabʼe mil saq pwaq ex jun mil saq pwaq. Atzunte toj yol griego, atz jatumel kubʼ tzʼibʼin Tyol Dios, in nyolin tiʼj jweʼ talento, kabʼe talento ex jun talento. Tuʼn tkambʼet oʼkx jun talento tuʼn jun aqʼunal toj tqʼijlalil Jesús, iltoq tiʼj tuʼn taqʼunan 20 abʼqʼi.
^ taqik' 8 Nim qe xjal e ok te nya bʼaʼn ex e ok ten xnaqʼtzal junjun xnaqʼtzbʼil nya ax tok toj Ja te Chmabʼil tej otoqxi che kyim qe t-apóstol Jesús. Ex tuʼn jlu tej tikʼtl nimku syent abʼqʼi, nya nim qe in che pakbʼan. Noqtzun tuʼnj, tqʼama Jesús qa aʼyeju okslal axix tok che okel ten juntl maj pakbʼal toj mankbʼil tqʼijlal (Mateo 13:24-30, 36-43). In tzaj qʼamaʼn jlu toj uʼj La Atalaya te 15 te julio te 2013, t-xaq 9 a 12.
^ taqik' 11 Jyonkuxa uʼj La Atalaya te 15 te julio te 2013, t-xaq 7 ex 8, taqikʼ 14 a 18.
^ taqik' 15 Qʼonka twitza tiʼj taqikʼ 13 te xnaqʼtzbʼil «¿Ok kxqʼuqil teya?», aju tkuʼx tojx uʼj lu.
