1. ¿Tiquʼn in tzaj tqʼamaʼn Tyol Dios qa «jaw tzalaj Jesús»? (Qʼonka twitza tiʼj tnejel tilbʼilal.)

XI T-SAMAʼN Jesús qeju 70 t-xnaqʼtzbʼen tuʼn kyxiʼ pakbʼal Tkawbʼil Dios. Noqtzun tuʼnj, iltoq tiʼj tuʼn kyok weʼ kywitz junjun aj qʼoj nim kyipumal. Jun techel, ateʼtoq nejenel kye okslal kye aj Judiy, aʼyeju otoq che xnaqʼtzan kyoj tja xnaqʼtzbʼil nim kyoklen ex tuʼn jlu at nim kynabʼil. Kyajbʼiltoq tuʼn tkubʼ kyximen xjal qa noq jun karpinter te Jesús (Marcos 6:3). Ax ik kyajbʼiltoq tuʼn tkubʼ kyximen xjal qa nya nim kyxnaqʼtzbʼil t-xnaqʼtzbʼen Jesús at ex qa nya nim kyoklen (Hechos 4:13). Tuʼntzunju, tajbʼilxixtoq Jesús tuʼn kymeltzʼaj qe t-xnaqʼtzbʼen tuʼntzun tel tnikʼ tiʼj tzeʼn otoq che ok toj pakbʼabʼil. Tejtzun kypon juntl maj tukʼil Jesús, ok tqʼoʼn twitz kyiʼj qa in che tzalajxix. Otoq tbʼant kyuʼn aju xi tqʼamaʼn Jesús kye, maske e kubʼ weʼ qe taqʼunal Tajaw il kywitz. Tuʼntzun jlu in tzaj tqʼamaʼn Tyol Dios qa «jaw tzalaj Jesús» kyiʼj qe t-xnaqʼtzbʼen tej kypon juntl maj tukʼil. Jawlo tzeʼn twitz tuʼn nim tzalajbʼil kyiʼj. Noqtzun tuʼnj, ¿tiʼ onin kyiʼj t-xnaqʼtzbʼen Jesús tuʼn miʼn kytzaj xobʼ ex tuʼn kukx kytzalaj? (Kjawil uʼjit Lucas 10:1, 17-21.)

2. a) ¿Tiquʼn tqʼama Jesús qa ik kyten qe t-xnaqʼtzbʼen ik tzeʼn qe «tal kʼwaʼl»? b) ¿Tiʼ onin kyiʼj t-xnaqʼtzbʼen Jesús tuʼntzun tel kynikʼ kyiʼj junjun xnaqʼtzbʼil kwest tuʼn tel kynikʼ xjal tiʼj?

 ² Xi tqʼamaʼn Jesús lu te Jehová: «Kxel nqʼoʼne chjonte teya, Tat, aya Tajaw kyaʼj ex Tajaw txʼotxʼ, porque ma kubʼ tewana tkyaqil jlu kywitz aj nabʼl ex kywitz qeju nneʼlxix kynikʼ tiʼj, ex ma tzaj tyekʼuna kye tal kʼwaʼl». Tej tbʼaj tqʼamaʼn Jesús jlu, tqʼamatl qa tgan Jehová tuʼn ttzaj t-xnaqʼtzaʼn qe xjal ikju (Mateo 11:25, 26). ¿Tiquʼn tqʼama Jesús qa ik kyten qe t-xnaqʼtzbʼen ik tzeʼn qe «tal kʼwaʼl»? Tuʼnju mintiʼ jaw kynimen kyibʼ ex e ok te mans. Atzun qe nejenel kye okslabʼil kubʼ kyximen qa at nim kynabʼil tuʼnju at nim kyxnaqʼtzbʼil, atzun qe t-xnaqʼtzbʼen Jesús xi kyqʼoʼn ambʼil tuʼn kyxiʼ xnaqʼtzaʼn mastl ik tzeʼnj in bʼant kyuʼn tal kʼwaʼl (Mateo 18:1-4). Tuʼnju mintiʼ jaw kynimen kyibʼ, ajbʼen xewbʼaj xjan tuʼn Jehová tuʼntzun tel kynikʼ kyiʼj junjun xnaqʼtzbʼil tkuʼx toj Tyol Dios aju kwest tuʼn tel kynikʼ xjal tiʼj. Atzun qe nejenel kye okslabʼil jaw kynimen kyibʼ ex e ok lepeʼ tiʼj Satanás, tuʼntzunju mintiʼ el kynikʼ kyiʼj t-xnaqʼtzbʼil Dios.

3. ¿Tiʼ qo xnaqʼtzal tiʼj toj xnaqʼtzbʼil lu?

³ Nim tzalaj Jesús tej tok tqʼoʼn twitz tiʼj alkye tten onin Jehová kyiʼj xjal mans tuʼn tel kynikʼ kyiʼj junjun xnaqʼtzbʼil kwest tuʼn tel kynikʼ xjal tiʼj, aju tkuʼx toj Tyol Dios. ¿Yajtzun jaʼlo? ¿Kukxpe tajbʼil Jehová tuʼn tonin kyiʼj xjal mans tuʼn tel kynikʼ kyiʼj qe t-xnaqʼtzbʼil? Kukx, mintiʼ o chʼexpaj te. ¿Tiquʼn in xi qqʼamaʼn jlu? Qo xnaqʼtzal tiʼj toj xnaqʼtzbʼil lu. Kʼelel qnikʼ alkye tten in nonin Jehová kyiʼj xjal mans tuʼn tel kynikʼ kyiʼj t-xnaqʼtzbʼil aju kwest tuʼn tel kynikʼ xjal tiʼj.

4. ¿Tiquʼn jaku txi qqʼamaʼn qa aju quʼj Aju Xqʼuqil toj yol nya kwest jun tbʼanel oyaj?

⁴ Kyoj abʼqʼi tzma in che ikʼ, o tzʼok tilel tuʼn ttnam Jehová tuʼn kyetz xnaqʼtzbʼil mas tbʼanel. ¿Alkye tten? Aj ttzaj tchikʼbʼaʼn qe xnaqʼtzbʼil kyoj yol nya kwest tuʼn tel qnikʼ kyiʼj. Qo xnaqʼtzan kyiʼj oxe techel. Tnejel, in netz uʼj Aju Xqʼuqil tuʼn tnam Jehová toj yol nya kwest. * (Qʼonka twitza tiʼj tqanil t-xe t-xaq uʼj.) Jun tbʼanel oyaj uʼj lu, axpe ikx kye xjal mintiʼxix bʼaʼn uʼj kyuʼn ex mintiʼxix bʼaʼn yol kyuʼn. Ax ikx o tzʼok kyqʼoʼn mambʼaj kywitz tiʼj qa nim in nonin uʼj lu kyiʼj kykʼwaʼl tuʼn telxix kynikʼ kyiʼj xnaqʼtzbʼil. Ex at junjun o tzaj kysamaʼn junjun uʼj te qʼobʼil chjonte tiʼj uʼj lu. Tqʼama jun ermana qa tej naʼmxtoq tetz uʼj Aju Xqʼuqil toj yol nya kwest, mintiʼtoq in jaw tiʼn tqʼabʼ tuʼn t-xi tqʼoʼn jun tyol, atzun jaʼlo, mintiʼtl in tzaj xobʼ, ¡ex nim maj in jaw tiʼn tqʼabʼ!

5. ¿Tiʼ tbʼanel tkuʼx toj Traducción del Nuevo Mundo toj inglés aju o bʼaj bʼinchaʼn chʼintl?

⁵ Tkabʼ, toj 5 te octubre toj abʼqʼi 2013, etz Traducción del Nuevo Mundo tuʼn ttnam Jehová toj inglés aju otoq bʼaj bʼinchaʼn chʼintl. * (Qʼonka twitza tiʼj tqanil t-xe t-xaq uʼj.) Nya nim yol tkuʼx kyoj nim taqikʼ Tyol Dios lu ex ax xnaqʼtzbʼil in tzaj kyqʼoʼn. Ax ikx nya kwest tuʼn tok toj qwiʼ. Jun techel, tnejel, tkuʼxtoq 27 yol toj Job 10:1, atzun jaʼlo oʼkx 19 yol tkuʼx toj, ax ikx tkuʼxtoq 20 yol toj Proverbios 8:6, atzun jaʼlo oʼkx 13 yol tkuʼx toj. Aqeju kabʼe taqikʼ lu, mas jurat in nel nikʼbʼaj kyiʼj. Tqʼama jun ermano skʼoʼn maj, aju ma tzikʼ nim abʼqʼi in najbʼen te Jehová, qa tej tjaw tuʼjin aju uʼj Job toj inglés etz toj 2013, ik el toj twitz ik tzeʼn tzma tnejel maj el tnikʼ  tiʼj uʼj lu. Ex at mastl erman ax kyyol in tzaj kyqʼamaʼn.

6. ¿Tiʼ teya t-ximbʼetz tiʼjju akʼaj chikʼbʼabʼil o tzʼetz tiʼj Mateo 24:45-47?

⁶ Toxin, kyoj qe abʼqʼi tzma in che ikʼ, mas in nel tnikʼ ttnam Jehová kyiʼj junjun taqikʼ Tyol Dios. Jun techel, aju uʼj Aju Xqʼuqil etz toj kastiy toj 15 te julio te 2013, tzaj tqʼoʼn mastl chikʼbʼabʼil tiʼjju tkuʼx toj Mateo 24:45-47. Toj uʼj lu tzaj tqʼamaʼn qa «aju majen in bʼant taqʼun [...] ex at tnabʼl», atzun Kʼloj Xjal Qʼil Twitz Aqʼuntl kye testigos de Jehová. Ax ikx tzaj qʼamaʼn qa aqeju «ateʼ tuj tja» patrón, in yolin kyiʼj okslal skʼoʼn maj ex kyiʼj txqantl ẍneʼl, tuʼnju kykyaqil in tzaj qʼoʼn xnaqʼtzbʼil kye tiʼj Tyol Dios tuʼn majen in bʼant taqʼun (Juan 10:16). In qo tzalajxix kyiʼj xnaqʼtzbʼil lu ex qajbʼil tuʼn t-xi qyekʼun kye xjal. Atzun jaʼlo, qo xnaqʼtzaʼn tiʼj junjuntl techel in tzaj tyekʼun qa tgan Jehová tuʼn ttzaj t-xnaqʼtzaʼn qe xjal toj yol nya kwest.

7, 8. ¿Alkye junjun techel kyiʼj txʼolbʼabʼil tkuʼx toj Tyol Dios in kubʼ kyechlaʼn jun tiʼ?

⁷ Kyoj abʼqʼi ma che ikʼ, in bʼaj tchʼixpuʼn ttnam Jehová alkye tten in tzaj t-xnaqʼtzaʼn junjun txʼolbʼabʼil tiʼj Tyol Dios. Toj ambʼil ojtxi, tzaj tqʼamaʼn qa at nim txʼolbʼabʼil ik kyten ik tzeʼn qe yol e kyaj qʼamaʼn tuʼn kyjapun kywiʼ. ¿Atpe tiquʼn tzaj xnaqʼtzaʼn junjun xnaqʼtzbʼil tiʼj Tyol Dios ikju? At. Ax Jesús tzaj xnaqʼtzante junjun txʼolbʼabʼil ikju. Jun techel, tqʼama qa aju ambʼil tej tten Jonás toj tkʼuʼj kiẍ, kubʼ techlaʼn aju jteʼ qʼij tuʼn tten toj muqbʼil (kjawil uʼjit Mateo 12:39, 40).

⁸ Noqtzun tuʼnj, nya oʼkxju txʼolbʼabʼil lu in nok te jun xjal moqa te jun tiʼ mas nim toklen. Jun techel, tqʼama apóstol Pablo qa aju t-xilen Abrahán ten tukʼil Agar ex Sara, in yolin tiʼjju tamiwbʼil Jehová ten  tukʼil tnam Israel ex aju at kyukʼil qeju in che ajbʼen te toj kyaʼj (Gálatas 4:22-26). Ax ikx tqʼama apóstol Pablo qa at nim tiʼchaq tkuʼx toj Ley xi qʼoʼn te tnam Israel, kubʼ techlaʼn jun xjal moqa jun tiʼ tuʼn tikʼ yajxitl. Kyxol qe jlu, yolin tiʼj ja xbʼalun, tiʼj tja Dios, tiʼj Qʼij te Najsbʼil Il ex tiʼj tnejel pal (Hebreos 9:23-25; 10:1). Aj qxnaqʼtzan kyiʼj txʼolbʼabʼil lu ex tiʼj kyxilen, in chʼiy mas qʼuqbʼil qkʼuʼj kyuʼn. Noqtzun tuʼnj, ¿in tzajpe tyekʼun jlu qa kykyaqil qe xjal ex qe tiʼchaq in yolin Tyol Dios tiʼj in kubʼ kyechlaʼn jun tiʼ?

9. ¿Alkye tten tzaj xnaqʼtzan txʼolbʼabʼil tiʼj Nabot kyoj abʼqʼi ma che ikʼ?

⁹ Toj ambʼil o tzikʼ, chʼixme tkyaqil maj tzaj kyqʼamaʼn quʼj qa kykyaqil txʼolbʼabʼil in yolin Tyol Dios tiʼj in kubʼ kyechlaʼn junjun tiʼ aju tuʼn tikʼ yajxitl. Qo ximen tiʼjju txʼolbʼabʼil tkuʼx toj 1 Reyes 21:1-16, jatumel in yolin tiʼj aj kawil Acab ex tiʼj Jezabel. Jyon Jezabel tumel tzeʼn tuʼn tkubʼ bʼiyet Nabot tuʼn tkyaj Acab tukʼil tqan t-uva Nabot. Tzaj tchikʼbʼaʼn uʼj Aju Xqʼuqil etz toj kastiy toj 1932 qa ok Jezabel ex Acab te techel Satanás kyukʼix qeju xjal in che ok lepeʼ tiʼj. Ex tqʼama qa ok Nabot te techel Jesús ex qa aju tej tkyim Nabot ax ikx ok te techel aju tej tkyim Jesús. Noqtzun tuʼnj, toj 1961 etz uʼj “Santificado sea tu nombre” toj inglés, ex tzaj tqʼamaʼn qa in nok Nabot te kyechel qeju okslal skʼoʼn maj ex qa in nok Jezabel te kyechel qeju okslabʼil nya ax tok. Ax ikx tzaj tqʼamaʼn qa aju nya bʼaʼn tzaj tiʼj Nabot in kubʼ techlaʼn nya bʼaʼn tuʼn tikʼx kyuʼn okslal skʼoʼn maj kyoj bʼajsbʼil tqʼijlalil. Toj nimku abʼqʼi, ajbʼen tumel lu tuʼn ttnam Jehová tuʼn tchʼiy qʼuqbʼil qkʼuʼj. Noqtzun tuʼnj, toj ambʼil jaʼlo, junxitl tumel in najbʼen tuʼn, tuʼn kytzaj tchikʼbʼaʼn qe txʼolbʼabʼil lu. ¿Tiquʼn?

10. a) ¿Tzeʼn in kubʼ tyekʼun aju majen in bʼant taqʼun qa at mas tnabʼil aj tzaj t-xnaqʼtzaʼn junjun txʼolbʼabʼil tiʼj Tyol Dios? b) ¿Alqiʼj mas in che yolin qe quʼj toj ambʼil jaʼlo?

¹⁰ Aju junjun chikʼbʼabʼil kyiʼj qe txʼolbʼabʼil tiʼj Tyol Dios kyoj qe quʼj ojtxe, kwesttoq tuʼn tel qnikʼ kyiʼj, tuʼn kytzaj qnaʼn ex tuʼn kykubʼ qbʼinchaʼn. Ex tuʼnju oʼkx in che yolintoq quʼj tiʼj tiʼ kyxilen qe txʼolbʼabʼil, mintiʼtl in che yolin tiʼj alkye tten jaku tzʼonin toj qanqʼibʼil. Tuʼntzunju, kyoj qe abʼqʼi tzma in che ikʼ, o tzaj tonin Jehová «majen in bʼant taqʼun [...] ex at tnabʼl» tuʼn tten mas tnabʼil. ¿Tzeʼn in kubʼ tyekʼun majen qa at mas tnabʼil jaʼlo? Jaʼlo, oʼkx in tzaj tqʼamaʼn qa at juntl t-xilen jun txʼolbʼabʼil qa in tzaj tyekʼunxix Tyol Dios qa ik ttenju. Ax ikx, toj ambʼil jaʼlo mas in che yolin qe quʼj tiʼj alkye xnaqʼtzbʼil nya kwest ex jaku tzʼonin tuʼn tchʼiy qʼuqbʼil qkʼuʼj, tuʼn tikʼx nya bʼaʼn quʼn, tuʼn tten qkʼujlabʼil tiʼj Dios ex tuʼn tten junjuntl tbʼanel qmod aju in tzaj kyyekʼun txʼolbʼabʼil toj Tyol Dios. * (Qʼonka twitza tiʼj tqanil t-xe t-xaq uʼj.)

11. a) ¿Alkye tten in xi qchikʼbʼaʼn aju ikʼ tiʼj Nabot toj ambʼil jaʼlo? b) ¿Tiʼ xnaqʼtzbʼil in nel qiʼn tiʼj tbʼanel techel kubʼ tqʼoʼn Nabot?

¹¹ Qo yolin juntl maj tiʼjju ikʼ tiʼj Nabot. ¿Alkye tten in xi qchikʼbʼaʼn jaʼlo? Mas nya kwest in xi qchikʼbʼaʼn. Ya mintiʼtl in xi qqʼamaʼn qa kyim Nabot tuʼn tkubʼ techlaʼn Jesús ex qeju okslal skʼoʼn maj. Kyim Nabot tuʼnju tajbʼil tuʼn tajbʼenxix te Jehová. Tej ttzaj nya bʼaʼn tiʼj kyuʼn junjun aj kawil nim kyipumal, xi tbʼiʼn aju tley Dios (Números 36:7; 1 Reyes 21:3). ¿Tiʼ xnaqʼtzbʼil jaku tzʼel qiʼn tiʼj jlu? Qa ma tzaj nya bʼaʼn qiʼj ik tzeʼn te Nabot, ilxix tiʼj tuʼn qajbʼenxix te Jehová (kjawil uʼjit 2 Timoteo 3:12). Qkyaqilx jaku tzʼel qnikʼ tiʼj xnaqʼtzbʼil lu, jaku tzaj qnaʼn ex jaku kubʼ qbʼinchaʼn. In chʼiy qʼuqbʼil qkʼuʼj tuʼn aju ikʼ tiʼj Nabot.

12. a) ¿Tiʼ mintiʼ tuʼn tkubʼ qximen kyiʼj qe txʼolbʼabʼil tkuʼx toj Tyol Dios? b) ¿Tiʼ in nonin kyiʼj okslal tuʼn tel kynikʼ tiʼj junjun tiʼchaq kwest tuʼn tel nikʼbʼaj kyiʼj? (Qʼonka twitza tiʼj tqanil t-xe t-xaq uʼj.)

¹² Noqtzun tuʼnj, miʼn kubʼ qximen qa mintiʼx jun tiʼ in kubʼ kyechlaʼn qeju txʼolbʼabʼil tkuʼx toj Tyol Dios ex qa oʼkx in che yolin tiʼj alkye tuʼn tbʼant  quʼn. Ateʼ junjun txʼolbʼabʼil in kubʼ kyechlaʼn junjun xnaqʼtzbʼil nim kyoklen. Noqtzun tuʼnj, toj ambʼil jaʼlo nya oʼkx in che yolin quʼj tiʼjju tiʼ in kubʼ kyechlaʼn txʼolbʼabʼil. Mas in che yolin quʼj tiʼj tiʼ toklen jun txʼolbʼabʼil tukʼil juntl txʼolbʼabʼil ex in tzaj kyqʼamaʼn tiʼ jaku tzʼel qkanoʼn kyiʼj. Jun techel, aj tjaw quʼjin qa ajbʼenxix Nabot te Jehová toj tkyaqil tanqʼibʼil, in tzaj tnaʼn qe qa ajbʼenxix Jesús te Jehová tzmaxi tej tkyim tzalu twitz Txʼotxʼ ex qa axju in bʼant kyuʼn qe okslal skʼoʼn maj. Nya oʼkxju, ax ikx in tzaj tyekʼun qe qa ax ikx ateʼ junjuntl ẍneʼl in che ajbʼenxix te Jehová tzmaxi aj kykyim. A jlu in qo tzaj tonin tuʼn telxix qnikʼ tiʼj qa in qo tzaj t-xnaqʼtzaʼn Jehová kyoj yol nya kwest. * (Qʼonka twitza tiʼj tqanil t-xe t-xaq uʼj.)

13. ¿Alkyeqe techel e kubʼ tqʼoʼn Jesús mas nya kwest tuʼn tel qnikʼ kyiʼj aj ttzaj tchikʼbʼaʼn qe quʼj toj ambʼil jaʼlo?

¹³ Aʼyeju techel, in che onin tuʼn tel qnikʼ kyiʼj junjun xnaqʼtzbʼil kwest. Ax ikx, in qo tzaj kyonin tuʼn qximen kyiʼj ex tuʼn kykuʼpin toj qanmi. Ok Jesús te tbʼanel xnaqʼtzal ex tbʼanel el toj twitz tuʼn kyajbʼen qe techel tuʼn (Mateo 13:34). Kyoj qe abʼqʼi tzma in che ikʼ, aqeju techel e kubʼ tqʼoʼn Jesús mas nya kwest tuʼn tel qnikʼ kyiʼj aj ttzaj tchikʼbʼaʼn qe quʼj. Junjun techel, aju quʼj Aju Xqʼuqil etz toj kastiy te 15 te julio te 2008 tzaj tonin qo tuʼn tel qnikʼ tiʼj tiʼ t-xilen aju techel ajbʼen tuʼn Jesús tiʼj t-samel pan, tiʼj twitz mostaza ex tiʼj xyubʼ. Toj ambʼil jaʼlo, mas in nel qnikʼ tiʼj qa aqeju techel lu atz in che yolin tiʼj qa nim xjal in che ok te tmajen Dios tuʼnju xnaqʼtzbʼil in xi qʼet tiʼj Tkawbʼil Dios.

14. a) ¿Tiʼtoq in tzaj tqʼamaʼn quʼj ojtxe tiʼjju txʼolbʼabʼil in yolin tiʼj jun tbʼanel xjal te tnam Samaria? b) ¿Tiʼ in tzaj tqʼamaʼn quʼj tiʼj txʼolbʼabʼil lu toj ambʼil jaʼlo?

¹⁴ At maj, ok ten Jesús qʼamal junjun txʼolbʼabʼil aʼyeju nim kyxilen. Kyxol qe jlu, ateʼ junjun in che yolin tiʼjju kbʼajel ex ateʼ junjuntl oʼkx in che yolin tiʼj alkye tuʼn tbʼant quʼn. ¿Alkye tten jaku tzʼel qnikʼ tiʼj qa atz in yolin ex qa nya atz in yolin jun txʼolbʼabʼil tiʼjju kbʼajel? Kyoj nim abʼqʼi o che ikʼ, o tzʼel mastl qnikʼ tiʼj jlu. Jun techel, qo ximen tiʼj tiʼtoq in tzaj tqʼamaʼn quʼj ojtxe tiʼjju txʼolbʼabʼil in yolin tiʼj jun tbʼanel xjal te tnam Samaria (Lucas 10:30-37). Toj abʼqʼi 1924, tzaj tqʼamaʼn quʼj Aju Xqʼuqil qa aju xjal te Samaria ok te techel Jesús ex qa aju bʼe te Jerusalén in kuʼpin toj Jericó, in nok te kyechel qe xjal tuʼnju atxix tej tel kypan kyibʼ xjal tiʼj Jehová xiʼni kyxiʼ mas toj nya bʼaʼn. Ax ikx tqʼama quʼj qa aqeju eleqʼ, e ok te kyechel qeju nimaq kykʼaʼẍ xjal, ex qa aju nejenel kye pal tukʼix aju aj Leví, e ok te kyechel qeju okslabʼil nya ax tok. Atzun toj ambʼil jaʼlo, in tzaj tqʼamaʼn quʼj qa aju txʼolbʼabʼil lu in tzaj tyekʼun qe qa mintiʼ tuʼn tok qqʼoʼn qwitz tiʼj alkye kytnam xjal moqa alkye kycostumbr. Ex in tzaj tqʼamaʼn quʼj qa aju txʼolbʼabʼil lu in tzaj tyekʼun qa il tiʼj tuʼn qonin kyiʼj xjal tuʼn tel kynikʼ tiʼj Jehová. Nimxix in qo tzalaj tuʼnju chebʼe chebʼe in qo tzaj tonin Jehová tuʼn telxix mastl qnikʼ tiʼjju axix tok.

15. ¿Tiʼ qo xnaqʼtzal tiʼj toj juntl xnaqʼtzbʼil?

¹⁵ Toj juntl xnaqʼtzbʼil, qo yolil tiʼj txʼolbʼabʼil aju in yolin kyiʼj qeju lajaj txin naʼmx kykubʼ mojeʼ (Mateo 25:1-13). ¿Tiʼ tajbʼiltoq Jesús tuʼn tel qnikʼ tiʼj txʼolbʼabʼil lu kyoj bʼajsbʼil tqʼijlalil? ¿Axpe tok qa at jun tiʼ in kubʼ techlaʼn teyele junjun xjal moqa teyele junjun tiʼ toj txʼolbʼabʼil lu? ¿Moqa noq oʼkx taj tuʼn ttzaj tqʼamaʼn jun xnaqʼtzbʼil tuʼn tkubʼ qbʼinchaʼn toj ambʼil jaʼlo? Qo xnaqʼtzal tiʼj.