¿O ximen teya kyiʼj xjel ik tzeʼn qe jlu? Qa ikju, nya oʼkx teya in ximen ikju. Nim (bʼampo) xjal toj tkyaqil twitz Txʼotxʼ in che jyoʼn kyiʼj tzaqʼwebʼil kyiʼj nimaq qxjelbʼitz toj qanqʼibʼil. ¿Jakupe kanet tzaqʼwebʼil kyiʼj jlu?

At nim millón xjal jaku tzaj kyqʼamaʼn qa jaku kanet tzaqʼwebʼil kyiʼj xjelbʼitz lu. ¿Tiquʼn? Tuʼnju o kanet axix tok (bʼaʼn ax) tzaqʼwebʼil toj Tyol Dios kyuʼn. ¿Taj teya tuʼn tel tnikʼa tiʼj tiʼ in tzaj tqʼamaʼn Tyol Dios? Qa ikju, tajlo teya tuʼn t-xi tkʼamoʼna jun xnaqʼtzbʼil noq kukx tiʼj Tyol Dios in xi kyqʼoʼn testigos de Jehová. *

Aj qyolin tuʼn qxnaqʼtzan tiʼj Tyol Dios, at junjun in kyqʼamaʼn qa mintiʼ ambʼil kyiʼj, qa kwest tuʼn tel qnikʼ tiʼj Tyol Dios moqa nya kyajbʼil tuʼn t-xi kytziyen jun kyyol. Noqtzun tuʼnj, qʼonk twiʼya tiʼjju o tzaj kyqʼamaʼn junjun xjal aʼyeju o tzʼajbʼen ambʼil kyuʼn tuʼn kyxnaqʼtzan tiʼj Tyol Dios.

• «In xaje kyoj iglesia católica ex protestante, in xaje toj jun ja te kʼulbʼil sij tbʼi ex toj jun ja jatumel ateʼqe budista, axpe ikx in xnaqʼtzane tiʼj Teología toj universidad. Noqtzun tuʼnj, mintiʼx kanet tzaqʼwebʼil wuʼne kyiʼj chʼixmi kykyaqil nxjelbʼitze. Pontzun jun testigo de Jehová ttzi njaye. Tbʼanel el toj nwitze tej ttzaj ttzaqʼweʼn qe nxjelbʼitze tukʼil Tyol Dios, tuʼntzunju, tzaj nkʼamoʼne xnaqʼtzbʼil tiʼj Tyol Dios tej ttzaj tqʼamaʼn weye.» (Chi Gill, te Inglaterra.)

• «In bʼajtoq nkʼuʼje kyiʼj nim tiʼchaq in tzaj toj qanqʼibʼil, noqtzun tuʼnj, aʼyeju tzaqʼwebʼil tzaj tqʼoʼn nejenel weye toj wokslabʼile (nnimbʼile), mintiʼ kubʼ nkʼuʼje tuʼn. Atzun tej tpon jun testigo de Jehová wukʼile ex oʼkx ajbʼen Tyol Dios tuʼn, tuʼn ttzaqʼwet qe nxjelbʼitze, el nnikʼe kyiʼj tzaqʼwebʼil. Tej ttzaj tqanin weye qa wajbʼile (ngane) tuʼn kukx nxnaqʼtzaʼne, xi nqʼamaʼne qa wajbʼile.» (Chi Koffi, te Benín.)

• «Wajtoqe tuʼn tel nnikʼe tiʼj tiʼ in bʼaj kyiʼj kyimni. Nimen wuʼne qa jaku tzʼok kybʼinchaʼn nya bʼaʼn qiʼj ex kubʼ nximane tiʼ in tzaj tqʼamaʼn Tyol Dios tiʼj jlu. Tuʼntzunju, in ok tene xnaqʼtzal tiʼj Tyol Dios tukʼil jun wamiwe testigo de Jehová.» (Chi José, te Brasil.)

• «Tzyet wuʼjine tiʼj Tyol Dios, noqtzun tuʼnj, mintiʼx chʼin el nnikʼe tiʼj. Jun qʼij, e pon testigos de Jehová njaye ex tzaj kyyekʼunxix weye tukʼil Tyol Dios junjun tiʼ tuʼn tbʼaj. Tuʼn jlu, tzaj mas wajbʼile tuʼn tel mas nnikʼe tiʼj.» (Chi Dennize, te México.)

• «Nyaxixtoq qʼuqli nkʼuʼje qa ax tok at tkʼuʼj Dios wiʼje. In oktzun tene naʼl Dios teju Bʼinchal Xjan Uʼj. Te juntl qʼij e pon testigos de Jehová njaye ex tzaj nkʼamoʼne jun xnaqʼtzbʼil tiʼj Tyol Dios tej ttzaj kyqʼamaʼn weye.» (Chi Anju, te nepal.)

Aqeju yol lu in nok kyqʼoʼn tipumal tyol Jesús tej tqʼama jlu: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3). Qkyaqilx qajbʼil tuʼn tel qnikʼ tiʼj Dios ex in qo tzaj tonin Dios tuʼn tel qnikʼ tiʼj toj Tuʼjil Tyol.

¿Alkye tten in xi qqʼoʼne xnaqʼtzbʼil tiʼj Tyol Dios? ¿Alkye tten jaku tzʼonin tiʼja? Qo xnaqʼtzan tiʼj.