1. ¿Tiquʼn il tiʼj tuʼn tok tilil quʼn tuʼn tchʼiyset qamiwbʼil tukʼil Jehová?

O TZAJ qʼoʼn jun tbʼanil qoklen tuʼnju testigo de Jehová qoʼ. Aju qamiwbʼil tukʼil Jehová. Nim toklen tuʼn tok tilil quʼn tuʼn tchʼiyset qamiwbʼil tukʼil tuʼnju jaku chewix tuʼn tkyaqilju tokx tjaqʼ tipumal Satanás ex tuʼnju aj il qoʼ.

2. a) ¿Tzeʼn jun amiwbʼil? (Qʼonka twitza tiʼj tqanil t-xe t-xaq uʼj.) b) ¿Tiʼ kbʼantel quʼn tuʼn tchʼiy qamiwbʼil tukʼil Jehová?

² ¿In tnaʼna qa kyamiwxix kyibʼe tukʼil Jehová? ¿Tajbʼila tuʼn tchʼiy tamiwbʼila tukʼil? In tzaj tqʼamaʼn Santiago 4:8 alkye tten jaku bʼant jlu: «Che laqʼexe ttxlaj Dios, ax ikx te ktzajel laqʼeʼ kyukʼile». In tzaj tyekʼun jlu qa kykabʼile tukʼil Jehová il tiʼj tuʼn tok laqʼeʼ jun tiʼj juntl tuʼn tok kyamiwinxix kyibʼe. * (Qʼonka twitza tiʼj tqanil t-xe t-xaq uʼj.) Qa ma txi laqʼeʼya ttxlaj Jehová, ax ikx te ktzajel laqʼeʼ ttxlaja. Ex qa mas ma txi laqʼeʼya ttxlaj Jehová, mas kchʼiyil tamiwbʼila tukʼil ex mas axix tok kʼelel toj twitza. Kbʼel tnaʼna ik tzeʼn tnaʼ Jesús aju axix tok ela Jehová toj twitz  aju tzaj samante te ex tqʼama jlu: «Atzun weye ojtzqiʼn twitz wuʼne» (ma tzʼok qqʼoʼne qʼeq tiʼj; Juan 7:28, 29). Qo xnaqʼtzaʼn tiʼj tiʼ kbʼantel quʼn tuʼn qpon laqʼeʼ ttxlaj.

3. ¿Tiʼ kbʼantel quʼn tuʼn qyolin tukʼil Jehová?

³ Qa qajbʼil tuʼn qxi laqʼeʼ ttxlaj Jehová, nimxix toklen tuʼn qyolin tukʼil. ¿Alkye tten jaku bʼant jlu? Jun techel, qa at kabʼe xjal kyamiw kyibʼ ex qa najchaq taʼ jun tiʼj juntl, il tiʼj tuʼn t-xi ttzʼibʼin jun te juntl jun uʼj moqa jaku tzʼajbʼen jun yolbʼil kyuʼn tuʼn kyyolin. Ax ikx qe jaku qo yolin tukʼil Jehová qa ma qo naʼn Dios tkyaqil maj (kjawil uʼjit Salmo 142:2). Yajtzun te Jehová, ¿alkye tten in tzaj yolin qe? In najbʼen Tuʼjil Tyol tuʼn, tuʼn ttzaj yolin qe. Tuʼntzunju, tuʼn tok qbʼiʼn aju in tzaj tqʼamaʼn qe, il tiʼj tuʼn tkubʼ quʼjin Tuʼjil Tyol ex tuʼn qximen tiʼjju in kubʼ quʼjin (kjawil uʼjit Isaías 30:20, 21). Ik tzeʼn kʼelel qnikʼ tiʼj, qa ma qo yolin tukʼil Jehová, ok kʼokel qamiwinxix qibʼ tukʼil.

4, 5. ¿Alkye tten in tzaj yolin Jehová qe toj Tuʼjil Tyol? Qʼamantza jun techel.

⁴ Ojtzqiʼn quʼn qa jaku tzʼonin Tyol Dios kyiʼj kykyaqil xjal, noqtzun tuʼn, ax ikx jaku tzʼonin tiʼj teyele junjun qe tuʼn qxi laqʼeʼ ttxlaj Dios. Tuʼn tbʼant jlu, il tiʼj tuʼn tel qnikʼ tiʼj tiʼ in qnaʼn aj tkubʼ quʼjin ex aj tkubʼ qxnaqʼtzaʼn Tyol Dios. Ax ikx il tiʼj tuʼn qximen tiʼj alkye tten tuʼn tjapun quʼn aju in kubʼ quʼjin. Aj tbʼant tkyaqil jlu quʼn, ik in nok ik tzeʼn a Jehová in tzaj yolin qe. Ex aj tok qqʼoʼn qwitz tiʼj onbʼil in tzaj tqʼoʼn qe, in nok qamiwinxix qibʼ tukʼil (Hebreos 4:12; Santiago 1:23-25).

⁵ Jun techel, tqʼama Jesús jlu toj Mateo 6:19, 20: «Miʼn bʼaj kychmoʼne kyqʼinumabʼle twitz txʼotx». ¿Tiʼ in qnaʼn aj tkubʼ quʼjin qe yol lu? Qa ya in kubʼtl qqʼoʼn Jehová tnejel toj qanqʼibʼil, ok kbʼel qnaʼn qa in tzalaj Jehová qukʼil. ¿Yajtzun qa ma tzʼel qnikʼ tiʼj qa il tiʼj tuʼn tkubʼ qchʼixpuʼn junjun tiʼchaq toj qanqʼibʼil tuʼn tok qqʼoʼn qwiʼ tuʼn qajbʼen mastl te Jehová? Qa ikju, a Jehová in nonin qiʼj tuʼn tel qnikʼ tiʼ kbʼantel quʼn tuʼn qxi laqʼeʼ mastl ttxlaj.

6, 7. a) ¿Tiʼ in bʼaj tiʼj qamiwbʼil tukʼil Jehová qa in kubʼ qxnaqʼtzaʼn Tyol? b) ¿Tiquʼn qajbʼil tuʼn tkubʼ qxnaqʼtzaʼn Tyol Dios?

⁶ Aj tkubʼ qxnaqʼtzaʼn Tyol Dios, in nel qnikʼ alkyeqe chʼixpubʼil il tiʼj tuʼn tbʼant quʼn tuʼn qajbʼenxix te Dios. Ax ikx in nel qnikʼ tiʼj alkyeqe tmod Dios at ex tiʼ in bʼant tuʼn tuʼnju at tkʼujlabʼil. Tuʼnju in nel qnikʼ tiʼj jlu, mas in chʼiy qkʼujlabʼil tiʼj. Ax ikx te, mas in qo ok tkʼujlaʼn. Ex tuʼntzunju, in chʼiy qamiwbʼil tukʼil (kjawil uʼjit 1 Corintios 8:3).

⁷ Qa qajbʼil tuʼn qok laqʼeʼ ttxlaj Jehová, nim toklen tuʼn qximen tiʼj tiquʼn qajbʼil tuʼn tkubʼ qxnaqʼtzaʼn Tyol Dios. Tqʼama Jesús qa il tiʼj tuʼn tok qojtzqiʼnxix Jehová qa qajbʼil tuʼn qanqʼin te jumajx (Juan 17:3). At nimku tbʼanel in nel qnikʼ tiʼj toj Tyol Dios. Noqtzun tuʼnj, nya oʼkx tuʼn jlu qajbʼil  tuʼn tkubʼ qxnaqʼtzaʼn Tyol Dios. In kubʼ qxnaqʼtzaʼn Tyol Dios, tuʼnju qajbʼil tuʼn tok qojtzqiʼnxix Jehová (kjawil uʼjit Éxodo 33:13; Salmo 25:4).

8. a) ¿Tiʼ jaku kubʼ kyximen junjun aj tkubʼ kyuʼjin aju bʼant tuʼn Jehová tiʼj aj kawil Azarías? b) ¿Tiʼ qʼuqli qkʼuʼj tiʼj tuʼnju ojtzqiʼnxix Jehová quʼn?

⁸ Qa ax tok jun amiw Jehová toj qwitz, mlay tzaj bʼaj qkʼuʼj tiʼj tiquʼn nya tkyaqil maj in tzaj tqʼamaʼn Tyol Dios tiquʼn bʼant junjun tiʼchaq tuʼn Jehová, moqa tiquʼn mintiʼ bʼant tuʼn. Jun techel, qo ximen tiʼj jun aj kawil te Judá aju Azarías tbʼi. Tej tkawin, e ajbʼen xjal kye txqantl Dios. Atzunte mintiʼ, in tzaj tqʼamaʼn Tyol Dios qa «bʼaʼn e ela qe tbʼinchbʼen Azarías tuj twitz Qman» (2 Reyes 15:1-5). Ik bʼantju tuʼn, noqtzun tuʼnj, tzaj tqʼoʼn Jehová jun yabʼil tiʼj. ¿Tiquʼn? Mintiʼ in tzaj qʼamaʼn kyoj taqikʼ Tyol Dios lu. Tuʼn jlu atlo junjun jaku kubʼ kyximen qa nya bʼaʼn tmod Jehová ex qa mintiʼ jun tiquʼn kubʼ tqʼoʼn tkastiw Azarías. Noqtzun tuʼnj, ojtzqiʼnxix Jehová quʼn ex qʼuqli qkʼuʼj qa in kubʼ tbʼinchaʼn aju bʼaʼn toj tkyaqil ambʼil (Jeremías 30:11). Kyjuʼtzun, mintiʼ ojtzqiʼn quʼn tiquʼn kubʼ tqʼoʼn tkastiw aj kawil lu, noqtzun tuʼnj, qʼuqli qkʼuʼj qa bʼant aju bʼaʼn tuʼn.

9. ¿Tiquʼn kubʼ tqʼoʼn Jehová tkastiw aj kawil Azarías?

⁹ In kanet chʼintl tqanil quʼn toj Tyol Dios tiʼj tanqʼibʼil Azarías, aju ax ikx tok tbʼi te Uzías (2 Reyes 15:7, 32). In tzaj tqʼamaʼn 2 Crónicas 26:3-5, 16-21 qa «qe tbʼinchbʼen Uzías bʼaʼn e eʼla tuj twitz Qman». Noqtzun tuʼnj, ax ikx in tzaj tqʼamaʼn qa «jaw tniman tibʼ». Pon jun qʼij, tajbʼiltoq tuʼn tkubʼ tbʼinchaʼn aju oʼkx qe pal jakutoq kubʼ kybʼinchaʼn. Xi kyqʼamaʼn 81 pal te qa nya bʼaʼn tuʼn tbʼant aju tuʼn ex ok tilil kyuʼn tuʼn tmayet kyuʼn. Tuʼnju otoqxix jaw tnimsan tibʼ, tzaj tqʼoj kyiʼj pal ex mintiʼ xi tbʼiʼn aju tzaj kyqʼamaʼn te. Tuʼn tqanil lu, in nel qnikʼ tiquʼn kubʼ tqʼoʼn Jehová tkastiw.

10. a) ¿Tiquʼn nya il tiʼj tuʼn ttzaj qʼamaʼn qe tiquʼn xbʼant jun tiʼ tuʼn Jehová moqa tiquʼn mintiʼ xbʼant tuʼn? b) ¿Tiʼ kbʼantel quʼn tuʼn tok qeʼxix qkʼuʼj tiʼj qa in kubʼ tbʼinchaʼn Jehová aju bʼaʼn toj tkyaqil ambʼil?

¹⁰ Aju techel ma qo yolin tiʼj in tzaj tqʼoʼn jun xnaqʼtzbʼil qe aju nim toklen. In tzaj tqʼoʼn techel lu tqanil qe tuʼn tel qnikʼ tiʼj tiquʼn kubʼ tqʼoʼn Dios tkastiw aj kawil Azarías. Noqtzun tuʼnj, ateʼ txqantl techel toj Tyol Dios aju mintiʼ in tzaj tqʼoʼn tkyaqil tqanil. Tuʼntzunju, bʼaʼn tuʼn qximen tiʼj lu: ¿Okpe tzul toj qwiʼ qa nya bʼaʼn xbʼat tuʼn Jehová? ¿Moqa tzul qnaʼn qa in kubʼ tbʼinchaʼn Jehová aju bʼaʼn toj tkyaqil ambʼil? (Deuteronomio 32:4.) At nim tqanil tkuʼx toj Tyol Dios aju in qo tzaj tonin tuʼn telxix qnikʼ tiʼj Jehová ex tuʼn tok qʼuqeʼ qkʼuʼj tiʼj. Qa ma tzʼok qojtziʼnxix Jehová ex qa ma tzʼok qkʼujlaʼn, nya il tiʼj tuʼn ttzaj qʼamaʼn qe tiquʼn xbʼant jun tiʼ tuʼn moqa tiquʼn mintiʼ xbʼant tuʼn. Qa ikju, ¿tiʼ kbʼantel quʼn tuʼn tok qeʼxix qkʼuʼj tiʼj qa in kubʼ tbʼinchaʼn Dios aju bʼaʼn toj tkyaqil ambʼil? Qo xnaqʼtzal tiʼj Tyol Dios. Iktzun tten ok qo okel te tamiwxix Jehová (Salmo 77:12, 13).

11-13. ¿Tiquʼn jaku txi qqʼamaʼn qa in qo tzaj tbʼiʼn Jehová aj qnaʼn Dios? (Qʼonka twitza tiʼj tnejel tilbʼilal.)

¹¹ Aj qnaʼn Dios, in jaw qnimsaʼn Jehová, in xi qqʼoʼn chjonte te ex in xi qqanin onbʼil te. A jlu in qo ok tlaqʼbʼaʼn ttxlaj (Salmo 32:8). Noqtzun tuʼnj,  qa qajbʼil tuʼn qokxix te tamiw Jehová, il tiʼj tuʼn tok qeʼ qkʼuʼj qa in qo tzaj tbʼiʼn aj qnaʼn Dios te.

¹² At junjun xjal in kyqʼamaʼn qa mintiʼ in tzaj tbʼiʼn Dios qnaʼj Dios. In kyqʼamaʼn qa noq in najbʼen naʼj Dios tuʼn tkubʼ qnaʼn bʼaʼn. In kyqʼamaʼn qa noq in qo tzaj tonin naʼj Dios tuʼn qximen tiʼj nya bʼaʼn in tzaj qiʼj ex tuʼn tkanet ttxolil quʼn tuʼn qex twitz quʼnx qibʼ. Ax tok in qo tzaj tonin naʼj Dios tuʼn tbʼant jlu quʼn. Noqtzun tuʼnj, aj qnaʼn Dios te Jehová, ax tok in qo tzaj tbʼiʼn. ¿Tiquʼn in xi qqʼamaʼn jlu?

¹³ Tej naʼmxtoq tul Jesús tzalu twitz Txʼotxʼ, ok tqʼoʼn twitz tiʼj alkye tten tzaj ttzaqʼweʼn Jehová kynaʼj Dios xjal. Ex tej tul tzalu, naʼn Dios ex xi tqʼamaʼn te Dios aju in kubʼ t-ximen ex aju in tnaʼn. At jun maj, ex qonikʼan tuʼn, tuʼn tnaʼn Dios (Lucas 6:12; 22:40-46). Nya oʼkxju, ax ikx, xi t-xnaqʼtzaʼn kye t-xnaqʼtzbʼen tuʼn kynaʼn Dios. Mintiʼwlo bʼant jlu tuʼn noqwit mintiʼ in tzaj tbʼiʼn Jehová naʼj Dios. Ojtzqiʼnxixtoq tuʼn qa in tzaj tbʼiʼn Dios aju qnaʼj Dios. Tuʼntzunju, xi tqʼamaʼn jlu te Dios: «Kukx in chin tzaj tbʼiʼna». Ax ikx qe qʼuqli qkʼuʼj tiʼj qa in qo tzaj tbʼiʼn Jehová aj qnaʼn Dios te (Juan 11:41, 42; Salmo 65:2).

14, 15. a) ¿Tiquʼn il tiʼj tuʼn t-xi qqʼamaʼn te Jehová alkyexix qajbʼil aj qnaʼn Dios? b) ¿Alkye tten onin naʼj Dios tiʼj jun ermana?

¹⁴ Atlo maj mintiʼ qʼanchaʼlxix alkye tten in tzaj ttzaqʼweʼn Jehová qnaʼj Dios. Kyjuʼtzun, bʼaʼn tuʼn t-xi qqanin te Jehová alkyexix qajbʼil tuʼntzun tel qnikʼ tiʼj tzaqʼwebʼil tzul tqʼoʼn. Iktzun tten kʼokel Jehová te jun tbʼanel qamiw. Qa ma txi qqʼamaʼn tuʼn tkyaqil qanmi tkyaqilju in tzaj bʼaj qkʼuʼj tiʼj, ok ktzajel laqʼeʼ qtxlaj.

¹⁵ Ik tzeʼn ikʼ tiʼj jun ermana aju Kathy tbʼi. * (Qʼonka twitza tiʼj tqanil t-xe t-xaq uʼj.) In nextoq ermana pakbʼal, noqtzun tuʼnj, mintiʼtoq in tzalaj toj pakbʼabʼil. Tqʼama jlu: «Nya ngantoq weye pakbʼabʼil, ax tok nya ngane». Tej tjapun bʼaj ambʼil tuʼn taqʼunan toj taqʼun, xi tqʼamaʼn jun ansyan te tuʼn tok te precursora regular. Kubʼ t-ximen ermana tuʼn t-xi tbʼiʼn nabʼil xi qʼoʼn te tuʼn ansyan. Nya oʼkxju, ax ikx ok ten qanil te Jehová tkyaqil qʼij tuʼn ttzaj onin tuʼn, tuʼn tten tajbʼil tiʼj pakbʼabʼil. ¿Tzajpe bʼiʼn tnaʼj Dios? Tzaj bʼiʼn. Toj ambʼil jaʼlo,  ma tzikʼ oxe abʼqʼi toklen ermana te precursora. Ex in tzaj tqʼamaʼntl qa tuʼnju nim ambʼil in ten toj pakbʼabʼil, ex tukʼe onbʼil kyuʼn txqantl ermana, ma bʼant-xix tpakbʼan jaʼlo. ¡Tgantl ermana pakbʼabʼil jaʼlo! Noqtzun tuʼnj, tqʼama qa aju mas nim toklen, aju tamiwbʼil tukʼil Jehová mas tbʼanel jaʼlo. Ik tzeʼn in nel qnikʼ tiʼj, onin naʼj Dios tiʼj ermana tuʼn tokxix te tamiw Jehová.

16, 17. a) ¿Tiʼ kbʼantel quʼn tkyaqil qʼij tuʼn qok mastl te jun tbʼanel tamiw Dios? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁶ Kukx jaku qo ok laqʼeʼ ttxlaj Jehová te jumajx. Tuʼntzunju, kukx qbʼinx tqʼajqʼajel twiʼ Jehová aj qxnaqʼtzan tiʼj Tuʼjil Tyol, ex kukx qo yolin tukʼil toj naʼj Dios. Qa ma bʼant jlu quʼn, tkyaqil qʼij qo okel mastl te jun tbʼanel tamiw Dios. Ex tuʼn onbʼil tzul tqʼoʼn qe, jaku tzikʼx quʼn aju nya bʼaʼn in tzaj qiʼj.

¹⁷ Noqtzun tuʼnj, at maj nim in qo naʼn Dios te Jehová ex kukx jaku tzaj nya bʼaʼn qiʼj. Ex tuʼn jlu jaku chewix qʼuqbʼil qkʼuʼj tiʼj Jehová. Jaku kubʼ qximen qa mintiʼ in tzaj tbʼiʼn qnaʼj Dios ex jaku tzul toj qximbʼetz qa kukx tamiw Jehová qoʼ moqa nyatl. Qa ma qnaʼ jlu, ¿tiʼ jaku bʼant quʼn? Qo xnaqʼtzal tiʼj jlu toj juntl xnaqʼtzbʼil.