1-3. ¿Tiquʼn qʼuqlitoq tkʼuʼj apóstol Pablo tiʼj Jehová? (Qʼonka twitza tiʼj tnejel tilbʼilal.)

AQEJU okslal e anqʼin toj Roma toj tnejel syent abʼqʼi, tzaj nim nya bʼaʼn kyiʼj. I el ikʼun kyuʼn xjal te Roma ex e ok lipen kyiʼj. In kyqʼamaʼntoq xjal te Roma qa ikʼun kywitz xjal kyuʼn, ex qa kyuʼn ok txqoʼn qʼaqʼ tiʼj tnam. In che okx okslal kyuʼn toj carcel, ex at junjun okslal in che okx xoʼn kywitz nimaq txkup tuʼn kybʼaj chyoʼn. At junjuntl okslal e jaw qʼoʼn twitz tzeʼ ex okx qʼoʼn qe clavo toj kyqʼabʼ ex itzʼx qe in nok txqoʼn qʼaqʼ kyiʼj tuʼn ttzaj kyqʼoʼn spikʼun te qonikʼan toj tnam. Ojtzqiʼntoq kyuʼn okslal qa jakutoq tzaj jlu tiʼj alkyexku jun kye ex toj alkyexku ambʼil.

² Kyoj qe ambʼil kwest-xix lu, okx qʼoʼn apóstol Pablo pres. Kubʼlo t-ximen qa ok kxel onin kyuʼn txqantl erman moqa mlay. ¿Tiquʼn kubʼ t-ximen jlu? Tuʼnju ax ikx otoqxi tzaj juntl nya bʼaʼn tiʼj ex mintiʼx jun onin tiʼj. Noqtzun tuʼnj, tqʼama qa otoq tzʼajbʼen Qajaw Jesús tuʼn Jehová tuʼn ttzaj onin ex tuʼn ttzaj qʼoʼn tipumal. Axpe ikx tqʼama jlu: «In klete tuj ttzi bʼalun», moqa toj ttzi león (2 Timoteo 4:16, 17). * (Qʼonka twitza tiʼj tqanil t-xe t-xaq uʼj.)

 ³ Qʼuqlixixtoq tkʼuʼj apóstol Pablo qa jakutoq tzʼok qeʼ tkʼuʼj tiʼj Jehová. ¿Tiquʼn? Tuʼnju tzaj tnaʼn alkye tten otoq tzaj onin tuʼn Jehová toj junjuntl maj. Qʼuqlitoq tkʼuʼj qa kxel qʼoʼn tipumal tuʼn Jehová tuʼn tikʼx nya bʼaʼn lu tuʼn ex tuʼn tikʼx alkyexku juntl nya bʼaʼn tuʼn toj ambʼil tzul. Qʼuqlitoq tkʼuʼj, tuʼntzunju tqʼama qa a Qajaw klol te tiʼj tkyaqil nya bʼaʼn (2 Timoteo 4:18). Ojtzqiʼntoq tuʼn qa at maj mlay tzaj onin kyuʼn erman, noqtzun tuʼnj, qʼuqlixixtoq tkʼuʼj qa ok tzul onin tuʼn Jehová ex tuʼn Jesús toj tkyaqil ambʼil.

4, 5. a) ¿Alkye jun jaku qo tzaj tonin toj tkyaqil ambʼil? b) ¿Tiʼ kbʼantel tuʼna tuʼn tchʼiy tamiwbʼila tukʼil Jehová?

⁴ ¿O tzaj jun matij nya bʼaʼn tiʼja? ¿O kubʼ t-ximana qa tjunalxa at? Qape mintiʼ taqʼuna moqa o tzaj jun nya bʼaʼn tiʼja toj tja xnaqʼtzbʼil. Qape o tzaj jun tyabʼa moqa juntl nya bʼaʼn. Olo tzaj tbʼisa tuʼnju mintiʼ jun onin tiʼja. At junjun nya bʼaʼn mlayx kyaj toj ttxolil kyuʼn xjal. ¿Tiʼ jaku bʼant tuʼna? In tzaj tqʼamaʼn Tyol Dios qa il tiʼj tuʼn tok qeʼ qkʼuʼj tiʼj Jehová (Proverbios 3:5, 6). Noqtzun tuʼnj, ¿axpe tok jaku tzʼok qʼuqeʼ qkʼuʼj tiʼj Jehová? Ax tok. In yolin Tyol Dios tiʼj nimku techel aju in tzaj tyekʼun qa ax tok in che tzaj tonin Jehová qe tmajen.

⁵ Qa ma tzaj jun nya bʼaʼn tiʼja ex qa mintiʼx jun in nonin tiʼja, miʼn tzaj bʼaj tkʼuʼja. Tzʼajbʼenx nya bʼaʼn tuʼna tuʼn tok qeʼxix tkʼuʼja tiʼj Jehová ik tzeʼn te apóstol Pablo. Ax ikx tzʼajbʼenx nya bʼaʼn tuʼna tuʼn tel tnikʼa tiʼj alkye tten kʼokel xqʼuqina tuʼn Jehová. Ok kʼonil jlu tiʼja tuʼn tchʼiy qʼuqbʼil tkʼuʼja tiʼj Jehová ex tuʼn tchʼiy tamiwbʼila tukʼil.

6. ¿Tiquʼn at maj kwest tuʼn tok qʼuqeʼ qkʼuʼj tiʼj Jehová aj ttzaj jun nya bʼaʼn qiʼj?

⁶ Ximana tiʼj jlu: ma tzaj jun nya bʼaʼn tiʼja ex in tzajxix bʼaj tkʼuʼja tuʼn. Ma bʼant tkyaqil tuʼna tuʼn tkyaj nya bʼaʼn toj ttxolil ex ma txi tqanina onbʼil te Jehová. Qa ma bʼant jlu tuʼna, ya miʼn tzaj bʼajxix tkʼuʼja ex qeʼk tkʼuʼja qa tzul onina tuʼn Jehová (kjawil uʼjit Salmo 62:8 ex 1 Pedro 5:7). Qa tajbʼila tuʼn toka te tamiwxix Jehová, ilxix tiʼj tuʼn t-xi t-xnaqʼtzan tibʼa tuʼn tok qʼuqeʼ tkʼuʼja tiʼj. Ax tok, at maj kwest tuʼn bʼant jlu. ¿Tiquʼn at maj kwest? Jun tiquʼn, tuʼnju at maj mintiʼ in tzaj ttzaqʼweʼn naj Jehová qnaʼj Dios (Salmo 13:1, 2; 74:10; 89:46; 90:13; Habacuc 1:2).

7. ¿Tiquʼn at maj nya jurat in tzaj ttzaqʼweʼn Jehová qnaʼj Dios?

⁷ ¿Tiquʼn at maj nya jurat in tzaj ttzaqʼweʼn Jehová qnaʼj Dios? Tuʼnju in tzaj tqʼamaʼn Tyol Dios qa a Jehová Qtat ex qa aqoʼ tkʼwaʼl (Salmo 103:13). Mintiʼ in xi kyqʼoʼn tatbʼaj tkyaqil aju in xi kyqanin kykʼwaʼl kye. Ex qatzun in xi kyqʼoʼn, nya tkyaqil maj jurat in xi kyqʼoʼn. Nya oʼkxju, ax ikx at maj in xi kyqanin kʼwaʼl jun tiʼ ex yajxitl nya kyajtl. Ax ikx ojtzqiʼn kyuʼn tatbʼaj qa in tzaj kyqanin kʼwaʼl jun tiʼ aju jaku tzaj tiʼn nya bʼaʼn kyiʼj moqa kyiʼj txqantl. Qa jurat naj ma txi kyqʼoʼn tatbʼaj tkyaqilju in tzaj kyqanin kykʼwaʼl, che okel te kymajen kykʼwaʼl. Noqtzun tuʼnj, ojtzqiʼn kyuʼn tatbʼaj tiʼ il tiʼj tuʼn t-xi qʼet kye kykʼwaʼl ex toj alkye ambʼil bʼaʼn tuʼn t-xi qʼet kye. Chʼixmi ik in bʼant tuʼn Jehová. Kʼujlaʼn qoʼ tuʼn, ojtzqiʼn tuʼn tiʼ il tiʼj tuʼn ttzaj tqʼoʼn qe ex toj alkye ambʼil mas bʼaʼn tuʼn ttzaj tqʼoʼn. Tuʼntzunju, il tiʼj tuʼn tbʼaj  qxnaqʼtzan qibʼ tuʼn tkubʼ qyoʼn ex tuʼn tok qqʼoʼn qwitz tiʼj alkye tten ktzajel ttzaqʼweʼn Jehová qnaʼj Dios (kkanetel chʼixmi ax ximbʼetz jlu tuʼna toj Isaías 29:16 ex 45:9).

8. ¿Tiʼ in tzaj ttziyen Jehová?

⁸ Ax ikx bʼaʼn tuʼn ttzaj qnaʼn qa ojtzqiʼn tuʼn Jehová aju jaku tzikʼx quʼn (Salmo 103:14). Kukx in tzaj tqʼoʼn qipumal. At maj in qnaʼn qa mlay tzikʼxtl nya bʼaʼn quʼn. Noqtzun tuʼnj, qa in qnaʼn qa kwest-xix nya bʼaʼn, in tzaj ttziyen Jehová qa ok qo tzajel tonin tuʼn tikʼx quʼn (kjawil uʼjit 1 Corintios 10:13). Aj tel qnikʼ tiʼj qa ojtzqiʼn tuʼn Jehová jniʼ jaku tzikʼx quʼn, in tzaj tqʼuqbʼaʼn qkʼuʼj.

9. ¿Tiʼ bʼaʼn tuʼn tbʼant tuʼna qa nya jurat naj in tzaj ttzaqʼweʼn Jehová tnaʼj Diosa?

⁹ Qa nya jurat naj in tzaj ttzaqʼweʼn Jehová tnaʼj Diosa, bʼaʼn tuʼn tten tpasensa. Bʼaʼn tuʼn ttzaj tnaʼna qa tajbʼil te tuʼn tonin qiʼj, noqtzun tuʼnj, in yon tiʼj alkye jun ambʼil mas bʼaʼn tuʼn tbʼant tuʼn. In tzaj tqʼamaʼn Tyol Dios qa in yon Jehová tukʼil pasens tuʼn qtzaj tonin ex tuʼn ttzaj tyekʼun qʼaqʼbʼil tkʼuʼj qiʼj tuʼnju tzʼaqli te. Ex in tzaj tqʼamaʼn qa aqeju in nok qeʼ kykʼuʼj tiʼj Jehová in che tzalaj (Isaías 30:18).

10-12. a) ¿Tiquʼn kwest tuʼn tok kwentit jun toj qja? b) Qa ma tzaj jun nya bʼaʼn qiʼj ex in nok qeʼ qkʼuʼj tiʼj Jehová, ¿tiʼ in bʼaj tiʼj qamiwbʼil tukʼil Jehová? Qʼamantza jun techel.

¹⁰ Ma qo yolin tiʼj toj taqikʼ 2 qa klet apóstol Pablo toj ttzi león (2 Timoteo 4:17). Qa ma tzaj nimxix nya bʼaʼn tiʼja ex qa in tnaʼna ik tzeʼn tnaʼ apóstol Pablo, nimxix toklen tuʼn tok qʼuqeʼ tkʼuʼja tiʼj Jehová. Jun techel, qa in kwentina tiʼj jun toj tjaya aju yabʼ taʼ, bʼaʼn tuʼn t-xi tqanina te Jehová tuʼn ttzaj onina tuʼn, tuʼn tikʼx tuʼna ex tuʼn tel tnikʼa tiʼj alkye mas bʼaʼn tuʼn tbʼant. * (Qʼonka twitza tiʼj tqanil t-xe t-xaq uʼj.) Ya miʼn tzajxix bʼaj tkʼuʼja tuʼnju ojtzqiʼn tuʼna qa in nel tnikʼ Jehová tiʼjju in nikʼ tiʼja. Ok kʼonil Jehová tiʼja tuʼn tikʼx nya bʼaʼn tuʼna ex ktzajel onina tuʼn, tuʼn kukx tajbʼena te (Salmo 32:8).

¹¹ Noqtzun tuʼnj, atlo maj jaku kubʼ t-ximana qa mintiʼ in tzaj onina tuʼn Jehová. Mintiʼlo in mojeʼ kyyol qʼanil tiʼj alkye tten tuʼn tqʼanit toj tjaya. Moqa olo kubʼ tyoʼna tuʼn tok qʼuqbʼaʼn tkʼuʼja kyuʼn txqantl toj tjaya, noqtzun tuʼnj, mas in tzajtl nya bʼaʼn tiʼja. Qa ik in bʼaj tiʼja, nimxix toklen tuʼn kukx txi tqanina tipumala te Jehová ex tuʼn kukx tok laqʼeʼya ttxlaj (kjawil uʼjit 1 Samuel 30:3, 6). Ex aj tel tnikʼa tiʼj alkye tten saj onina tuʼn Jehová, ok kchʼiyil tamiwbʼila tukʼil.

¹² Ikʼ jlu tiʼj jun ermana aju Linda tbʼi. * (Qʼonka twitza tiʼj tqanil t-xe t-xaq uʼj.) Tqʼama qa tej naʼmxtoq kykyim ttat, xqʼuqin kyiʼj toj nim ambʼil. Ex tzaj tqʼamaʼn qa nim maj mintiʼ el kynikʼ tukʼil tchmil ex tukʼil t-xibʼin tiʼtoq kbʼantel kyuʼn. At maj kynaʼ qa ya mlay tzikʼxtl nya bʼaʼn kyuʼn. Atzun toj ambʼil jaʼlo, in nelxix kynikʼ tiʼj qa e tzaj onin tuʼn Jehová tuʼn tikʼx kyuʼn. Qʼuqlixix tkʼuʼj Linda qa tzaj tqʼoʼn Jehová kyipumal, ex mas toj ambʼil tej mintiʼ el kynikʼ tiʼj alkye tten tuʼn tkyaj junjun nya bʼaʼn toj ttxolil.

13. ¿Alkye tten onin qʼuqbʼil tkʼuʼj Rhonda tiʼj Jehová tuʼn tikʼx jun ex juntl nya bʼaʼn tuʼn?

¹³ Qa in nok qʼuqeʼ qkʼuʼj tiʼj Jehová tuʼn tkyaqil qanmi, qo tzajel tonin tuʼn tikʼx nimaq nya bʼaʼn quʼn. Ikʼ jlu tiʼj jun ermana aju Rhonda tbʼi. Nya testigo de Jehová tchmil ex in jyontoq tchmil tumel tuʼn tkubʼ tpaʼn kymejebʼleʼn. Tojx ambʼil aju, tzaj jun matij yabʼil tiʼj t-xibʼin. Ex tej tikʼ chʼintl ambʼil, kyim t-xuʼjil t-xibʼin. Kwest ela jlu toj twitz Rhonda. Tej tnaʼ qa bʼaʼn chʼintl taʼ, ok te precursora regular. Noqtzun tuʼnj, ax ikx kyim tnan. ¿Tiʼ onin tiʼj Rhonda tuʼn tikʼx tkyaqil jlu tuʼn? Aju naʼn Dios  tkyaqil qʼij te Jehová, maske nyaxix nim toklen aju kxeltoq tqʼamaʼn te Jehová. In tzaj tqʼamaʼn Rhonda qa ok Jehová te tamiwxix. Ax ikx in tzaj tqʼamaʼn qa bʼant tuʼn tok qeʼ tkʼuʼj tiʼj Jehová ex nya tiʼjx ex nya kyiʼj txqantl xjal. Tnaʼ Rhonda qa ax tok tzaj onin tuʼn Jehová, tuʼnju tzaj tqʼoʼn te tkyaqil aju attoq tajbʼen te. Tnaʼ qa in naqʼunantoq junx tukʼil Jehová.

14. ¿Alkye tten jaku tzaj onina tuʼn Jehová qa ma tzʼex lajoʼn jun toj tjaya toj ttnam Jehová?

¹⁴ Qo yolin tiʼj juntl nya bʼaʼn kwest. Ximana tiʼj jlu: ma tzʼex lajoʼn jun toj tjaya toj ttnam Jehová. Ojtzqiʼn tuʼna qa in yolin Tyol Dios tiʼj tiʼ kbʼantel quʼn qa at jun ma tzʼex lajoʼn (1 Corintios 5:11; 2 Juan 10). Noqtzun tuʼnj, tuʼnju kʼujlaʼn toj tjaya tuʼna, in tnaʼna qa kwest-xix tuʼn tjapun kawbʼil lu tuʼna. ¿Alkye tten jaku tzaj onina tuʼn Jehová? Tzul tqʼoʼn tipumala tuʼn kukx tajbʼena te ex tuʼn kukx txi tbʼiʼna aju in tzaj tqʼamaʼn. Qeʼk tkʼuʼja tiʼj Jehová ex tzʼajbʼenx jlu tuʼna tuʼn tok laqʼeʼxixa ttxlaj.

15. ¿Tiquʼn mintiʼ xi tbʼiʼn Adán aju tzaj tqʼamaʼn Jehová te?

¹⁵ Jaku txi qqʼamaʼn qa ik tten jlu ik tzeʼn bʼant tuʼn Adán. ¿Tiquʼn xi tloʼn twitz tzeʼ xi tqʼoʼn Eva te? Nya tuʼnju kubʼ t-ximen qa jakutoq tzʼanqʼin ex mlaytoq txi tbʼiʼn aju otoq tzaj tqʼamaʼn Dios te. In tzaj tqʼamaʼn Tyol Dios qa «mya ate Adán o sbʼunjtz» (1 Timoteo 2:14). Qa ikju, ¿tiquʼn xi tbʼiʼn Adán aju tqʼama Eva ex nya aju tqʼama Jehová? Tuʼnju mastoq kʼujlaʼn Eva tuʼn ex nya a Jehová (Génesis 3:6, 17).

16. ¿Alkye kʼokel qkʼujlaʼn mas twitz alkyexku juntl xjal, ex tiquʼn?

¹⁶ Aju bʼant tuʼn Adán in tzaj tyekʼun qe qa il tiʼj tuʼn tok qkʼujlaʼn Jehová mas twitz alkyexku juntl xjal (kjawil uʼjit Mateo 22:37, 38). ¿Tiquʼn? Tuʼnju atzun mas kʼonil kyiʼj toj qja, qa in che ajbʼen te Jehová ex qa mintiʼ in che ajbʼen te. Kyjuʼtzun, qʼonka tilil tkyaqil qʼij tuʼn tok tkʼujlaʼna mas Jehová ex tuʼn tok qʼuqeʼ mas tkʼuʼja tiʼj. Qa in tzaj bʼaj tkʼuʼja tuʼnju o tzʼex lajoʼn jun toj tjaya, qʼamanxa aju in tnaʼna te  Jehová (Romanos 12:12; Filipenses 4:6, 7). * (Qʼonka twitza tiʼj tqanil t-xe t-xaq uʼj.) Axpe ikx qa in tzaj nim tbʼisa tuʼn jlu, bʼaʼn tuʼn tajbʼen jlu tuʼna tuʼn tchʼiy mastl tamiwbʼila tukʼil Jehová. Iktzun tten kʼokel qʼuqeʼ tkʼuʼja tiʼj Jehová ex kʼelel tnikʼa tiʼj qa mas tbʼanel kʼelel tkyaqil qa ma txi tbʼiʼna aju in tzaj tqʼamaʼn.

17. ¿Tiʼ jaku tzʼok qʼuqeʼ qkʼuʼj tiʼj qa ma tzʼok tilil quʼn toj pakbʼabʼil?

¹⁷ ¿Tiquʼn klet apóstol Pablo tuʼn Jehová toj «ttzi bʼalun», moqa león? Tqʼama apóstol Pablo qa tuʼn kukx tpakbʼan ex tuʼn tkubʼ bʼaj aqʼuntl tuʼn aju xi tqʼoʼn Dios te (2 Timoteo 4:17). Ax ikx o tzaj tqʼoʼn Jehová aqʼuntl qe tuʼn qpakbʼan. Ex in tzaj tqʼamaʼn qa aqʼunal qoʼ junx tukʼil (1 Corintios 3:9; 1 Tesalonicenses 2:4). Qa ma tzʼok tilil quʼn toj pakbʼabʼil, jaku tzʼok qʼuqeʼ qkʼuʼj tiʼj qa tzul tqʼoʼn Jehová tkyaqilju at tajbʼen qe (Mateo 6:33). Ax ikx mas nya kwest kʼelel toj qwitz tuʼn tkubʼ qyoʼn aj ttzaj ttzaqʼweʼn Jehová qnaʼj Dios.

18. ¿Tiʼ kbʼantel quʼn tuʼn qokxix te tamiw Jehová ex tuʼn tok qeʼxix qkʼuʼj tiʼj?

¹⁸ Qʼonka tilil tkyaqil qʼij tuʼn tchʼiy mas tamiwbʼila tukʼil Jehová. Aj ttzaj jun nya bʼaʼn tiʼja, tzʼajbʼenx nya bʼaʼn tuʼna tuʼn tok laqʼeʼya ttxlaj Jehová. Uʼjina, xnaqʼtzana ex ximena tiʼj Tyol Dios. Kukx naʼna Dios ex kukx qʼonka tilil tuʼn tajbʼena te Jehová. Qa ma bʼant tkyaqil jlu tuʼna, jaku tzʼok qʼuqeʼ tkʼuʼja qa tzul onina tuʼn Jehová tuʼn texa twitz nya bʼaʼn jaʼlo ex toj ambʼil tzul.