Aj tok tbʼiʼna yol lu: «Chʼix tul mankbʼil tqʼijlalil», ¿tiʼ in nul toj twiʼya? ¿In kubʼpe t-ximana qa kbʼel xiten Txʼotxʼ tuʼn jun kyaqnajnabʼ, tuʼn jun kyqʼiqʼ jbʼal, moqa tuʼn jun qʼoj? Aj kyximen xjal tiʼj jlu, at junjun in che tzaj xobʼ tuʼn ex at junjuntl mintiʼ in nok kyqʼoʼn kywiʼ tiʼj.

Atzunte Tyol Dios in tzaj tqʼamaʼn jlu: «Tzul mankbʼil tqʼijlalil» (Mateo 24:14). Ax jlu in nok tbʼi te «Armagedón» ex te «qʼij maʼ toklen» te Dios (Apocalipsis 16:14, 16). Ax tok, at nim kyximbʼetz xjal ex qe okslabʼil tiʼj jlu, ex mintiʼxix in nel kynikʼ tiʼj ex in kyqʼamaʼn qa xobʼajil aju tzul. Atzunte Tyol Dios in tzaj tqʼamaʼn tiʼ in tzaj tyekʼun makbʼil, moqa bʼajsbʼil, tqʼijlalil ex tiʼ mintiʼ in tzaj tyekʼun. Ax ikx in qo tzaj tonin Tyol Dios tuʼn tel qnikʼ tiʼj qa niqayin taʼ mankbʼil tqʼijlalil. Nya oʼkxju, ax ikx, aju mas tbʼanel aju in tzaj tyekʼun alkye tten jaku qo kyaj anqʼin. Tnejel, qo yolil tiʼj aju in kubʼ kyximen xjal ex tiʼj aju in tzaj tyekʼun Tyol Dios tiʼj «makbʼil tqʼijlalil».

1. MINTIʼ IN TZAJ TYEKʼUN QA KBʼEL XITEN TXʼOTXʼ TUʼN QʼAQʼ

   In tzaj tqʼamaʼn Tyol Dios jlu: «Kubʼ tqʼoʼna txʼotxʼ tibʼaj tqʼuqbʼil tuʼntzun miʼn tyukch tuj tlugar» (Salmo 104:5). Aju taqikʼ Tyol Dios lu ex junjuntl in tzajxix tyekʼun qa mlay kubʼ t-xiten Dios Txʼotxʼ ex qa mlay t-xi tqʼoʼn ambʼil tuʼn tkubʼ xiten (Eclesiastés 1:4; Isaías 45:18).

2. MINTIʼ IN TZAJ TYEKʼUN QA MIJUN OJTZQILTE ALKYE QʼIJ TZUL EX ALKYE OR

   In tzaj tqʼamaʼn Tyol Dios qa aju mankbʼil, moqa bʼajsbʼil, tqʼijlalil o bʼaj t-ximen Dios ex o kyaj tqʼoʼn jun or te. In tzaj tqʼamaʼn Tyol Dios jlu: «Mi aʼl jun bʼilte alkye qʼij ex alkye or tuʼn wule; mi qe anjel ateʼ tuj kyaʼj mintiʼ bʼiʼn kyuʼn, ax ikx weye Tkʼwaʼl Dios qine mintiʼ bʼiʼn wuʼne. Oʼkx te Dios Mambʼaj bʼaʼn tuʼn. Kyjaʼtzun, ten kykwente kyiʼje, che xqʼuqine ex che naʼne Dios; porque mintiʼ bʼiʼn kyuʼne jtoj bʼan tjapun tqʼijlalil» (Marcos 13:32, 33). A Dios, aju «Mambʼaj», ojtzqiʼnxix tuʼn «jtoj bʼan tjapun tqʼijlalil» jlu.

3. MINTIʼ IN TZAJ TYEKʼUN QA KYUʼN XJAL TZUL MOQA KYUʼN JUNJUN ABʼJ IN CHE BʼET TOJ KYQʼIQʼ TIʼJXI TXʼOTXʼ

   ¿Alkye tzul qʼinte mankbʼil tqʼijlalil? In tzaj tqʼamaʼn Apocalipsis 19:11 jlu: «O wile kyaʼj katl; ex wile jun chej saq tiʼj, ex aju tjax tibʼaj chej, atzun tbʼi jlu: In japunxix tuʼn ex axix tok tyol». Ex in tzaj tqʼamaʼn versículo 19 jlu: «O wile aju txkup kyukʼix qe rey ateʼ tuj tkyaqil twitz txʼotxʼ ex kyukʼix qe kysoldad nim kyajlal, kychmon kyibʼ tuʼn kyqʼojin tiʼj ju tjax tibʼaj chej, ex kyiʼj qe t-soldad nim kyajlal» (Apocalipsis 19:11-21). Noq techel qe yol in che ajbʼen tzalu, noqtzun tuʼnj, jaku tzʼel qnikʼ tiʼj jlu: ok che tzajel t-samaʼn Dios nimxix t-anjel, aqeju ik kyten ik tzeʼn jun kʼloj soldad, tuʼn kykubʼ kynajsaʼn qe aj qʼoj.

1. KBʼEL NAJSAʼN KYKAWBʼIL XJAL

   In tzaj tqʼamaʼn Tyol Dios jlu: «Tuj kyqʼijlalil qe rey lu, ate Dios aju at tuj kyaʼj kbʼel tqʼoʼn jun kawbʼil mlay naj ex mlay kubʼ tiʼj tuʼn juntl nasyon, noq oʼkx che bʼel bʼaj kykyaqil mastl kawbʼil  tuʼn, atzunte kukx ktel te jumajx» (Daniel 2:44). Ik tzeʼn saj qʼamaʼn toj tajlal 3, ok che kbʼel najsaʼn «qe rey ateʼ tuj tkyaqil twitz txʼotxʼ ex kyukʼix qe kysoldad» aqeju che qʼojil «tiʼj ju tjax tibʼaj chej, ex kyiʼj qe t-soldad nim kyajlal» (Apocalipsis 19:19).

2. KBʼEL NAJSAʼN QʼOJ, BʼIYBʼIL EX NYA BʼAʼN

   Ok kwebʼil «tkyaqil qʼoj tuʼn» Dios «tuj tkyaqil twitz txʼotxʼ» (Salmo 46:9). «Qeju in che anqʼin tuj tumelxix ex mintiʼ kypaltil, kukx che anqʼil twitz txʼotxʼ; atzun qeju bʼinchal mya bʼaʼn ex qe aj il, bʼiʼx che elex lajoʼn tuj ex mintiʼ kyoklen tiʼj.» (Proverbios 2:21, 22.) «Tkyaqil kʼokel te akʼaj wuʼne», chi Dios (Apocalipsis 21:4, 5).

3. CHE KBʼEL NAJSAʼN OKSLABʼIL MINTIʼ IN CHE AJBʼEN TE DIOS EX MINTIʼ O CHE ONIN KYIʼJ XJAL

   «Qe xjal nnoʼk kyqʼon kyibʼ te t-sanjel Dios puro nikʼaj yol in kymaʼn, qe pal in che kawin kyibʼaj xjal in kybʼinchaʼn aju kyex kyajbʼil [...]. ¿Pero ti kbʼantel kyuʼn ok tkubʼ xitj [moqa ‹ajtponjuʼ mankbʼil qʼij?›, Xjan Tuʼjil].» (Jeremías 5:31.) «Aqeju in kymaʼn weye: Tat, Tat, mya kykyaqil che okex tuj kawbʼil in tzaj tuj kyaʼj; noq oʼkx kʼokex aju in tbʼinchaʼn tajbʼil Nmane aju at tuj kyaʼj. Nimku xjal tuj tqʼijlalil tzul ok kymaʼ weye: Tat, Tat, ¿mintiʼpetzun qoklene tzaj tqʼoʼna tuʼn qpakbʼane, ex tuʼn tipumala e jeʼtz qe juʼẍ tuj kyanmi xjal quʼne, ex tuʼn tipumala o qbʼinchaye nimku bʼinchbʼen nim kyipumal?, che chi. Atzun weye kxel nmaʼne kye: Mintiʼ ojtzqiʼn kywitze wuʼne; kypaʼmil kyibʼe wiʼje aqeye bʼinchal mya bʼaʼn.» (Mateo 7:21-23.)

4. CHE KBʼEL NAJSAʼN XJAL IN CHE ONIN TIʼJ TKYAQILJU NYA BʼAʼN AT TWITZ TXʼOTXʼ

   Tqʼamaʼn Jesucristo jlu: «Ex tuʼntzun jlu, ma kubʼ kysentens xjal [moqa, ‹ma kubʼ kyjuicio xjal›, TNM]; porque ul ju spikʼun kyxol xjal, atzun kye xjal mas e tzalaj tiʼj tuʼn kyten tuj qlolj, kykʼiʼ tuʼn kyten tuj spikʼun, porque mya bʼaʼn kybʼinchbʼen» (Juan 3:19). In yolin Tyol Dios tiʼj ambʼil tej tkubʼ najsaʼn twitz Txʼotxʼ toj tqʼijlalil Noé aju jun tbʼanel tmajen Dios. «Kyjaʼtzun kykyaqil qeju ateʼ twitz txʼotxʼ ojtxi e kyaj mulqʼaj tjaqʼ aʼ ex e naj. Atzun te kyaʼj tukʼix txʼotxʼ aqeju ateʼ jaʼlo, tzyuʼn qe tuʼnx tyol Dios, kʼuʼn qe tuʼn kybʼaj tzʼeʼy tuʼn qʼaqʼ tuj tqʼijlalil jwisi ex tuj tqʼijlalil ok kynaj qe xjal mya nimal Dios qe.» (2 Pedro 3:5-7.)

In nok mojbʼaʼn aju «tqʼijlalil ok kynaj qe xjal mya nimal Dios» tukʼil aju tej kykubʼ najsaʼn «qeju ateʼ twitz txʼotxʼ ojtxi» toj tqʼijlalil Noé. ¿Tiʼ kubʼ najsaʼn toj tqʼijlalil Noé? Mintiʼ kubʼ xiten Txʼotxʼ aju jatumel atoʼ jaʼlo. Aqe xjal «ateʼ twitz txʼotxʼ» toj ambʼil aju e kubʼ tnajsaʼn Jehová. Ax ikx «tuj tqʼijlalil jwisi» tzul, aqeju kʼokel kyqʼoʼn kyibʼ te aj qʼoj tiʼj Dios ok che kbʼel najsaʼn. Atzun qeju tamiw Dios ok che kletel ik tzeʼn te Noé klet kyukʼix qe toj tja (Mateo 24:37-42).

¡Noqpe ximana tiʼj tzeʼn kʼokela Txʼotxʼ toj ambʼil aju! Otoq kubʼ tnajsaʼn Dios qe xjal nya bʼaʼn. Aju xnaqʼtzbʼil in tzaj tqʼoʼn Tyol Dios tiʼj mankbʼil, moqa bʼajsbʼil tqʼijlalil, tbʼanelxix ex nya tuʼn qtzaj xobʼ tuʼn. Noqtzun tuʼnj, jakulo kubʼ t-ximana jlu: «¿Chʼixpe tul bʼajsbʼil tqʼijlalil? ¿Tiʼ jaku bʼant wuʼne tuʼn nkyaj anqʼine?». Qo xnaqʼtzan tiʼj jlu toj Tyol Dios.