In tzaj tqʼamaʼn Tyol Dios jlu tiʼj ambʼil aj tkubʼ najsaʼn tkyaqil nya bʼaʼn: «Tzul jun kʼixbʼisabʼl maʼxix, bʼajx tzaj jun maj ikju atxix tej tbʼant twitz txʼotxʼ, ex mlay tzaj juntl maj ik tzaʼn jlu. Noqwit mintiʼ tuʼn tajtz laqʼeʼ tiʼj tqʼijlalil kʼixbʼisabʼl, miwtlo jun xjal tuʼn tkyaj klet» (Mateo 24:21, 22). Noqtzun tuʼnj, ax ikx in tzaj ttziyen qa ateʼ xjal che kjel anqʼin: «Kbʼajel ju twitz txʼotxʼ [...]; atzunju xjal in tbʼinchaʼn tajbʼil Dios kyjel ten te jumajx» (1 Juan 2:17).

¿Tiʼ kbʼantel quʼn tuʼn qkyaj anqʼin? ¿Ilpe tiʼj tuʼn tkubʼ qchmoʼn junjun tiʼchaq qe? Nya ikju. In tzaj tqʼamaʼn Tyol Dios nabʼil lu: «Qatzun il tiʼj tuʼn tkubʼ ulj tkyaqil jlu, ¿yajtzun kyeye, myapelo il tiʼj tuʼn kyanqʼine bʼaʼn, ex tuʼn tel kypaʼn kyibʼe tiʼj tkyaqil mya bʼaʼn, ex tuʼn kynimane te Dios? Tzʼok tililx kyuʼne tuʼn tbʼant kytene ex tuʼn kyayone tiʼj tqʼijlalil ok tul Dios» (2 Pedro 3:10-12). Aju txqantl taqikʼ ateʼk ttxlaj taqikʼ Tyol Dios lu, in tzaj tyekʼun qa aqeju che kbʼel «ulj», ax ikx in yolin tiʼj qa che kbʼel najsaʼn qe kykawbʼil xjal, qe xjal in che onin kyiʼj kawbʼil lu ex qeju in nel kyikʼun Tkawbʼil Dios. A jlu in tzaj tyekʼun qa mlay qo klet tuʼn qʼinumabʼil aj tul xitbʼil.

Oʼkx jaku qo kyaj anqʼin qa ma txi qxnaqʼtzaʼn qibʼ tuʼn tkubʼ qbʼinchaʼn aju tajbʼil Dios ex qa ma qo ajbʼen te tuʼn tkyaqil qkʼuʼj (Sofonías 2:3). Miʼn qo ok lepeʼ kyiʼj nimku xjal aqeju mintiʼ in nok kyqʼoʼn kywiʼ kyiʼj yekʼbʼil at qa in qo anqʼin kyoj bʼajsbʼil tqʼijlalil. Qqʼonk tilil tuʼn tok qqʼoʼn qwiʼ «tiʼj tqʼijlalil» Jehová. Jaku txi kyqʼoʼn testigos de Jehová xnaqʼtzbʼil teya tiʼj Tyol Dios tuʼn tel tnikʼa tiʼj alkye tten jaku kyaʼj anqʼina.