¿Kukxpe tzul tqʼoʼn Dios ambʼil kye xjal tuʼn kykawin kyibʼaj txqantl xjal ex tuʼn ttzaj kyiʼn nya bʼaʼn kyibʼaj? Mlay txi tqʼoʼn Dios ambʼil kye xjal tuʼn tkubʼ kynajsaʼn kyyajil, moqa kyiyjil. Ik tzeʼn ma tzʼel qnikʼ tiʼj, o tzaj tqʼamaʼn Dios qa kʼelel tiʼn tkyaqil nya bʼaʼn. Aju Bʼinchal kye xjal ex aju Bʼinchal Txʼotxʼ, tajbʼil tuʼn tel qnikʼ toj alkye ambʼil kjel tkyaqil tuʼn toj ttxolil. ¿Alkye tten in tzaj tyekʼun jlu qe?

Bʼaʼn tuʼn t-ximana tiʼj jlu: Qa ma txiʼ teya toj jun lugar toj kar, tnejel-lo kxel tqanina alkye tten jaku pona. Ex aj tok tqʼoʼn twitza kyiʼj qe yekʼbʼil otoq tzaj qʼamaʼn teya, kʼelel tnikʼa tiʼj qa niqayin taʼ lugar jatumel tuʼn tpona. Ax ikx te Qman Dios, o tzaj tqʼamaʼn junjun yekʼbʼil toj Tuʼjil Tyol aju tuʼn tikʼ twitz Txʼotxʼ. Aj tok qqʼoʼn qwitz kyiʼj yekʼbʼil lu, in nelxix qnikʼ tiʼj qa chʼixtl tul bʼajsbʼil tqʼijlalil nya bʼaʼn.

In tzaj tqʼamaʼn Tyol Dios qa naʼmxtoq tkubʼ najsaʼn nya bʼaʼn, ktel jun ambʼil nim toklen twitz tkyaqil Txʼotxʼ. Toj ambʼil lu, junx kbʼajel junjun tiʼchaq aju bʼajx tzikʼ toj juntl ambʼil atxix kykubʼlen bʼinchaʼn xjal. Qo xnaqʼtzan tiʼj junjun yekʼbʼil lu aju in tzaj tqʼamaʼn Tyol Dios.

1. AJU NYA BʼAʼN TUʼN TIKʼ In tzaj tqʼamaʼn Tyol Dios toj Mateo 24 aju kbʼajeltoq twitz Txʼotxʼ. A jlu kʼokeltoq te jun techel aju «aj tjapun bʼaj tqʼijlalil tiʼchaq at twitz Txʼotxʼ», ex aj tikʼ jlu, kbʼel najsaʼn tkyaqil nya bʼaʼn (Mateo 24:3, TNM, 14). Kyxol qe yekʼbʼil lu, tzultoq qʼoj, weʼyaj, kyaqnajnabʼ jaxku tumel, kchʼiyiltoq bʼiybʼil, kchewixel kʼujlabʼil ex kʼokeltoq tilil kyuʼn nejenel kye okslabʼil tuʼn kysbʼuʼn kyiʼj xjal (Mateo 24:6-26). Ax tok atxix ojtxe in tzaj junjun kyxol qe nya bʼaʼn lu, noqtzun tuʼnj, mas in bʼaj toj ambʼil jaʼlo tuʼnju chʼix tjapun bʼaj tkyaqil jlu. Nya oʼkxju, ax ikx toj junx ambʼil in nikʼ tkyaqil jlu. Ex in che ikʼ qe jlu junx tukʼe oxetl yekʼbʼil aju qo xnaqʼtzal tiʼj.

2. AJU KYMOD XJAL In tzaj tqʼamaʼn Tyol Dios qa toj «mankbʼil tqʼijlalil» —moqa aju ambʼil in xiʼ tuʼn tkubʼ najsaʼn nya bʼaʼn— ok kteltoq nim xjal nya bʼaʼn kymod. In tzaj qʼamaʼn jlu: «Che ul xjal oʼkx tok kykʼuʼj kyiʼjx, ex oʼkx tok kykʼuʼj tiʼj pwaq, ex in jaw kyniman kyibʼ, ex jawni qe, ex yasul qe, ex mibʼan che niman tyol kyman, ex mintiʼ in kyqʼoʼn chjonte tiʼj ju in kykʼmoʼn, mibʼan che niman te Dios, ex mintiʼ kykʼujlalil, ex mintiʼ in chewix kykʼuʼj, ex siʼmil yol qe, ex mintiʼ in kyjakʼun kyibʼ, ex mintiʼ chʼin kylastmi kyiʼj xjal, ex nneʼl kyikʼun aju bʼaʼn, ax in che ok meltzʼaj kyiʼj kyukʼil, txʼuʼj kywiʼ, ex in jaw kyniman kyibʼ, mas tok kykʼuʼj tiʼj achbʼil ex mya tiʼj Dios» (2 Timoteo 3:1-4). Ax tok, nya tzma jaʼlo in che ikʼ jlu, noqtzun tuʼnj, mas in che ikʼ toj «mankbʼil tqʼijlalil» jaʼlo ex tuʼntzunju, jaku txi qqʼamaʼn qa in qo anqʼin toj jun ambʼil jatumel in tzaj «nim yajbʼil». ¿O tzʼok tqʼoʼn teya twitz tiʼj jlu?

3. MA NAJ TWITZ TXʼOTXʼ In tzaj tqʼamaʼn Tyol Dios qa kpol «tqʼijlalil tuʼn kynaj qeju ma naj twitz txʼotxʼ kyuʼn» (Apocalipsis 11:18). ¿Alkye tten o naj twitz Txʼotxʼ? Chʼixmi ax jlu in tzaj qʼamaʼn tiʼj tqʼijlalil Noé: «Otoq chmet il twitz txʼotxʼ tuj twitz Dios, puro txʼuʼj qe xjal, ex nojni tuj kyanmi tuʼn qʼoj. O til Dios mya bʼaʼntoq twitz txʼotxʼ». Tuʼntzunju, tqʼama Dios jlu kyiʼj xjal nya bʼaʼn: «Che najel kykyaqil xjal wuʼne, tukʼix twitz txʼotxʼ» (Génesis 6:11-13). ¿O tzʼok tqʼoʼn teya twitz tiʼj bʼiybʼil ma chʼiy twitz Txʼotxʼ? Nya oʼkxju, ax ikx in qo anqʼin atz jatumel at nim tiʼchaq o kubʼ kybʼinchaʼn xjal: o che bʼant junjun qʼaqʼ kyuʼn aju jaku kubʼ xiten Txʼotxʼ tuʼn ex jaku che kyim kykyaqil xjal tuʼn. At tumel tuʼn tbʼant jlu kyuʼn. Ax ikx o bʼaj naj twitz Txʼotxʼ te juntl tten, aju junjun tten ik tzeʼn kyqʼiqʼ, ik tzeʼn qe txkup, ik tzeʼn qe tzeʼ ex ik tzeʼn qe aʼ, ma che naj tuʼnju in bʼant kyuʼn xjal.

 Ximana tiʼj jlu: «Toj jun syent abʼqʼi ma tzikʼ, ¿atpe tumel kyuʼn xjal tuʼn tkubʼ kynajsaʼn kyyajil?». Mintiʼ. Atzun toj ambʼil jaʼlo at tumel. In xi qqʼamaʼn jlu tuʼnju ma chmet qe qʼaqʼ kyuʼn xjal ex ma naj junjun tiʼchaq kyuʼn aju in najbʼen tuʼn tten chwinqlal twitz Txʼotxʼ. Nya oʼkxju, ax ikx mintiʼ in che ximen tiʼj aju jaku tzʼaj kyuʼn qe kʼuxbʼil in kubʼ kybʼinchaʼn ex mintiʼ in kanet tumel kyuʼn tuʼn tmayet nya bʼaʼn. Noqtzun tuʼnj, tbʼanelxix tuʼnju nya aʼye xjal che kbʼajel ximente aju kbʼajel tiʼj Txʼotxʼ. Naʼmxtoq tkubʼ naj tkyaqil chwinqlal, ok che kbʼel tnajsaʼn Dios qeju ma naj Txʼotxʼ kyuʼn. ¡O tzaj ttziyen Dios jlu!

4. AJU PAKBʼABʼIL TWITZ TKYAQIL TXʼOTXʼ Aju juntl yekʼbʼil tiʼj qa chʼixtl tkubʼ najsaʼn nya bʼaʼn aju pakbʼabʼil twitz tkyaqil Txʼotxʼ. In tzaj qʼamaʼn jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14). Junxitl pakbʼabʼil lu twitz aju o bʼant kyuʼn chʼixmi kykyaqil okslabʼil atxix ma bʼant nim syent abʼqʼi. Toj mankbʼil, moqa bʼajsbʼil, tqʼijlalil kxel qʼamet-xix «aju tqanil bʼaʼn lu tiʼj tkawbʼil Dios». ¿Ojtzqiʼn teya tuʼn alkye jun kʼloj okslal in che pakbʼan tiʼj tqanil lu? Axpe ikx qa o tzʼok tqʼoʼn twitza tiʼj jun kʼloj xjal in che pakbʼan atz jatumel najliya, ¿in che pakbʼanpe toj «tkyaqil twitz txʼotxʼ» ex «kye kykyaqil nasyon»?

Aju tembʼil toj Internet jw.org kye testigos de Jehová in tzaj tqʼamaʼnxix «tqanil bʼaʼn lu tiʼj tkawbʼil Dios». Toj tembʼil lu, ateʼkx nim onbʼil tiʼj Tyol Dios toj mas te 700 yol. ¿Alkye juntl kʼloj okslal in nok tilil kyuʼn tuʼn t-xi kyqʼamaʼn Tkawbʼil Dios kye xjal? Axpe ikx tej mintiʼtoq Internet, otoq tzʼok ojtzqiʼn kywitz testigos de Jehová tuʼnju in che pakbʼan tiʼj Tkawbʼil Dios. Atxix toj 1939, ok qʼet yol: «Qʼol tqanil tiʼj Tkawbʼil Jehová», tiʼj t-xkʼomil uʼj Aju Xqʼuqil. At jun uʼj in yolin kyiʼj okslabʼil tqʼama qa aju aqʼuntl in bʼant kyuʼn testigos de Jehová mintiʼx juntl kʼloj okslal in bʼant jlu kyuʼn. Jun kyxol qeju tbʼanel tqanil in xi kyqʼamaʼn testigos de Jehová aju qa chʼix tul ambʼil tuʼn tkubʼ tnajsaʼn Tkawbʼil Dios tkyaqil nya bʼaʼn.

¿O tzʼok tqʼoʼn teya twitz tiʼj qa in che ikʼ qe yekʼbʼil ma qo yolin kyiʼj toj xnaqʼtzbʼil lu? Ma bʼant jun syent abʼqʼi aju uʼj Aju Xqʼuqil in tzaj tqʼamaʼn junjun tqanil tiʼjju in nikʼ twitz tkyaqil Txʼotxʼ, ex aqeju xjal in che uʼjin tiʼj uʼj lu, o tzʼel kynikʼ tiʼj qa in che japun qeju yekʼbʼil lu toj bʼajsbʼil tqʼijlalil jaʼlo. Noqtzun tuʼnj, aqeju mintiʼ in nok qʼuqeʼ  kykʼuʼj tiʼj jun tiʼ, in kyqʼamaʼn qa nya ax tok aju in kyqʼamaʼn junjun tqanil, ex kyjuʼtzun, nya ax tok aju tqanil qa mas in tzaj nya bʼaʼn twitz Txʼotxʼ jaʼlo. In kyqʼamaʼn qa tuʼnju mas jaku tzʼok qbʼiʼn junjun tqanil toj ambʼil jaʼlo, in nok qbʼiʼn junjun nya bʼaʼn jaʼlo aju mintiʼ bʼant tuʼn tok qbʼiʼn toj ambʼil ojtxe. Noqtzun tuʼnj, ax ikx aqeju junjuntl xjal in che ximen tiʼjju in nikʼ, o tzʼel kynikʼ tiʼj qa at mastl yekʼbʼil tiʼj qa in qo anqʼin toj jun ambʼil nim toklen.

Toj 2014, at jun kʼloj xjal in che xnaqʼtzan tiʼjju in nikʼ twitz Txʼotxʼ ex at kyoklen tiʼj uʼj The Bulletin of the Atomic Scientists xi kyqʼamaʼn kye Consejo de Seguridad de las Naciones Unidas aju nya bʼaʼn chʼix ttzaj kyiʼj xjal. Kyqʼama jlu: «Ma bʼajxix qxnaqʼtzaʼne nya bʼaʼn lu, ex ma tzʼel qnikʼe tiʼj qa kukx at nim yekʼbʼil tiʼj qa jaku kubʼ naj kyyajil xjal tuʼn junjun kʼuxbʼil o bʼaj kybʼinchaʼn xjal at kynabʼil». Aju junjun yekʼbʼil ik tzeʼn jlu in tzaj tyekʼun kye nimku xjal qa in qo anqʼin kyoj bʼajsbʼil tqʼijlalil ex qa chʼix tul ambʼil tuʼn tkubʼ najsaʼn nya bʼaʼn, ex kukx in chʼiy kyajlal xjal aqeju in kubʼ kyximen jlu. Kyxol qe jlu ateʼ qeju bʼinchal uʼj lu ex qeju in che uʼjin tiʼj uʼj lu. Noqtzun tuʼnj, mintiʼ tuʼn qtzaj xobʼ. ¿Tiquʼn? Tuʼnju jaku qo kyaj anqʼin.