Toj nimku ambʼil o tzaj tqʼamaʼn quʼj qa aju bʼibʼaj Gog ex Magog atz in yolin tiʼj Satanás tej otoqxi tzʼetz xoʼn toj kyaʼj. ¿Tiquʼn tzaj kyqʼamaʼn quʼj lu? Tuʼnju in tzaj tqʼamaʼn Apocalipsis qa a Satanás kbʼel nej kywitz aj qʼoj tuʼn kyok tzoqpaj tiʼj ttnam Jehová twitz tkyaqil Txʼotxʼ (Apocalipsis 12:1-17). Tuʼntzunju, kubʼ qximen qa aju Gog atzun juntl bʼibʼaj in nok te tbʼi Satanás.

Noqtzun tuʼnj, at junjuntl tiʼchaq mintiʼxix in nel qnikʼ tiʼj tuʼnju chikʼbʼabʼil lu. ¿Tiquʼn? Tnejel, aj tyolin Jehová tiʼjju aj tkubʼ najsaʼn Gog in xi tqʼamaʼn te Gog qa ok kxel qʼoʼn te «kychiʼ kykyaqil txkaj kʼutz ex te kychiʼ qe txkup te tjaqʼ kʼul» (Ezequiel 39:4). Ex in tqʼamaʼntl Jehová jlu: «Kxel nqʼoʼne jun piẍ txʼotxʼ jatum tuʼn tkuʼx maquʼn Gog, ax tuj kytxʼotxʼ aj Israel» (Ezequiel 39:11). Tuʼnju jun xewbʼaj te Satanás aju mintiʼ qʼanchaʼl mlay bʼant tuʼn t-xi chyon kyuʼn txkup ex mlay bʼant tuʼn tkux maqet tzalu twitz Txʼotxʼ. Nya oʼkxju, ax ikx in tzaj tqʼamaʼn Tyol Dios qa ok kbʼelex xoʼn Satanás 1,000 abʼqʼi toj jun jul mintiʼ bʼajsbʼil t-xeʼ. A jlu in tzaj tyekʼun qa mlay txi chyoʼn tuʼn jun txkup ex mlay kux maquʼn (Apocalipsis 20:1, 2).

Tkabʼ, in tzaj tqʼamaʼn Tyol Dios qa aj tkubʼ bʼaj 1,000 abʼqʼi, ok kjawitz tzaqpiʼn Satanás toj jul «ex kʼelextzun sbʼul kye nasyon ateʼ tuj tkyaqil twitz txʼotxʼ, aju nasyon Gog tukʼix Magog, tuʼntzun kyok tchmoʼn tuʼn kyqʼojin» (Apocalipsis 20:8). Qa a Satanás in nok te Gog, a jlu in tzaj tyekʼun qa ax Satanás kʼokel ten sbʼul tibʼ. Noqtzun tuʼnj, nya ik ttenju. Tuʼn jlu in nel qnikʼ qa aj tyolin uʼj Ezequiel ex Apocalipsis tiʼj Gog, nya atz in che yolin tiʼj Satanás.

Qa ikju, ¿alkyetzun Gog ex Magog? Tuʼn tel qnikʼ tiʼj, il tiʼj tuʼn tkubʼ qxnaqʼtzaʼn toj Tyol Dios alkye kʼokel tzoqpaj tiʼj ttnam Dios toj qʼoj. In tzaj tqʼamaʼn Tyol Dios qa kʼokel tzaqpaj Gog ex Magog, qa kʼokel tzaqpaj «nimaqkawil toj tbʼaʼnqʼobʼkyaʼj», moqa rey del norte, ex qa che okel tzaqpaj «qe rey ateʼ tuj tkyaqil twitz txʼotxʼ» (Ezequiel 38:2, 10-13; Daniel 11:40, Xjan Tuʼjil, 44, 45; Apocalipsis 17:14; 19:19). ¿Junxitpe qʼoj lu twitz juntl? Nyalo. In yolinlo jlu tiʼj axju qʼoj, noqtzun tuʼnj, in nok qʼoʼn te junxitl tbʼi. ¿Tiquʼn in xi qqʼamaʼn jlu? Tuʼnju in tzaj tqʼamaʼn Tyol Dios qa kykyaqil ttnam twitz Txʼotxʼ che okel tzoqpaj toj qʼoj tiʼj ttnam Jehová ex qa tiʼj jlu kyxel tzyet qʼoj Armagedón (Apocalipsis 16:14, 16).

Qa ma che ok qmojbʼaʼn qe taqikʼ Tyol Dios aqeju in che yolin tiʼj qʼoj tiʼj ttnam Dios, in nel qnikʼ  qa aju Gog ex Magog nya atz in yolin tiʼj Satanás. Atz in yolin kyiʼj jun kʼloj tnam. ¿Ape rey del norte kbʼel nej toj qʼoj kʼokel tiʼj ttnam Dios? Mlay bʼant tuʼn t-xi qqʼamaʼn qa ikxix ttenju. Noqtzun tuʼnj, iklo ttenju tuʼnju in xi tqʼamaʼn Jehová jlu te Gog: «Ktzajela tuj ttanmiya najchaq tuj txʼotxʼ tuj tbʼanqʼabʼ qʼij, kyukʼix nimku xjal te elaʼ tnam che tzajel tukʼila, nimxix kyipun ex kyukʼix qe soldad kyjax kyibʼaj chej» (ma tzʼok qqʼoʼne qʼeq tiʼj; Ezequiel 38:6, 15).

Chʼixmi axju tqʼama Daniel, aju t-sanjel Dios, tej tyolin tiʼj rey del norte: «Ktzajel t-xobʼil tuʼn jun tqanil ktzajel tuj tjawitz qʼij ex tuj txʼotxʼ tuj tbʼanqʼabʼ qʼij, kʼajel meltzʼaj tukʼil nim ttxʼuʼjil ex che bʼel tbʼyoʼn nimku xjal. Atzun kbʼel ten tcampament kyxol mar tukʼil witz xjan ex tbʼanilxix. Pero kpol or tuʼn tkyim ex mi aʼl jun kʼonil tiʼj» (Daniel 11:44, 45). Aju tqʼama Daniel chʼixmi junx taʼ tukʼil aju tqʼama Ezequiel tiʼj Gog (Ezequiel 38:8-12, 16).

¿Tiʼ kbʼajel aj kyok lipen aj qʼoj tiʼj ttnam Dios? In tzaj tqʼamaʼn Daniel 12:1 jlu: «Tujtzun tqʼijlalil lu kbʼel tyekʼun tibʼ aju anjel maʼ toklen Miguel tbʼi, aju in kolin kyiʼj qe t-xjalila». Ex in tzaj tqʼamaʼntl jlu: «Aju tqʼijlalil lu te nim kʼixkʼoj ex bʼis, naʼnx tbʼaj jun maj ikju atxix tej kykubʼ xeʼt qe nasyon». Aju chʼintl jlu in yolin tiʼj nimxix yajbʼil tzul. Aj tkubʼ bʼaj Daniel 12:1 in tzaj tqʼamaʼntl jlu: «Kykyaqil qe t-xjalila», toj juntl yol, aju ttnam Dios aqeju «tzʼibʼan kybʼi tuj libro che kletel». ¿Tiʼ in tzaj tyekʼun taqikʼ Tyol Dios lu? Qa atxix toj 1914 tzaj tzyet tuʼn tkawin Jesucristo ex qa kqʼojil tuʼn tkolin qiʼj toj Armagedón. Chʼixmi ax chikʼbʼabʼil lu in tzaj tqʼamaʼn Apocalipsis 19:11-21 tiʼjju kbʼantel tuʼn Jesucristo aj kyok lipen aj qʼoj tiʼj ttnam Dios.

Yajtzun aju Gog tukʼix Magog in tzaj tqʼamaʼn Apocalipsis 20:8, ¿alkyetzun? Atz in yolin kyiʼj kykyaqil xjal kʼelel kypan kyibʼ tiʼj Jehová ex che okel lipen kyiʼj tmajen aj kyok toj mankbʼil, moqa toj bʼajsbʼil, malbʼil aj tkubʼ bʼaj 1,000 abʼqʼi. Aqeju xjal lu ok kʼelel kyikʼen ttnam Dios ik tzeʼn kbʼantel tuʼn Gog ex Magog. Noqtzun tuʼnj, ok che kbʼel tnajsaʼn Dios ik tzeʼn ok kbʼel tnajsaʼn Gog ex Magog toj Armagedón (Apocalipsis 19:20, 21; 20:9). Kyjuʼtzun, kykyaqil qeju xjal kʼelel kypan kyibʼ tiʼj Dios aj tkubʼ bʼaj 1,000 abʼqʼi, in nok tqʼoʼn Tyol Dios kybʼi te Gog tukʼix Magog.

Aqo testigos de Jehová qganxix tuʼn qxnaqʼtzan tiʼj Tyol Dios. Tuʼntzunju, qajbʼilxix tuʼn tel qnikʼ alkye kʼokel te «nimaqkawil toj tbʼaʼnqʼobʼkyaʼj», moqa te rey del norte, toj ambʼil tzul. Noqtzun tuʼnj, noq alkyexku kbʼel nej kywitz tnam toj qʼoj qiʼj, qʼuqli qkʼuʼj tiʼj jlu: tnejel, kbʼel tiʼj Gog ex Magog kyukʼix qe t-soldad ex che kbʼel najsaʼn. Ex tkabʼ, qo kletel tuʼn Jesucristo, aju aj kawil qibʼaj, ex tzul tqʼoʼn ambʼil qe tuʼn qanqʼin toj jun akʼaj twitz Txʼotxʼ atz jatumel ktel axix tok mujbʼabʼil ex axix tok xqʼuqbʼil (Apocalipsis 7:14-17).