1. ¿Tiʼ bʼant tuʼn jun anjel aju ok te Satanás?

ATTOQ jun anjel aju tamiwtoq Jehová tnejel. Noqtzun tuʼnj, pon tkʼuʼj tiʼjju tuʼn kykʼulin xjal twitz ex nya twitztl Dios. Ex tuʼnju mintiʼ kyaj ttzaqpiʼn tuʼn t-ximen tiʼj jlu, ilen (Santiago 1:14, 15). Mintiʼ ojtzqiʼn quʼn tiʼtoq tbʼi tok, noqtzun tuʼnj, ojtzqiʼn quʼn qa Satanás tbʼi jaʼlo. El tpaʼn tibʼ tiʼj Jehová ex «atzun in tzaj nikʼaj yol tukʼil» (Juan 8:44).

2, 3. ¿Tiquʼn in nok tbʼi tnejel aj qʼoj tiʼj Jehová te Satanás, te Tajaw il, te ojtxe lobʼaj ex te nintz jil dragón?

² A Satanás tnejel aj qʼoj tiʼj Jehová ex kyiʼj xjal. In qo tzaj tonin Tuʼjil Tyol Dios tuʼn tel qnikʼ tiʼj qa o tzʼok Satanás te puro nya bʼaʼn. In tzaj qʼamaʼn qa a t-xilen bʼibʼaj Satanás aju «aj Qʼoj». In tzaj qʼamaʼn jlu tiʼj tuʼnju in nel tikʼun Tkawbʼil Jehová ex in nok tilil tuʼn, tuʼn tkubʼ naj. Nya tajbʼil Satanás tuʼn tkawin Jehová.

³ In tzaj tqʼamaʼn Apocalipsis 12:9 qa ax ikx in nok tbʼi Satanás te Tajaw il aju in nyolin nim nya ax yol tiʼj Jehová ex kyiʼj xjal. In  tqʼamaʼn Satanás qa nya ax tok aju in tqʼamaʼn Jehová. Ax ikx in tzaj qʼamaʼn qa ate Satanás «aju ojtxi lobʼaj», moqa ojtxe kan, tuʼnju ajbʼen jun kan tuʼn, tuʼn t-sbʼun tiʼj Eva. Ex in tzaj qʼamaʼn qa ate aju «nintz jil dragón» tuʼnju ik tten ik tzeʼn jun matij txkup aju jaku qo tzaj xobʼ tuʼn, jaku qox tchyoʼn ex puro nya bʼaʼn tmod. Nya tajbʼil tuʼn tjapun twiʼ aju o tzaj ttziyen Jehová. Ex tajbʼil tuʼn kykyim kykyaqil tmajen Jehová.

4. ¿Tiʼ qo xnaqʼtzal tiʼj toj xnaqʼtzbʼil lu?

⁴ At nim yekʼbʼil tiʼj qa tajbʼil Satanás tuʼn miʼn qajbʼentl te Jehová. Tuʼntzunju, in tzaj tqʼamaʼn Tyol Dios jlu qe: «Tenx kynabʼle ex che xqʼuqine porque ate tajaw il aj qʼoj kyiʼje, ex in bʼet kyiʼjele, in tzanun ik tzaʼn jun bʼalun, in jyon tiʼj alkye jun tuʼn t-xi tchyoʼn» (1 Pedro 5:8). Toj xnaqʼtzbʼil lu, ok qo xnaqʼtzal tiʼj oxe tiquʼn kʼokel qxqʼuqin qibʼ tiʼj aj qʼoj tiʼj Jehová ex tiʼj ttnam.

5, 6. a) ¿Alkye junjun techel in tzaj tyekʼun qa nim kyipumal anjel at? b) ¿Tiquʼn in tzaj tqʼamaʼn Tyol Dios qa a Satanás tajaw kamik?

⁵ At nim kyipumal anjel (Salmo 103:20). Ex at nim kynabʼil kywitz xjal. Aqeju tbʼanel anjel in najbʼen kyipumal kyuʼn tuʼn tkubʼ kybʼinchaʼn aju bʼaʼn. Jun techel, in tzaj tqʼamaʼn Tyol Dios qa toj junx qonikʼan e kyim 185,000 soldad aj qʼoj tuʼn junx anjel. Mlayx bʼant jlu tuʼn jun xjal ex kwest jaku tzʼel toj twitz jun kʼloj soldad (2 Reyes 19:35). Toj juntl maj, etz tiʼn jun anjel qe t-apóstol Jesús toj carcel. Ex tjaqoʼn qe pwert, i etz qe apóstol ex e okx tlamoʼn juntl maj qe pwert. Mintiʼ kynaʼ soldad tej tbʼaj jlu (Hechos 5:18-23).

⁶ Ik tzeʼn in nel qnikʼ tiʼj, aqeju tbʼanel anjel in najbʼen kyipumal kyuʼn tuʼn tkubʼ kybʼinchaʼn aju bʼaʼn. Atzunte Satanás in najbʼen tipumal tuʼn, tuʼn tkubʼ tbʼinchaʼn aju nya bʼaʼn. Ex at nim tipumal. Kyjuʼtzun, in tzaj tqʼamaʼn Tyol Dios qa a «nejenel at twitz txʼotxʼ» ex qa a «kydios xjal» (Juan 12:31; 2 Corintios 4:4). Ax ikx in tzaj qʼamaʼn qa a «tajaw kamik» (Hebreos 2:14). Mintiʼ in tzaj tyekʼun jlu qa in che kubʼxix tbʼiyoʼn kykyaqil xjal. ¿Tiquʼntzun in tzaj tqʼamaʼn Tyol Dios qa a tajaw kamik? Tnejel, tuʼnju at tipumal kyibʼaj xjal tuʼn tten ikʼbʼil toj kyanmi ex tuʼn tten bʼiybʼil kyxol. Tkabʼ, tuʼnju e ilen Adán ex Eva tuʼn, ex tuʼntzunju, in qo ilen ex in qo kyim (Romanos 5:12). Kyjuʼtzun tqʼama Jesús qa jun «bʼyol xjal te» Satanás (Juan 8:44). Ax tok, at nim tipumal Satanás.

7. ¿Alkye junjun techel in tzaj tyekʼun qa at nim kyipumal taqʼunal Tajaw il?

⁷ Aj tel qikʼun Satanás, ax ikx in che el qikʼun qeju in che ok lepeʼ tiʼj. Kyxol qe jlu ateʼ qeju nya bʼaʼn anjel, aqeju taqʼunal (Apocalipsis 12:3, 4). Ateʼqe techel toj Tyol Dios aju in tzaj tyekʼun qa mas nim kyipumal taqʼunal Tajaw il qwitz ex qa jaku tzʼok kybʼinchaʼn nim nya bʼaʼn qiʼj (Mateo 8:28-32; Marcos 5:1-5). Miʼn tzʼel naj tiʼj qkʼuʼj qa at nim tipumal Satanás kyukʼex t-anjel (Mateo 9:34). Oʼkx jaku che kubʼ quʼn tukʼe onbʼil in tzaj tqʼoʼn Jehová.

8. a) ¿Tiʼ tajbʼil Satanás? (Qʼonka twitza tiʼj tnejel tilbʼilal.) b) ¿Tiquʼn puro nya bʼaʼn kymod xjal ik tzeʼn Satanás?

⁸ Puro nya bʼaʼn tmod Satanás. Ik tzeʼn sel qnikʼ tiʼj toj taqikʼ 4, in tzaj tqʼamaʼn Tyol Dios qa ik tten ik tzeʼn jun león aju in tzanun wen tuʼnju at nim weʼyaj tiʼj. Ya in kawintl Satanás kyibʼaj chʼixmi kykyaqil xjal, noqtzun tuʼnj, nya oʼkx jlu tajbʼil (1 Juan 5:19). Ax ikx tajbʼil tuʼn kykubʼ tnajsaʼn qe okslal skʼoʼn maj aʼyeju ateʼx  twitz Txʼotxʼ ex qeju «txqantl» ẍneʼl (Juan 10:16; Apocalipsis 12:17). Tuʼntzunju, atxix toj tnejel syent abʼqʼi in nok tilil tuʼn, tuʼn kyel ikʼun axix tok okslal ex toj ambʼil jaʼlo.

9, 10. a) ¿Tiʼ bʼant tuʼn Satanás tuʼn tok lipen kyiʼj aj Israel? b) ¿Tiquʼn tajbʼilxixtoq Satanás tuʼn tok lipen kyiʼj aj Israel? c) ¿Tiʼ in tnaʼn Satanás qa at jun tmajen Jehová ma kubʼ tbʼinchaʼn jun matij il?

⁹ Qa at weʼyaj tiʼj jun león, mintiʼ in tzaj qʼaqʼin tkʼuʼj tiʼjju kbʼel tbʼiyoʼn te tchiʼ ex mintiʼ in tzaj qʼaqʼin tkʼuʼj tiʼj otoqxi kubʼ tbʼiyoʼn. Ax ikx te Satanás, mintiʼ in tzaj qʼaqʼin tkʼuʼj kyiʼj xjal aj tok lipen kyiʼj. Qo ximen tiʼj alkye tten ok lipen tiʼj tnam Israel. Bʼant tuʼn kykubʼ tzʼaq aj Israel tuʼn toj yaẍbʼil, ik tzeʼn Zimrí. Ex bʼant tuʼn tpon kykʼuʼj tuʼn tiʼj aju mintiʼ kyoklen tiʼj, ik tzeʼn Guehazí. Tzaj tiʼn jlu nimxix kʼixkʼoj kyiʼj aj Israel. Ex olo tzalajxix Satanás tej kykubʼ tzʼaq qe jlu toj il (Números 25:6-8, 14, 15; 2 Reyes 5:20-27).

¹⁰ ¿Tiquʼn tajbʼilxixtoq tuʼn tok lipen kyiʼj aj Israel? Tuʼnju ojtzqiʼntoq tuʼn qa atztoq tzul Mesías kyiʼj aj Israel. Ex ojtzqiʼntoq tuʼn qa kbʼeltoq najsaʼn tuʼn Mesías ex qa kbʼeltoq tyekʼun Mesías qa at toklen Jehová tuʼn tkawin (Génesis 3:15). Nyatoq tajbʼil Satanás tuʼn ttzalaj Jehová kyiʼj aj Israel, kyjuʼtzun, ok tilil tuʼn, tuʼn tkubʼ kybʼinchaʼn aj Israel il. Mintiʼ tzaj qʼaqʼin tkʼuʼj tiʼj David tej tel tiʼn t-xuʼjil juntl. Ax ikx mintiʼ tzaj qʼaqʼin tkʼuʼj tiʼj Moisés tej t-xi tnajsaʼn toklen tuʼn tokx toj Txʼotxʼ otoq tzaj Tziyen. In jaw tzalaj Satanás qa at jun tmajen Dios ma kubʼ tbʼinchaʼn jun matij il. Ex in najbʼen jlu tuʼn, tuʼn t-xmayin tiʼj Jehová (Proverbios 27:11).

11. ¿Tiquʼn tajbʼiltoq Satanás tuʼn tkubʼ tzʼaq Sara toj il?

¹¹ Mas o che el tikʼun Satanás ja xjal aqeju e ok te t-xeʼchel Mesías. Jun techel, qo ximen tiʼjju ikʼ tej t-xi tqʼamaʼn Jehová jlu te Abrahán: «Tiʼja kbʼel nbʼinchaʼne jun nasyon maʼxix» (Génesis  12:1-3). Tej attoq Abrahán tukʼil Sara toj Egipto, xi qiʼn Sara tuʼn aj kawil te tnam lu tuʼn tkubʼ mojeʼ tukʼil. Noqtzun tuʼnj, klet tuʼn Jehová (kjawil uʼjit Génesis 12:14-20). Chʼixmi ax jlu bʼaj tukʼil juntl aj kawil te tnam Guerar tej naʼmxtoq tul itzʼji Isaac (Génesis 20:1-7). ¿Tuʼnpe Satanás bʼant tuʼn tok kyqʼoʼn kywitz qeju aj kawil lu tiʼj Sara? Mintiʼ in tzaj tqʼamaʼn Tyol Dios. Noqtzun tuʼnj, qa ma tzaj qnaʼn, otoq kyaj ttzaqpiʼn Sara qe junjun qʼinumabʼil toj tnam Ur tuʼn tanqʼin kyoj ja xbʼalun. Tajlotoq Satanás tuʼn ttzajtl tajbʼil Sara tiʼj kyqʼinumabʼil aj kawil ex tuʼn tkyaj ttzaqpiʼn tchmil tukʼix Jehová. Owtlo tzalaj Satanás noqwit xi tnajsaʼn Sara toklen tuʼn tok te t-xeʼchel Mesías. Mintiʼ tzaj te tbʼis tiʼj qa kbʼel t-xiten xuʼj lu aju tmejebʼleʼn, qa che yolil xjal nya bʼaʼn tiʼj ex qa kxel tnajsaʼn tamiwbʼil tukʼil Jehová. ¡Puro nya bʼaʼn Satanás!

12, 13. a) ¿Tiʼ bʼant tuʼn Satanás tej tul itzʼji Jesús? b) ¿Tiʼtzulo t-xim Satanás at kyiʼj kuʼxin in che ajbʼen te Jehová?

¹² Tej tikʼ nim ambʼil, ul itzʼji Jesús. Nya tbʼanel ela neʼ lu toj twitz Satanás. Ojtzqiʼntoq tuʼn qa tzajni kʼwaʼl lu kyiʼj toj tja Abrahán ex qa ok kʼokeltoq te Mesías. Ax ikx a Jesús kbʼel najsante tkyaqilju o bʼant tuʼn Tajaw il (1 Juan 3:8). ¿Kubʼpe t-ximen Satanás qa mintiʼ tuʼn tkubʼ bʼiyet jun tal neʼ? Mintiʼ. Mintiʼ in ximen te tiʼj qa bʼaʼn taʼ jun tiʼ moqa nya bʼaʼn. Axpe ikx jurat naj ok tilil tuʼn, tuʼn tkubʼ bʼiyet Jesús. ¿Tiʼ bʼant tuʼn?

¹³ Tej tok tbʼiʼn aj kawil Herodes qa otoq tzul itzʼji aju «rey kye xjal judiy», tzaj nim tqʼoj ex kubʼ t-ximen tuʼn tkubʼ tbʼiyoʼn (Mateo 2:1-3, 13). Tuʼntzunju, xi tqʼoʼn kawbʼil tuʼn kykubʼ bʼiyet kykyaqil kʼwaʼl te kabʼe abʼqʼi ex qeju naʼmxtoq kyjapun te kabʼe abʼqʼi toj Belén ex kyoj qe txqantl tnam ateʼ ttxlaj (kjawil uʼjit Mateo 2:13-18). Kyaʼj anqʼin Jesús tej tbʼaj jlu. Noqtzun tuʼnj, ¿tiʼ in tzaj tyekʼun jlu qe tiʼj Satanás? In tzaj tyekʼun qa mintiʼx toklen kychwinqlal xjal toj twitz, nixpe aju kychwinqlal tal kʼwaʼl. Ax tok, ik tten Satanás ik tzeʼn jun león. Miʼn tzʼel naj tiʼj qkʼuʼj qa puro nya bʼaʼn tmod.

14, 15. ¿Alkye tten in che kubʼ t-sbʼuʼn Satanás xjal?

¹⁴ Oʼkx jaku che ok tqʼoʼn Satanás qe xjal te aj qʼoj tiʼj Jehová qa ma che kubʼ t-sbʼuʼn (1 Juan 4:8). ¿Alkye tten in che kubʼ t-sbʼuʼn? In nok tilil tuʼn, tuʼn miʼn tel «kynikʼ tiʼj qa at tajbʼen Dios kye». Toj juntl yol, in nok tilil tuʼn, tuʼn tkubʼ kyximen xjal qa nya nim toklen tuʼn kyok te tamiw Dios (Mateo 5:3). Ma che kubʼ tmoẍsaʼn Satanás nim xjal tuʼn miʼn tel kynikʼ tiʼj axix tok tiʼj Dios (2 Corintios 4:4).

¹⁵ Ojtzqiʼn tuʼn Satanás qa tajbʼil Jehová tuʼn qkʼulin, moqa tuʼn qnimen, oʼkx te (Éxodo 20:5). Tuʼntzunju, mas in che ajbʼen nya ax tok okslabʼil (nimbʼil) tuʼn, tuʼn kykubʼ t-sbʼuʼn xjal. In jaw tzalaj wen qa in che kʼulin xjal kye kyxeʼchel, kye txkup, te tbʼinchbʼen Dios ex kye junjuntl tiʼchaq ex nya te Jehová. Aqeju in bʼant jlu kyuʼn, in kubʼ kyximen qa in tzalaj Dios kyiʼj, noqtzun tuʼnj, aju kyokslabʼil ex tkyaqilju in bʼant kyuʼn mintiʼx tajbʼen. Chʼixmi ax jlu bʼant kyuʼn aj Israel toj tqʼijlal Isaías. Xi tqanin Jehová jlu kye: «¿Tiquʼn noqx gan tuʼn tbʼaj kynajsaʼne kypwaqe qa mya wabʼj tuʼn tlaqʼet kyuʼne? ¿Tiquʼn tuʼn tbʼaj kynajsaʼne twi kykʼuʼje tiʼj ju mintiʼ in che noje tuʼn? Kyqʼontz kywiʼye tiʼj nyole ex che waʼle tbʼanil wabʼj ex che nikʼbʼele kyiʼj qe tiʼxti nim tkʼokʼjal» (Isaías 55:2).

16, 17. a) ¿Tiquʼn xi tqʼamaʼn Jesús jlu te Pedro: «Tela nwitze Satanás»? b) ¿Tiʼ in bʼant tuʼn Satanás tuʼn qkubʼ t-sbʼuʼn?

¹⁶ Ax ikx jaku che kubʼ t-sbʼuʼn Satanás tbʼanel  tmajen Dios. Jun techel, qo ximen tiʼjju ikʼ tej t-xi tqʼamaʼn Jesús kye t-xnaqʼtzbʼen qa chʼixtoq tkyim. Tuʼnju nimtoq kʼujlaʼn Jesús tuʼn Pedro, xi tqʼamaʼn te Jesús qa bʼaʼn tuʼn ttzaj qʼaqʼin tkʼuʼj tiʼjx ex tuʼn miʼn tikʼ nya bʼaʼn tiʼj. Atzunte Jesús xi tqʼamaʼn jlu te: «Tela nwitze Satanás» (Mateo 16:22, 23). ¿Tiquʼn xi tqʼamaʼn Jesús jlu te Pedro? Tuʼnju ojtzqiʼntoq tuʼn Jesús qa iltoq tiʼj tuʼn tkyim tuʼn kyklet xjal ex tuʼn tkubʼ tyekʼun qa nya ax tok aju in tqʼamaʼn Satanás. Nimtoq toklen ambʼil aju. Nya atoq ambʼil aju tuʼn ttzaj qʼaqʼin tkʼuʼj Jesús tiʼjx. Owtlo tzalaj Satanás noqwit mintiʼtl ok t-xqʼuqin tibʼ Jesús.

¹⁷ Ax ikx qe in qo anqʼin toj jun ambʼil nim toklen tuʼnju chʼixtl tkubʼ najsaʼn nya bʼaʼn twitz Txʼotxʼ. Noqtzun tuʼnj, tajbʼil Satanás tuʼn ttzaj qʼaqʼin qkʼuʼj qiʼjx ex tuʼn qtzalaj tiʼjju at twitz Txʼotxʼ. Tajbʼil tuʼn tkubʼ qximen qa atx nim ambʼil tuʼn tkubʼ najsaʼn nya bʼaʼn, moqa axpe ikx qa mlayx kubʼ najsaʼn. Noq jun sbʼubʼil jlu. Kukx qo xqʼuqin ex miʼn tzʼel naj tiʼj qkʼuʼj qa in qo anqʼin toj bʼajsbʼil tqʼijlalil (Mateo 24:42).

18, 19. a) ¿Tiʼ tajbʼil Satanás tuʼn tkubʼ qximen? b) ¿Alkye tten in qo tzaj tonin Jehová?

¹⁸ Ax ikx tajbʼil Satanás tuʼn tkubʼ qximen qa nya kʼujlaʼn qoʼ tuʼn Jehová ex qa mlayx kubʼ tnajsaʼn qil. Ax ikx jun sbʼubʼil jlu. In tzaj tqʼamaʼn Tyol Dios jlu: «Ate Dios tzʼaqlxix, mlay tzikʼ tnaʼl tuʼn aju kyaqʼunbʼene; xi kyyekʼune qa at kykʼujlalile tiʼj Dios» (Hebreos 6:10). Ik tzeʼn in nel qnikʼ tiʼj, nim toklen toj twitz Jehová tkyaqilju in bʼant quʼn tuʼn qajbʼen te (kjawil uʼjit 1 Corintios 15:58). Ate Satanás nya kʼujlaʼn tuʼn Jehová ex mlayx kubʼ najsaʼn til. Kyjuʼtzun, miʼn txi qqʼoʼn ambʼil tuʼn miʼn qkubʼ sbʼuʼn kyuʼn t-sbʼubʼil Tajaw il.

¹⁹ Ma tzʼel qnikʼ tiʼj toj xnaqʼtzbʼil lu qa at nim tipumal Satanás, qa puro nya bʼaʼn tmod ex qa tajbʼil tuʼn qkubʼ t-sbʼuʼn. Noqtzun tuʼnj, jaku kubʼ tiʼj Satanás quʼn tukʼe onbʼil in tzaj tqʼoʼn Jehová. In tzaj tqʼamaʼn qe toj Tuʼjil Tyol alkyeqe ttramp Satanás tuʼntzun tok qxqʼuqin qibʼ kyiʼj (2 Corintios 2:11). Noqtzun tuʼnj, nya oʼkx il tiʼj tuʼn tel qnikʼ tiʼj alkyeqe ttramp Satanás, ax ikx il tiʼj tuʼn kyel qikʼun. Tuʼntzunju, in tzaj tqʼamaʼn Tyol Dios jlu: «Che weʼxixe twitz tajaw il, ex kʼeleltzun oq kywitze» (Santiago 4:7). Toj juntl xnaqʼtzbʼil ok qo xnaqʼtzal tiʼj alkye tten jaku che el qikʼun ttramp Satanás.