1. ¿Tiquʼn in qo tzalaj tuʼnju jaku qo ximen kyiʼj qe tiʼchaq? (Qʼonka twitza tiʼj tnejel tilbʼilal.)

TUʼNJU xjal qoʼ, jaku kubʼ qximen junjun tiʼchaq naʼmxtoq tok qqʼoʼn qwitz tiʼj. Nimxix in qo tzalaj tuʼnju o tzaj tqʼoʼn Jehová aju oyaj lu qe. ¿Tiquʼn? Tuʼnju a jlu in nonin qʼij tuʼn qximen kyiʼj junjun tiʼchaq tbʼanil in qo yon tiʼj. Ax ikx, tuʼn jlu jaku kubʼ qximen tiʼ kbʼantel quʼn toj qanqʼibʼil. In tzaj ttziyen Jehová toj Tuʼjil Tyol qa qo tzalajel tiʼj nimku tiʼchaq toj ambʼil tzul. Ax tok, mintiʼ in nok qqʼoʼn qwitz tiʼj toj ambʼil jaʼlo. Noqtzun tuʼnj, jaku qo ximen kyiʼj ex jaku tzʼok qeʼxix qkʼuʼj qa ax tok che ul (2 Corintios 4:18).

2, 3. a) ¿Alqiʼj jaku tzʼajbʼen aju qximbʼetz? b) ¿Tiʼ kbʼel qxnaqʼtzaʼn toj xnaqʼtzbʼil lu?

² Ateʼ junjun xjal in najbʼen kyximbʼetz kyuʼn tuʼn kyximen tiʼj junjun tiʼchaq mlay che ikʼ. Jun techel, jakulo kubʼ t-ximen jun tal txin qa tjax tibʼaj jun tal pakal (puʼt) ex a jlu mlay bʼant. Noqtzun tuʼnj, ateʼ junjuntl xjal in najbʼen kyximbʼetz kyuʼn toj tumel, ik tzeʼn te Ana, aju tnan Samuel toj ambʼil ojtxe. Ximen Ana tiʼj ambʼil aj t-xi tiʼn tal tuʼn tonin kyiʼj pal toj ja xbʼalun. Nya noqx gan aju ximen tiʼj. Ximen tiʼjju kbʼanteltoq tuʼn. Ex tuʼnju ximen tiʼj qʼij aju, xi tqʼoʼn jlu tipumal tuʼn t-xi tiʼn tal ik tzeʼn otoq t-xi ttziyen te Jehová (1 Samuel 1:22). Ax ikx qe, jaku tzʼajbʼen qximbʼetz quʼn tuʼn qximen kyiʼj qe tiʼchaq o tzaj ttziyen Jehová qe, tuʼnju ax tok che japunel tuʼn (2 Pedro 1:19-21).

 ³ Nimku tmajen Dios toj ambʼil ojtxe e ximen tiʼj alkye tten che japunel aju otoq ttzaj ttziyen Dios. ¿Alkye tten onin jlu kyiʼj? ¿Ex alkye tten jaku tzʼonin qe qiʼj qa ma qo ximen tiʼjju o tzaj ttziyen Dios qe? Qo xnaqʼtzal tiʼj tojju xnaqʼtzbʼil lu.

4. ¿Tiʼ onin tiʼj Abel tuʼn tkubʼ t-ximen jun tbʼanel ambʼil tuʼn tul?

⁴ Aju tnejel xjal ok qeʼ tkʼuʼj tiʼjju tzaj ttziyen Dios a Abel. Ojtzqiʼn tuʼn qa tej otoqxi kubʼ tbʼinchaʼn Adán ex Eva il, xi tqʼamaʼn Jehová jlu te kan, moqa lobʼaj: «Kbʼel nqʼoʼne qʼoj kyxole tukʼil xuʼj, ex kyxol tiyjila tukʼil tiyjil xuʼj. Aju tiyjil xuʼj kbʼel paʼn twiʼya tuʼn, atzun teya kʼokel ttxʼaʼna t-xe tqan, chi Dios» (Génesis 3:14, 15). Mintiʼtoq ojtzqiʼn tuʼn Abel alkye tten kjapunel twiʼ aju yol lu. Noqtzun tuʼnj, kubʼlo ten ximel tiʼj jlu: «¿Alkyeju kʼokel tzoqpaj kan tiʼj ex kʼonil kyiʼj xjal tuʼn kyok juntl maj te tzʼaqli?». Ok qeʼ tkʼuʼj Abel qa kjapunel tuʼn Jehová alkyexku tyol. Tuʼntzunju, tej t-xi tqʼoʼn Abel jun oyaj, tzalaj Jehová tiʼj (kjawil uʼjit Génesis 4:3-5 ex Hebreos 11:4).

5. Ximen Enoc tiʼj aju ambʼil tuʼn tul, ¿alkye tten onin jlu tiʼj?

⁵ A Enoc juntl xjal ten qʼuqbʼil tkʼuʼj kyiʼj qe ttziybʼil Dios. Anqʼin tuj jun ambʼil jatumel at nim xjal nya bʼaʼn ex in kyqʼamaʼn nim tiʼchaq nya bʼaʼn tiʼj Jehová. Ximenlo Enoc tiʼj ambʼil jatumel oʼkx qe xjal che ajbʼelxix te Dios che tel (kjawil uʼjit Hebreos 11:5, 6). ¿Alkye tten onin jlu tiʼj? Tzaj tqʼoʼn jlu tipumal tuʼn t-xi tqʼamaʼn kye xjal qa che kbʼel tnajsaʼn Dios kykyaqil xjal nya bʼaʼn (Judas 14, 15).

6. Tej otoqxi tzikʼ Nim Jbʼal, ¿tiʼ oklo ten Noé ximel tiʼj?

⁶ Ax ikx Noé ten qʼuqbʼil tkʼuʼj kyiʼj qe ttziybʼil Dios. Tuʼntzunju, mintiʼ kyim tej ttzaj Nim Jbʼal (Hebreos 11:7). Tuʼnju at nimxix qʼuqbʼil tkʼuʼj tej otoqxi tzikʼ Nim Jbʼal, xi tqʼoʼn qe txkup te oyaj te Dios (Génesis 8:20). Noqtzun tuʼnj, e ok qe xjal juntl maj te nya bʼaʼn. Ok jun xjal aju Nemrod tbʼi te jun aj kawil ex ok tilel tuʼn, tuʼn miʼn txi kynimen xjal Jehová (Génesis 10:8-12). Atzunte Noé kukx chʼiy qʼuqbʼil tkʼuʼj. Ax ik tzeʼn te Abel, kubʼlo ten Noé ximel tiʼj aj tpon jun qʼij jatumel kʼelel tiʼn Dios aju il ex kamik. Axlo ikx kubʼlo ten ximel tiʼj aj tpon jun qʼij jatumel ya miʼn che tentl nya bʼaʼn aj kawil. Ax ik qe, jaku qo ximen tiʼj aj tpon jun qʼij ikju, aju nqayin taʼ jaʼlo (Romanos 6:23).

7. ¿Tiʼ jakutoq ximen Abrahán, Isaac ex Jacob tiʼj?

⁷ Jakutoq ximen Abrahán, Isaac ex Jacob tiʼj jun tbʼanel ambʼil tuʼn tul. Xi ttziyen Dios kye qa kykyaqil tnam che tzajel kʼiwlaʼn tuʼn kyyajil, moqa kyiyjil (Génesis 22:18; 26:4; 28:14). Ax ikx xi ttziyen Dios kye qa kchʼiyil kybʼaj qe toj kyja tzmaxi aj kyok te jun matij tnam ex qa che anqʼil toj jun tbʼanel tnam (Génesis 15:5-7). Qʼuqlitoq kykʼuʼj Abrahán, Isaac ex Jacob qa kjapunel tuʼn Jehová aju otoq tzaj ttziyen. Tuʼntzunju, jakutoq che ximen tiʼj ambʼil jatumel ateʼtl qe toj kyja toj tnam aju. Atxix tej tkubʼ tbʼinchaʼn Adán ex Eva il, o tzʼonin Jehová kyiʼj tbʼanel tmajen tuʼn tel kynikʼ tiʼj alkye tten che anqʼil juntl maj xjal toj tbʼanel.

8. ¿Tiʼ onin tiʼj Abrahán tuʼn tchʼiy qʼuqbʼil tkʼuʼj ex tuʼn tkubʼ tbʼinchaʼn aju tzaj qʼamaʼn te?

⁸ Tuʼnju nimtoq qʼuqbʼil tkʼuʼj Abrahán, xi tbʼiʼn tkyaqil tzaj tqʼamaʼn Jehová te maske kwest ela toj twitz. Mintiʼ japun twiʼ aju tzaj ttziyen Jehová toj tqʼijlal Abrahán ex qe txqantl tmajen Jehová, noqtzun tuʼnj, e ximenxix tiʼj ex ik ela te kye ik tzeʼn otoq japun twiʼ. In tzaj tqʼamaʼn Tyol Dios qa «xi kykeʼyin ik tzaʼn najchaq, xi kyokslaʼn ex e tzalaj tiʼj» (kjawil uʼjit Hebreos 11:8-13). Ojtzqiʼntoq tuʼn Abrahán qa otoqxi japun tuʼn Jehová aju junjun tiʼchaq otoq tzaj ttziyen, kyjuʼtzun qʼuqlitoq tkʼuʼj qa tkyaqilju xi ttziyen Jehová te, ok kjapunel twiʼ tuʼn.

9. ¿Alkye tten onin tiʼj Abrahán aju qʼuqbʼil tkʼuʼj tiʼjju tzaj ttziyen Jehová?

 ⁹ Tuʼnju qʼuqlitoq tkʼuʼj Abrahán tiʼjju otoq tzaj ttziyen Jehová te, toj tkyaqil ambʼil kubʼ tbʼinchaʼn aju xi tqʼamaʼn Jehová te. Jun techel, kyaj tqʼoʼn tja toj tnam Ur ex mintiʼtl kyaj ten anqʼil nim ambʼil toj jun tnam. Ojtzqiʼntoq tuʼn qa mintiʼx jun tnam jakutoq ten te jumajx tuʼnju aqeju aj kawil toj mintiʼ in che ajbʼen te Jehová (Josué 24:2). Nya oʼkxju, ax ikx tuʼn tkyaqil tanmi kubʼ tyoʼn ambʼil jatumel kkawil Jehová tibʼaj Txʼotxʼ te jumajx. In tzaj tqʼamaʼn Tyol Dios qa aju Tkawbʼil Dios lu atzun aju «at qe t-simyentil, ax Dios ximal tiʼj ex ax bʼinchalte» (Hebreos 11:10). Qʼuqlitoq tkʼuʼj Abrahán, Abel, Enoc, Noé ex qe txqantl tmajen Jehová qa che jawil anqʼin qe xjal juntl maj. Qa mastoq in che ximen tiʼj ambʼil aj kyten toj Tbʼanel Najbʼil, mas in chʼiytoq qʼuqbʼil kykʼuʼj tiʼj Jehová (kjawil uʼjit Hebreos 11:15, 16).

10. ¿Tiquʼn tbʼanel ela te Sara tuʼnju ximen tiʼj alkye tten kjapunel tuʼn Jehová aju tyol tzaj ttziyen?

¹⁰ Ax ikx te Sara, aju t-xuʼjil Abrahán, attoq nim qʼuqbʼil tkʼuʼj tiʼjju in tzaj ttziyen Jehová. Xi ttziyen Jehová jlu te tchmil: «Kbʼel nkyʼiwlaʼne Sara ex tzul itzʼj jun tkyʼajala tiʼj [...]. Ate xuʼj lu kʼokel te kytxuʼ nimku nasyon, ex kyiʼj tiyjil che elel jlet rey kyibʼaj tnam» (Génesis 17:16). Iqʼintoq 90 abʼqʼi tuʼn Sara toj ambʼil aju ex mintiʼtoq tal, noqtzun tuʼnj, ximen tiʼj ambʼil aj tul tal. Ex ximenlo tiʼj ambʼil jatumel kchʼiyil kybʼet qe toj tja tal ex tuʼn kyok te jun matij tnam (Hebreos 11:11, 12). Tuʼnju bʼant jlu tuʼn, chʼiy mastl qʼuqbʼil tkʼuʼj. Ex ik tzeʼn tzaj ttziyen Jehová, ul itzʼji jun tal ex ok tbʼi te Isaac. A jlu onin tiʼj Sara tuʼn tok qeʼ tkʼuʼj tiʼj qa che japunel tuʼn Jehová aqeju txqantl tyol tzaj ttziyen. Ax ikx qe kchʼiyil mastl qʼuqbʼil qkʼuʼj qa ma qo ximen tiʼjju o tzaj ttziyen Jehová.

11, 12. ¿Tiʼ onin tiʼj Moisés tuʼn tchʼiy tkʼujlabʼil tiʼj Jehová?

¹¹ Ax ikx te Moisés attoq nim qʼuqbʼil tkʼuʼj tiʼjju tzaj ttziyen Jehová. Jaw chʼiy ik tzeʼn jun tkʼwaʼl aj kawil toj tnam Egipto. Noqtzun tuʼnj, tuʼnju aj Israel qe ttat, xi kyqʼoʼn xnaqʼtzbʼil te tiʼj Jehová. Xi kyxnaqʼtzaʼn te qa otoq tzaj ttziyen Jehová tuʼn kyetz ttzaqpiʼn aj Israel ex tuʼn kyanqʼin toj jun tbʼanel najbʼil (Génesis 13:14, 15; Éxodo 2:5-10). Qa mastoq in ximen tiʼj jlu, mastoq in chʼiy tkʼujlabʼil tiʼj Jehová. Ex tuʼnju chʼiy tkʼujlabʼil tiʼj Jehová, mintiʼ ten tajbʼil tuʼn tten tpwaq ex toklen kyxol xjal.

¹² In tzaj tqʼamaʼn Tyol Dios qa tuʼnju attoq nim qʼuqbʼil tkʼuʼj, mintiʼ tajtl tuʼn tok te jun toj tja aj kawil te Egipto tej ttijen. «Mas o tajbʼexix Moisés tuʼn tyajlanjtz kyukʼil qe xjal etzan tuʼn Dios, ex mya tuʼn ttzalaj tiʼj ju achbʼil in tqʼoʼn il aju noq te kabʼ qʼij». Kubʼ t-ximan Moisés qa mas nim toklen aju tuʼn tjaw jyoʼn tuʼn Jehová «twitzju kyqʼinumabʼl aj Ejipt». ¿Tiquʼn? Tuʼnju ximen nim tiʼj oyaj otoq tzaj ttziyen Dios te (Hebreos 11:24-26).

13. ¿Alkye tten onin tiʼj Moisés tej kukx ximen tiʼjju otoq tzaj ttziyen Jehová?

¹³ Nimlo ximen Moisés tiʼjju tzaj ttziyen Jehová qa che elex ttzaqpiʼn qe aj Israel. Ik tzeʼn qe txqantl tmajen Dios, ax ikx ojtzqiʼntoq tuʼn Moisés qa in tzaj ttziyen Jehová tuʼn tel tiʼn kamik (Job 14:14, 15; Hebreos 11:17-19). Tuʼnju kukx ximen Moisés tiʼjju tzaj ttziyen Jehová, el tnikʼ qa nimxix kʼujlaʼn qe xjal tuʼn Jehová. A jlu onin tiʼj tuʼn tten mas tkʼujlabʼil ex qʼuqbʼil tkʼuʼj tiʼj Jehová. Ex onin tiʼj tuʼn kukx tajbʼen te Jehová toj tkyaqil tanqʼibʼil (Deuteronomio 6:4, 5). Tuʼnju ojtzqiʼntoq tuʼn qa tzul tqʼoʼn Dios oyaj te toj  ambʼil tzul, mintiʼ tzaj xobʼ tej xi tqʼamaʼn aj kawil te Egipto tuʼn tkubʼ bʼiyoʼn (Éxodo 10:28, 29).

14. ¿Tiʼ in kubʼ kyximen junjun xjal?

¹⁴ At nim xjal in che ximen tiʼjju mlayx tzikʼ toj ambʼil tzul. Ateʼ xjal aqeju mintiʼxix kypwaq, in che ximen tiʼj ambʼil aj kyok te qʼinin ex tuʼn miʼn ttzaj bʼajtl kykʼuʼj. Noqtzun tuʼnj, in tzaj tqʼamaʼn Tyol Dios qa tuʼnju in qo anqʼin jatumel ateʼ xjal tjaqʼ tipumal Satanás, kukx atoʼ toj «bʼis ex siktleʼn» (Salmo 90:10). At junjuntl in kubʼ kyximen qa aju kykawbʼil xjal tzul tiʼn tbʼanel kye txqantl. Atzunte Tyol Dios in tzaj tqʼamaʼn qa oʼkx Tkawbʼil Dios tzul tiʼn tbʼanel kye xjal (Daniel 2:44). Ex at nim xjal in kubʼ kyximen qa mlay tzul tiʼn Dios xitbʼil kyibʼaj xjal nya bʼaʼn. Atzunte Tyol Dios in tzaj tqʼamaʼn qa ok tzul tiʼn Dios xitbʼil (Sofonías 1:18; 1 Juan 2:15-17). Aqeju xjal at kyximbʼetz junxitl twitzju in tzaj tqʼamaʼn Tyol Dios, ok tzul nim kybʼis.

15. a) ¿Tiquʼn bʼaʼn tuʼn qkubʼ ten ximel tiʼjju in tzaj ttziyen Dios toj ambʼil tzul? b) ¿Alkye jun kʼiwlabʼil in yona tiʼj toj ambʼil tzul?

¹⁵ O tzaj ttziyen Jehová jun tbʼanel ambʼil qe. Qa ma qo ximen tiʼj ambʼil aju, mas qo tzalajel ex mas ktel qipumal tuʼn qajbʼen te Jehová. Noq jatumel in yon teya tuʼn ttena, qa toj kyaʼj moqa twitz Txʼotxʼ, ¿jaku ximen teya tiʼj ambʼil jatumel kbʼel tbʼinchaʼna junjun tiʼchaq in tzaj ttziyen Jehová? Qa in yon teya tuʼn tanqʼina twitz Txʼotxʼ, noqpe ximana tiʼj ambʼil jatumel in naqʼunan teya kyukʼe tamiwoya tuʼn tok Txʼotxʼ te jun tbʼanel najbʼil. Ok ktzalajel teya tiʼj taqʼuna tuʼnju aqeju che kbʼel nej toj aqʼuntl, ok che xqʼuqil tiʼja. Kykyaqil xjal kʼokel kykʼujlaʼn Jehová ik tzeʼn teya. Nya oʼkxju, ax ikx ya miʼn tzajtl tyabʼa, ya miʼn tzaj bʼajtl tkʼuʼja ex ktel tipumala. Ax ikx ok ktzalajela tuʼnju kʼajbʼel aju jaku tbʼant tuʼna tuʼn tonina kyiʼj xjal ex tuʼn tjaw nimset Jehová. Ex aj kyjaw anqʼin xjal, jakulo tzʼonina kyiʼj tuʼn tel kynikʼ tiʼj Jehová (Juan 17:3; Hechos 24:15). Aj qkubʼ ten ximel kyiʼj qe tiʼchaq lu, ojtzqiʼn quʼn qa in qoʼ ximen kyiʼj qe tiʼchaq che ul, tuʼnju in tzaj tqʼamaʼn Tyol Dios (Isaías 11:9; 25:8; 33:24; 35:5-7; 65:22).

16, 17. ¿Tiquʼn bʼaʼn tuʼn qyolin tiʼj ambʼil in tzaj ttziyen Jehová qe toj ambʼil tzul?

¹⁶ Qa ma qo yolin kyukʼil txqantl qerman tiʼjju qajbʼil tuʼn tbʼant quʼn toj Tbʼanil Najbʼil, ok kʼonil qiʼj tuʼn qximenxix tiʼjju kbʼajel toj ambʼil tzul. Ax tok, mintiʼ ojtzqiʼn quʼn tiʼxix kbʼel qbʼinchaʼn toj Tbʼanil Najbʼil. Noqtzun tuʼnj, qa ma qo yolin tiʼj, kʼonil qiʼj te kabʼe tten. Tnejel, kbʼel qyekʼun qʼuqbʼil qkʼuʼj tiʼjju in tzaj ttziyen Jehová. Ex tkabʼ, kʼokel qqʼuqbʼaʼn qkʼuʼj qxolx tuʼn kukx qajbʼen te Jehová maske in qo ok weʼ twitz nya bʼaʼn. Atzun bʼant tuʼn Pablo ex txqantl okslal toj tnam Roma (Romanos 1:11, 12).

¹⁷ Qa ma qo ximen tiʼjju in tzaj ttziyen Jehová qe toj ambʼil tzul, in nonin qiʼj tuʼn miʼn qximenxix tiʼj nya bʼaʼn in tzaj qiʼj. Jun maj, tzajxix tbʼis Pedro ex xi tqʼamaʼn jlu te Jesús: «Ma kyaj qqʼoʼne tkyaqilju at qeye ex ma qo ok lpeʼye tiʼja. ¿Alkyetzun ktzajel qʼoʼn qeye?». Tajbʼiltoq Jesús tuʼn t-ximen Pedro ex qe txqantl t-xnaqʼtzbʼen kyiʼj qe tiʼchaq tbʼanel kbʼel kybʼinchaʼn toj ambʼil tzul. Kyjuʼtzun, xi tqʼamaʼn jlu kye: «Tuj tqʼijlalil ok tok tkyaqil te akʼaj, chin bʼel qeʼye tuj nqʼuqbʼile in qoptzʼaj tuʼn nkawine, aqine skʼoʼmaj qine tuʼn Dios tuʼn ntene kyukʼil xjal; ax ikx kyeye che bʼel qeʼye tibʼaj kabʼlaj qʼuqbʼil tuʼn kykawine kyibʼaj kabʼlaj kʼloj tiyjil Israel, porque ma che ok lpeʼye wiʼje. Ex alkye jun ma kyaj tqʼoʼn tja, ex qa ttzik, ex qa titzʼin, ex qa tman, ex qa ttxuʼ, [...] ex qa tkʼwaʼl, ex qa ttxʼotxʼ, noq tuʼn nlaje, jun syent maj ok tkʼmaʼ t-xel, ex ok tkambʼaʼ tchwinqlal te jumajx» (Mateo 19:27-29). Jakutoq bʼant tuʼn t-ximen Pedro ex txqantl t-xnaqʼtzbʼen Jesús tiʼj ambʼil aj kykawin toj kyaʼj tukʼil Jesús ex aj kyonin kyiʼj qe tbʼanel xjal tuʼn kyok te tzʼaqli.

18. ¿Tiquʼn bʼaʼn tuʼn qximen tiʼj ambʼil aj tjapun twiʼ qe ttziybʼil Jehová?

¹⁸ Toj xnaqʼtzbʼil lu ma tzeʼl qnikʼ tiʼj alkye tten ajbʼen kyximbʼetz junjun tmajen Dios kyuʼn tuʼn tchʼiy qʼuqbʼil kykʼuʼj. Kubʼ tten Abel ximel tiʼjju ambʼil otoq txi ttziyen Dios te. Ex tuʼnju ok qeʼ tkʼuʼj tiʼj jlu, tzalaj Jehová tiʼj. Kubʼ ten Abrahán ximel tiʼj ambʼil aj tjapun aju ttziybʼil Jehová tiʼj «tiyjil xuʼj» (Génesis 3:15). Ex tuʼnju ximen tiʼj jlu, kukx nimen te Dios maske ok weʼ twitz nya bʼaʼn. Ximen Moisés tiʼj oyaj tzul tqʼoʼn Jehová te, ex onin jlu tiʼj tuʼn tchʼiy tkʼujlabʼil tiʼj Jehová ex tuʼn kukx tajbʼen te (Hebreos 11:26). Ax ikx qe qa kukx ma qo ximen tiʼjju ambʼil aj tjapun tuʼn Jehová tkyaqilju o tzaj ttziyen, ok kʼokel qkʼujlaʼnxix Jehová ex kchʼiyil mas qʼuqbʼil qkʼuʼj tiʼj. Toj juntl xnaqʼtzbʼil ok qo xnaqʼtzal tiʼj alkye juntl tten jaku tzʼajbʼen qximbʼetz quʼn.