1. ¿Alkye tten in najbʼen naʼj Dios tkuʼx toj Mateo 6:9-13 quʼn aj qpakbʼan?

AT NIM xjal ojtzqiʼn naʼj Dios kyuʼn aju tkuʼx toj Mateo 6:9-13. Aqoʼ testigos de Jehová, in che ajbʼen yol tiʼj naʼj Dios lu quʼn tuʼn t-xi qqʼamaʼn kye xjal qa aju Kawbʼil ax tok jun gobierno jlu o kubʼ tqʼoʼn Dios aju kʼokel Txʼotxʼ tuʼn te jun tbʼanel najbʼil. Ax ikx in che ajbʼen yol quʼn aju «noqit tzʼel kynikyʼxjal qa xjanxixjo tbʼiy» tuʼn t-xi qyekʼun qa at te Dios jun tbʼi ex qa il tiʼj tuʼn tok qqʼoʼn te xjan (Mateo 6:9, ATM).

2. ¿Alkye tten in nel qnikʼ tiʼj qa nya tajbʼil Jesús tuʼn t-xi qqʼamaʼn aʼyex yol tkyaqil maj toj qnaʼj Dios?

² At nim xjal ax qe yol tkuʼx toj Mateo 6:9-13 in najbʼen kyuʼn tkyaqil maj aj kynaʼn Dios. Noqtzun tuʼnj, ¿ape jlu tajbʼil Jesús? Nya. Tqʼama Jesús jlu: «Miʼn txi kymaʼne elaʼ maj axju yol» (Mateo 6:7). Toj juntl ambʼil, tej kyxi t-xnaqʼtzaʼn Jesús qeju t-xnaqʼtzbʼen tiʼj alkye tten tuʼn kynaʼn Dios, chʼixmi aʼyex yol e ajbʼen tuʼn, noqtzun tuʼnj, in chʼixpuj chʼin (Lucas 11:1-4, TNM). A jlu in tzaj tyekʼun qa kyaj t-xnaqʼtzaʼn Jesús naʼj Dios lu tuʼn tel qnikʼ tiʼ jaku txi qqanin toj qnaʼj Dios.

3. ¿Alkyeqe xjel bʼaʼn tuʼn qximen kyiʼj kyoj kabʼe xnaqʼtzbʼil lu?

 ³ Toj xnaqʼtzbʼil lu ex toj juntl, ok kʼelel qnikʼ tiʼj naʼj Dios kyaj t-xnaqʼtzaʼn Jesús. Ex bʼaʼn tuʼn qximen kyiʼj xjel lu: «¿Alkye tten jaku chin tzaj onine tuʼn naʼj Dios lu tuʼn tbʼant-xix nnaʼne Dios? ¿Ex in chin anqʼine ik tzeʼn in tqʼamaʼn naʼj Dios lu?».

4. a) ¿Tiʼ in tzaj tnaʼn qe aju txol yol aya «Qman»? b) ¿Tiquʼn jaku txi kyqʼamaʼn qeju che anqʼil twitz Txʼotxʼ qa a Jehová kytat?

⁴ Xi tzyet naʼj Dios tuʼn Jesús tukʼil yol aya «Qman». In tzaj tnaʼn jlu qe qa a Jehová tatbʼaj kyibʼaj kykyaqil qerman ateʼ twitz tkyaqil Txʼotxʼ (1 Pedro 2:17). O jaw tjyoʼn Jehová junjun okslal tuʼn kyanqʼin toj kyaʼj. O che ok tqʼoʼn Jehová te tkʼwaʼl. O tzʼok Jehová te kyman te jun tbʼanel tten (Romanos 8:15-17). ¿Yajtzun qeju in che ayon tuʼn kyanqʼin twitz Txʼotxʼ? ¿Tiquʼn jaku t-xi kyqʼamaʼn qa a Jehová kyman, moqa kytat? Tuʼnju a Jehová o tzaj qʼonte kychwinqlal ex tkyaqilju at tajbʼen kye. Ex toj ambʼil tzul, aj kyok te tzʼaqli ex otoqxi tzikʼ bʼajsbʼil malbʼil kyiʼj, ax ikx kye che okel te tkʼwaʼl Dios (Romanos 8:21; Apocalipsis 20:7, 8).

5, 6. a) ¿Alkye mas tbʼanel oyaj jaku txi kyqʼoʼn mambʼaj kye kykʼwaʼl? b) ¿Tiʼ il tiʼj tuʼn tbʼant tuʼn teyele junjun kʼwaʼlbʼaj tukʼil oyaj lu? (Qʼonka twitza tiʼj tnejel tilbʼilal.)

⁵ Aqeju mambʼaj okslal jaku txi kyqʼoʼn jun tbʼanel oyaj kye kykʼwaʼl. ¿Alkye oyaj? Aju tuʼn t-xi kyxnaqʼtzaʼn kye qa a Jehová kytat toj kyaʼj ex aju alkye tten tuʼn kynaʼn Dios. At jun ansyan in bʼet kyojele Ja te Chmabʼil te Sudáfrica tzaj tqʼamaʼn qa atxix tej kyul itzʼji tmeʼjel, moqa tmyal, in naʼn Dios kyukʼil tkyaqil qonikʼan, oʼkx mintiʼtoq in naʼn Dios kyukʼil tmeʼjel qa nya atz taʼ tja. In tzaj kyqʼamaʼn qe tmeʼl erman lu qa mintiʼ naʼn kyuʼn alkyexix qe yol in che ajbʼen tuʼn tatbʼaj aj tnaʼn Dios. Noqtzun tuʼnj, naʼnx kyuʼn qa aj tok ten kyman naʼl Dios, in kubʼtoq kynaʼn tzalajbʼil ex xqʼuqbʼil. Tej tbʼant kynaʼn txin Dios, xi tqʼamaʼn tatbʼaj kye tuʼn kynaʼn Dios tukʼil tqʼajqʼajel kywiʼ tuʼntzun tok tbʼiʼn tatbʼaj alkye tten in xi kyqʼamaʼn txin te Jehová aju in kubʼ kyximen ex aju in kubʼ kynaʼn. Ax ikx jun ambʼil jlu tuʼn tel tnikʼ tatbʼaj tiʼxix in kynaʼn tmeʼl. Iktzun tten jakutoq tzʼonin tatbʼaj tuʼn t-xi kyqanin txin junjun tiʼchaq tiʼj naʼj Dios kyaj t-xnaqʼtzaʼn Jesús ex tuʼn tbʼant-xix kynaʼn Dios.

⁶ Tej kychʼiy tmeʼjel erman lu, kukx ok tilil kyuʼn txin tuʼn tchʼiy kyamiwbʼil tukʼil Jehová. Toj ambʼil jaʼlo, o che kubʼ mojeʼ ex in che ajbʼen toj tkyaqil ambʼil te Dios tukʼil kychmil. Aju mas tbʼanel oyaj jaku txi kyqʼoʼn mambʼaj kye kykʼwaʼl aju tuʼn t-xi kyxnaqʼtzaʼn kye kykʼwaʼl qa ax tok at Jehová ex qa jaku che ok te tamiw. Noqtzun tuʼnj, teyele junjun kʼwaʼl il tiʼj tuʼn tok t-xqʼuqin tamiwbʼil tukʼil Jehová (Salmo 5:11, 12; 91:14).

7. a) ¿Alkye jun tbʼanel qoklen o tzaj qʼoʼn aqoʼ testigos de Jehová? b) ¿Alkye tten in kubʼ qyekʼun qa in qo tzalaj tiʼj qoklen lu?

⁷ O tzaj qʼoʼn jun tbʼanel qoklen aqoʼ testigos de Jehová tuʼnju ojtzqiʼn tbʼi Dios quʼn ex tok tbʼi qiʼj (Hechos 15:14, TNM; Isaías 43:10). In xi qqanin jlu te Jehová: «Noqit tzʼel kynikyʼxjal qa xjanxixjo tbʼiy». Tukʼe jlu in kubʼ qyekʼun qa qajbʼil tuʼn tok tbʼi Dios te saq. Ax ikx in xi qqanin onbʼil te Jehová tuʼn miʼn t-xi qqʼamaʼn  jun tiʼ ex tuʼn miʼn tkubʼ qbʼinchaʼn jun tiʼ aju jaku tzaj tiʼn nya bʼaʼn tiʼj tbʼi. Miʼn qo ok ik tzeʼn junjun okslal toj tnejel syent abʼqʼi aʼyeju mintiʼtoq in japun kyuʼn aju in xitoq kyxnaqʼtzaʼn. Tqʼama apóstol Pablo qa e ok ten xjal yolil nya bʼaʼn tiʼj tbʼi Dios tuʼn kypaj (Romanos 2:21-24).

8, 9. ¿Alkye tten onin Jehová tiʼj jun ermana aju in noktoq tilil tuʼn, tuʼn tjaw nimsaʼn tbʼi tuʼn?

⁸ In nok tilil quʼn tuʼn tjaw qnimsaʼn tbʼi Jehová. Jun techel, at jun ermana te tnam Noruega kyim tchmil ex kyaj ten tukʼil jun tal te kabʼe abʼqʼi. Tqʼama ermana: «Kwest el ambʼil lu toj nwitze. Tkyaqil ambʼil xi nqanine te Dios tuʼn ttzaj tqʼoʼn wipumale ex onbʼil weye tuʼn tten nximbʼetze toj tumel. Nyatoq wajbʼile tuʼn t-xmayin Satanás tiʼj Jehová tuʼnju junjun tiʼchaq in kubʼ nximane tuʼn tbʼant. Ax ikx nyatoq wajbʼile tuʼn tkubʼ nbʼinchaʼne jun il twitz. Aju wajbʼile aju tuʼn tjaw nnimsaʼne tbʼi Dios ex tuʼn tok tqʼoʼn twitz wale tiʼj ttat toj Tbʼanel Najbʼil» (Proverbios 27:11).

⁹ ¿Tzajpe ttzaqʼweʼn Jehová tnaʼj Dios ermana lu? Tzaj ttzaqʼweʼn. Tuʼnju kukxtoq at kyukʼil erman, xi qʼoʼn nim qʼuqbʼil tkʼuʼj. Tej tikʼ jweʼ abʼqʼi yajxitl, kubʼ mojeʼ tukʼil jun ansyan. Toj ambʼil jaʼlo, ma japun tal te 20 abʼqʼi ex o jaw aʼ twiʼ. Tqʼamatl ermana jlu: «Nimxix in chin tzalaje tuʼnju onin nchmile wiʼje tuʼn tchʼiyset wale».

10. ¿Alkye tten kʼokel tqʼoʼn Jehová tbʼi te xjan te jumajx?

¹⁰ Kʼokel tqʼoʼn Jehová tbʼi te xjan te jumajx aj kykubʼ tnajsaʼn kykyaqil qeju in nel kyikʼun tbʼi ex kykyaqil qeju nya kygan tuʼn tok te aj Kawil kyibʼaj (kjawil uʼjit Ezequiel 38:22, 23). Yajxitl, che okel xjal tuʼn te tzʼaqli. Ex kykyaqil qeju ateʼ toj kyaʼj ex twitz Txʼotxʼ, che ajbʼel te Jehová ex kjawil kynimsaʼn tbʼi aju xjan. Tojtzun ambʼil aju, ktel «toklen Dios tibʼaj tkyaqil» tuʼn tkawin kyibʼaj (1 Corintios 15:28).

11, 12. ¿Tiʼ bʼant tuʼn Jehová toj 1876?

¹¹ Tej naʼmxtoq tmeltzʼaj Jesús toj kyaʼj, xi kyqanin t-xnaqʼtzbʼen te qa chʼixtoq t-xi tzyet tuʼn tkawin Tkawbʼil Dios. Noqtzun tuʼnj, xi tqʼamaʼn Jesús kye qa naʼmxtoq tpon ambʼil tuʼn tel kynikʼ tiʼj ex qa atz tuʼn tok kyqʼoʼn kywiʼ tiʼj pakbʼabʼil (kjawil uʼjit Hechos 1:6-8). Ax ikx xi tyekʼun kye tuʼn t-xi kyqanin tuʼn ttzaj Tkawbʼil Dios ex tuʼn kyxqʼuqin tuʼn tel kynikʼ tiʼj jtoj tuʼn t-xi tzyet tuʼn tkawin kawbʼil lu. Kyjuʼtzun, kukx in xi qqanin te Jehová tuʼn ttzaj Tkawbʼil.

¹² Toj 1876 onin Jehová kyiʼj tmajen tuʼn tel kynikʼ tiʼj qa kxeltoq tzyet tuʼn tkawin Jesús toj kyaʼj toj 1914. ¿Alkye tten onin Jehová kyiʼj? Toj ambʼil aju, kubʼ ttzʼibʼen ermano Russell xnaqʼtzbʼil lu: «¿Cuándo terminan los tiempos de los gentiles?». Tqʼama qa aju «wuq abʼqʼi» kyaj tqʼamaʼn Daniel, axju yolin Jesús tiʼj tej tyolin tiʼj tuʼn tjapun «bʼaj tqʼijlalil tuʼn kykawin qe nasyon» (Daniel 4:16; Lucas 21:24). Ax ikx tqʼama qa aju «wuq abʼqʼi», moqa wuq ambʼil, oktoq kjapunel bʼaj toj 1914. * (Qʼonka twitza tiʼj tqanil t-xe t-xaq uʼj.)

13. a) ¿Tiʼ ikʼ toj 1914? b) ¿Tiʼ in tzaj tyekʼun tkyaqilju in nikʼ jaʼlo aju atxix tzaj tzyet tuʼn tikʼ toj abʼqʼi 1914?

¹³ Toj 1914 xi tzyet jun qʼoj toj Europa  aju kanin twitz tkyaqil Txʼotxʼ. Nim xjal e kyim tuʼn waʼyij. Ex toj 1918, mas nim xjal e kyim tuʼn gripe twitz tuʼn qʼoj. Tkyaqil jlu ok te jun techel, aju tqʼama Jesús (Mateo 24:3-8; Lucas 21:10, 11). Aju techel lu tzaj tyekʼun qa xi tzyet tuʼn tkawin Jesús toj 1914. Toj abʼqʼi lu, «in kubʼ tiʼj tkyaqil tuʼn, ex tuʼn tkubʼ tiʼj mastl tuʼn» (Apocalipsis 6:2). Etz t-xoʼn Jesús Satanás kyukʼix qe taqʼunal toj kyaʼj ex e kutz t-xoʼn twitz Txʼotxʼ. Tej tbʼaj jlu, tzaj tzyet tuʼn tjapun twiʼ yol lu: «Bʼekʼbʼil kywitze aqeye najl twitz txʼotxʼ ex tuj mar. Porque ma kuʼpun tajaw il kyxole tukʼil nim tqʼoj, porque bʼaʼn tuʼn mya nim qʼij tuʼn ttentl» (Apocalipsis 12:7-12).

14. a) ¿Tiquʼn kukx in xi qqanin tuʼn tul Tkawbʼil Dios? b) ¿Alkye aqʼuntl nimxix toklen kukx kbʼantel quʼn?

¹⁴ Aju kyaj qʼamaʼn toj Apocalipsis capítulo 12 in qo tzaj tonin tuʼn tel qnikʼ tiʼj tiquʼn tzaj nim nya bʼaʼn twitz Txʼotxʼ tej t-xi tzyet tuʼn tkawin Jesús. Ax tok in kawintl Jesús toj kyaʼj, noqtzun tuʼnj, a Satanás in kawin twitz Txʼotxʼ. Noq chʼintl ambʼil atx tuʼn tel tiʼn Jesús tkyaqil nya bʼaʼn, iktzun tten kbʼel tiʼj tkyaqil tuʼn. Akux in pon ambʼil lu, kukx kxel qqanin tuʼn tul Tkawbʼil Dios. Ax ikx, kukx kbʼel qbʼinchaʼn aju aqʼuntl nimxix toklen. Aju tuʼn qpakbʼan tiʼj Tkawbʼil Dios. Tuʼn pakbʼabʼil in japun twiʼ qe yol lu kyaj tqʼamaʼn Jesús: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14).

15, 16. ¿Tiquʼn nya oʼkx kxel qqanin tuʼn tbʼant tajbʼil Dios tzalu twitz Txʼotxʼ?

¹⁵ Malo tzikʼ 6,000 abʼqʼi jaʼlo in bʼanttoq tajbʼil Jehová twitz Txʼotxʼ. Tuʼntzunju tqʼama qa «tbʼanilxix tkyaqil» (Génesis 1:31). Noqtzun tuʼnj, el tpan tibʼ Satanás tiʼj Jehová ex atxix toj ambʼil aju, chʼixme kykyaqil xjal mintiʼ in kubʼ kybʼinchaʼn  tajbʼil Dios. Noqtzun tuʼnj, toj ambʼil jaʼlo, ateʼqe xjal in che ajbʼen te Jehová ex ma japun kyajlal te mas te 8 millón. Ojtzqiʼn kyuʼn qa nya oʼkx tuʼn t-xi kyqanin tuʼn tbʼant tajbʼil Dios twitz Txʼotxʼ. Kyjuʼtzun, in nok tilel kyuʼn tuʼn tkubʼ kybʼinchaʼn. In nok tilel kyuʼn tuʼn ttzalaj Dios kyiʼj ex tuʼn tkyaqil kykʼuʼj in che yolin kyukʼil xjal tiʼj Tkawbʼil Dios.

¹⁶ Qqʼonk qwiʼ tiʼjju in bʼant tuʼn jun ermana te 80 abʼqʼi aju xi samaʼn pakbʼal toj tnam África ex aju jaw aʼ twiʼ toj 1948. Tqʼama jlu: «Chʼixmi toj tkyaqil ambʼil in xi nqanine te Dios tuʼn tel kynikʼ xjal tiʼj, akux at ambʼil. Ex aj nyoline tukʼil jun xjal, in xi nqanine tuʼn ttzaj tqʼoʼn Jehová nnabʼile tuʼn tkuʼpin toj tanmi aju kxel nqʼamaʼne te. Ex aj kykanet xjal at jun tbʼanel kyanmi, in xi nqanine te Jehová tuʼn qtzaj tonin qkyaqilx tuʼn qxqʼuqin kyiʼj». O tzʼonin ermana lu kyiʼj nimku xjal tuʼn tok kyojtzqiʼn Jehová. ¿Ojtzqiʼn junjuntl erman ma che tijen tuʼna aʼyeju in bʼant tajbʼil Jehová kyuʼn tuʼn tkyaqil kykʼuʼj? (Kjawil uʼjit Filipenses 2:17.)

17. ¿Tiʼ t-ximbʼetza at tiʼjju kbʼantel tuʼn Jehová toj ambʼil tzul?

¹⁷ Aqoʼ tmajen Jehová kukx kxel qqanin tuʼn tbʼantju tajbʼil tzalu twitz Txʼotxʼ ajxi tkubʼ t-xiten qe aj qʼoj tiʼj. Maxitzun kʼokel Txʼotxʼ te Tbʼanel Najbʼil ex che jawil anqʼin nim millón xjal. Tqʼama Jesús jlu: «Kykyaqil xjal maquʼn tuj kamposant ok kybʼiʼ tqʼajqʼajel nwiʼye, ex che jawitz anqʼin tuj muqbʼil» (Juan 5:28, 29). Nimxix ok qo tzalajel aj kyjaw anqʼin qe toj qja o che kyim ex aj tel «t-suʼn Dios» taʼl qwitz (Apocalipsis 21:4). Chʼixme kykyaqil qeju che jawil anqʼin «mya tzʼaqlxix» qe. ¿Tiquʼn in nok qʼoʼn kybʼi ikju? Tuʼnju mintiʼ el kynikʼ tiʼj axix tok tiʼj Jehová ex tiʼj Jesús. Jun tbʼanel oklenj tzul qʼoʼn qe tuʼn t-xi qqʼoʼn xnaqʼtzbʼil kye tuʼntzun tkubʼ kybʼinchaʼn aju tajbʼil Dios ex tuʼn kyanqʼin te jumajx (Hechos 24:15; Juan 17:3).

18. ¿Alkye at mas tajbʼen kye xjal?

¹⁸ Chʼix tpon ambʼil tuʼn ttzaj ttzaqʼweʼn Jehová aju oxe tnejel tiʼchaq in xi qqanin toj naʼj Dios aju kyaj t-xnaqʼtzaʼn Jesús. Tzul Tkawbʼil Dios, kʼokel tbʼi Dios te xjan tuʼn ex toj ambʼil aju, kykyaqil qeju ateʼ toj kyaʼj ex twitz Txʼotxʼ che ajbʼel junx te Jehová. Iktzun tten tzul tqʼoʼn Jehová aju at mas tajbʼen kye xjal. Toj juntl xnaqʼtzbʼil, qo xnaqʼtzal tiʼj junjuntl tiʼchaq tuʼn t-xi qqanin toj naj Dios aju kyaj t-xnaqʼtzaʼn Jesús.