1-3. ¿Tiquʼn qʼuqlixix tkʼuʼj jun ermana qa tzaj ttzaqʼweʼn Jehová qe tnaʼj Dios?

AT JUN precursora Lana tbʼi aju mlayx tzikʼ tnaʼl tuʼn aju bʼaj tiʼj tej t-xiʼ visitaril atz Alemania toj 2012. In tzaj tqʼamaʼn Lana qa tzaj ttzaqʼweʼn Jehová kabʼe tnaʼj Dios. Aju tnejel, aju tej in bʼettoq toj tren tuʼn tpon atz jatumel in che ex qe avión. Xi tqanin te Jehová tuʼn tonin tiʼj tuʼn tkanet jun xjal tuʼn aju tajtoq tuʼn tok tbʼiʼn Tyol Dios. Tej tpon atz jatumel in che ex qe avión, tzaj qʼamaʼn te qa ok kʼelex toj avión toj juntl qʼij. Tojtzun ambʼil lu xi tqanin tkabʼ tnaʼj Dios. Xi tqanin onbʼil te Jehová tuʼnju chʼixtoq tkubʼ bʼaj tpwaq ex mintiʼ jatumel tuʼn tkyaj ten wtal te qonikʼan aju.

² Tej tbʼaj naʼn Lana Dios, pon jun xjal ex tzaj tqʼamaʼn jlu te: «¿Lana, tiʼ in bʼaj teya tzalu?». Ojtzqiʼntoq twitz Lana tuʼn xjal lu tuʼnju junx e ten toj tja xnaqʼtzbʼil. Otoq pon qʼa lu tukʼil tnan ex tukʼil tyaʼ tuʼnju chʼixtoq tex qʼa toj avión tuʼn tpon toj tnam Sudáfrica. Tej t-xi tqʼamaʼn Lana aju in nikʼtoq tiʼj, xi txkoʼn tuʼn tnan qʼa ex tuʼn tyaʼ tuʼn tkyaj ten kyja. Nya oʼkxju, ax ikx xi kyqanin  te Lana tzeʼn tokslabʼil ex tzeʼn aqʼuntl in bʼant tuʼn, tuʼn tpakbʼaʼn toj tkyaqil ambʼil.

³ Te juntl qiʼj, xi ttzaqʼweʼn Lana kyxjel at tiʼj Tyol Dios. Ex naʼmxtoq tmeltzʼaj Lana tja, kux ttzʼibʼin jatumel najleqeʼ tuʼntzun tpon junjuntl erman visitaril kye. Kukx in najbʼen Lana te precursora ex qʼuqli tkʼuʼj qa tzaj ttzaqʼweʼn Jehová tnaʼj Dios (Salmo 65:2).

4. ¿Tiʼ kbʼel qxnaqʼtzaʼn toj xnaqʼtzbʼil lu?

⁴ Qa in qo ok weʼ twitz nya bʼaʼn, jurat in qo ok ten naʼl Dios. In qo tzaj tbʼiʼn Jehová ex in qo tzaj tonin tuʼn tkyaqil tkʼuʼj (Salmo 34:15; Proverbios 15:8). Noqtzun tuʼnj, kyaj t-xnaqʼtzaʼn Jesús qa at junjun tiʼchaq mas nim toklen tuʼn kukx qnaʼn Dios tiʼj. Toj xnaqʼtzbʼil lu, kbʼel qxnaqʼtzaʼn junjuntl txol yol tqʼama Jesús tuʼn tkubʼ bʼaj naʼj Dios kyaj t-xnaqʼtzaʼn, ex kbʼel qxnaqʼtzaʼn tzeʼn jaku che onin txol yol lu qiʼj tuʼn qajbʼen te Dios tuʼn tkyaqil qkʼuʼj (kjawil uʼjit Mateo 6:11-13).

5, 6. ¿Tiquʼn kxel qqanin «qʼontza qwaye jaʼlo» maske at qwa?

⁵ Kyaj t-xnaqʼtzaʼn Jesús tuʼn t-xi qqanin jlu: «Qʼontza qwaye jaʼlo», ex nya tuʼn t-xi qqanin: «Qʼontza nwaye jaʼlo». At jun ansyan in bʼet kyojele Ja te Chmabʼil toj tnam África aju Victor tbʼi, tqʼama jlu: «In xi nqʼoʼne chjonte te Jehová tuʼnju mintiʼ in qo ximene tukʼil nxuʼjile tiʼj tiʼ kxel qwaʼne nix alkye tten kchjetel ja quʼne. Aʼye qerman in che onin tuʼn tten qe tiʼchaq lu qeʼye. Noqtzun tuʼnj, in xi nqanine te Dios tuʼn tonin kyiʼj erman aqeju mintiʼxix kypwaq».

⁶ Atlo qe qwa, noqtzun tuʼnj, at nim erman mintiʼ at kye ex in nikʼ junjuntl nya bʼaʼn toj  kyanqʼibʼil. Il tiʼj tuʼn qnaʼn Dios kyiʼj. Ax ikx jaku qo onin kyiʼj te junjuntl tumel. Jun techel, jaku txi qqʼoʼn chʼin kye tiʼjju at qe. Ax ikx jaku txi qqʼoʼn pwaq tuʼn qonin tiʼj aqʼuntl in bʼant twitz tkyaqil Txʼotxʼ. Ojtzqiʼn quʼn qa aju onbʼil in xi qqʼoʼn, in nonin kyiʼj erman kyajbʼil onbʼil (1 Juan 3:17).

7. ¿Alkye techel kubʼ tqʼoʼn Jesús tuʼn qtzaj t-xnaqʼtzaʼn tuʼn miʼn ttzaj bʼajxix qkʼuʼj tiʼjju at tajbʼen qe?

⁷ Tej otoqxi tzaj t-xnaqʼtzaʼn Jesús aju naʼj Dios, kubʼ tqʼoʼn jun tbʼanil techel tuʼn qtzaj t-xnaqʼtzaʼn tuʼn miʼn ttzajxix bʼaj qkʼuʼj kyiʼj qe tiʼchaq at tajbʼen qe tuʼn qanqʼin. Tqʼama qa mintiʼ in che ximen qe bʼech tiʼj tiʼ kʼajbʼel kye tuʼnju a Jehová xqʼuqil kye. Ax ikx qe, mintiʼ tuʼn qximen tiʼjju kʼajbʼel qe toj ambʼil tzul (Mateo 6:30-34). Bʼaʼn tuʼn qtzalaj tiʼjju at qe te jun qʼij. Jun techel, jaku txi qqanin jun qja te Jehová, jun qaqʼun tuʼn qwaʼn tuʼn ex tuʼn qtzaj tonin tuʼn tel qnikʼ tiʼ jaku bʼant quʼn qa ma tzaj qyabʼ. Noqtzun tuʼnj, at jun tiʼ aju mas nim toklen tuʼn t-xi qqanin toj qnaʼj Dios. ¿Alkye jlu?

8. ¿Tiʼ in tzaj tnaʼn txol yol qe aju «qʼontza qwaye jaʼlo»?

⁸ Aju txol yol «qʼontza qwaye jaʼlo», in tzaj tnaʼn qe qa il tiʼj tuʼn t-xi qqanin te Jehová tuʼn kukx qtzaj t-xnaqʼtzaʼn ex tuʼn kukx qtzaj tonin tuʼn qok te tamiw. ¿Tiquʼn? Tuʼnju ax ikx tqʼama Jesús jlu: «Mya noq oʼkx tuʼn wabʼj kʼanqʼil xjal, ax ikx jaku tzʼanqʼin xjal tuʼn tkyaqil yol in tmaʼn Dios» (Mateo 4:4).

9. ¿Tiquʼn in nok il ik tzeʼn kʼas?

⁹ Tqʼama Jesús jlu: «Najsama qkʼase» (Mateo 6:12, TNM). Ex toj juntl maj tqʼama jlu: «Najsankuya qile’» (Lucas 11:4, Xjan Tuʼjil). Tqʼama Jesús qe yol lu tuʼnju ik tten il ik tzeʼn kʼas. Aju uʼj Aju Xqʼuqil etz toj kastiy toj 1952, tzaj tchikʼbʼaʼn qa il tiʼj tuʼn tok qkʼujlaʼn Jehová ex tuʼn t-xi qbʼiʼn. Ex aj tkubʼ qbʼinchaʼn jun il, mintiʼ in xi qqʼoʼn te Jehová aju il tiʼj tuʼn t-xi qqʼoʼn te. In nok jlu ik tzeʼn jun kʼas. Noqwit tajbʼil Jehová, jaku tzʼel tpan tibʼ qiʼj tuʼn miʼn toktl te qamiw. Ex tqʼamatl uʼj Aju Xqʼuqil qa «aj tkubʼ qbʼinchaʼn il, mintiʼ in kubʼ qyekʼun qkʼujlabʼil tiʼj Dios» (1 Juan 5:3).

10. a) ¿Tiʼ in najbʼen tuʼn Jehová tuʼn tkubʼ tnajsaʼn qil? b) ¿Ex tiʼ in qnaʼn tuʼnju o bʼant tuʼn Jehová?

¹⁰ ¡Nimxix in xi qqʼoʼn chjonte te Jehová tuʼnju tzaj t-samaʼn Jesús tuʼn tchjet qil! Qajbʼil tuʼn tkubʼ tnajsaʼn Jehová qil tkyaqil qʼij. Ma tzikʼ junlo 2,000 abʼqʼi tkyimlen Jesús, noqtzun tuʼnj, kukx at tajbʼen chojbʼil bʼant tuʼn toj ambʼil jaʼlo. Il tiʼj tuʼn t-xi qqʼoʼn chjonte te Jehová tiʼjju oyaj lu aju nimxix toklen. Noqwit mintiʼ kyim Jesús, mlaywitlo bʼant tuʼn qtzaqpaj tiʼj il ex tiʼj kyimen (kjawil uʼjit Salmo 49:7-9 ex 1 Pedro 1:18, 19). Aju txol yol «najsankuya qileʼ», in tzaj tnaʼn qe qa ax ikx qe qerman at tajbʼen chojbʼil kye. A jlu in tzaj tyekʼun qa ax ikx tajbʼil Jehová tuʼn qximen kyiʼj qerman ex tiʼj kyamiwbʼil tukʼil. Jun tten tuʼn tbʼant jlu quʼn, aju qa ma kubʼ qnajsaʼn jun nya bʼaʼn sok kybʼinchaʼn qiʼj. Chʼixmi tkyaqil maj, nyaxix nim il in bʼant kyuʼn. Qa ma kubʼ qnajsaʼn kyil qerman, kbʼel qyekʼun qa kʼujlaʼn qe quʼn ex qa in xi qqʼoʼn chjonte tuʼnju in kubʼ tnajsaʼn Jehová qil (Colosenses 3:13, TNM).

11. ¿Tiquʼn il tiʼj tuʼn tkubʼ qnajsaʼn kyil txqantl?

¹¹ Tuʼnju aj il qoʼ, atlo maj kwest in nela toj qwitz tuʼn tkubʼ qnajsaʼn kyil erman (Levítico 19:18). Qa ma tzʼok tbʼinchaʼn jun erman nya bʼaʼn qiʼj, ex qa ma qo ok ten qʼamalte kye txqantl, oklo qo xel bʼiʼn ex jaku tzaj nya bʼaʼn kyxim txqantl tiʼj erman. A jlu, jaku tzaj tiʼn xitbʼil toj ttnam Jehová. Qa ma tzikʼ jlu ex qa mintiʼx jun tiʼ in bʼant quʼn tuʼn tkyaj nya bʼaʼn toj  ttxolil, in kubʼ qyekʼun qa mintiʼ in xi qqʼoʼn chjonte tiʼj chojbʼil (Mateo 18:35). Qa mintiʼ xkubʼ qnajsaʼn kyil txqantl, mlay kubʼ tnajsaʼn Jehová qil (kjawil uʼjit Mateo 6:14, 15). Ax ikx qa qajbʼil tuʼn tkubʼ tnajsaʼn Jehová qil, mintiʼtl tuʼn tkubʼ qbʼinchaʼn aju nya bʼaʼn in nela toj twitz (1 Juan 3:4, 6).

12, 13. a) ¿Tiʼ ikʼ tiʼj Jesús tej otoqxi jaw aʼ twiʼ? b) ¿Tiquʼn mlay bʼant tuʼn tok qqʼoʼn te kypaj txqantl qa ma qo kubʼ tzʼaq toj jun nya bʼaʼn? c) ¿Tiʼ kubʼ tyekʼun Jesús tej kukx xi tbʼiʼn aju tzaj tqʼamaʼn Dios?

¹² Tqʼama Jesús jlu toj naʼj Dios kyaj t-xnaqʼtzaʼn: «Miʼn taqʼa ambʼil tuʼn qoke tuj joybʼil». A jlu in tzaj tnaʼn qe aju ikʼ tiʼj Jesús tej otoqxi jaw aʼ twiʼ. Xi tqʼoʼn Jehová ambʼil «tuʼn tok tuj joybʼil tiʼj tuʼn tajaw il» (Mateo 4:1; 6:13). ¿Tiquʼn xi tqʼoʼn Jehová ambʼil tuʼn tikʼ jlu? Tuʼnju otoq tzʼel tikʼun Adán ex Eva aju toklen Dios tuʼn tkawin kyibʼaj, ex iltoq tiʼj tuʼn t-xi tzaqʼwet qe xjel lu: «¿Atpe jun tiʼ nya bʼaʼn bʼant tuʼn Jehová tej kykubʼ tbʼinchaʼn xjal? ¿Kukxpe jaku tzʼajbʼen jun xjal tzʼaqli te Dios qa ma kubʼ qʼoʼn jun nya bʼaʼn twitz? ¿Maspe bʼaʼn che tel xjal qa ma kubʼ kykawin kyibʼ kyxolx ik tzeʼn tqʼama Satanás?» (Génesis 3:4, 5). Tzaj t-samaʼn Jehová tkʼwaʼl, aju Jesús, tuʼn kyxi tzaqʼwet xjel lu. Noqtzun tuʼnj, kykyaqil qe xjel lu che tzajel tzaqʼweʼn toj ambʼil tzul. Tzmaxi toj ambʼil aju, kykyaqil qeju che anqʼil toj kyaʼj ex twitz Txʼotxʼ ok kʼelel kynikʼ qa a Jehová mas tbʼanel aj Kawil.

¹³ Mintiʼ in kubʼ tqʼoʼn Jehová jun nya bʼaʼn kywitz xjal tuʼnju xjan te. A Satanás in kubʼ qʼonte nya bʼaʼn kywitz xjal (Mateo 4:3). Noqtzun tuʼnj, aqoʼ qo bʼel ximente qa qo bʼel tzʼaq moqa mlay toj nya bʼaʼn (kjawil uʼjit Santiago 1:13-15). Tej tkubʼ tqʼoʼn Satanás nya bʼaʼn twitz Jesús, jun rat naj el tikʼun Jesús ex xi tqʼamaʼn aju in tzaj tqʼamaʼn Tyol Dios. Otoq bʼaj t-ximen Jesús tuʼn tajbʼen te Jehová tuʼn tkyaqil tkʼuʼj. Atzunte Satanás kukx jyon tiʼj juntl ambʼil tuʼn tkubʼ tbʼinchaʼn Jesús jun nya bʼaʼn (Lucas 4:13). Noqtzun tuʼnj, tiʼxku jakutoq bʼant tuʼn Satanás, kukx xi tbʼiʼn Jesús aju tzaj tqʼamaʼn Dios. Kubʼ tyekʼun qa jaku tzʼajbʼen jun xjal tzʼaqli te Jehová, axpe ikx qa kwest ma tzʼel toj twitz. Ax ikx  toj ambʼil jaʼlo, in kubʼ tqʼoʼn Satanás nya bʼaʼn qwitz tuʼn miʼn txi qbʼiʼn Jehová.

14. ¿Tiʼ il tiʼj tuʼn tbʼant quʼn qa nya qajbʼil tuʼn qkubʼ tzʼaq toj nya bʼaʼn?

¹⁴ Aju tqʼama Satanás kukx il tiʼj tuʼn t-xi tzaqʼwet. Tuʼntzunju, kukx in tzaj tqʼoʼn Jehová ambʼil te Satanás tuʼn tkubʼ tqʼoʼn nya bʼaʼn qwitz. Ex bʼaʼn tuʼn ttzaj qnaʼn qa nya a Jehová in kubʼ qʼonte nya bʼaʼn. Qʼuqli tkʼuʼj Jehová qiʼj ex in qo tzaj tonin. Noqtzun tuʼnj, mintiʼ in qo ok t-obligarin tuʼn qnimen te. In tzaj tqʼoʼn ambʼil qe tuʼn tbʼaj qximen qa kukx qo ajbʼel te moqa mlay. ¿Tiʼ il tiʼj tuʼn tbʼant quʼn qa nya qajbʼil tuʼn qkubʼ tzʼaq toj nya bʼaʼn? Il tiʼj tuʼn qok te tbʼanel tamiw Jehová ex tuʼn qnaʼn Dios tuʼn qtzaj tonin. ¿Alkye tten jaku qo tzaj ttzaqʼweʼn? Qo xnaqʼtzan tiʼj.

15, 16. a) ¿Alkye junjun nya bʼaʼn il tiʼj tuʼn kyel qikʼun? b) ¿Alkye at tpaj qa ma qo kubʼ tzʼaq toj jun nya bʼaʼn?

¹⁵ In najbʼen xewbʼaj xjan tuʼn Jehová tuʼn tonin qiʼj tuʼn miʼn qkubʼ tzʼaq toj nya bʼaʼn in kubʼ tqʼoʼn Satanás. Ax ikx in najbʼen Tuʼjil Tyol ex ttnam tuʼn, tuʼn ttzaj tqʼamaʼn qe alkye junjun nya bʼaʼn. Jun techel, in tzaj tqʼamaʼn qe tuʼn miʼn tok qqʼoʼn nimxix ambʼil, qipumal ex qpwaq tiʼj junjun tiʼchaq aju mintiʼ tajbʼen qe. At jun mejebʼleʼn toj jun tnam qʼinun te Europa aju Espen ex Janne kybʼi. Toj nimku abʼqʼi e ajbʼen te precursor atz jatumel nyaxix nim pakbʼal at. Tej tul itzʼj kykʼwaʼl, mintiʼtl bʼant tuʼn kyok te precursor. Noqtzun tuʼnj, in tzaj tqʼamaʼn ermano jlu: «Tuʼnju nya tkyaqil ambʼil in xi qqʼoʼne te qajbʼebʼile te Jehová toj ambʼil jaʼlo, in xi qqanine te Jehová tuʼn tonin qiʼje tuʼn miʼn qkubʼ tzʼaqe toj jun nya bʼaʼn. In xi qqanine te tuʼn tonin qiʼje tuʼn kukx tten jun tbʼanel qamiwbʼile tukʼil ex tuʼn kukx qpakbʼane tuʼn tkyaqil qkʼuʼje».

¹⁶ Aju juntl nya bʼaʼn il tiʼj tuʼn tel qikʼun aju nya bʼaʼn tilbʼilal. Qa in nok qqʼoʼn qwitz tiʼj kyilbʼilal xjal mintiʼ kyxbʼalun tok mlay bʼant tuʼn tok qqʼoʼn te tpaj Satanás nix te tpaj tkyaqilju tokx tjaqʼ tipumal. ¿Tiquʼn? Tuʼnju mlay bʼant tuʼn kyok ten obligaril qe tuʼn tkubʼ qbʼinchaʼn aju nya bʼaʼn. At junjun in nok kyqʼoʼn kywitz tiʼj nya bʼaʼn tilbʼilal tuʼnju mintiʼ in nel kyikʼun nya bʼaʼn ximbʼetz. Noqtzun tuʼnj, at nim ermano ex nim ermana o tzʼel kyikʼun jlu. Ax ikx qe jaku tzʼel qikʼun (1 Corintios 10:12, 13).

17. a) ¿Alkye tten in kubʼ qyekʼun qa qajbʼil tuʼn tkolin Jehová qiʼj twitz Satanás? b) ¿Tiʼ kbʼantel tuʼn Jehová toj chʼintl ambʼil?

¹⁷ Aj t-xi qqʼamaʼn te Jehová: «Qo tkloma teju mya bʼaʼn», in xi qqanin te tuʼn tkolin qiʼj twitz Satanás. ¿Alkye tten in kubʼ qyekʼun qa qajbʼil jlu? Qa mintiʼ xkubʼ qbʼinchaʼn aju «te twitz txʼotxʼ» ex qa mintiʼ sok qkʼujlaʼn «mya bʼaʼn at twitz txʼotxʼ» (Juan 15:19; 1 Juan 2:15-17). Chʼix tkux tjupuʼn Jehová Satanás ex chʼix tkubʼ t-xiten tkyaqil nya bʼaʼn at jaʼlo. Akux in pon ambʼil lu, bʼaʼn tuʼn ttzaj qnaʼn qa at nim tqʼoj Satanás tuʼnju ojtzqiʼn tuʼn qa nya nimtl ambʼil atx te. In jyon Satanás tiʼj alkyexku tumel tuʼn miʼn qajbʼentl te Jehová. Tuʼntzunju, kukx qqaninx te Jehová tuʼn miʼn qkubʼ tzʼaq tuʼn Satanás (Apocalipsis 12:12, 17).

18. ¿Tiʼ kbʼantel quʼn qa qajbʼil tuʼn qanqʼin jatumel miʼn tentl Satanás?

¹⁸ Qa qajbʼil tuʼn qanqʼin jatumel miʼn tentl Satanás, il tiʼj tuʼn qanqʼin ik tzeʼn naʼj Dios kyaj t-xnaqʼtzaʼn Jesús. ¿Alkye tten? Qa ma txi qqanin te Dios tuʼn tul Tkawbʼil, tuʼn tok tbʼi te xjan ex tuʼn tbʼant tajbʼil twitz Txʼotxʼ. Qeʼk qkʼuʼj tiʼj qa tkyaqil qʼij tzul tqʼoʼn Jehová aju at tajbʼen qe tuʼn qanqʼin ex tuʼn kukx qajbʼen te.