Qikʼumel aju il
«Kytxʼjom kyqʼabʼe; [...] kytxʼjome tuj kyanmiye.» (SANTIAGO 4:8)
1. ¿Tiʼ in kubʼ kyximen nim xjal?
IN QO anqʼin kyxol xjal jatumel chʼixmi kykyaqil in che yaẍin, moqa in che kyʼaʼjin. Jun techel, ateʼ nim xjal in kubʼ kyximen qa mintiʼ jun nya bʼaʼn in kubʼ kybʼinchaʼn qa ma che yaẍin ex naʼmxtoq kykubʼ mojeʼ, axpe ikx bʼaʼn in nela toj kywitz qa ma kubʼ ten jun xinaq tukʼil juntl xinaq moqa jun xuʼj tukʼix juntl xuʼj. In netz yekʼun jlu kyoj película, kyoj uʼj ex kyoj qe bʼitz (Salmo 12:8). Noqtzun tuʼnj, jaku qo tzaj tonin Jehová tuʼn qanqʼin ik tzeʼn te tajbʼil. Ma bʼaj kytzʼilsan kyibʼ xjal toj ambʼil jaʼlo tuʼn nim nya bʼaʼn, noqtzun tuʼnj, kukx jaku qo ten saq kyxol (kjawil uʼjit 1 Tesalonicenses 4:3-5).
2, 3. a) ¿Tiquʼn nim toklen tuʼn tel qikʼun qeju nya bʼaʼn ximbʼetz? b) ¿Tiʼ qo xnaqʼtzal tiʼj toj xnaqʼtzbʼil lu?
2 Qkyaqilx aj il qoʼ. Tuʼntzunju, atlo maj qgan junjun nya bʼaʼn, ik tzeʼn qe kyiẍ kygan aju in xi qʼoʼn kye tuʼn kytzyet. ¿Tiʼtzun kbʼantel quʼn qa ma che ul junjun nya bʼaʼn ximbʼetz toj qwiʼ? Il tiʼj tuʼn tetz qiʼn naj toj qwiʼ. Qatzun qa mintiʼ ma bʼant jlu quʼn, jaku chʼiy nya bʼaʼn ximbʼetz toj qanmi. Ex aj tpon ambʼil jatumel jaku bʼant il quʼn, kbʼel-lo qbʼinchaʼn (kjawil uʼjit Santiago 1:14, 15). Kyjuʼtzun, qa qajbʼil tuʼn kukx ttzalaj Jehová qukʼil, nimxix toklen tuʼn tel qikʼun qe nya bʼaʼn ximbʼetz.
3 Ik tzeʼn in qo xnaqʼtzaʼn tiʼj, il tiʼj tuʼn tok qxqʼuqin aju in kubʼ qximen. Qa ma tzʼel qikʼun qeju nya bʼaʼn achbʼil, mlay qo yaẍin ex mlay tzaj nya bʼaʼn qiʼj tuʼn (Gálatas 5:16). Toj xnaqʼtzbʼil lu, qo xnaqʼtzal tiʼj oxe tiʼ, aju qo tzajel tonin tuʼn miʼn qkubʼ tuʼn nya bʼaʼn achbʼil. Tnejel, aju qamiwbʼil tukʼil Jehová. Tkabʼ, aʼyeju tbʼanel nabʼil in tzaj tqʼoʼn Tyol Dios. Ex toxin, aju onbʼil in tzaj kyqʼoʼn erman at kynabʼil.
AJU QAMIWBʼIL TUKʼIL JEHOVÁ
4. ¿Tiquʼn nim toklen tuʼn qok te tamiw Dios?
4 In tzaj tqʼamaʼn Xjan Uʼj lu kye qeju kyajbʼil tuʼn kyok te tamiw Dios: «Kytxʼjom kyqʼabʼe» ex «kytxʼjome tuj kyanmiye» (Santiago 4:8). In yolin jlu tiʼj qa tamiw Dios qoʼ, in kubʼ qbʼinchaʼn aju bʼaʼn in nela toj twitz ex in qo ximen tiʼj. Ex tuʼnju tamiw Dios qoʼ, nya qajbʼil tuʼn tkubʼ qbʼinchaʼn jun tiʼ aju jaku tzaj tbʼis tuʼn. Tuʼntzunju, in nok tilel quʼn tuʼn qximen oʼkx tiʼjju bʼaʼn (Salmo 24:3, 4; 51:6; Filipenses 4:8). Ax tok, ojtzqiʼn tuʼn Jehová qa aj il qoʼ ex qa at maj in nul junjun nya bʼaʼn toj qwiʼ. Noqtzun tuʼnj, tuʼnju nya qajbʼil tuʼn ttzaj tbʼis Jehová, in nok tilel quʼn tuʼn kyel qikʼun qe jlu ex tuʼn tok qqʼoʼn qwiʼ oʼkx tiʼjju bʼaʼn (Génesis 6:5, 6).
5, 6. ¿Alkye tten in qo tzaj tonin naʼj Dios tuʼn tkubʼ kyiʼj qe nya bʼaʼn achbʼil quʼn?
5 Qa in qo naʼn Dios te Jehová tkyaqil maj, qo tzajel tonin tuʼn tkubʼ tiʼj nya bʼaʼn achbʼil quʼn. Tzul tqʼoʼn xewbʼaj xjan qe ex qipumal tuʼn kukx qten saq. Jaku txi qqʼamaʼn toj qnaʼj Dios qa oʼkx qajbʼil tuʼn qximen kyiʼj qe tiʼchaq aqeju bʼaʼn in che ela toj twitz (Salmo 19:14). Ax ikx, bʼaʼn tuʼn tkubʼ qin qibʼ ex qqaninx te tuʼn ttzaj tyekʼun alkye jun nya bʼaʼn tok qiʼj tuʼntzun miʼn tkubʼ qbʼinchaʼn il (Salmo 139:23, 24). Ax ikx bʼaʼn tuʼn t-xi qqanin te Jehová tuʼn qtzaj tonin tuʼn miʼn qyaẍin, mas toj ambʼil aj qok weʼ twitz il (Mateo 6:13).
6 Qganlo tuʼn qbʼinchaʼn junjun nya bʼaʼn tej naʼmxtoq qok te testigo de Jehová. Ex atlo maj kukx qajbʼil tuʼn kykubʼ qbʼinchaʼn. Noqtzun tuʼnj, jaku qo tzaj tonin Jehová tuʼn tchʼixpuj qximbʼetz. Ik bʼaj tiʼj aj kawil David. Kubʼ kuẍe tukʼil jun xuʼj aju nya t-xuʼjil. Noqtzun tuʼnj, ajtz tiʼj tanmi ex xi tqanin te Jehová tuʼn ttzaj tqʼoʼn jun tanmi aju «saqxix» ex tuʼn tonin tiʼj tuʼn tnimen te (Salmo 51:10, 12). Tuʼntzunju, qa in nok tilel tuʼna, tuʼn tkubʼ tiʼj jun nya bʼaʼn achbʼil, qaninxa onbʼil te Jehová. Ok tzul onina tuʼn, tuʼn ttenxix tajbʼila tuʼn tnimana te ex tuʼn tok t-xqʼuqina aju in kubʼ t-ximana ex aju in kubʼ tbʼinchaʼna (Salmo 119:133).
Qa at jun nya bʼaʼn in chʼiy toj qanmi, il tiʼj tuʼn tjatz qiʼn naj (Qʼonka twitza tiʼj taqikʼ 6)
AQEJU TBʼANEL NABʼIL IN TZAJ TQʼOʼN TYOL DIOS
7. ¿Alkye tten jaku qo tzaj tonin Tyol Dios tuʼn tel qikʼun qe nya bʼaʼn qajbʼil?
7 Jaku tzaj ttzaqʼweʼn Jehová qe qnaʼj Dios toj Tuʼjil Tyol. In kanet nabʼil «saq» quʼn toj Xjan Uʼj aju tzajni tukʼil Dios (Santiago 3:17). Qa ma qo uʼjin tiʼj Tyol Dios tkyaqil qʼij, ok ktel tbʼanel ximbʼetz toj qwiʼ (Salmo 19:7, 11; 119:9, 11). Ax ikx in che kanet nabʼil ex techel quʼn toj Tyol Dios aqeju in che onin qiʼj tuʼn tel qikʼun qeju nya bʼaʼn qajbʼil.
8, 9. a) Ik tzeʼn in tzaj tqʼamaʼn capítulo 7 te uʼj te Proverbios, ¿tiquʼn yaẍin jun kuʼxun tukʼil jun xuʼj in kubʼ ten kyukʼil nim xinaq? b) ¿Alkye junjun tiʼchaq jaku tzaj tiʼn nya bʼaʼn qiʼj?
8 In tzaj tqʼamaʼn Proverbios 5:8 qe tuʼn tel qpan qibʼ tiʼj il ik tzeʼn yaẍbʼil. Ex in yolin Proverbios capítulo 7 tiʼj jun kuʼxun aju etz bʼetil qonikʼan nqayin jatumel najli jun xuʼj aju in kubʼ ten kyukʼil nim xinaq, moqa ichan. Otoq bʼaj tbʼinchanxix tibʼ xuʼj tuj t-xbʼalun ex attoq toj bʼe. Tej tok tqʼoʼn twitz tiʼj kuʼxun, pon laqʼeʼ ttxlaj, el ttzʼubʼan twitz ex xi tqʼamaʼn junjun tbʼanel yol te tuʼntzun ttzaj mas tajbʼil kuʼxun tuʼn tkubʼ kuẍe tukʼil. Mintiʼtoq ximen tuʼn kuʼxun tuʼn tbʼinchante jun il tej tetz tja. Noqtzun tuʼnj, kubʼ tbʼinchaʼn il tuʼnju mintiʼ el tikʼun aju nya bʼaʼn achbʼil. Ex tzaj nya bʼaʼn tiʼj tuʼn jlu. Noqwit ximen tiʼjju nya bʼaʼn jakutoq tzaj tiʼj, mintiʼwtlo xi tjyoʼn tbʼe jatumel taʼtoq xuʼj (Proverbios 7:6-27).
9 Ax ikx qe, jaku kubʼ qbʼinchaʼn jun nya bʼaʼn qa mintiʼ ma qo ximen tiʼjju nya bʼaʼn jaku tzaj tiʼn junjun tiʼchaq. Jun techel, nya bʼaʼn tuʼn qok ten chʼixpul jun canal ex juntl canal te televisión te qonikʼan noq okx tuʼn tok qqʼoʼn qwitz tiʼjju in netz kyoj. ¿Tiquʼn? Tuʼnju jaku che kanet nya bʼaʼn kyilbʼilal xjal in che yaẍin quʼn kyoj. Qatzun in najbʼen Internet quʼn, nya bʼaʼn tuʼn qokx jatumel ateʼ kyilbʼilal xjal mintiʼ kyxbʼalun tok moqa atz jatumel mintiʼ ojtzqiʼn quʼn tiʼ at toj. Qa ma tzʼok qqʼoʼn qwitz kyiʼj jlu, jaku tzaj qajbʼil kyiʼj nya bʼaʼn achbʼil ex tuʼn jlu ya mlaytl qo nimen te Jehová.
10. ¿Tiquʼn nya bʼaʼn tuʼn tkubʼ qyekʼun qajbʼil tiʼjju nya qxuʼjil moqa tiʼjju nya qchmil ex moqa tiʼj jun xjal nya chʼix qkubʼ mojeʼ tukʼil? (Qʼonka twitza tiʼj tnejel tilbʼilal.)
10 Ax ikx in tzaj tqʼamaʼn Tyol Dios alkye tmod jun xinaq ktel tukʼil jun xuʼj ex alkye tmod jun xuʼj ktel tukʼil jun xinaq (kjawil uʼjit 1 Timoteo 5:2). Oʼkx kbʼel tyekʼun jun testigo de Jehová tajbʼil tiʼj t-xuʼjil moqa tiʼj tchmil. Ex qatzun chʼix tkubʼ mojeʼ jun qʼa moqa jun txin, oʼkx kbʼel tyekʼun tajbʼil tiʼjju kbʼel mojeʼ tukʼil. Ateʼ junjun in kubʼ kyximen qa mintiʼ jun nya bʼaʼn in bʼaj qa mintiʼ in nok kytzyuʼn kyibʼ kabʼe xjal, qa oʼkx in kubʼ kyyekʼun kyajbʼil tukʼil alkye tten in xi kykeʼyin toj kywitz, tukʼil alkye tten in che bʼet ex junjuntl tten. Noqtzun tuʼnj, qa at kabʼe xjal in kubʼ kyyekʼun kyajbʼil kyxolx, jaku tzaj nya bʼaʼn kyajbʼil tuʼn ex jaku kubʼ kybʼinchaʼn jun il tuʼn. O tzikʼ jlu kyiʼj junjuntl xjal, ax ikx qe jaku tzikʼ qiʼj. Tuʼntzunju, nya bʼaʼn tuʼn tbʼant tkyaqil jlu tuʼn jun tmajen Jehová.
11. ¿Alkye xnaqʼtzbʼil in tzaj tqʼoʼn qe aju bʼant tuʼn José?
11 Jaku tzʼel qiʼn nim xnaqʼtzbʼil tiʼj José. Tajbʼiltoq t-xuʼjil tpatrón tuʼn tyaẍin tukʼil. Atzunte José el tikʼun jlu, noqtzun tuʼnj, kukx ok tilil tuʼn xuʼj tuʼn tkubʼ koẍeʼ tukʼil. Tkyaqil qʼij xi tqʼamaʼn te José tuʼn kykyaj ten kyjunalx (Génesis 39:7, 8, 10). At jun xjal in xnaqʼtzan tiʼj jlu tqʼama qa aju xuʼj kubʼ t-ximan qa kbʼeltoq tzʼaq José qa ma che kyaj ten kyjunalx. Noqtzun tuʼnj, otoq bʼaj t-ximen José tuʼn miʼn ttzeʼn tukʼil ex tuʼn miʼn t-xi tqʼoʼn twiʼ tiʼjju tajbʼiltoq xuʼj. Iktzun tten mintiʼ xi tqʼoʼn ambʼil tuʼn tchʼiy nya bʼaʼn toj tanmi. Jun qʼij, tzyet José tukʼix t-xbʼalun tuʼn xuʼj ex ok ten obligaril te José tuʼn tkubʼ koẍeʼ tukʼil. «Atzunte José etz ojqelan, ex ax kyaj ten t-xbʼalun tuj tqʼabʼ xuʼj.» (Génesis 39:12.)
12. ¿Alkye tten in nel qnikʼ tiʼj qa jaku tzaj nya bʼaʼn qajbʼil tuʼnju in nok qqʼoʼn qwitz tiʼj?
12 Aju in nok qqʼoʼn qwitz tiʼj jaku tzaj nya bʼaʼn qajbʼil tuʼn. Tqʼama Jesús jlu: «Alkye jun ma txi keʼyinte jun xuʼj ex in pon tkʼuʼj tiʼj tuʼn tbʼinchante mya bʼaʼn tukʼil, ma tbʼincha aj pajil tuj tanmi» (Mateo 5:28). Atzun jlu ikʼ tiʼj aj kawil David. In tzaj tqʼamaʼn Tyol Dios jlu: «Tej in bʼet tikʼ twi tja tzaj tkeʼyin lu jun xuʼj tbʼanilxix keʼyin matoq in chin» (2 Samuel 11:2). At te xuʼj tchmil. Atzunte David mintiʼ el tiʼn witz tiʼj xuʼj ex kukx ximen tiʼj. Tuʼn jlu kubʼ koẍeʼ tukʼil xuʼj.
13. ¿Tiquʼn il tuʼn tkubʼ qqʼoʼn «jun ley tiʼj» qwitz, ex tzeʼn jaku bʼant jlu quʼn?
13 Qa qajbʼil tuʼn tel qikʼun nya bʼaʼn ximbʼetz, il tiʼj tuʼn tel qkanoʼn techel kyaj tqʼoʼn Job. Tqʼama jlu: «O kubʼ nqʼoʼne jun nleye ax wiʼje [moqa ‹jun ley tiʼj nwitze›, TNM]» (Job 31:1, 7, 9). Ik tzeʼn te Job, in bʼaj qximen tuʼn miʼn tok qqʼoʼn qwitz tiʼj jun xjal ex tuʼn tpon qkʼuʼj tuʼn qyaẍin tukʼil. Ex qa ma kubʼ ten jun tilbʼilal nya bʼaʼn toj computadora, twitz jun uʼj moqa jaxku tumel, jurat naj kʼelel qiʼn qwitz tiʼj.
14. ¿Tiʼ il tiʼj tuʼn tbʼant quʼn tuʼn kukx tuʼn qten saq?
14 Qa aj t-ximana tiʼjju ma qo xnaqʼtzan tiʼj in nel tnikʼa tiʼj qa at junjun chʼixpubʼil il tiʼj tuʼn tbʼant tuʼna, bʼinchanxa jurat. Qa ma txi qbʼiʼn aju in tzaj tqʼamaʼn Jehová, jaku tzʼel qikʼun il ik tzeʼn yaẍbʼil ex jaku qo ten saq (kjawil uʼjit Santiago 1:21-25).
AJU ONBʼIL IN TZAJ KYQʼOʼN ERMAN AT KYNABʼIL
15. ¿Tiquʼn nim toklen tuʼn t-xi tqanina onbʼil qa kwest tuʼn tkubʼ kyiʼj qe nya bʼaʼn ximbʼetz tuʼna?
15 Qa kwest tuʼn tkubʼ kyiʼj qe nya bʼaʼn ximbʼetz tuʼna, bʼaʼn tuʼn t-xi tqanina onbʼil kye qe erman ma bʼet ambʼil in che ajbʼen te Jehová ex jaku tzaj kyqʼoʼn onbʼil teya tukʼil Tyol Dios. Ax tok, kwest tuʼn qyolin tiʼj jlu tukʼil jun erman, noqtzun tuʼnj, nin toklen tuʼn tbʼant tuʼna (Proverbios 18:1; Hebreos 3:12, 13). ¿Tiquʼn? Tuʼnju aʼyeju erman at kynabʼil jaku tzʼajbʼen Tyol Dios kyuʼn tuʼn tel tnikʼa tiʼjju alkye tuʼn tbʼant tuʼna. Qa ma bʼant jlu tuʼna kukx jaku tzʼoka te tamiw Jehová.
16, 17. a) Qʼamantza jun techel tiʼj alkye tten in che onin ansyan kyiʼj qeju in nok tilil kyuʼn tuʼn tel kyikʼun nya bʼaʼn kyajbʼil. b) ¿Tiquʼn nim toklen tuʼn t-xi kyqanin naj onbʼil aqeju in nok kyqʼoʼn kywitz tiʼj nya bʼaʼn tilbʼilal?
16 Aqeju ansyan ateʼ jatumel in nok qchmon qibʼ, mas jaku che onin qiʼj (kjawil uʼjit Santiago 5:13-15). Ik tzeʼn ikʼ tiʼj jun kuʼxin te Brasil. Tqʼama kuʼxin qa nim abʼqʼi ok tilel tuʼn, tuʼn tkubʼ tiʼj nya bʼaʼn ximbʼetz tuʼn. Tqʼama jlu: «Ojtzqintoq wuʼne qa nya bʼaʼn in nel nximbʼetze toj twitz Jehová, noqtzun tuʼnj, in chin tzaj chʼixwitoqe tuʼn t-xi nqʼamaʼne te jun erman». Ok tqʼoʼn twitz jun ansyan tiʼj qa iltoq tiʼj tuʼn t-xi qʼet onbʼil te kuʼxin ex xi tqʼamaʼn te tuʼn tyolin kyukʼil ansyan. Tqʼamatl kuʼxin jlu: «Kubʼ kyyekʼin ansyan kykʼujlabʼil wiʼje ex el kynikʼ wiʼje. Etz nwitze tiʼjju bʼant kyuʼn wiʼje, tuʼnju otoq kubʼ nximane qa mintiʼ woklene tuʼn tkubʼ kyyekʼun kykʼujlabʼil wiʼje. Kubʼ kybʼiʼn qine, ajbʼen Tyol Dios kyuʼn tuʼn ttzaj kynaʼn weye qa kʼujlan qine tuʼn Jehová ex e naʼn Dios wukʼile. Tkyaqil jlu onin wiʼje tuʼn t-xi nbʼiʼne nabʼil tzaj kyqʼoʼn weye tukʼil Tyol Dios». Atzun jaʼlo ma tzikʼ nim abʼqʼi ex at jun tbʼanel tamiwbʼil tukʼil Jehová. Tqʼama jlu: «Ma tzeʼl nnikʼe tiʼj jaʼlo qa mas bʼaʼn tuʼn qqanin onbʼil twitzju tuʼn t-xi qiʼn iqtz qjunalx».
17 Qa ma naqʼeta tuʼn tok tqʼoʼn twitza kyiʼj tilbʼilal xjal mintiʼ kyxbʼalun tok, nim toklen tuʼn t-xi tqanin naja onbʼil. ¿Tiquʼn? Tuʼnju qa mas in xi tqʼoʼna ambʼil te, mas jurat jaku kubʼ tzʼaqa toj yaẍbʼil. Qa ma bʼaj jlu tiʼja, tzul tiʼna bʼis kyiʼj qe toj tjaya ex kyiʼj qe tamiwoya. Nya oʼkxju, ax ikx ok che yolil xjal nya bʼaʼn tiʼj Dios tuʼna. Ateʼ nim o txi kyqanin onbʼil kye ansyan ex o txi kykʼamoʼn nabʼil o tzaj qʼoʼn kye. A jlu o tzʼonin kyiʼj tuʼn kukx kyok te tamiw Jehová ex tuʼn miʼn kyetz lajoʼn toj ttnam Dios (Salmo 141:5; Hebreos 12:5, 6; Santiago 1:15).
QʼONKA TILIL TUʼN KUKX TTENA SAQ
18. ¿Tiʼ kukx kbʼantel quʼn?
18 Mas in bʼaj kytzʼilsan kyibʼ xjal ateʼkx tjaqʼ tipumal Satanás jaʼlo. Atzun qeju tmajen Jehová in nok tilil kyuʼn tuʼn tel kyikʼun nya bʼaʼn kyajbʼil ex tuʼn kukx kyten saq. Ex in tzalaj Jehová kyiʼj. Kyjuʼtzun, kukx tzʼajbʼenx qeju oxe onbʼil quʼn aʼyeju ma qo xnaqʼtzan kyiʼj: aju qamiwbʼil tukʼil Jehová, aqeju tbʼanel nabʼil in tzaj tqʼoʼn Tyol Dios ex aju onbʼil in tzaj kyqʼoʼn erman at kynabʼil. Qa ma che ajbʼen jlu quʼn. Qo tzalajel ex kbʼel qnaʼn bʼaʼn toj qanmi (Salmo 119:5, 6). Kbʼel naj Satanás toj ambʼil tzul, atzun qe qo anqʼil te jumajx toj jun tbʼanel najbʼil aju kʼokel te saq.
