In tzaj tqʼamaʼn jun pujbʼil yol qa aju yol nabʼil a t-xilen «jun chʼuq ojtzqibʼil kyiʼj qeju tiʼchaq in che ikʼ, a jlu in kanet tuʼn xnaqʼtzbʼil ex aj tok qʼet witzbʼaj tiʼj». Tuʼn tkanet ojtzqibʼil lu, in nokxix tilil kyuʼn xjal ex at maj mintiʼ in kanet aju in che jyon tiʼj. Aʼyeju aj nabʼil in nok kyqʼoʼn nim ambʼil tiʼjju kyaj tuʼn tel kynikʼ tiʼj. At junjun maj aju aqʼuntl in bʼant kyuʼn mintiʼ in nonin ex toj junjuntl maj in nonin kyiʼj kykyaqil xjal. Qo xnaqʼtzan kyiʼj junjun techel.

Jun kʼloj xjal toj Europa o kubʼ kybʼinchaʼn jun tbʼanel filtro te plástico aju in ten nim ambʼil ex in najbʼen tuʼn tok aʼ tuʼn te saq. Aʼyeju bʼinchbʼen ik tzeʼn jlu o che ajbʼen aj ttzaj junjun xitbʼil twitz Txʼotxʼ, ik tzeʼn kyaqnajnabʼ tzaj toj tnam Haití toj abʼqʼi 2010.

Toj ambʼil jaʼlo, at nimxix satélite ateʼkx twitz kyaʼj aʼyeju in che ajbʼen tuʼn jun kʼuxbʼil tuʼn ttzaj tyekʼun jatumel atoʼ twitz Txʼotxʼ (moqa aju in nok tbʼi te GPS). Tnejel kubʼ bʼinchaʼn tuʼn tajbʼen kyuʼn soldad toj qʼoj, noqtzun tuʼnj, aju onbʼil lu in nonin kyiʼj yukel kar, kyiʼj yukel bark, kyiʼj qeju in cheʼx toj juntl tnam ex kyiʼj qeju jyol txkup tuʼn tel kynikʼ jatumel ateʼ. Tuʼn jlu, nya kwest tuʼn qpon jaxku tumel qaj.

¿Ope tzʼajbʼenxi jun yolbʼil moqa jun computadora tuʼna? ¿At Internet tukʼila? ¿Ope tzʼonin jun qʼanbʼil tiʼja aju o bʼant kyuʼn aj qʼanel? ¿Ope t-xiʼya toj jun avión tuʼn tpona toj juntl tnam? Qa ikju, o tzʼajbʼen tuʼna aju junjun tbʼanel tiʼchaq kyxol qeju o che bʼant kyuʼn xjal at kyojtzqibʼil tuʼn tajbʼen kyuʼn xjal. Ikju, aju kyojtzqibʼil xjal lu o tzʼonin tuʼn tchʼixpet junjun tten qanqʼibʼil.

Toj ambʼil jaʼlo, aʼyeju aj nabʼil kukx in che jyon tqanil tiʼjju at twitz Txʼotxʼ ex twitz kyaʼj. Aqeju físicos nucleares in che xpichʼun tiʼj átomo tuʼn tel kynikʼ alkye tten in naqʼunan, ex qeju in che xnaqʼtzan kyiʼj qeju tiʼchaq ateʼ twitz kyaʼj (astrofísicos) in che xnaqʼtzan tiʼjju ma tzikʼ nim millón abʼqʼi tikʼlen tuʼn tel kynikʼ tiʼj alkye tten bʼant tkyaqil. At junjun in kubʼ kyximen qa tukʼeju nimxix xnaqʼtzbʼil kyiʼj qe tiʼchaq mlay che tzyet quʼn ex qeju mintiʼ qʼanchaʼl, owtlo tzʼel toj qʼanchaʼl qa at Dios aju in yolin Xjan Uʼj tiʼj.

Ex ateʼ txqantl aj nabʼil ojtzqiʼnxix kywitz in kyqʼamaʼn junjuntl kyyol mas nya bʼaʼn tiʼj jlu. Ik tzeʼn in tzaj tqʼamaʼn aj tzʼibʼil Amir Aczel, qa aʼyeju xjal lu in xi kyxnaqʼtzaʼn «kyximbʼetz qa mintiʼ jun Dios at». Jun techel, jun físico nim toklen twitz tkyaqil Txʼotxʼ tqʼama qa «tuʼnju mintiʼ qe yekʼbʼil tuʼn ttzaj kyyekʼun qa at jun Dios aju bʼinchal tkyaqil twitz Txʼotxʼ ex twitz kyaʼj, jun yekʼbʼil jlu tiʼj qa mintiʼ aju dios lu». At junjuntl in kyqʼamaʼn qa ma txi qnimen aju bʼant tuʼn Dios aju in yolin Xjan Uʼj tiʼj, a jlu ik tten ik tzeʼn in qo nimen tiʼj «kybʼinchbʼen chman» ex qa aju nabʼil il tiʼj tuʼn ttzaqpaj tiʼj alkyexku «xnaqʼtzbʼil mintiʼ in nel qnikʼ tiʼj». *

 Tuʼntzunju, bʼaʼn tuʼn qximen tiʼj xjel lu: ¿ope kanet nim tqanil kyuʼn aj nabʼil tuʼn tten aju kyximbʼetz ik tzeʼn jlu? Mintiʼ. Ax tok nim o kanet kyuʼn, noqtzun tuʼnj, nim aj nabʼil ma tzʼel kynikʼ qa ateʼ xjel naʼmx kytzaqʼwet ex mlayx che tzaqʼwet. Tzaj tqʼamaʼn Steven Weinberg aju xi tkʼamoʼn tbʼanel oyaj Nobel de Física qa «mlayx tzʼel qnikʼ kyiʼj qe tiʼchaq». Aju aj xnaqʼtzal Martin Rees, aju in xnaqʼtzan kyiʼj qe tiʼchaq ateʼ twitz kyaʼj te Gran Bretaña, tqʼama: «At junjun tiʼchaq aju mlayx tzʼel kynikʼ xjal tiʼj». Atx nim tuʼn tok qojtzqiʼn tiʼj tkyaqilju at, nya oʼkx tiʼj célula aju chʼinxix ax ikx tiʼj tkyaqilju at twitz Txʼotxʼ ex twitz kyaʼj, ik tzeʼn qe techel che ul qʼamaʼn:

• Aʼyeju in che xnaqʼtzan tiʼj qxmilal (biólogos), mintiʼ in nel kynikʼ tiʼ in bʼajxix kyoj qe célula: ik tzeʼn alkye tten in kyqʼoʼn ipumalj, alkye tten in kyqʼoʼn proteína ex alkye tten in nel kypan kyibʼ. Aʼyeju xjel lu naʼmx kytzaqʼwet-xix kyuʼn xjal at kynabʼil.

• Aju ipumalj in tqʼoʼn Txʼotxʼ (gravedad), tkyaqil qʼij in naqʼunan qiʼj, ax ikx mintiʼ o tzʼel nikʼbʼaj tiʼj alkye tten in naqʼunan. Mintiʼ in nelxix kynikʼ físico tiʼj alkye tten in qo kubʼ t-xoʼn twitz Txʼotxʼ aj qjaw tʼikpaj moqa alkye tten kukx in bʼet xjaw (qya) tiʼjele Txʼotxʼ tuʼn.

• Aʼyeju in che xnaqʼtzan tiʼjju at twitz kyaʼj in kyqʼamaʼn qa jun 95% tiʼj tkyaqilju at, nya qʼanchaʼl ex mlay bʼant tuʼn tkubʼ toj malbʼil kyuʼn qeju makbʼil in che ajbʼen kyuʼn xjal at kynabʼil. Aju mintiʼ in nel kynikʼ tiʼj in kubʼ te kabʼe kʼloj: aju materia oscura ex energía oscura. ¿Tiʼ kyxilen jlu? Mi jun ojtzqilte.

Ex at junjuntl tiʼchaq naʼmx tel kynikʼ xjal at kynabʼil tiʼj. Jun aj qʼanel aju in xnaqʼtzan tiʼj qwiʼ (neurólogo) tqʼama jlu: «Aju mintiʼ ojtzqiʼn quʼn mas nim twitzju ojtzqiʼn quʼn. In kubʼ nximane qa te jun aj nabʼil, mas nim toklen tuʼn tok tojtzqiʼn junjun tiʼ ex tuʼn tetz twitz tiʼj twitzju tuʼn tok qeʼxix tkʼuʼj oʼkx tiʼj jun xnaqʼtzbʼil». Tuʼntzunju, tuʼnju mintiʼ ojtzqiʼn nim tqanil quʼn, mlay bʼant tuʼn t-xi qqʼamaʼn qa ikxix tten jun xnaqʼtzbʼil moqa nya ik ttenju.

Qa ax ikx teya in kubʼ t-ximan qa tuʼnju ma kanet tkyaqil tzaqʼwebʼil kyuʼn xjal at kynabʼil, mlaylo tzʼok qeʼ tkʼuʼja tiʼj Dios ex tiʼj Xjan Uʼj, bʼaʼn tuʼn ttzaj tnaʼna qa aʼyeju at kynabʼil kyukʼe qeju tbʼanel makbʼil in che ajbʼen kyuʼn tuʼn kyxnaqʼtzan, noq chʼin kyojtzqibʼil o kanet tiʼj tkyaqilju at. Juntl techel tiʼj jlu aju tqʼama uʼj Encyclopedia Britannica tej chʼixtoq tkubʼaj xnaqʼtzbʼil tiʼj txʼolbʼabʼil ex tiʼj alkye tten o chʼiy aju ojtzqibʼil tiʼj astronomía, tqʼama jlu: «Ma tzikʼ chʼixme kyaje mil abʼqʼi kyoklen ten xjal xnaqʼtzal tiʼj tkyaqilju at twitz kyaʼj, noqtzun tuʼnj, kukx mintiʼ in nel qnikʼ tiʼj ik tzeʼn qe xjal te Babilonia ojtxe». Tuʼntzunju, ¿tiʼ kbʼantel quʼn kyukʼeju tiʼchaq mintiʼ o tzʼel kynikʼ aj nabʼil tiʼj? ¿Kukxpe qo xnaqʼtzal kyiʼj moqa miʼn?

Aqoʼye testigos de Jehová mintiʼ in nel qiʼne ambʼil kye xjal tuʼn tkubʼ kyximen aju kye kyajbʼil tuʼn tkubʼ kyximen kyiʼj xnaqʼtzbʼil lu, tuʼnju in nok tilil quʼne tuʼn t-xi qbʼiʼne jlu: «Tzʼelxwit nikʼbʼaj kyiʼje kyuʼn kykyaqil xjal qa mejor kymodiye» (Filipenses 4:5). Noqtzun tuʼnj, ax ikx in qo txokine tiʼja tuʼn tten jun tbʼanel t-ximbʼetza kyiʼj qe xnaqʼtzbʼil lu ex tuʼn tel tnikʼa kyiʼj junjun tiʼchaq aju junx xnaqʼtzbʼil in tzaj tqʼoʼn Tyol Dios ex qe xjal at kynabʼil kyiʼj.