«Aj t-xi nbʼiʼne alarma, nimxix in chin tzaj xobʼe ex in chinx ojqeline toj jun ewbʼil kyiʼj avión —chi Alona—. Axpe ikx toj jlu, kukx in chin xobʼe. Ex mas in chin tzaj xobʼe qa nya atz atine toj njaye tuʼnju mintiʼ jatumel tuʼn nxiʼye klol wibʼe. Jun maj, tej in chin bʼettoqe toj bʼe, in nok tene oqʼel ex kwesttoq tuʼn tjatz nxewe. Ikʼ nim ambʼil tzmaxi tej tel nxobʼile. Ex jawtzun qʼajt juntl maj alarma.»

Nya oʼkx in che tzaj xobʼ qeju in che anqʼin kyoj tembʼil jatumel at qʼoj. Jun techel, qa ma tzʼok qbʼiʼn qa yabʼxix taʼ jun toj qja moqa jun qamiw, ax ikx jun bomba jaku tzʼela jlu toj qwitz. At txqantl xjal in tzaj bʼajxix kykʼuʼj tiʼj ambʼil tzul; in kubʼlo kyximin jlu: «¿Tzeʼntzulo che anqʼil qe qkʼwaʼl ex qe tal qchman? ¿Okpe che anqʼil toj jun tembʼil jatumel ktel qʼoj, txʼuʼj yabʼil ex junjuntl nya bʼaʼn?». ¿Tiʼ jaku bʼant quʼn tuʼn miʼn ttzaj bʼajxix qkʼuʼj kyiʼj nya bʼaʼn lu?

In tzaj tqʼamaʼn Tyol Dios jlu: «Aju xjal at tnabʼl, ok ttil kyjaʼ ttzaj mya bʼaʼn, nneʼl oq tiʼj» (Proverbios 27:12). ¿Nyape jun tbʼanel nabʼil jlu tuʼnju in qo anqʼin atz jatumel at nim bʼiybʼel? Ik tzeʼn in nok tilil quʼn tuʼn tok qxqʼuqin qxmilal, ax ikx bʼaʼn tuʼn tok qxqʼuqin qnabʼil ex aju in qnaʼn. Jaku tzaj bʼajxix qkʼuʼj ex jaku tzaj bʼajxix kykʼuʼj qkʼwaʼl kyuʼn película ex kyuʼn bʼiybʼel in che etz yekʼun toj televisión, axpe ikx qe tqanil jatumel in che etz yekʼun qe tilbʼilal aju jaku tzaj salin qiʼj tuʼn. Qa miʼn  sok qqʼoʼn qwitz kyiʼj tilbʼilal lu nya a t-xilen qa mintiʼ in nel qnikʼ tiʼjju in bʼaj, sino in nok qxqʼuqin qibʼ. Mintiʼ kubʼ tbʼinchaʼn Qman Dios qnabʼil tuʼn tokx qnojsaʼn kyuʼn tiʼchaq nya bʼaʼn, sino tuʼn tokx qnojsaʼn kyuʼn tiʼchaq axix tok qe, tzʼaqli ex tbʼanel. Qa ma bʼant quʼn ikju, aju Dios qʼuqbʼal qkʼuʼj ok tzul tqʼoʼn tzalajbʼil toj qanmi (Filipenses 4:8, 9).

Ma qo xnaqʼtzan tiʼj qa aju axix tok qʼuqbʼil qkʼuʼj in qo tzaj tonin tuʼn miʼn ttzaj bʼajxix qkʼuʼj. In tzaj tqʼamaʼn Tyol Dios qa aj ttzaj nya bʼaʼn qiʼj, mintiʼ tuʼn tkyaj qtzaqpiʼn tuʼn qnaʼn Dios (1 Pedro 4:7). Jaku qo kubʼsan twitz tuʼn qtzaj tonin ex tuʼn ttzaj tqʼoʼn qnabʼil ex qipumal tuʼn tbʼant junjun tiʼchaq quʼn toj tbʼanel, ex qeʼk qkʼuʼj tiʼj qa «in tzaj tbʼiʼn Dios alkyeju ma txi qqanin te» (1 Juan 5:15).

In tzaj tqʼamaʼn Tyol Dios qa aju «nkawin twitzju’ tx’otx’», a Satanás, nya a Qman Dios (Juan 12:31, Xjan Tuʼjil [XT]; 1 Juan 5:19). Tej tyolin Jesús tiʼj Tajaw il, axix tok tuʼn ex tzaj t-xnaqʼtzaʼn qe tuʼn t-xi qqanin jlu: «Qo tkloma teju mya bʼaʼn» (Mateo 6:13). Jaku qo tzaj tonin naʼj Dios tuʼn miʼn ttzaj bʼajxix qkʼuʼj maske in qo anqʼin twitz jun txʼotxʼ jatumel a Satanás in kawin. «Aj kytzaj qʼajt qe alarma, in xi nqanine te Dios tuʼn ntzaj tonine tuʼn miʼn ntzaj xobʼe —chi Alona—. Ax ikx, in tzaj yolin nchmile weye toj yolbʼil ex in qo naʼne Dios junx. A jlu in nonin wiʼje tuʼn miʼn ttzaj bʼajxix nkʼuʼje.» Axtok aju in tzaj tqʼamaʼn Tyol Dios: «Niqayin taʼ Qman kyiʼj qeju in che kubʼsan twitz», ikju, kyiʼj qeju axix tok in xi kyqanin onbʼil te (Salmo 145:18).

Toj tchikʼbʼabʼil Jesús twi witz, xi t-xnaqʼtzaʼn kye t-xnaqʼtzbʼen tuʼn t-xi kyqanin toj naʼj Dios: «E ttzaj ju tkawbʼila» (Mateo 6:10). Te jumajx kbʼel tnajsaʼn Tkawbʼil Dios tkyaqilju in tzaj bʼaj qkʼuʼj tuʼn. A Jesucristo o jaw t-skʼoʼn Dios tuʼn tok te «Nejenel tuʼn kyten xjal tuj txubʼtxaj», aju kwebʼil «tkyaqil qʼoj tuʼn tuj tkyaqil twitz txʼotxʼ» (Isaías 9:6; Salmo 46:9). «Che okel qe nasyon tuj xjel tuʼn Qman [...]. Mi jun tnam tuʼn ttzaj tiʼn juntl maj qe t-spad tuʼn tqʼojin tiʼj juntl, ex mlay kykʼam mastl xnaqʼtzbʼil tuʼn kyqʼojin». Ax ikx «kykyaqil xjal che anqʼil mintiʼtl kyxobʼil» (Miqueas 4:3, 4). Aʼyeju ja xjal «kjawil kybʼinchaʼn [...] kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz» (Isaías 65:21). Nya oʼkxju, ax ikx «mi jun xjal najl tuj tnam ok tmaʼ kyjaʼ: Yabʼ qine, chiwt» (Isaías 33:24).

Ax tok, at maj in nok tilil quʼn tuʼn miʼn ttzaj nya bʼaʼn qiʼj, noqtzun tuʼnj, at maj noq minabʼen in tzaj mya bʼaʼn (Santiago 4:13, 14). Atlo maj tuʼnju atoʼ toj jun nya bʼaʼn tembʼil ex toj jun nya bʼaʼn ambʼil. Ax ikx, ik tzeʼn kukx o bʼaj, in che kyim xjal mintiʼ kyil toj qʼoj, tuʼn bʼiybʼel ex tuʼn yabʼil. Noqtzun tuʼnj, ¿bʼaʼnpe jlu?

Toj ambʼil tzul, nimxix millón xjal che jawil anqʼin, aqeju oʼkx Dios ojtzqilte jteʼxix kyajlal. Toj ambʼil jaʼlo, in che ajlan toj tzʼaqlixix tnabʼil Jehová tzmaxi aj tpon qʼij atz jatumel «kykyaqil xjal maquʼn tuj kamposant [...] che jawitz anqʼin tuj muqbʼil» (Juan 5:28, 29). Tiʼj qʼuqbʼil qkʼuʼj lu, in tzaj tqʼamaʼn Tyol Dios qa «ik tten ik tzaʼn taqʼal bark, in ajbʼen te tzuybʼil te qanmi tuʼn tten qanmi segurxix ex tuʼn miʼn qyukch» (Hebreos 6:19). Ex o «tzaj tyekʼun» Dios «kye kykyaqil xjal qa ax tok» jlu, tuʼnju o jaw anqʼin Jesús (Hechos 17:31).

Toj ambʼil jaʼlo, axpe ikx qeju in nok tilil kyuʼn tuʼn kyajbʼen te Jehová in tzaj bʼaj kykʼuʼj. Aju ma tzʼonin kyiʼj Paul, Janet ex Alona tuʼn miʼn ttzaj bʼajxix kykʼuʼj aju in bʼant junjun tiʼ kyuʼn, aju in xi kyqanin onbʼil te Dios toj naʼj Dios ex aju in nok qeʼ kykʼuʼj tukʼe tzalajbʼil tiʼjju o tzaj ttziyen Dios toj ambʼil tzul. Ax ikx qe jaku bʼant quʼn, tuʼnju in tzaj tqʼamaʼn Tyol Dios: «Ate Dios in tzaj qʼuqbʼante qkʼuʼj, awt nojsante kyanmiye tuʼn tkyaqil tzalajbʼil» (Romanos 15:13).