«Tej tjax twiʼ tkyaqil tiʼchaq toj tnam jatumel najli qoʼye, mintiʼxix kanet wabʼj ex jax nimxix twiʼ», chi Paul, aju jun chmilbʼaj ex jun tatbʼaj kye kabʼe kʼwaʼl. «Toj nim maj, ikʼ nim ambʼil waʼl qoʼye toj jun fila tuʼn tetz qlaqʼoʼne wabʼj, ex aj qpone toj kʼaybʼil, ya otoq tzʼex bʼaj wabʼj. Attoq nim waʼyij kyiʼj xjal, at junjun e kubʼ tzʼaq toj bʼe tuʼn weʼyaj ex ok kyiʼj tuʼnju mintiʼ in che waʼn. Jax nimxix kywiʼ tiʼchaq mas nim toklen, japun kywiʼ te millón toj qeye qpwaq ex, yajxitl, te miles te millón. Aju pwaq in najbʼentoq quʼne, naj tbalor. Xi naj tkyaqil npwaqe toj bank, xi naj nseguroye ex aju onbʼil in tzaj qʼoʼntoq weye».

El tnikʼ Paul tiʼj qa tuʼn kykyaj anqʼin qe toj tja, iltoq tiʼj tuʼn tten tnabʼil (Proverbios 3:21). «Xnaqʼtzaʼn maj qiʼne te electricista, noqtzun tuʼnj, wajtoqe tuʼn waqʼunane tiʼj alkyexku aqʼuntl jaku kanet, ex maske nya nimtoq twiʼ nkʼuʼje tuʼn ttzaj chjoʼn», chi Paul. «Wabʼj twiʼ nkʼuʼje in tzaj qʼoʼntoq ex junjuntl tiʼchaq in najbʼen toj ja. Jun techel, qa ma chin tzaj chjoʼne tukʼe kyaje jabón, kabʼe in najbʼentoq qeye ex atzun kabʼetl in chex nkʼayine. Jun maj, e tzaj wiʼne 40 tal ekʼ. Ex tej kychʼiy, i ex nkʼaʼyine ex e tzaj nlaqʼoʼne oxetl syent. Yajxitl, xi nqʼoʼne 50 ekʼ ex tzaj qʼoʼn 110 libr arin weye aju bʼinchaʼn tiʼj xiʼn. Ex tuʼn jlu e waʼn qe toj njaye ex junjuntl ja xjal toj nimku ambʼil».

Ax ikx ojtzqiʼntoq tuʼn Paul qa aju mas tbʼanel jaku bʼant quʼn aju tuʼn tok qeʼ qkʼuʼj tiʼj Dios. Qa ma che japun qe tkawbʼil Dios quʼn, in qo tzaj tonin. Tuʼn tkanet aju at tajbʼen qe tuʼn qanqʼin, tqʼama Jesús tuʼn miʼn ttzaj bʼajxix qkʼuʼj ex tqʼama jlu: «Miʼn che bʼisune tiʼj. Porque [...] at jun Kymane ojtzqiʼn tuʼn qa at tajbʼen tkyaqil jlu kyeye» (Lucas 12:29-31).

Bʼisbʼajilxix, tuʼnju aju nimaq aj qʼoj tiʼj Dios, aju Satanás, o che kubʼ t-sbʼuʼn nimxix xjal tuʼn tkubʼ kyximen qa aju mas nim toklen aju junjun qʼinumabʼil. In tzaj bʼajxix kykʼuʼj xjal tiʼjju at tajbʼen kye tuʼn kyanqʼin, at maj axix tok qe jlu ex at maj noq in kubʼ kyximin, ex in nokxix tilil kyuʼn tuʼn kykanet qe tiʼchaq lu aju at maj nya ilxix  tiʼj kye. At nim xjal in nokx kyqʼon kyibʼ tjaqʼ kʼas ex nya toj tumel in nel kynikʼ tiʼj qa «in che kyaj tjaqʼ tkawbʼil aju in qʼonte kychʼex» (Proverbios 22:7).

At junjuntl xjal in jaw kyjyoʼn jun nya bʼaʼn kybʼe. «At junjun xjal ojtzqiʼn qe quʼne, kyaj kyqʼoʼn toj kyja ex kyamiw tuʼn kyxiʼ toj juntl tnam tuʼn tten jun tbʼanel kyanqʼibʼil toj kywitz», chi Paul. «Tuʼnju at junjun mintiʼ kyuʼj mintiʼ kanet kyaqʼun. At maj in kubʼ kyewin kyibʼ kywitz polisiy ex in che kyaj jtan toj bʼe. Mintiʼ xi kyqʼoʼn ambʼil te Dios tuʼn kytzaj onin tuʼn. Atzun qeye ma qo exe twitz nya bʼaʼn lu junx kyukʼil toj njaye, tukʼe onbʼil tzaj tqʼoʼn Dios».

Tzaj tqʼamaʼntl Paul jlu: «Kyaj tqʼamaʼn Jesús: ‹Miʼn bʼaj kykʼuʼje tiʼj ju te nchiʼj, porque aju te nchiʼj texte tbʼis ktzajel. Aju nnikʼx quʼn tuj jun qʼij, akuxju›. Tuʼntzunju, bʼant jlu wuʼne, in naʼne Dios tkyaqil qʼij ex xi nmaʼne: ‹Qʼontza qwaye jaʼlo, aju in ajbʼen tkyaqil qʼij›. Ex tzaj tqʼoʼn Qman Dios onbʼil ik tzeʼn kyaj ttziyen Jesús. Ax tok, at maj mintiʼ kanet quʼne aju mas qajbʼile tuʼn tkanet. Jun maj, in nokxe toj jun fila ex mintiʼtoq ojtzqiʼn wuʼne tiʼtoq in netz kʼayin. Tej npone twitz, ok nqʼoʼn nwitze tiʼj qa yogurt aju in netz kaʼyin. Nya ngane yogurt. Noqtzun tuʼnj, wabʼj jlu, tuʼntzunju o waʼne tiʼj yogurt toj qonikʼen aju. Nimxix in xi nqʼoʼne chjonte te Dios tuʼnju toj tkyaqil ambʼil aju, mintiʼ i eʼx toj njaye jtal tukʼil waʼyij. *

Mas at chʼintl qpwaqe jaʼlo. Noqtzun tuʼnj, tuʼnju o tzikʼ qwitze tiʼj, in nel qnikʼe tiʼj qa aju mas nim toklen qa ma tzaj bʼajxix qkʼuʼj aju qa ma tzʼok qeʼ qkʼuʼj tiʼj Jehová. * Kukx kʼonil Jehová qiʼj qa kukx ma kubʼ qbʼinchaʼn aju tajbʼil. Ma tzʼok qqʼoʼne qwitze tiʼj qa axix tok aju tkuʼx toj Salmo 34:8, jatumel in tzaj tqʼamaʼn jlu: ‹Che nikʼbʼenchaqe tiʼj, tzʼelx kynikʼe tiʼj, ate Qman puro bʼaʼn. At tzalajbʼil teju xjal nnoʼk qeʼ tkʼuʼj tiʼj Qman›. Tuʼntzunju, toj ambʼil jaʼlo, mintiʼ in qo tzaj xobʼe tuʼn qok weʼye juntl maj twitzju nya bʼaʼn lu.

In nelxix qnikʼe tiʼj jaʼlo qa tuʼn kyanqʼin xjal, mas il tiʼj wabʼj twitz aqʼuntl ex twitz pwaq. Kyjuʼtzun, nimxix in qo ayone tiʼj ambʼil aj tjapun twiʼ aju o tzaj ttziyen Dios qe: ‹Kchmetel nim twitz triw tuj txʼotxʼ›. Ex atzun jaʼlo, ‹qa at qwa ex at qxbʼalun, qo tzalaj tiʼj jlu›. Ax ikx in tzaj tqʼamaʼn Tyol Dios jlu: ‹Miʼn pon kykʼuʼje tiʼj pwaq; che tzalaje tiʼj chʼin at kyeye jaʼlo; porque in tmaʼn Dios: Mlay kyaj nkoline, ex mlay kyaj nqʼoʼne. Kyjaʼtzun in qeʼxix qkʼuʼj tuʼn t-xi qmaʼn: Ate Qman onil weye; mlay chin xobʼe›». *

Ilxix tiʼj tuʼn tten jun axix tok qʼuqbʼil qkʼuʼj tuʼn qbʼet tukʼe Dios ik tzeʼn bʼant tuʼn Paul kyukʼe toj tja (Génesis 6:9). Qa ma kubʼ bʼaj qpwaq toj ambʼil jaʼlo moqa toj ambʼil tzul, aju qʼuqbʼil tkʼuʼj Paul ex aju tbʼanel nabʼil ok lepeʼ tiʼj, in tzaj tyekʼun qe tiʼ jaku bʼant quʼn.

Noqtzun tuʼnj, ¿yajtzun qa atz in tzaj bʼaj qkʼuʼj kyiʼj qe toj qja?