TBʼI XNAQʼTZBʼIL TOK TIʼJ T-XKʼOMIL: ¿TIʼ JAKU TZʼONIN QIʼJ TUʼN MIʼN TTZAJ BʼAJXIX QKʼUʼJ?
In tzaj bʼajxix kykʼuʼj xjal twitz tkyaqil Txʼotxʼ
«In xaje laqʼol wabʼj, noqtzun tuʼnj, oʼkx e kanet galleta wuʼne ex otoq jax twiʼ, ¡10,000 majtl twiʼ otoq jax! Ya mintiʼtl kanet wabʼj kyoj kʼaybʼil toj juntl qʼij.» (Chi Paul te Zimbabue)
«Tzaj tqʼamaʼn nchmile weye tuʼn nkubʼ qeʼye, ex tzaj tqʼamaʼn qa oktoq chin kjel ttzaqpiʼne kyukʼil wale. Kubʼ naʼne qa ok chin kyimeltoqe. ¿Tiʼtzun kbʼantel wuʼne jaʼlo kyukʼil wale?» (Chi Janet te Estados Unidos)
«Tej t-xi nbʼiʼne tqʼajqʼajel twiʼ junjun alarma, in nel oqe tuʼn nxiʼye ewil wibʼe, kubʼ nxon wibʼe twitz txʼotxʼ tej kukxtoq in che xon xjal qʼaqʼ. Tej otoqxi tzikʼ nim or tbʼajlen jlu, kukxtoq in chin luʼline.» (Chi Alona te Israel)
In qo anqʼin toj jun ambʼil jatumel chʼixmi kykyaqil xjal in tzaj bʼajxix kykʼuʼj tuʼn «nim yajbʼil» (2 Timoteo 3:1). Jaxku tumel mintiʼ in kanin pwaq, in tzaj xitbʼil kyoj kyja xjal, in nok qʼoj kyxol tnam, in tzaj yabʼil mintiʼ qʼanbʼil tiʼj ex in tzaj xitbʼil tuʼn twitz Txʼotxʼ moqa kyuʼn xjal. Nya oʼkxju, ax ikx in che ximen xjal tiʼj jlu: «¿Yajtzun qa ma tzaj tqʼamaʼn aj qʼanel qa at jun cáncer wiʼje? ¿Tzeʼn kʼokel twitz Txʼotxʼ aj kychʼiy nkʼwaʼle ex aj kychʼiy tal nchmane?».
At maj ilx tiʼj in tzaj bʼaj qkʼuʼj ik tzeʼn aj qok toj xjel toj tja xnaqʼtzbʼil, aj qyolin kywitz xjal moqa aj qxiʼ jyol jun qaqʼun. Qa ma qo tzaj xobʼ chʼin a jlu in nonin qiʼj tuʼn tel qpan qibʼ tiʼj nya bʼaʼn. Noqtzun tuʼnj, qa nimxix ex qa kukx in tzaj bʼaj qkʼuʼj, jaku tzaj nim nya bʼaʼn qiʼj tuʼn. Ok jun xnaqʼtzbʼil kʼitzqeku kyiʼj mas te 68,000 xjal ex tzaj tyekʼun qa axpe ikx jaku che kyim naj xjal qa ma tzaj bʼaj chʼin kykʼuʼj. Tuʼntzunju, tbʼanel aju tqʼama Jesús tej ttzaj tqanin qa alkye jun «jaku bʼant tuʼn tuʼn tok tqʼoʼn kabʼe xkʼachubʼtl twaʼl» tchwinqlal «tuʼnju nimxix in bʼaj tkʼuʼj». Ax tok mlay qo anqʼin mas ambʼil qa ma tzaj bʼajxix qkʼuʼj. Tuʼntzunju tqʼamatl jlu: «Miʼn bʼaj kykʼuʼje» (Mateo 6:25, 27). ¿Tiʼ kbʼantel quʼn tuʼn miʼn ttzaj bʼajxix qkʼuʼj?
Aju jaku bʼant quʼn aju qa ma japun junjun nabʼil quʼn. Ax ikx, il tiʼj tuʼn t-xi qqanin onbʼil te Dios toj naʼj Dios ex tuʼn tok qeʼxix qkʼuʼj tiʼjju o tzaj ttziyen Dios toj ambʼil tzul. Ax ikx qa mintiʼ jun nya bʼaʼn in tzaj qiʼj jaʼlo, jaku tzaj qiʼj toj ambʼil tzul. Kyjuʼtzun, qo xnaqʼtzan tiʼj tiʼ onin tiʼj Paul, tiʼj Janet ex tiʼj Alona tuʼn miʼn ttzajxix bʼajtl kykʼuʼj.
Bʼalo ax ikx tgana jlu
JUNJUNTL XNAQʼTZBʼIL
In tzaj bʼaj kykʼuʼj xinaq | ¿Jakupe tzʼonin Tyol Dios kyiʼj?
Mas in tzaj bʼaj kykʼuʼj xjal toj ambʼil jaʼlo tuʼnju at nim nya bʼaʼn. Qa in tzaj bʼaj teya tkʼuʼj, ¿jakupe tzʼonin Tyol Dios tiʼja?
