1, 2. ¿Alqiʼj in yolin Tyol Dios, aju kubʼ tzʼibʼen toj yol hebreo, aj ttzaj tqʼamaʼn «lugar tuʼn tkubʼ ten» tqan Dios?

TQʼAMA Jehová jlu: «Aju kyaʼj, atzun nqʼuqbʼile tuʼn nkawine, ex aju txʼotxʼ atzun lugar tuʼn tkubʼ ten nqane tibʼaj» (Isaías 66:1). Ax ikx tej tyolin Jehová tiʼj «lugar tuʼn tkubʼ ten» tqan, tqʼamatl jlu: «Tuʼntzun tjaw nimsaʼn ju lugar jatum ax atine [moqa ‹aju jatumel tuʼn tkubʼ ten nqane›, TNM]» (Isaías 60:13). ¿Alkye tten kjawil tnimsaʼn Jehová, moqa kʼokel tuʼn te tbʼanel, aju lugar jatumel in kubʼ ten tqan? ¿Ex tiʼ t-xilen jlu qe aqoʼ in qo anqʼin tzalu twitz Txʼotxʼ atz jatumel in kubʼ ten tqan Dios?

² Aj tyolin Tyol Dios, aju kubʼ tzʼibʼin toj yol hebreo, tiʼj «lugar tuʼn tkubʼ ten» tqan Dios, at maj in yolin tiʼj tja Dios kubʼ kybʼinchaʼn aj Israel ojtxe (1 Crónicas 28:2; Salmo 132:7, TNM). Tbʼanelxixtoq ja lu toj twitz Jehová tuʼnju atz toj e ajbʼen tmajen te. Ex ajbʼen tuʼn tjaw nimsaʼn Jehová twitz Txʼotxʼ.

3. a) ¿Jatumel jaku jaw qnimsaʼn Dios toj ambʼil jaʼlo? b) ¿Jtoje tzaj tzyet tuʼn tten tja Dios mintiʼ qʼanchaʼl?

³ Yajtzun toj ambʼil jaʼlo, ¿jatumel jaku jaw qnimsaʼn Dios? Nya  atz toj jun ja ik tzeʼn kubʼ kybʼinchaʼn aj Israel. Atz toj aju in nok qqʼoʼn tbʼi te tja Dios mintiʼ qʼanchaʼl. A jlu mas in xi tqʼoʼn nimsbʼil te Jehová twitz jun ja. ¿Tiʼtzun aju tja Dios mintiʼ qʼanchaʼl? Aju jun tumel o bʼaj tbʼinchaʼn Jehová tuʼn tbʼant tuʼn kyok xjal te tamiw ex tuʼn kykʼulin te. Oʼkx jaku bʼant jlu tuʼnju kyim Jesús tuʼn qpaj. ¿Jtoje tzaj tzyet tuʼn tten tja Dios mintiʼ qʼanchaʼl? Toj abʼqʼi 29, tej tjaw aʼ twiʼ Jesús, moqa tej tbʼyan, ex tej tjaw jyoʼn tuʼn tok te nejenel kye pal toj tja Dios mintiʼ qʼanchaʼl (Hebreos 9:11, 12).

4, 5. a) ¿Tiʼ il tiʼj tuʼn tbʼant kyuʼn tmajen Jehová ik tzeʼn in tzaj tqʼamaʼn Salmo 99? b) ¿Alkye xjel il tiʼj tuʼn t-ximen teyele junjun qe tiʼj?

⁴ Nimxix in xi qqʼoʼn chjonte tuʼnju o bʼaj tbʼinchaʼn Jehová tumel lu tuʼn qkʼulin te. ¿Alkye tten jaku kubʼ qyekʼun? Qa ma qo yolin kyukʼil xjal alkye tbʼi Dios ex qa tzaj t-samaʼn Dios Jesús tuʼn tkyim tuʼn qpaj. Nimxix in qo tzalaj tuʼnju at mas te 8 millón testigos de Jehová in jaw kynimsaʼn Jehová tkyaqil qʼij. Nim xjal in kubʼ kyximen qa aj kykyim, che xeʼl toj kyaʼj ex tzmaxitzun kjawil kynimsaʼn Dios. Atzun qe, ojtzqiʼn quʼn qa toj ambʼil jaʼlo il tiʼj tuʼn tjaw qnimsaʼn Dios.

⁵ Aj tjaw qnimsaʼn Jehová, in nel qkanoʼn techel kubʼ kyqʼoʼn tmajen Dios toj ambʼil ojtxe (kjawil uʼjit Salmo 99:1-3, 5). Nim kyxol qe tmajen Jehová lu ik tzeʼn Moisés, Aarón ex Samuel, e onin tiʼj tumel kubʼ tbʼinchaʼn Dios tuʼn tjaw nimset (Salmo 99:6, 7). Toj ambʼil jaʼlo, at kabʼe kʼloj xjal in che kʼulin te Dios junx. Tnejel, aqeju o che jaw skʼoʼn ex in che ajbʼen toj tja Dios mintiʼ qʼanchaʼl twitz Txʼotxʼ naʼmxtoq kyxiʼ toj kyaʼj tuʼn kyok te pal junx tukʼil Jesús. Ex tkabʼ, aqeju nim millón, moqa aʼyeju «txqantl» ẍneʼl, in che onin tuʼn tkyaqil kykʼuʼj kyiʼj qeju o che jaw skʼoʼn (Juan 10:16). Noqtzun tuʼnj, teyele te junjun il tiʼj tuʼn t-ximen tiʼj xjel lu: «¿In chin onine tiʼj tumel o bʼaj tbʼinchaʼn Dios tuʼn qkʼulin te?».

6, 7. a) ¿Tiʼ nya bʼaʼn tzaj kyxol tnejel okslal? b) ¿Tiʼ tzaj yekʼun toj abʼqʼi 1919?

⁶ Tej naʼmxtoq tikʼ 100 abʼqʼi ttzajlen tzyet tuʼn kyten okslal tiʼj Jesús, at junjun e ok ten xnaqʼtzal nya ax tok xnaqʼtzbʼil kye txqantl ik tzeʼn otoq kyaj qʼamaʼn (Hechos 20:28-30; 2 Tesalonicenses 2:3, 4). Tej tbʼet ambʼil, mas kwest el nikʼ kyiʼj qeju ax tok in che ajbʼen te Dios. Ikʼ nim syent abʼqʼi tuʼn tajbʼen Jesús tuʼn Jehová tuʼn tonin tuʼn tel nikʼ kyiʼj qeju ax tok in che ajbʼen toj tja Dios mintiʼ qʼanchaʼl.

 ⁷ Toj abʼqʼi 1919 tzajxix yekʼun alkyeqe in che ajbʼen te Dios toj tja aju mintiʼ qʼanchaʼl. Otoq bʼant junjun chʼixpubʼil kyuʼn qe jlu tuʼn kyajbʼen te Jehová ik tzeʼn tajbʼil (Isaías 4:2, 3; Malaquías 3:1-4). Toj ambʼil lu, japun twiʼ jun witzikʼ tzaj yekʼun te apóstol Pablo. Qo xnaqʼtzan tiʼj tiʼ tzaj yekʼun te.

8, 9. ¿Alkyetzun aju «tbʼanel najbʼil» tzaj yekʼun te apóstol Pablo?

⁸ Ajbʼen tipumal Jehová tuʼn, tuʼn ttzaj tyekʼun te apóstol Pablo aju kbʼajeltoq toj ambʼil tzul. In tzaj qʼamaʼn jlu: «At jun xjal ojtzqiʼn wuʼne okslal tiʼj Jesucristo, ma bʼant-xi kyajlaj abʼqʼi jaw jubʼchaʼn, xi qʼiʼn tuj toxin kol kyaʼj. Mintiʼ bʼiʼn wuʼne qa tukʼix t-xmilal xi qʼiʼn ex qa mya tukʼix t-xmilal; ate Dios ojtzqilte. [...] Aju xjal lu jaw jubʼchaʼn tuʼn t-xiʼ toj tbʼanel najbʼil, ex o tbʼi yol mlay bʼant tuʼn qyolin tiʼj, mintiʼ toklen jun xjal tuʼn tyolin tiʼj» (2 Corintios 12:2, 4, TNM). Tzaj yekʼun jun tiʼ te apóstol Pablo aju ok tqʼoʼn tbʼi te «tbʼanel najbʼil». ¿Alkyetzun aju tbʼanel najbʼil lu? In yolinlo kyiʼj jlu: tnejel, tiʼjlo ax tok Tbʼanel Najbʼil ktel tzalu twitz Txʼotxʼ (Lucas 23:43). Tkabʼ, tiʼjlo mujbʼabʼil tzul tqʼoʼn Jehová te ttnam toj akʼaj twitz Txʼotxʼ. Ex toxin, tiʼjlo «tnajbʼil Dyos», toj juntl yol, tiʼjlo tbʼanel oklenj at kye txqantl tuʼn kyten ttxlaj Jehová toj kyaʼj (Apocalipsis 2:7, XT).

⁹ ¿Tiquʼn tqʼama apóstol Pablo qa otoq tbʼi junjun tiʼchaq aju mlay bʼant tuʼn tyolin tiʼj? Tuʼnju naʼmxtoq tpon ambʼil tuʼn ttzaj chikʼbʼaʼn junjun tbʼanel tqanil tzaj yekʼun te. Noqtzun tuʼnj, toj ambʼil jaʼlo, aqoʼ tmajen Jehová jaku qo yolin kyukʼil xjal kyiʼj qe tbʼanel tiʼchaq at qe toj ttnam.

10. ¿Tiquʼn nya ax aju tbʼanel at toj ttnam Dios jaʼlo tukʼilju tja Dios mintiʼ qʼanchaʼl?

¹⁰ Nim maj in che yolin quʼj tiʼjju tbʼanel at toj ttnam Jehová jaʼlo. Noqtzun tuʼnj, ¿axpe tbʼanel at toj ttnam Dios jaʼlo tukʼilju tja Dios mintiʼ qʼanchaʼl? Nya axju. Ik tzeʼn ma tzʼel qnikʼ tiʼj, aju tja Dios mintiʼ qʼanchaʼl atz in yolin tiʼj tumel o kubʼ tbʼinchaʼn Dios tuʼn tbʼant qkʼulin te. Atzunte tbʼanel at toj ttnam Dios jaʼlo, atz in yolin tiʼj mujbʼabʼil in tzaj tqʼoʼn Dios te ttnam. Aju mujbʼabʼil lu in qo tzaj tonin tuʼn tel qnikʼ tiʼj alkyeqe in che ajbʼen toj tja Dios mintiʼ qʼanchaʼl (Malaquías 3:18).

11. ¿Alkye qoklen o tzaj qʼoʼn toj ambʼil jaʼlo?

¹¹ Nimxix in qo tzalaj tuʼnju atxix toj 1919 o tzaj tqʼoʼn Jehová ambʼil kye xjal nya tzʼaqli tuʼn kyonin tuʼn tchʼiyset mujbʼabʼil toj ttnam Jehová. ¿In nonin teya tuʼn tbʼant jlu? ¿In tzalaja tiʼj toklena aju tuʼn taqʼunana tukʼil Jehová ex aju tuʼn tjaw nimset toklen twitz Txʼotxʼ?

12. ¿Tiquʼn in xi qqʼamaʼn qa in japun twiʼ Isaías 60:17? (Qʼonka twitza tiʼj tnejel tilbʼilal.)

¹² Atxix ojtxe o tzul nim tbʼanel chʼixpubʼil kyxol qeju in che ajbʼen te Jehová twitz Txʼotxʼ. Ex a jlu kyaj tqʼamaʼn Isaías tuʼn tikʼ, aju t-sanjel Dios (kjawil uʼjit Isaías 60:17). Aqeju tzma kuʼxin ex qe tzma in che oktz toj ttnam Dios, noqlo oʼkx o tzʼok kybʼiʼn chʼixpubʼil lu kye txqantl moqa noq oʼkx o kux kyuʼjin kyoj quʼj. Noqtzun tuʼnj, ateʼ qerman o tzikʼ nim ambʼil in che ajbʼen te Jehová ex ok tzʼok kyqʼoʼn kywitz kyiʼj chʼixpubʼil lu. Qʼuqlixix kykʼuʼj qa in najbʼen aj kawil Jesús tuʼn Dios tuʼn tkubʼ nej twitz aqʼuntl toj ttnam. Qa ma che ok qbʼiʼn qerman lu aj kyyolin kyiʼj chʼixpubʼil o che ul, ok kchʼiyil qʼuqbʼil qkʼuʼj tiʼj Jehová.

13. ¿Tiʼ bʼaʼn tuʼn tbʼant quʼn ik tzeʼn in tzaj tqʼamaʼn Salmo 48:12-14?

¹³ Qkyaqilx il tiʼj tuʼn qyolin kyukʼil txqantl tiʼj ttnam Jehová. At nim nya bʼaʼn at jaʼlo, tuʼntzunju, jun milagr aju mujbʼabʼil ex tbʼanel at kyxol nimxix erman twitz tkyaqil Txʼotxʼ. Kyjuʼtzun, bʼaʼn tuʼn qyolin kyukʼil «qe xjal che ul itzʼj te tibʼajxi» tiʼj ttnam Jehová ex tiʼj mujbʼabʼil in tzaj tqʼoʼn toj ttnam, toj juntl yol, kyukʼil qeju tzma kuʼxin ex qeju tzma in che oktz toj ttnam Dios (kjawil uʼjit Salmo 48:12-14).

14, 15. a) ¿Tiʼ junjun chʼixpubʼil e bʼant kyoj abʼqʼi 1970? b) ¿Tiquʼn o tzaj kyiʼn chʼixpubʼil nim tbʼanel?

 ¹⁴ Nim qe erman ma bʼet ambʼil in che ajbʼen te Jehová, o tzʼok kyqʼoʼn kywitz tiʼj alkye tten o tzʼok ttnam Jehová te tbʼanel kyuʼn junjun chʼixpubʼil. Jun techel, ojtxe, noq oʼkx jun nejenel kyxol jun kʼloj okslal at, oʼkx jun nejenel toj ninja qʼil twitz aqʼuntl ex noq oʼkx jun nejenel te Sociedad Watch Tower at. Teyele te junjun erman ateʼ tbʼanel onil kye, noqtzun tuʼnj, oʼkx junx in kubʼ t-ximen tiʼ kbʼantel toj jun kʼloj okslal, toj jun ninja qʼil twitz aqʼuntl ex toj kytxuylal ninja qʼil twitz aqʼuntl. Atzun kyojlo abʼqʼi 1970 chʼexpaj jlu. Toj ambʼil jaʼlo, at jun kʼloj ansyan kyxol jun kʼloj okslal, at jun Kʼloj ansyan iqʼel twitz aqʼuntl toj jun Ninja qʼil twitz aqʼuntl ex at jun kʼloj ansyan skʼoʼn maj kyxol testigo de Jehová aju in nok qʼet tbʼi te Kʼloj Xjal Qʼil Twitz Aqʼuntl.

¹⁵ Aʼyeju junjun chʼixpubʼil lu, nimxix o che onin tiʼj ttnam Dios. ¿Tiquʼn? Tuʼnju mas in nel qnikʼ tiʼj Tyol Dios jaʼlo, ex tuʼntzunju, in che bʼant qeju chʼixpubʼil lu. Mas nim kʼiwlabʼil in tzaj tkʼamoʼn ttnam Jehová jaʼlo tuʼnju nya noq junx xjal in kubʼ ten ximel tiʼj tiʼ kbʼantel. Toj ambʼil jaʼlo, kykyaqil qe ansyan o che tzaj toyin Jehová, jaku che onin tukʼil tbʼanel kymod (Proverbios 24:6; Efesios 4:8, TNM).

16, 17. Kyxol qeju chʼixpubʼil tzma in che bʼant tuʼn ttnam Jehová, ¿alkye jun mas tbʼanel toj twitza, ex tiquʼn?

¹⁶ Ax ikx qo ximen tiʼj junjun chʼixpubʼil tzma in che etz kyoj quʼj. Mas tbʼanel bʼinchabʼin kye quʼj in che etz jaʼlo. Ax ikx in najbʼen junjun kʼuxbʼil quʼn tuʼn t-xi qpakbʼaʼn Tyol Dios. Tuʼnju at qtembʼil toj Internet aju jw.org, at nim xjal in xi kykʼamoʼn onbʼil aju kyajbʼil. Tkyaqil chʼixpubʼil lu, in tzaj tyekʼun qa kʼujlaʼn qe xjal tuʼn Jehová ex qa in ximen kyiʼj.

¹⁷ Ax ikx in qo tzalaj tiʼj junjun chʼixpubʼil o bʼant kyiʼj qchmabʼil tuʼn tten mas ambʼil qiʼj tuʼn qxnaqʼtzan qjunalx moqa kyukʼil toj qja.  In qo tzalaj tiʼj junjun chʼixpubʼil o bʼant tiʼj alkye tten in che etz qʼoʼn qxnaqʼtzbʼil kyoj nimaq chmabʼil. ¡Mas tbʼanel in che ok aj tbʼet ambʼil! Ex in qo tzalaj aj qtzaj ttxkoʼn ttnam Jehová kyoj junxichaq xnaqʼtzbʼil in tzaj tqʼoʼn. Tkyaqil jlu in tzaj tyekʼun qa a Jehová in kubʼ nej twitz aqʼuntl toj ttnam ex qa in tzaj tqʼoʼn mujbʼabʼil te ttnam tuʼntzun tok te mas tbʼanil.

18, 19. ¿Tiʼ jaku bʼant quʼn tuʼn qonin tuʼn tchʼiy mujbʼabʼil toj ttnam Jehová?

¹⁸ In tzaj tqʼoʼn Jehová jun tbʼanel qoklen tuʼn qonin tuʼn tchʼiy mujbʼabʼil toj ttnam Jehová. ¿Tiʼ jaku bʼant quʼn tuʼn qonin? Jun tten, aju qa ma qo pakbʼan ex qa ma txi qqʼoʼn xnaqʼtzbʼil tiʼj Tyol Dios tukʼe tkyaqil qanmi. Toj tkyaqil ambʼil aj qonin tiʼj jun xjal tuʼn tok te testigo de Jehová, in qo onin tuʼn tchʼiy mujbʼabʼil toj ttnam Jehová (Isaías 26:15; 54:2).

¹⁹ Juntl tumel tuʼn qonin tuʼn tchʼiy mujbʼabʼil toj ttnam Jehová, aju qa kukx sok tilil quʼn tuʼn tok qmod te mas tbʼanel. Tuʼn jlu qo onil tuʼn tel bʼaʼn ttnam Jehová toj kywitz xjal. Tuʼnju aju qa tbʼanel qmod atzun mas tbʼanel in nel toj kywitz xjal ex atzun in nonin tuʼn tten kyajbʼil tuʼn kytzaj toj ttnam Jehová ex tuʼn tel kynikʼ tiʼj Jehová ex tiʼj Jesús, ex nya oʼkxju qojtzqibʼil.

20. ¿Tiʼ kbʼantel quʼn ik tzeʼn in tzaj tqʼamaʼn Proverbios 14:35?

²⁰ Nimxixlo in che tzalaj Jehová tukʼil Jesús aj ttzaj kyqʼoʼn kywitz tiʼj mujbʼabʼil at toj ttnam Jehová. Ex in qo tzalaj qe tuʼnju in qo onin tuʼn tok te tbʼanel. Noqtzun tuʼnj, mas qo tzalajel aj qonin tuʼn tok Txʼotxʼ te jun tbʼanel najbʼil. In tzaj tqʼamaʼn Proverbios 14:35 qa nimxix in jaw tzalaj jun aj kawil qa at jun tmajen at tnabʼil. Tuʼntzunju, tenx qnabʼil ex qqʼonk tilil tuʼn qonin tuʼn tchʼiy mujbʼabʼil toj ttnam Jehová.