Mintiʼ jun qe qaj tuʼn qok te nya bʼaʼn xjal ik tzeʼn tuʼn qok ten nikʼal yol, sino qaj tuʼn qok te tbʼanel xjal. Noqtzun tuʼnj, ¿tiquʼn at nim nya bʼaʼn, ik tzeʼn bʼiybʼil ex yajbʼil? Bʼisbʼajilxix tuʼnju tkyaqil qʼij in nok qqʼoʼn qwitz kyiʼj qe tqanil aqeju in tzajxix qxobʼil kyuʼn. ¿Alkye tajbʼil ex in nok tilil tuʼn, tuʼn tkubʼ kybʼinchaʼn xjal nya bʼaʼn? (Uʼjinxa 1 Juan 5:19.)

¿Ope qo kubʼ tbʼinchaʼn Dios tuʼn tkubʼ qbʼinchaʼn nya bʼaʼn? Mintiʼ. Tzʼaqlxix qoʼ tej qkubʼ bʼinchaʼn tuʼn Dios, o qo kubʼ tbʼinchaʼn Dios ik tzeʼn te tilbʼilal. A t-xilen jlu qa jaku kubʼ qyekʼun qe tmod ex jaku tzʼel qkanoʼn tkʼujlabʼil (Génesis 1:27; Job 34:10). Noqtzun tuʼnj, ax ikx o qo kubʼ tbʼinchaʼn tuʼn tkubʼ qximen qa kbʼel qbʼinchaʼn bʼaʼn moqa miʼn. Aʼyeju tnejel qtat mintiʼ el kykanoʼn aju tmod Dios ex kubʼ kybʼinchaʼn nya bʼaʼn. Toj ambʼil aju, xi kynajsaʼn aju kychwinqlal tzʼaqli. Ex tej kyul itzʼji kykʼwaʼl, kyaj kyqʼoʼn kyibʼaj kykʼwaʼl aju kyajbʼil tuʼn tkubʼ kybʼinchaʼn nya bʼaʼn. (Uʼjinxa Deuteronomio 32:4, 5.)

Tajbʼil Dios tuʼn tok tilel quʼn tuʼn miʼn tkubʼ qbʼinchaʼn nya bʼaʼn (Proverbios 27:11). In qo tzaj t-xnaqʼtzaʼn Dios tuʼn qok te bʼaʼn xjal. Qa ma t-xi qbʼiʼn aju in tzaj tqʼamaʼn qe ex qa ma tzʼel qkanoʼn qe tmod ok qo tzalajel. Toj ambʼil jaʼlo, mlay bʼant tuʼn tkubʼ qyekʼunxix tkyaqil qe tmod Dios. (Uʼjinxa Salmo 32:8.)

O tzaj tqʼoʼn Dios ambʼil te nya bʼaʼn tuʼntzun tok qqʼoʼn qwitz tiʼj aju in tzaj tuʼn. Noqtzun tuʼnj, nya te jumajx tzul tqʼoʼn ambʼil te nya bʼaʼn (2 Pedro 3:7-9). Chʼix tpon ambʼil tuʼn tnoj twitz Txʼotxʼ kyuʼn xjal tbʼanel aʼyeju in nel kykanoʼn tmod Dios tukʼil tzalajbʼil. (Uʼjinxa Salmo 37:9-11.)