At junjun xjal jaku kubʼ kyximen qa mintiʼ qojtzqibʼil at qa in nok qeʼ qkʼuʼj tiʼj qa che jawil anqʼin kyimni. Atzunte apóstol Pablo mintiʼ kubʼ t-ximen jlu, quʼn tqʼama jlu: «Qa oʼkx at tajbʼen qokslabʼl tiʼj Crist akux itzʼx qoʼ tzalu twitz txʼotxʼ, bʼekʼbʼilxix qwitz kywitz kykyaqil xjal. Pero jaʼlo ax tok o jatz anqʼin Crist kyxol kyimni; ate Crist o jatz anqʼin nej, tuʼntzun kyjaw anqʼin qeju o che kyim ik tzaʼnx te, ik tten jlu ik tzaʼn tnejel twitz awal in tyekʼun qa tzul mastl twitz» (1 Corintios 15:19, 20). Ax tok toj twitz apóstol Pablo qa che jawil anqʼin kyimni. ¿Tiquʼn tenxix qʼuqbʼil tkʼuʼj tiʼj jlu? Tuʼnju otoq jaw anqʼin Jesús (Hechos 17:31). * Tuʼntzunju, tqʼama qa ik tten Jesús ik tzeʼn «tnejel twitz awal» tuʼnju a Jesús jaw anqʼin tnejel tuʼn tanqʼin te jumajx. Qa a Jesús tnejel xjal jaw anqʼin, a jlu in tzaj tyekʼun qa ateʼ mastl xjal che jawil anqʼin.

At juntl tiquʼn jaku tzʼok qʼuqeʼ qkʼuʼj tiʼj qa che jawil anqʼin kyimni, aju qa «mibʼan te Dios nikʼan yol» (Tito 1:2). Mintiʼx jun maj o tzaj tqʼamaʼn Dios jun tyol nya ax tok ex mlayx tzaj tqʼamaʼn jun tyol nya ax tok. Kyjuʼtzun, ¿jakupe tzaj ttziyen Dios qa che jawil anqʼin kyimni, axpe ikx qa in tzaj tqʼoʼn yekʼbʼil tiʼj qa jaku bʼant tuʼn, ex yajxitl mlayx bʼanttl tuʼn? Mlay. Qa ma kubʼ qximen ikju, nya toj tumel aju in kubʼ qximen.

Tuʼnju at tkʼujlabʼil Jehová kyiʼj xjal, o bʼaj t-ximen tuʼn kyjaw anqʼin kyimni tuʼn. Xi tqanin Job jlu: «Qa ma kyim jun xjal, ¿kʼanqʼilpelo juntl maj? [...] Jakulo chin txkete tuʼna ex jakulo txi ntzaqʼweʼne, ex jakulo chin tzaj t-xtalina [moqa ‹ktel tajbʼila›, TNM], porque taqʼunbʼenx tqʼabʼa qine» (Job 14:14, 15). Qʼuqlixitoq tkʼuʼj Job qa tajbʼiltoq Ttat toj kyaʼj, aju Jehová, tuʼn t-xi qʼoʼn juntl maj tchwinqlal tuʼn. ¿Kukxpe tajbʼil Dios jlu? In tzaj tqʼamaʼnxix Tuʼjil Tyol lu: «Aqine Dios mintiʼ in chin chʼexpaje» (Malaquías 3:6). Ikju, kukx tajbʼil Jehová tuʼn t-xi tqʼoʼn kychwinqlal xjal o che kyim tuʼntzun kyanqʼin toj tzalajbʼil. Atzun jlu tajbʼil jun tbʼanel tatbʼaj aju o kyim jun tkʼwaʼl. Noqtzun  tuʼnj, aju mas tbʼanel aju qa nya oʼkx tajbʼil Dios tuʼn kyjaw anqʼin tkʼwaʼl, ax ikx at tipumal tuʼn tbʼant tuʼn (Salmo 135:6).

Kxel tqʼoʼn Jehová tipumal Tkʼwaʼl tuʼn kyjaw anqʼin kyimni tuʼn. A jlu tzul tiʼn nimxix tzalajbʼil kye qeju o kyim jun toj kyja. Ax ikx te Jesús in tzalaj tiʼj jlu. ¿Tiquʼn in xi qqʼamaʼn qa ax ikx te Jesús tajbʼil tuʼn tbʼant jlu? Tuʼnju tej naʼmxtoq tjaw anqʼin Lázaro, aju tamiw, jaw «oqʼ». Jaw «oqʼ» tuʼnju ok tqʼoʼn twitz tiʼjju bʼis in kynaʼn tanabʼ Lazáro ex qe kyamiw (Juan 11:35). Toj juntl maj, tej tok tqʼoʼn Jesús twitz tiʼj jun xuʼj viud, aju otoq kyim oʼkxku jun tal, «tzaj qʼaqʼan tkʼuʼj tiʼj ex xi tmaʼn te: —Miʼn tzʼoqʼa». Ex tojx ambʼil aju, jaw anqʼin tal xuʼj tuʼn (Lucas 7:13). Aqeju taqikʼ Tyol Dios lu, in tzaj kyekʼun qe qa in tnaʼn Jesús aju kʼixkʼoj in qnaʼn qa ma kyim jun toj qja. Tuʼntzunju, ¡nimxix ktzalajel aj kyjaw anqʼin xjal tuʼn tuʼnju kʼokel bʼis tuʼn te tzalajbʼil!

¿O kyim jun toj tjaya? Qa o kyim jun toj tjaya, jakulo kubʼ t-ximana qa mlayx tzul juntl maj. Noqtzun tuʼnj, o bʼaj t-ximen Dios tuʼn kyjaw anqʼin juntl maj kyimni ex o txi tqʼoʼn aqʼuntl lu te Tkʼwaʼl. Bʼaʼn tuʼn ttzaj tnaʼna qa tajbʼil Dios tuʼn ttena toj ambʼil aju, tuʼntzun ttena tukʼilju toj tjaya o kyim. Noqpe ximana tiʼj ambʼil jatumel kbʼel kyximane tiʼ kbʼantel kyuʼne kyoj qe abʼqʼi che ul yajxitl ex mlayx bʼaj kychwinqlale, ex jatumel mlayx kubʼ naj juntl maj toj tjaya.

Aju Lionel xqo yolin tiʼj toj tnejel xnaqʼtzbʼil, tqʼama jlu: «Tej ttzaj qʼamaʼn weye qa che jawil anqʼin kyimni, kwest el toj nwitze tuʼn tkubʼ nximane qa ax tok jlu ex kubʼ nximane qa nya ax tok in tzaj qʼamaʼn weye. Noqtzun tuʼnj, el nnikʼe tiʼj toj Tyol Dios qa ax tok jlu. ¡Nimxix wajbʼile at tuʼn tok nqʼoʼne nwitze tiʼj nchmane juntl maj!».

¿Tajbʼila tuʼn tel chʼintl tnikʼa tiʼj jlu? Ok che tzalajel testigos de Jehová qa ma txi kyyekʼun teya tukʼil Tyol Dios tiquʼn in nok qeʼ kykʼuʼj tiʼj qa che jawil anqʼin kyimni. *