¡Kukx qo xqʼuqin!
«Maske yaj kjapunel pero ayona tiʼj.» (HABACUC 2:3)
BʼITZ: 128 EX 45
1, 2. ¿Tiʼ o bʼant ex kukx in tbʼant kyuʼn tmajen Jehová?
ATXIX ojtxe, o txi ttziyen Jehová junjun tyol kye tmajen tuʼn tjapun twiʼ. Ex kukx o kubʼ kyyoʼn tmajen tukʼil kypasens tuʼn tjapun bʼaj kywiʼ. Ik tzeʼn Jeremías tqʼama qa kbʼajel xitin aju tnam Judá kyuʼn xjal te tnam Babilonia. Ex japun twiʼ jlu toj abʼqʼi 607 tej naʼmxtoq tul Jesús (Jeremías 25:8-11). Ax ikx tqʼama tsanjel Dios Isaías, qa kʼonil Jehová kyiʼj qe tmajen tuʼn kyetz toj Babilonia ex tuʼn kymeltzʼaj toj kytnam. Tqʼama jlu: «At nim tzalajbʼil kye kykyaqil qeju in qeʼ kykʼuʼj tiʼj» (Isaías 30:18). Ax ikx te Miqueas ok qeʼ tkʼuʼj tiʼj qa che kjapunel kywiʼ qe yol e tzaj tqʼamaʼn Jehová. Tuʼntzunju, tqʼama jlu: «Atzun weye, chin ayole tiʼj» (Miqueas 7:7). Toj nim syent abʼqʼi, kubʼ kyyoʼn qe tmajen Dios tuʼn tul Mesías aju otoq tzaj tziyen (Lucas 3:15; 1 Pedro 1:10-12). * (Qʼonka twitza tiʼj tqanil t-xe t-xaq uʼj.)
2 Ax ikx qe in qo yon tiʼj tuʼn tjapun kywiʼ qe yol tiʼj Tkawbʼil Dios. A Jesús aju aj kawil toj Tkawbʼil Dios ex aju chʼinx tpon ambʼil tuʼn tkolin qiʼj tiʼj nya bʼaʼn at jaʼlo. Aj tkubʼ najsaʼn tkyaqil nya bʼaʼn, kbʼajel t-xiten Jesús kykyaqil xjal nya bʼaʼn ex kʼelel tiʼn tkyaqilju in tzaj tiʼn kʼixkʼoj qiʼj (1 Juan 5:19). Jaku tzul xitbʼil lu noq alkyexku qʼij. Kyjuʼtzun, nim toklen tuʼn tbʼaj qbʼinchaʼn qten aj tul ju qʼij lu.
3. Qa ma bʼant-xi nim abʼqʼi in qo yon tuʼn tul xitbʼil, ¿tiʼ jaku kubʼ qximen?
3 Qajxix tuʼn tpon qʼij jatumel kbʼantel tajbʼil Dios tzalu twitz Txʼotxʼ (Mateo 6:10). Noqtzun tuʼnj, qa ma bʼant-xi nim abʼqʼi in qo yon tuʼn tul xitbʼil, jakulo kubʼ qximen jlu: «¿Kukxpe chin xqʼuqile ex kukxpe kbʼel nbʼinchaʼne ntene?».
¿TIQUʼN IL TIʼJ TUʼN KUKX QXQʼUQIN EX TUʼN KUKX TKUBʼ QBʼINCHAʼN QTEN?
4. ¿Tiquʼn il tiʼj tuʼn kukx qxqʼuqin ex tuʼn kukx tbʼaj qbʼinchaʼn qten?
4 ¿Tiquʼn il tiʼj tuʼn kukx tok qxqʼuqin qibʼ ex tuʼn kukx tbʼaj qbʼinchen qten? At nim tiquʼn aju nim toklen. Tnejel, tuʼnju kyaj tqʼamaʼn Jesús tuʼn kukx qxqʼuqin ex tuʼn kukx tkubʼ qbʼinchaʼn qten (Mateo 24:42; Lucas 21:34-36). Ax ikx, in tzaj tqʼamaʼn ttnam Jehová qe tuʼn kukx qxqʼuqin ex tuʼn kukx tbʼaj qbʼinchaʼn qten aj tul xitbʼil. Ex in tzaj tqʼamaʼn qe tuʼn kukx qximen tiʼj Tbʼanel Najbʼil o tzaj ttziyen Dios (kjawil uʼjit 2 Pedro 3:11-13).
5. ¿Alkye juntl tiquʼn il tiʼj tuʼn tkubʼ qbʼinchaʼn qten tuʼn tul xitbʼil?
5 Qa iltoq tiʼj tuʼn tkubʼ kybʼinchaʼn kyten qeju okslal toj tnejel syent abʼqʼi aj tul ju tqʼij Jehová, mas nim toklen tuʼn tkubʼ qbʼinchaʼn qten toj ambʼil jaʼlo. ¿Tiquʼn? Tuʼnju aju yol kyaj tqʼamaʼn Jesús in tzaj tyekʼun qa ya o txi tzyet tuʼn tkawin Jesús ex qa in qo anqʼin kyoj bʼajsbʼil tqʼijlalil. Aju yekʼbʼil tiʼj jlu aju xiʼni txiʼ nya bʼaʼn toj il ex in xi pakbʼet Tyol Dios twitz tkyaqil Txʼotxʼ. Tkyaqil jlu tzaj tzyet tuʼn tjapun bʼaj twiʼ toj 1914 (Mateo 24:3, 7-14). Mintiʼ tqʼama Jesús jniʼ ambʼil qo anqʼil kyoj bʼajsbʼil tqʼijlal. A jlu in tzaj tyekʼun qa il tiʼj tuʼn tkubʼ qbʼinchaʼn qten tuʼnju noq alkyexku ambʼil tzul xitbʼil.
6. ¿Tiquʼn in xi qqʼamaʼn qa mas che okel xjal te nya bʼaʼn?
6 In tzaj tqʼamaʼn Tyol Dios qa mastoq che okel xjal te nya bʼaʼn kyoj «mankbʼil tqʼijlalil», moqa kyoj bʼajsbʼil tqʼijlalil (2 Timoteo 3:1, 13; Mateo 24:21; Apocalipsis 12:12). Tuʼntzunju, maske at nim nya bʼaʼn toj kyanmi xjal jaʼlo, ojtzqiʼn quʼn qa mas che okel xjal te nya bʼaʼn. Noqtzun tuʼnj, ¿in tzajpe tyekʼun jlu qa il tiʼj tuʼn tchʼiy mas nya bʼaʼn twitz tkyaqil Txʼotxʼ tuʼntzun tul xitbʼil?
7. ¿Tiʼ in nel qnikʼ tiʼj aj qximen tiʼj Mateo 24:37-39?
7 Atlo junjun in kubʼ kyximen qa naʼmxtoq txi tzyet «nimxix yajbʼil», il tiʼj tuʼn ttzaj weʼyaj, tuʼn ttzaj yabʼil ex tuʼn tok qʼoj twitz tkyaqil Txʼotxʼ (Apocalipsis 7:14). Noqtzun tuʼnj, mlay bʼaj jlu. ¿Tiquʼn? Tuʼnju qa ma bʼaj jlu, kykyaqil xjal kʼelel kynikʼ tiʼj qa in che japun kywiʼ yol e kyaj qʼamaʼn toj Tyol Dios, axpe ikx qe xjal mintiʼ in nok qʼuqeʼ kykʼuʼj tiʼj Tyol Dios. Noqtzun tuʼnj, tqʼama Jesús qa chʼixme kykyaqil xjal mlay tzʼel kynikʼ tiʼj qa in che anqʼin kyoj bʼajsbʼil tqʼijlalil. Tqʼama qa noq minabʼen kʼelel toj kywitz xjal aj tul xitbʼil tuʼnju in che anqʼin ik tzeʼn kyajbʼil ex mintiʼ in che ximen tiʼj qa tzul xitbʼil (kjawil uʼjit Mateo 24:37-39). Aj qximen tiʼjju tqʼama Jesús, ¿tiʼ in nel qnikʼ tiʼj? In nel qnikʼ tiʼj qa naʼmxtoq t-xi tzyet nimxix yajbʼil, moqa nimxix kʼixbʼisabʼil, nya il tiʼj tuʼn tchʼiy mas nya bʼaʼn twitz tkyaqil Txʼotxʼ twitzju ma chʼiy jaʼlo, ex nya kykyaqil xjal kʼokel kyqʼoʼn kywitz tiʼj qa chʼix tul xitbʼil (Lucas 17:20; 2 Pedro 3:3, 4).
8. ¿Alqiʼj qʼuqlixix kykʼuʼj qe tmajen Jehová?
8 Tej tyolin Jesús tiʼj bʼajsbʼil tqʼijlalil, yolin tiʼj jun tten tuʼn oʼkx qeju in che xqʼuqin kʼelel kynikʼ tiʼj qa chʼinx tul xitbʼil. Aqoʼ tmajen Jehová, kukx in qo qxqʼuqin (Mateo 24:27, 42). Tuʼntzunju, atxix toj 1914 o tzʼok qqʼoʼn qwitz tiʼj alkye tten in japun kywiʼ qe yol e kyaj tqʼamaʼn Jesús. Qʼuqlixix qkʼuʼj qa in qo anqʼin kyoj bʼajsbʼil tqʼijlalil nya bʼaʼn. Ex o kubʼ t-ximen Jehová toj alkye ambʼil mas bʼaʼn tuʼn tkubʼ tnajsaʼn.
9. ¿Tiquʼn il tiʼj tuʼn kukx qxqʼuqin ex tuʼn kukx tkubʼ qbʼinchaʼn qten?
9 ¿Tiquʼn il tiʼj tuʼn kukx qxqʼuqin ex tuʼn kukx tbʼaj qbʼinchaʼn qten? Tnejel, tuʼnju qajbʼil tuʼn t-xi qbʼiʼn aju tzaj tqʼamaʼn Jesucristo. Tkabʼ, tuʼnju qʼuqli qkʼuʼj tiʼj qa in japun twiʼ aju yol kyaj tqʼamaʼn tiʼj bʼajsbʼil tqʼijlalil. ¿Tiquʼn in nok qeʼ qkʼuʼj tiʼj jlu? Nya tuʼnju in nokx qnimen alkyexku yol. Sino tuʼnju at yekʼbʼil tiʼj qa ax tok in japun kywiʼ qe yol ateʼkux toj Tyol Dios.
¿JNI’ AMBʼIL KUKX KBʼEL QYOʼN?
10, 11. a) ¿Tiquʼn xi tqʼamaʼn Jesús tuʼn kukx kyxqʼuqin qe t-xnaqʼtzbʼen? b) ¿Tiʼ il tiʼj tuʼn tbʼant quʼn qa mas yajxi sul aju xitbʼil twitzju in kubʼ qximen? (Qʼonka twitza tiʼj tnejel tilbʼilal.)
10 Nim qe tmajen Jehová ma tzikʼ nim ambʼil in che yon tiʼj tuʼn tul xitbʼil. Noqtzun tuʼnj, noq jteʼxku ambʼil iqʼin quʼn tuʼn qajbʼen te Dios, il tiʼj tuʼn kukx qxqʼuqin ex tuʼn kukx tkubʼ qbʼinchaʼn qten. Nim toklen qa bʼantnitl qten aj tul Jesús xitil tkyaqilju tokx tjaqʼ tkawbʼil Satanás. Bʼaʼn tuʼn ttzaj qnaʼn qa xi tqʼamaʼn Jesús kye t-xnaqʼtzbʼen tuʼn tok qxqʼuqin kyibʼ tuʼnju mintiʼ ojtzqiʼn kyuʼn jtoj tuʼn tulju xitbʼil. Ax ikx xi tqʼamaʼn jlu kye: «Ik tten ik tzaʼn jun xjal xiʼ tuj jun tbʼe najchaq; naʼnxtoq tetz tuj tja, kyaj tqʼoʼn kyoklen qe tmajen ex xi tmaʼn te teyle junjun alkye taqʼun, ex kyaj tmaʼn te kwentil ttzi ja tuʼn t-xqʼuqin. Kyjaʼtzun, che xqʼuqine porque mintiʼ bʼiʼn kyuʼne jtoj bʼan tul ju tajaw ja, qa otoq qok yupj ok tul, qa te tmij aqʼbʼil, qa ok ttzaj oqʼ tzekʼ, ex qa chʼixtoq qsqix. Kyjaʼtzun, che xqʼuqine, mya yajku tzul kuchiwt miʼn che knete tuʼn in che tane. Aju in xi nmaʼne kyeye, kye kykyaqil in xi nmaʼne: Che xqʼuqine» (Marcos 13:33-37).
11 Tej tel kynikʼ tmajen Jehová qa toj abʼqʼi 1914 tzaj tzyet tuʼn tkawin Jesús, ax ikx el kynikʼ tiʼj qa noq alkyexku ambʼil jaku tzul aju xitbʼil. Kyjuʼtzun, ok tilil kyuʼn tuʼn tkubʼ kybʼinchaʼn kyten. ¿Tiʼ bʼant kyuʼn? Ok tilel kyuʼn tuʼn kypakbʼan. Tqʼama Jesús toj Marcos capítulo 13 qa aju tajaw ja jakutoq tzul mas yajxitl twitzju in kubʼ kyximen qe majen. Noqtzun tuʼnj, noq alkyexku ambʼil tuʼn tul, iltoq tiʼj tuʼn kukx kyxqʼuqin. A jlu in tzaj tyekʼin qe qa ma tzikʼ nim abʼqʼi in qo yon tiʼj xitbʼil, nya a t-xilen jlu qa atx taj tuʼn tul xitbʼil moqa otoq qo kyim aj tul xitbʼil. Il tiʼj tuʼn kukx qxqʼuqin.
12. a) ¿Tiʼ xi tqanin Habacuc te Jehová? b) ¿Tiʼ tzaj ttzaqʼweʼn Jehová te Habacuc?
12 Qo ximen tiʼj t-sanjel Dios aju Habacuc tbʼi. Kukx kubʼ tyoʼn Habacuc tukʼil tpasens ex xi tqʼoʼn tqanil kye xjal qa oktoq kbʼel xitj tnam Jerusalén. Tej naʼmxtoq t-xi tpakbʼaʼn Habacuc jlu, otoqxi t-xi kypakbʼaʼn junjuntl t-sanjel Dios aju tqanil lu toj nimku abʼqʼi. Ex el tnikʼ Habacuc tiʼj qa mas nya bʼaʼntoq kymod xjal twitzju tnejel. Tuʼntzunju, xi tqʼanin onbʼil te Jehová ex xi tqanin jlu: «Nman, ¿Jteʼ maj chin qanile onbʼil teya ex mintiʼ in chin tzaj tbʼiʼna?». Mintiʼ tzaj tqʼamaʼn Jehová te jtoj tuʼn tkubʼ xitj tnam Jerusalén, noqtzun tuʼnj, xi tqʼamaʼn Jehová te tuʼn kukx t-xqʼuqin ex xi ttziyen jlu te: «Mlay tzikʼx tiʼj», moqa nya yaj tzul (kjawil uʼjit Habacuc 1:1-4 ex 2:3).
13. a) Tuʼnju yon Habacuc nim ambʼil tiʼj xitbʼil, ¿tiʼwtlo jakutoq kubʼ t-ximen? b) Noqwit kubʼ t-ximen Habacuc ikju, ¿tiʼwtlo bʼaj tiʼj?
13 Noqwit sikt Habacuc tuʼn tyon ex noqwit kubʼ t-ximen jlu: «Ma tzikʼ nim abʼqʼi in chin yone tuʼn tkubʼ xiten Jerusalén. Atxlo nim ambʼil taj tuʼn tul xitbʼil, tuʼntzunju, nya il tiʼj tuʼn kukx npakbʼane, bʼaʼn tuʼn kypakbʼaʼn txqantl». Noqwit kubʼ t-ximen Habacuc ikju, ¿tiʼwlo bʼaj tiʼj? Najwitlo tamiwbʼil tukʼil Dios. Ex noqwit mintiʼ bʼantni tten tej tpon xitbʼil, mintiʼwtlo kyaj anqʼin.
14. ¿Tiʼ kbʼel qnaʼn toj akʼaj twitz Txʼotxʼ?
14 Atzun jaʼlo, ximana tiʼj qa ata toj akʼaj twitz Txʼotxʼ. Ma tzʼok tqʼoʼna twitza tiʼj alkye tten ma japun tuʼn Jehová tkyaqilju tzaj tqʼamaʼn tuʼn tikʼ kyoj bʼajsbʼil tqʼijlalil. Tuʼntzunju, mas in nok qʼuqeʼ tkʼuʼja tiʼj Jehová ex qʼuqli tkʼuʼja qa che japunel tuʼn aqeju txqantl tyol o che tzaj ttziyen (kjawil uʼjit Josué 23:14). Nimxix in xi tqʼoʼna chjonte te Jehová tuʼnju ma tzaj tiʼn xitbʼil tojxix ambʼil taj ex in xi tqʼoʼna chjonte te tuʼnju tzaj tqʼamaʼn kye tmajen tuʼn kukx kyxqʼuqin (Hechos 1:7; 1 Pedro 4:7).
KUKX QO PAKBʼAN
¿In nokpe tilil tuʼna tuʼn tpakbʼana? (Qʼonka twitza tiʼj taqikʼ 15)
15, 16. ¿Tiquʼn il tiʼj tuʼn tok tilil quʼn tuʼn qpakbʼaʼn?
15 Kukx tzul tnaʼn ttnam Jehová qe qa aju mas nim toklen toj qanqʼibʼil aju tuʼn qajbʼen te Dios. A jlu kʼonil qiʼj tuʼn kukx qajbʼen te Jehová. Noqtzun tuʼnj, ok kʼonil qiʼj tuʼn miʼn tikʼ tnaʼl quʼn qa ilxix tiʼj tuʼn t-xi pakbʼet naj Tyol Dios. Qʼuqli qkʼuʼj tiʼj qa aju kyaj tqʼamaʼn Jesús tiʼj bʼajsbʼil tqʼijlalil in japun twiʼ ex qa noq chʼintl ambʼil atx tuʼn tul xitbʼil. Kyjuʼtzun, aju mas nim toklen toj qwitz aju tuʼn qajbʼen te Jehová ex tuʼn t-xi pakbʼet Tkawbʼil (Mateo 6:33; Marcos 13:10).
16 Chʼixtl tkubʼ najsaʼn tkyaqilju tokx tjaqʼ tipumal Satanás. Aj qpakbʼan, in qo onin kyiʼj xjal tuʼn kyklet. Qo ximen tiʼj jun techel aju in tzaj tyekʼun qa nimxix toklen tuʼn tok tilil quʼn tuʼn qonin kyiʼj xjal tuʼn kyklet. Toj 1945, at jun bark te Alemania kux mulqʼaj toj mar ex e kyim nim xjal. At jun mejebʼleʼn e kyaʼj anqʼin ex e ok te testigo de Jehová yajxitl. In tzaj tnaʼn ermana qa tej tkux mulqʼaj bark, at jun xuʼj ok ten ẍchʼil tej t-xi tqʼoʼn twitz kyiʼj qe tiqatz ex kyiʼj qe tuʼ e kux mulqʼaj junx tukʼil bark. Atzun qe txqantl xjal ojtzqiʼntoq kyuʼn qa aju mas nim toklen aju tuʼn kyonin kyiʼj xjal tuʼn kyklet. Ax ikx toj ambʼil jaʼlo, ateʼ nim xjal che kbʼel najsaʼn. Kyjuʼtzun, il tiʼj tuʼn tok tilil quʼn tuʼn qpakbʼan tuʼnju ojtzqiʼn quʼn qa jaku che klet xjal tuʼnju tqanil in xi qiʼn kye. Qajbʼil tuʼn tbʼant tkyaqilju jaku bʼant quʼn tuʼn qonin kyiʼj xjal tuʼn kykyaj anqʼin.
Yekʼinkuya qa aju mas nim toklen toj twitza aju pakbʼabʼil (Qʼonka twitza tiʼj taqikʼ 17)
17. ¿Alkye tten in nel qnikʼ tiʼj qa jaku tzul xitbʼil toj alkyexku ambʼil?
17 Tkyaqil jlu in tzaj tyekʼun qa in che japun qe yol e kyaj qʼamaʼn toj Tyol Dios ex qa noq chʼintl ambʼil atx tuʼn tul xitbʼil. Toj chʼintl ambʼil che kbʼel najsaʼn nya ax tok okslabʼil tuʼn Organización de las Naciones Unidas ex kyuʼn qeju kawbʼil in che onin tiʼj (Apocalipsis 17:16). ¿Atxpe nimxix ambʼil tuʼn tikʼ jlu? Miʼn. Bʼaʼn tuʼn ttzaj qnaʼn qa kbʼel tqʼoʼn Dios toj kyanmi aj kawil tuʼn kyok lipen kyiʼj nya ax tok okslabʼil. Jurat naj jaku bʼant jlu tuʼn ex toj alkyexku ambʼil (Apocalipsis 17:17). Noq chʼintl ambʼil atx te tkyaqilju tokx tjaqʼ tkawbʼil Satanás. Tuʼntzunju, kukx qbʼinx qe nabʼil aju tzaj tqʼamaʼn Jesús: «Ten kykwente kyiʼje tuʼn miʼn tel tzpet kynabʼle tuʼn achbʼil te twitz txʼotxʼ ex tuʼn kʼaj qʼeʼn ex tuʼnju tichaq in bʼaj kykʼuʼje tiʼj, mya yajku in kanunku tqʼijlalil jlu kyibʼaje» (Lucas 21:34, 35; Apocalipsis 16:15). Kukx qo xqʼuqin ex atz qqʼonk qwiʼ tiʼj tuʼn qajbʼen te Jehová. Qeʼk qkʼuʼj tiʼj qa che kletel tuʼn aʼyeju in che xqʼuqin ex aʼyeju bʼinchaʼn kyten (Isaías 64:4).
18. ¿Alkye xjel tzul tzaqʼweʼn toj juntl xnaqʼtzbʼil?
18 Akux in kubʼ qyoʼn qʼij tuʼn tul xitbʼil, kukx qbʼinx nabʼil tqʼama Judas, aju ok lepeʼ tiʼj Jesús. Tqʼama Judas tuʼn tkubʼ qchʼiysaʼn qʼuqbʼil qkʼuʼj, tuʼn kukx qnaʼn Dios ex tuʼn tok qxqʼuqin qamiwbʼil tukʼil Dios akux in qo yon tiʼj qʼij tuʼn ttzaj toyin qchwinqlal te jumajx (Judas 20, 21). ¿Alkyetzun tten jaku kubʼ qyekʼun qa ax tok in qo yon tuʼn qanqʼin naj toj akʼaj Txʼotxʼ? Qo xnaqʼtzal tiʼj jlu toj juntl xnaqʼtzbʼil.
^ taqik' 1 Kkanetel chʼintl tqanil tuʼna kyiʼj qe yol e kyaj qʼamaʼn tiʼj Mesías ex alkye tten japun bʼaj kywiʼ tojju uʼj ¿Tiʼ in tzaj t-xnaqʼtzaʼnxix Tyol Dios?, toj t-xaq 200.
