1, 2. a) ¿Tiquʼn qʼuqli kykʼuʼj junjun testigo de Jehová qa kʼujlaʼn tuʼn Jehová aqeju tmajen? b) ¿Alkye tten o qo kubʼ tbʼinchaʼn Jehová?

¿QʼUQLI teya tkʼuʼj tiʼj qa kʼujlaʼn tuʼn Jehová aqeju in che ajbʼen te? Ximana kyiʼj qe techel lu: at jun ermana aju Taylene tbʼi, aju atxix ojtxe tajbʼil tuʼn tbʼant mas tuʼn aju mlay bʼant. Ex tuʼn jlu, tzaj bʼis toj tanmi. Toj nimku abʼqʼi, e yolin ermano tukʼil ex xi kyqʼamaʼn te tukʼil kʼujlabʼil tuʼn miʼn t-ximenxix tiʼj jlu. In tzaj tqʼamaʼn ermana Taylene qa noqwit mintiʼ tkʼujlabʼil Jehová tiʼj, mintiʼwtlo in tzaj tqʼoʼn qʼuqbʼil tkʼuʼj ex qe tnabʼil. At juntl ermana aju Brigitte tbʼi, o kyim tchmil ex o kyaj ten tjunalx kyukʼil kabʼe tal. In tzaj tqʼamaʼn ermana qa aju jun kyxol qeju tiʼchaq kwest tuʼn tbʼant toj ambʼil jaʼlo aju tuʼn kychʼiyset kʼwaʼl, ex qa mas kwest kye qeju kyjunalx ateʼ ik tzeʼn te. Noqtzun tuʼnj, qʼuqli tkʼuʼj Brigitte qa at tkʼujlabʼil Jehová tiʼj tuʼnju o tzʼonin tiʼj tuʼn tex twitz kʼixkʼoj ex twitz bʼis, ex tuʼnju mintiʼ o tzaj tqʼoʼn Jehová ambʼil tuʼn ttzaj mastl nya bʼaʼn tiʼj aju mlayx tzikʼx tuʼn (1 Corintios 10:13). At juntl ermana aju Sandra tbʼi, tok jun tyabʼ aju mlayx qʼanit. Jun maj, toj jun nimaq chmabʼil, ok laqʼeʼ jun ermana tiʼj aju mintiʼtoq ojtzqiʼn tuʼn, tuʼn tok tqʼolbʼeʼn ex tuʼn tyolin tukʼil Sandra. Tzaj tqʼamaʼn tchmil Sandra qa nimxix tzalaj  Sandra tuʼnju bʼant tuʼn ermana. Tqʼama tchmil Sandra qa in tnaʼn tkʼujlabʼil Jehová axpe ikx tiʼj junjun tal yekʼbʼil te kʼujlabʼil kyuʼn erman.

² Aqoʼ xjal qoʼ, qajbʼil tuʼn tok qkʼujlaʼn juntl ex tuʼn qok kʼujlaʼn tuʼn juntl, tuʼnju ik tten o qo kubʼ tbʼinchaʼn Jehová. Noqtzun tuʼnj, qa ma tzaj qyabʼ, qa mintiʼ qpwaq ex qa mijun xjal tajbʼil tuʼn tok tbʼiʼn Tyol Dios aj qex pakbʼal, jaku tzaj qbʼis tuʼn. Axpe ikx jaku kubʼ qximen qa ya mintiʼtl in qo ok tkʼujlaʼn Jehová. Qa in qnaʼn jlu, bʼaʼn tuʼn ttzaj qnaʼn qa in ximen Jehová qiʼj ex qa tajbʼil tuʼn tonin qiʼj. Mlayx qo kyaj ttzaqpiʼn qa kukx xqo ajbʼen te (Isaías 41:13; 49:15).

3. ¿Tiʼ jaku tzʼonin qiʼj tuʼn tqeʼ qkʼuʼj qa kʼujlaʼn qoʼ tuʼn Jehová?

³ Aʼyeju erman ma qo yolin kyiʼj, qʼuqlixix kykʼuʼj qa onin Dios kyiʼj kyoj ambʼil kwest. Ax ikx qe, jaku ten qʼuqbʼil qkʼuʼj tiʼj qa tajbʼil Jehová tuʼn tonin qiʼj (Salmo 118:6, 7). Qa ma qo ximen kyiʼj qe tiʼchaq o tzaj tqʼoʼn qe, kqeʼbʼil qkʼuʼj qa kʼujlaʼn qoʼ tuʼn (kjawil uʼjit Salmo 77:11, 12). Toj xnaqʼtzbʼil lu, qo xnaqʼtzal tiʼj kyaje tbʼanel o tzaj tqʼoʼn Jehová qe: aju tbʼinchbʼen, aju Tuʼjil Tyol, aju naʼj Dios ex aju chojbʼil.

4. ¿Tiʼ in nel qnikʼ tiʼj aj tok qqʼoʼn qwitz tiʼjju o kubʼ tbʼinchaʼn Jehová?

⁴ Aj tok qqʼoʼn qwitz tiʼjju o bʼaj tbʼinchaʼn Jehová, in nel qnikʼ tiʼj qa nimxix kʼujlaʼn qoʼ tuʼn Jehová (Romanos 1:20). Jun techel, o kubʼ tbʼinchaʼn Txʼotxʼ qe ex tkyaqilju at tajbʼen tuʼn qanqʼin. Ax ikx, o tzaj tqʼoʼn nimxix wiq wabʼj qe tuʼntzun qtzalaj aj qwaʼn (Eclesiastés 9:7). At jun ermana te Canadá aju Catherine tbʼi, in tzaj tqʼamaʼn qa nimxix in tzalaj aj tok tqʼoʼn twitz tiʼjju in nikʼ aj tel bʼaj tuʼn tkubʼ ttxa cheʼw ex jbʼal ex aj kyxulin juntl maj qe tzeʼ. Tgan aj kyel poqʼchaj qe bʼech ex aj kymeltzʼaj qe chyuʼj, moqa pichʼ (pájaro) aqeju e ikʼ bʼet tuʼnju kubʼ ttxa cheʼw ex jbʼal. Nimxix in tzalaj aj tpon jun tzʼunin waʼl tiʼjju in kyaj tqʼoʼn te atz ttzi ventan te kosin. In tzaj tqʼamaʼn ermana lu qa at nim tbʼanel o tzaj tqʼoʼn Jehová qe, a jlu in tzaj tyekʼun qa nimxix kʼujlaʼn qoʼ tuʼn Jehová. Nimxix in tzalaj Qtat aj tok tqʼoʼn twitz tiʼjju o kubʼ tbʼinchaʼn ex tajbʼil tuʼn qtzalaj tiʼj ax ikx (Hechos 14:16, 17).

5. ¿Tiʼ juntl in tzaj tyekʼun qe qa kʼujlaʼn qoʼ tuʼn Jehová?

⁵ Aju juntl in tzaj tyekʼun qe qa kʼujlaʼn qoʼ tuʼn Jehová aju alkye tten o qo kubʼ tbʼinchaʼn. O qo kubʼ tbʼinchaʼn Jehová tuʼn tbʼant aqʼuntl quʼn aju jaku qo tzalaj tuʼn ex aju jaku kubʼ qnaʼn tuʼn qa at qajbʼen (Eclesiastés 2:24). O tzaj tqʼoʼn Txʼotxʼ qe tuʼn tkubʼ qnojsaʼn kyuʼn xjal, tuʼn qawan twitz, tuʼn kyok qxqʼuqin qe txkup ex qeju txqantl tchʼisbʼen o che kubʼ tbʼinchaʼn (Génesis 1:26-28). Nya oʼkxju, ax ikx o qo kubʼ tbʼinchaʼn tuʼn tel qkanoʼn qe tbʼanel tmod (Efesios 5:1).

6. ¿Tiquʼn bʼaʼn tuʼn t-xi qqʼoʼn chjonte tiʼjju Tyol Dios o tzaj qʼoʼn qe?

⁶ O tzaj tqʼoʼn Jehová Tuʼjil Tyol qe tuʼnju kʼujlaʼn qoʼ tuʼn. Bʼaʼn tuʼn t-xi qqʼoʼn chjonte tiʼj oyaj lu tuʼnju in tzaj tqʼoʼn ambʼil qe tuʼn tel qnikʼ tiʼj alkye Jehová ex tiʼ in tnaʼn kyiʼj xjal. Jun techel, in tzaj tqʼamaʼn Xjan uʼj tiʼ tnaʼ Jehová tej nimku maj mintiʼ e nim aj Israel te. In tzaj tqʼamaʼn Salmo 78:38 jlu: «Nimku maj tzaj qʼaqʼan tkʼuʼj Dios kyiʼj, kubʼ tnajsaʼn kybʼinchbʼen mya bʼaʼn ex mintiʼ e naj tuʼn, nimku maj mintiʼ tzaj tqʼoj kyiʼj, ex mintiʼ xi tqʼoʼn ambʼil tuʼn ttzaj ttxʼuʼjil». Qa ma qo ximen tiʼj taqikʼ Tyol Dios lu, ok qo tzajel tonin tuʼn tqeʼ qkʼuʼj qa nimxix kʼujlaʼn qoʼ tuʼn Jehová ex qa in ximen qiʼj (kjawil uʼjit 1 Pedro 5:6, 7).

7. ¿Tiquʼn jun qʼinumabʼil in nel Tyol Dios toj qwitz?

⁷ Jun qʼinumabʼil in nel Tyol Dios toj qwitz. ¿Tiquʼn? Tuʼnju in najbʼen tuʼn Jehová tuʼn tyolin qukʼil. Qa toj tumel xyolin jun mambʼaj tukʼil tkʼwaʼl, in chʼiy qʼuqbʼil kykʼuʼj ex in chʼiy  kykʼujlabʼil kyxolx. A Jehová Qtat aju at nimxix tkʼujlabʼil qiʼj. Ex ax tok mintiʼ in nok qqʼoʼn qwitz tiʼj ex mintiʼ in xi qbʼiʼnxix tqʼajqʼajel twiʼ, noqtzun tuʼnj, in najbʼen Tuʼjil Tyol tuʼn, tuʼn tyolin qukʼil. Tuʼntzunju, aj tkubʼ quʼjin, il tiʼj tuʼn tok qqʼoʼn qwiʼ tiʼjju in tzaj tqʼamaʼn (Isaías 30:20, 21). Iktzun tten kʼelel qnikʼ qa tajbʼil Jehová tuʼn ttzaj tyekʼun qbʼe ex qa tajbʼil tuʼn qok t-xqʼuqin. Ex ok kʼokel qojtzqiʼnxix Jehová ex kʼokel qʼuqeʼxix qkʼuʼj tiʼj (kjawil uʼjit Salmo 19:7-11 ex Proverbios 1:33).

8, 9. a) ¿Tiʼ tajbʼil Jehová tuʼn tok qbʼiʼn? b) Qʼamantza jun techel tiʼj qa nya atz in nok tqʼoʼn Jehová twiʼ tiʼjju nyaxix toj tumel in bʼant quʼn.

⁸ Tajbʼil Jehová tuʼn tok qbʼiʼn qa nya atz in nok tqʼoʼn twiʼ tiʼjju nyaxix toj tumel in bʼant quʼn, sino tiʼjju bʼaʼn in nbʼant quʼn (2 Crónicas 16:9). Ik tzeʼn ikʼ tiʼj jun aj kawil te Judá aju Jehosafat tbʼi. At jun tiʼ nyaxix toj tumel bʼant tuʼn tuʼnju ok tmojbʼan tibʼ tukʼil Acab, aju aj kawil te Israel, tuʼn kyxiʼ qʼojil kyiʼj xjal te Siria. Attoq 400 sanjel nya ax tok qe, xi kyqʼamaʼn te Acab qa ok che kambʼal toj qʼoj. Noqtzun tuʼnj, aju ax tok t-sanjel Dios Micaya tbʼi, xi tqʼamaʼn te Jehosafat ex te Acab tuʼn miʼn kyxiʼ tuʼnju mlaytoq che kambʼan toj qʼoj. Ex ikʼ aju tqʼama Micaya. Kyim Acab toj qʼoj, ex chʼixmi kyim Jehosafat. Ex xitzun tqʼamaʼn Jehová te Jehú tuʼn t-xi kawit Jehosafat. Noqtzun tuʼnj, ax ikx tuʼn t-xi tqʼamaʼn jlu te Jehosafat: «At junjun bʼaʼn ma tbʼinchaya» (2 Crónicas 18:4, 5, 18-22, 33, 34; 19:1-3).

 ⁹ ¿Alkye junjun bʼaʼn otoq kubʼ tbʼinchaʼn Jehosafat? Tej otoqxi tzikʼ ambʼil, xi tqʼamaʼn kye xjal nim kyoklen ttxlaj, kye aj Leví ex kye pal tuʼn kyxiʼ toj tkyaqil Judá tuʼn t-xi kyqʼoʼn xnaqʼtzbʼil kye xjal kyiʼj tley Dios. Nimxix tbʼanel tzaj tuʼn jlu, axpe ikx qeju xjal te junjuntl tnam el kynikʼ tiʼj Jehová (2 Crónicas 17:3-10). At jun nya bʼaʼn bʼant tuʼn Jehosafat, noqtzun tuʼnj, mintiʼ ikʼ tnaʼl tuʼn Jehová aju junjun bʼaʼn otoq kubʼ tbʼinchaʼn. A jlu in tzaj tyekʼun qe qa ax tok qkyaqilx jaku qo el txalpaj tiʼj jun tiʼ, noqtzun tuʼnj, qa ma tzʼok tilil quʼn tuʼn qajbʼen te Jehová, kukx qo okel tkʼujlaʼn ex mlay tzʼel naj tiʼj tkʼuʼj aju bʼaʼn otoq kubʼ qbʼinchaʼn.

10, 11. a) ¿Tiquʼn in xi qqʼamaʼn qa jun oyaj aju naʼj Dios o tzaj tqʼoʼn Jehová qe? b) ¿Alkye tten jaku tzaj ttzaqʼweʼn Jehová qnaʼj Dios? (Qʼonka twitza tiʼj tnejel tilbʼilal.)

¹⁰ ¿Tiʼ in bʼant tuʼn jun tbʼanel tatbʼaj qa tajbʼil tkʼwaʼl tuʼn tyolin tukʼil? Tuʼnju in ximen tiʼj tkʼwaʼl, in nel tpaʼn ambʼil tuʼn tkubʼ tbʼiʼn ex tuʼn tel tnikʼ tiʼj tiʼ in tnaʼn tkʼwaʼl. A Jehová Qtat, ax ikx te in ximen qiʼj. Kyjuʼtzun, aj qnaʼn Dios te, in tzaj tqʼoʼn twiʼ qiʼj. Nimxix toklen toj qwitz aju jaku qo yolin tukʼil Jehová.

¹¹ Jun oyaj aju naʼj Dios o tzaj tqʼoʼn Jehová qe. ¿Tiquʼn? Tuʼnju in tzaj tqʼoʼn ambʼil qe tuʼn qyolin tukʼil toj alkyexku ambʼil qajbʼil. A Jehová qamiw ex kukx at ambʼil tiʼj tuʼn ttzaj tbʼiʼn qnaʼj Dios. Aju Taylene xqo yolin tiʼj toj tnejel taqikʼ, tqʼama jlu: «Noq tiʼxku jaku t-xi tqʼamaʼne te ex jniʼxku ambʼil jaku txi tiʼn». Aj t-xi qqʼamaʼn te Jehová aju in qnaʼn, jaku tzaj tqʼoʼn tzaqʼwebʼil qe toj jun taqikʼ Tyol, toj jun quʼj moqa jaku tzʼajbʼen jun erman tuʼn. In qo tzaj tbʼiʼn Jehová ex in nel tnikʼ qiʼj, axpe ikx qa mintiʼ juntl in nel tnikʼ qiʼj. Juntl yekʼbʼil tiʼj nimxix tkʼujlabʼil aju aj ttzaj ttzaqʼweʼn qnaʼj Dios.

12. ¿Tiquʼn bʼaʼn tuʼn qxnaqʼtzan kyiʼj qeju naʼj Dios in che kanet quʼn toj Tyol Dios? ¿Alkyeqe junjun kyxol qeju naʼj Dios lu?

¹² Aʼyeju naʼj Dios in che kanet quʼn toj Tyol Dios, jaku tzaj kyqʼoʼn nim xnaqʼtzbʼil qe. Tuʼntzunju, bʼaʼn tuʼn qxnaqʼtzan junjun maj kyiʼj aj t-xi qqʼoʼn ambʼil te Jehová kyukʼil toj qja. Jaku qo xnaqʼtzan tiʼj alkye tten kubʼ tin tibʼ Jonás tuʼn tnaʼn Dios toj tkʼuʼj matij kyiẍ (Jonás 1:17–2:10). Ax ikx jaku qo xnaqʼtzan tiʼj axix tok tnaʼj Dios Salomón tej tbʼant tja Dios (1 Reyes 8:22-53). Ex jaku qo ximen tiʼj naʼj Dios kyaj t-xnaqʼtzaʼn Jesús (Mateo 6:9-13, TNM). Qa ma tzʼel qpaʼn ambʼil tuʼn qximen kyiʼj qe naʼj Dios ik tzeʼn qe jlu, mas tbʼanel kʼokeltl qnaʼj Dios. Ax ikx, mintiʼ tuʼn tikʼ tnaʼl quʼn qa il tiʼj tuʼn kukx qnaʼn Dios. Iktzun tten «kqebʼil» qkʼuʼj «tuʼn Dios» ex «mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin» qanmi ex qximbʼetz. Qa toj tkyaqil maj xqo naʼn Dios, kukx kxel qqoʼn chjonte tiʼj tkʼujlabʼil Jehová (Filipenses 4:6, 7).

13. ¿Alkye ambʼil in tzaj qʼoʼn qe tuʼn chojbʼil?

¹³ Aju juntl yekʼbʼil tiʼj tkʼujlabʼil Jehová qiʼj aju tej ttzaj tqʼoʼn chojbʼil. Tzaj tqʼoʼn oyaj lu qe «tuʼntzun tten qchwinqlal» (1 Juan 4:9). Tzaj tchikʼbʼaʼn apóstol Pablo qa mintiʼxlo jun jaku t-xi tqʼoʼn tchwinqlal tiʼj «jun xjal tzʼaqlxix» ex qa noqlo junjunx jaku t-xi tqʼoʼn tchwinqlal tiʼj «jun xjal bʼaʼn». Ax ikx tqʼama Pablo qa atzunte Dios kubʼ tyekʼun qa kʼujlaʼn qoʼ tuʼn tej ttzaj t-samaʼn Tkʼwaʼl tuʼn tkyim qiʼj «tej aj ilxtoq qoʼ» (Romanos 5:6-8). Aju chojbʼil in tzaj tqʼoʼn ambʼil qe tuʼn qok te tamiw Jehová ex atzun yekʼbʼil mas nim toklen tiʼj tkʼujlabʼil Jehová.

14, 15. a) ¿Alkye tten in nonin chojbʼil kyiʼj qeju okslal skʼoʼn maj qe? b) ¿Alkye tten in nonin chojbʼil kyiʼj qeju nya skʼoʼn maj qe?

¹⁴ ¿Alkye tten in nonin chojbʼil kyiʼj qeju okslal skʼoʼn maj qe? In kynaʼn tkʼujlabʼil Jehová te jun tbʼanel tten (Juan 1:12, 13; 3:5-7). O  che jaw tjyoʼn Jehová tuʼn xewbʼaj xjan, ex tuʼntzunju, o che ok te tkʼwaʼl jaʼlo (Romanos 8:15, 16). Tqʼama apóstol Pablo qa kykyaqil qe jlu ma che «kubʼ tqʼuqbʼaʼn» Dios «tuj kyaʼj» (Efesios 2:6). Noqtzun tuʼnj, qa kukx ateʼ junjun okslal skʼoʼn maj tzalu twitz Txʼotxʼ, ¿tiquʼn tqʼama apóstol Pablo jlu? Tuʼnju o txi tqʼoʼn Jehová qʼuqbʼil kykʼuʼj kykyaqil qe jlu tuʼn kyanqʼin te jumajx toj kyaʼj (Efesios 1:13, 14; Colosenses 1:5).

¹⁵ ¿Ex alkye tten in nonin chojbʼil kyiʼj qeju mintiʼ o che jaw jyoʼn tuʼn kyxiʼ toj kyaʼj? Qa ma tzʼok qeʼ kykʼuʼj tiʼj chojbʼil, jaku che ok te tamiw Dios. Toj ambʼil tzul, ax ikx jaku che ok te tkʼwaʼl Dios ex jaku che anqʼin tej jumajx twitz Txʼotxʼ. Ik tzeʼn in nel qnikʼ tiʼj, aju chojbʼil in tzaj tyekʼun qa kʼujlaʼn kykyaqil xjal tuʼn Jehová (Juan 3:16). Nimxix in qo tzalaj tuʼnju qa kukx ma qo ajbʼen te Dios, tzul tqʼoʼn aju mas tbʼanel qanqʼibʼil toj Tbʼanel Najbʼil. Ax tok jaku txi qqʼamaʼn qa aju chojbʼil atzun mas nimxix yekʼbʼil tiʼj tkʼujlabʼil Jehová qiʼj. Tuʼntzunju, kukx qyekʼinku qa in xi qqʼoʼn chjonte tiʼj tuʼn tkyaqil qanmi.

16. ¿Tiʼ kbʼantel quʼn qa ma qo ximen tiʼj alkye tten in tzaj tyekʼun Jehová tkʼujlabʼil?

¹⁶ In tzaj tyekʼun Jehová tkʼujlabʼil te nimku tten. Tqʼama aj kawil David jlu: «Nman Dios, maʼxix t-xilen t-ximbʼetza tuj nwitze porque nimxix kyajlal. Noqwit chin ok tene ajlal kye, maslo nim kyajlal twitz ttxa tzʼaʼn» (Salmo 139:17, 18). Qa ma qo ximen tiʼj tkyaqil tten in tzaj tyekʼun Jehová tkʼujlabʼil qiʼj, mas kʼokel qkʼujlaʼn ex mas qo ajbʼel te tukʼil tkyaqil qkʼuʼj.

17, 18. ¿Alkyeqe tten jaku kubʼ qyekʼun qa kʼujlaʼn Jehová quʼn?

¹⁷ ¿Alkye tten jaku txi qyekʼun te Jehová qa kʼujlaʼn quʼn? Jun tumel, aju qa ma qo pakbʼan tiʼj Tkawbʼil tuʼn tkyaqil qkʼuʼj (Mateo 24:14; 28:19, 20). Juntl tumel, aju qa kukx xqo ajbʼen te aj ttzaj nya bʼaʼn qiʼj aju in nok qʼuqbʼil qkʼuʼj tuʼn toj malbʼil (kjawil uʼjit Salmo 84:11 ex Santiago 1:2-5). Axpe ikx qa in tzaj nimxix nya bʼaʼn qiʼj, ojtzqiʼn tuʼn Jehová tiʼ in nikʼx quʼn ex qo tzajel tonin tuʼnju nimxix kʼujlaʼn qoʼ tuʼn (Salmo 56:8).

¹⁸ Ma qo xnaqʼtzan toj xnaqʼtzbʼil lu tiʼj junjuntl tumel tuʼn t-xi qyekʼun te Jehová qa kʼujlaʼn quʼn. Tnejel, aju qa ma qo ximen tiʼj tkyaqilju tbʼanel tbʼinchbʼen. Tkabʼ, aju qa ma kubʼ qxnaqʼtzaʼnxix Tyol Dios. Toxin, aju qa ma qo naʼn Dios toj tkyaqil maj tuʼntzun tchʼiy qamiwbʼil tukʼil Jehová. Ex tkyajen, aju qa ma qo ximen tiʼj tbʼanelxix oyaj o tzaj tqʼoʼn Jehová qe, aju chojbʼil (1 Juan 2:1, 2). Qa ma bʼant tkyaqil jlu quʼn, kqeʼbʼil qkʼuʼj qa kʼujlaʼn qoʼ tuʼn Jehová, nya oʼkxju, ax ikx qe mas kchʼiyil qkʼujlabʼil tiʼj tkyaqil qʼij.