1. ¿Toj alkye ambʼil in qo anqʼin?

IN QO anqʼin toj jun ambʼil jatumel at nimxix nya bʼaʼn. Toj 1914 tzaj tzyet «mankbʼil tqʼijlalil», moqa bʼajsbʼil tqʼijlalil. Atxix toj ambʼil aju, kukx tchʼiy nya bʼaʼn (2 Timoteo 3:1-5). Ex ojtzqiʼn quʼn qa kukx kchʼiyil nya bʼaʼn tuʼnju in tzaj tqʼamaʼn Tyol Dios qa toj ambʼil lu, ok kchʼiyil nya bʼaʼn toj kyanmi xjal (2 Timoteo 3:13).

2. ¿Alkye tbʼanel in nel toj kywitz xjal jaʼlo? (Qʼonka twitza tiʼj tnejel tilbʼilal.)

² Toj ambʼil jaʼlo, at nim xjal tbʼanel in nel toj kywitz aju junjun nya bʼaʼn in nel tikʼun Jehová, ik tzeʼn bʼiybʼil, yaẍbʼil, kyaqʼun chman moqa aju at toklen kyukʼil taqʼunal Tajaw il. In che kubʼ kyqʼoʼn xjal lu te tbʼanel toj Internet, toj televisión, toj cine ex kyoj uʼj. Ma che chʼixpuj ley kyoj junjun tnam ex, jaʼlo, in tzaj kyqʼoʼntl ley ambʼil tuʼn tkubʼ bʼinchet junjun tiʼchaq aju nya bʼaʼn in nel toj kywitz xjal ojtxe. Atzunte Jehová mintiʼ o che kubʼ tchʼixpuʼn qe tley ex kukx in nel tikʼun aju nya bʼaʼn (kjawil uʼjit Romanos 1:28-32).

3. ¿Tiʼ kyximbʼetz xjal at qiʼj tuʼnju in chex qbʼiʼn tkawbʼil Dios?

³ Ax ikx toj ambʼil tej kyten tnejel okslal, tbʼaneltoq in nel toj  kywitz xjal aju bʼiybʼil ex aju yaẍbʼil. Noqtzun tuʼnj, nya bʼaʼn el toj kywitz okslal, tuʼnju in xi kybʼiʼn qeju tkawbʼil Dios. Tuʼntzunju, nim xjal mintiʼ el kynikʼ kyiʼj, e xmayin kyiʼj ex i el ikʼun kyuʼn (1 Pedro 4:4). Ax ikx toj ambʼil jaʼlo, tuʼnju in chex qbʼiʼn qeju tkawbʼil Dios, at nim xjal mintiʼ in nel kynikʼ qiʼj. Bʼiʼx in tzaj tqʼamaʼn Tyol Dios qa kykyaqil qeju in che ok lepeʼ tiʼj Jesús ok che elel ikʼun (2 Timoteo 3:12).

4. Qa qajbʼil tuʼn t-xi qnimen aju in tzaj tqʼamaʼn Dios, ¿tiʼ mintiʼ tuʼn tbʼant quʼn?

⁴ Qa qajbʼil tuʼn t-xi qnimen aju in tzaj tqʼamaʼn Dios, mintiʼ tuʼn tok qkʼujlaʼn «aju achbʼil te twitz txʼotxʼ» ex «mi jun tiʼxti mya bʼaʼn at twitz txʼotxʼ» (kjawil uʼjit 1 Juan 2:15, 16). In tzaj tqʼamaʼn Tyol Dios qa tkyaqilju at twitz Txʼotxʼ tokx tjaqʼ tkawbʼil Satanás. In che ajbʼen qe okslabʼil, qe kawbʼil, qe kʼaẍjel ex qeju qʼobʼil tqanil tuʼn Satanás tuʼntzun t-sbʼuʼn kyiʼj xjal (2 Corintios 4:4; 1 Juan 5:19). Qa nya qajbʼil tuʼn qkubʼ sbʼuʼn tuʼnju at twitz Txʼotxʼ, mintiʼ tuʼn tok qamiwin qibʼ kyukʼil nya bʼaʼn xjal. In tzaj tqʼamaʼnxix Tyol Dios jlu qe: «Qa ma txi kyukʼin kyibʼe kyukʼil xjal mya bʼaʼn, ok tzakjel kynabʼle» (1 Corintios 15:33).

5, 6. a) ¿Alkyeqe mintiʼ tuʼn tok qamiwin qibʼ kyukʼil? b) ¿Tiquʼn mintiʼ tuʼn tok qamiwin qibʼ tukʼil jun xjal in kubʼ tbʼinchaʼn nya bʼaʼn?

⁵ Qa qajbʼil tuʼn kukx qok te tamiw Dios, mintiʼ tuʼn tok qamiwin qibʼ kyukʼil qeju in kubʼ kybʼinchaʼn nya bʼaʼn ex kyukʼil qeju in kyqʼamaʼn qa ajbʼel qe te Jehová ex mintiʼ in che nimen te. Kyjuʼtzun, qa at jun kyxol qe jlu in kubʼ tbʼinchaʼn jun matij il ex mintiʼ in najtz tiʼj tanmi, mintiʼtl in qox yolin te ex mintiʼ in nel qpaʼn ambʼil tuʼn qten tukʼil (Romanos 16:17, 18).

⁶ Qa ma tzʼok qamiwin qibʼ tukʼil jun xjal aju in kubʼ tbʼinchaʼn nya bʼaʼn, ax ikx qe jaku qo ok ten bʼinchal nya bʼaʼn. ¿Tiquʼn? Tuʼnju chʼixmi kykyaqil xjal kyajbʼil tuʼn kyok ik tzeʼn qe kyamiw ex tuʼn kyten bʼaʼn kyukʼil. Jun techel, qa ma tzʼok qamiwin qibʼ tukʼil jun xjal in yaẍin, ax ikx qe jaku kubʼ qbʼinchaʼn jlu. O tzikʼ jlu kyiʼj junjun testigos de Jehová. At junjun ajtz tiʼj kyanmi, ex at junjuntl mintiʼ ajtz tiʼj kyanmi ex i ex lajoʼn toj ttnam Jehová (1 Corintios 5:11-13). Qa mintiʼx sajtz tiʼj kyanmi, ok kʼikʼel kyiʼj aju in tzaj tqʼamaʼn 2 Pedro 2:20-22 (kjawil uʼjit).

7. ¿Alkyeqe bʼaʼn tuʼn tok qamiwin qibʼ kyukʼil?

⁷ Ax tok il tiʼj tuʼn qok te tbʼanel xjal kyukʼil kykyaqil xjal. Noqtzun tuʼnj, mintiʼ tuʼn tok qamiwin qibʼ kyukʼil xjal mintiʼ in che bʼin te Dios. Jun techel, aju jun testigo de Jehová tajbʼil tuʼn tkubʼ mojeʼ, nya bʼaʼn tuʼn tok ten yolil tukʼil jun xjal naʼmx tjaw aʼ twiʼ. Mas nim toklen tuʼn qok te tamiw Dios twitz tuʼn qok te tamiw jun xjal mintiʼ kʼujlaʼn Jehová tuʼn. Oʼkx jaku qo ok te kyamiw qeju in che anqʼin ik tzeʼn tajbʼil Dios. Tqʼama Jesús jlu: «Alkyeju in tbʼinchaʼn tajbʼil Dios, atzun witzʼine, ex atzun wanbʼe» (Marcos 3:35).

8. ¿Tiʼ tzaj kyiʼj aj Israel tuʼnju ok kyamiwen kyibʼ kyukʼil nya bʼaʼn xjal?

⁸ Aʼyeju in nok kymojbʼan kyibʼ kyukʼil nya bʼaʼn xjal in tzaj kyiʼn nim nya bʼaʼn kyibʼaj. Ik tzeʼn ikʼ kyiʼj aj Israel. Tej chʼixtoq kyokx toj Txʼotxʼ Tziyen maj tuʼn Jehová, xi tqʼamaʼn Jehová kye tuʼn mi tok kymojbʼan kyibʼ kyukʼil xjal in che anqʼin atztzu. Xi tqʼamaʼn jlu kye: «Miʼn che kubʼ ẍmejeʼye kywitz kydios ex miʼn che kʼulune kye. Miʼn kybʼinchaye ik tzaʼn kye in kybʼinchaʼn. Noq oʼkx che bʼajel kybʼuchine qe tilbʼilal ex qe abʼj nnoʼk kyqʼoʼn te xjan. Che kʼulune weye, aqine Kymane ex Kydiose» (Éxodo 23:24, 25). Noqtzun tuʼnj, chʼixme kykyaqil aj Israel mintiʼ xi kybʼiʼn jlu  ex e ok ten bʼinchal nimaq il (Salmo 106:35-39). ¿Tiʼ tzaj kyiʼj tuʼn jlu tej tbʼet ambʼil? Ya mintiʼtl e ok tqʼoʼn Jehová te ttnam ex jaw tjyoʼn Jehová aju kʼloj okslal tuʼn kyok te ttnam (Mateo 23:38; Hechos 2:1-4).

9. ¿Tiquʼn nya bʼaʼn qeju nim película, nim uʼj, nim bʼitz ex nim tembʼil te Internet?

⁹ At nim película, nim uʼj, nim programa te televisión, nim bʼitz ex nim tembʼil te Internet nya bʼaʼn qe, tuʼnju jaku tzaj nya bʼaʼn qxol kyuʼn tukʼil Jehová. Ik kyten ik tzeʼn qeju nya bʼaʼn amiw aju jaku tzaj kyqʼamaʼn qe tuʼn tok qe qkʼuʼj tiʼjju tokx tjaqʼ tipumal Satanás ex nya tiʼj Jehová nix kyiʼj tyol o che tzaj ttziyen. Tuʼntzunju, il tiʼj tuʼn tok qxqʼuqin qibʼ. Mintiʼ in jaw quʼjin, mintiʼ in nok qbʼiʼn ex mintiʼ in nok qqʼoʼn qwitz tiʼjju jaku tzaj tqʼoʼn qajbʼil tiʼjju at twitz Txʼotxʼ (Tito 2:12).

10. ¿Tiʼ kbʼajel kyiʼj nya bʼaʼn película, kyiʼj nya bʼaʼn bʼitz, kyiʼj uʼj ex kyiʼj nya bʼaʼn tembʼil te Internet?

¹⁰ Noq chʼintl ambʼil atx tuʼn tkubʼ najsaʼn tkyaqilju tokx tjaqʼ tkawbʼil Satanás ex ya min che tentl nya bʼaʼn película, nya bʼaʼn uʼj ex nya bʼaʼn tembʼil te Internet. In tzaj tqʼamaʼn Tyol Dios qa aju at twitz Txʼotxʼ kbʼel najsaʼn, ex qa aqeju in kubʼ kybʼinchaʼn tajbʼil Dios che anqʼil te jumajx (1 Juan 2:17). In tzaj ttziyen uʼj te Salmos qa che kbʼel najsaʼn nya bʼaʼn xjal, ex qa aqeju bʼaʼn xjal che anqʼil te jumajx twitz Txʼotxʼ toj tzalajbʼil ex toj mujbʼabʼil (Salmo 37:9, 11, 29).

11. ¿Alkye tten in qo tzaj tonin Jehová tuʼn kukx qajbʼen te?

¹¹ Tqʼama Jesús toj jun naʼj Dios qa il tiʼj tuʼn ttenxix qojtzqibʼil tiʼj Jehová ex tiʼj Tkʼwaʼl qa qajbʼil tuʼn qanqʼin te jumajx (Juan 17:3). Ax Dios in qo tzaj tonin tuʼn tel qnikʼ tiʼj ex tuʼn kukx qajbʼen te. ¿Alkye tten? In najbʼen ttnam tuʼn. In che etz uʼj tuʼn ttnam, in che etz video ex in kubʼ tqʼoʼn tembʼil te Internet aju in tzaj t-xnaqʼtzaʼn qe tiʼ il tiʼj tuʼn tbʼant quʼn tuʼn qanqʼin te jumajx, nya ik tzeʼn in bʼant tuʼnju tokx tjaqʼ tipumal Tajaw il. Nya oʼkxju, ax ikx in qo tzaj t-xnaqʼtzaʼn ttnam Dios tiʼj Tuʼjil Tyol kyoj chmabʼil aʼyeju in che ok kyoj mas te 110,000 kʼloj okslal twitz tkyaqil Txʼotxʼ. Aju in nel qnikʼ tiʼj kyoj chmabʼil ex kyoj nimaq chmabʼil in qo tzaj tonin tuʼn tok qe mastl qkʼuʼj tiʼj Jehová ex tiʼjju o tzaj ttziyen (Hebreos 10:24, 25).

12. ¿Tiʼ in tzaj tyekʼun aju qa oʼkx tuʼn qkubʼ mojeʼ «tukʼil jun okslal»?

¹² Qa qajbʼil tuʼn qkubʼ mojeʼ, il tij tuʼn tok qxqʼuqin qibʼ. In tzaj tqʼamaʼn Tyol Dios qe qa mintiʼ tuʼn t-xi tzyet tuʼn qyolin tukʼil jun xjal aju mintiʼ in najbʼen te Jehová, tuʼnju junxitl qoʼ twitz ik tzeʼn spikʼun tukʼil qlolj (2 Corintios 6:14). Ax ikx in tzaj tqʼamaʼn Tyol Dios qa oʼkx qo kbʼel mojeʼ «tukʼil jun okslal» (1 Corintios 7:39). A jlu in tzaj tyekʼun qa oʼkx qo kbʼel mojeʼ tukʼil jun testigo de Jehová o jaw aʼ twiʼ ex in chex tbʼiʼn tkawbʼil Dios. Qa ma qo kubʼ mojeʼ tukʼil jun xjal aju kʼujlaʼn Jehová tuʼn, ok qo tzajel tonin xjal lu tuʼn kukx qajbʼen te Dios.

13. ¿Tiʼ xi tqʼamaʼn Jehová kye aj Israel?

¹³ Ojtzqiʼn tuʼn Jehová alkye jaku tzaj tiʼn tbʼanel qe. Ex kukx o tzaj tqʼamaʼn kye tmajen tuʼn kykubʼ mojeʼ kyukʼil xjal in che ajbʼen te. Jun techel, xi tqʼamaʼn kye aj Israel tuʼn miʼn kykubʼ mojeʼ kyukʼil xjal in che ajbʼen kye txqantl dios. ¿Tiquʼn? Tuʼnju jakutoq che ajbʼen aj Israel kye txqantl dios kyuʼn. Ax ikx xi tqʼamaʼn Jehová kye qa tzultoq nim tqʼoj kyiʼj ex qa oktoq che kbʼel tnajsaʼn qa mintiʼ xi kybʼiʼn tyol (Deuteronomio 7:3, 4).

14, 15. ¿Tiʼ tzaj tiʼj Salomón tuʼnju mintiʼ nimen te Jehová?

 ¹⁴ Tej tok Salomón te aj kawil kyibʼaj aj Israel, xi tqanin tnabʼil te Jehová. Tzaj ttzaqʼweʼn Jehová tnaʼj Dios ex ok ojtzqiʼn twitz tuʼnju jun aj kawil te aju at nimxix tnabʼil ex tuʼnju qʼinun qeju xjal ateʼkx tjaqʼ tkawbʼil. In tzaj tqʼamaʼn Tyol Dios qa tej tkanin jun aj kawil xuʼj te juntl tnam visitaril te, jaw labʼinxix tiʼj ex xi tqʼamaʼn te Salomón qa mas at tnabʼl ex mas qʼinintoq twitzju otoq tzʼok tbʼiʼn (1 Reyes 10:7). Noqtzun tuʼnj, at jun tiʼ bʼant tuʼn Salomón yajxitl aju in tzaj tyekʼun qe tiʼ jaku tzaj qiʼj qa mintiʼ xqo nimen ex qa ma qo kubʼ mojeʼ tukʼil jun xjal aju mintiʼ in najbʼen te Jehová (Eclesiastés 4:13).

¹⁵ Tzaj tqʼoʼn Jehová nim tbʼanel te Salomón, noqtzun tuʼnj, mintiʼ xi tbʼiʼn Salomón Tyol Dios ex kubʼ mojeʼ kyukʼil «nimku xuʼj stranjer xjal». ¡Ten 1,000 t-xuʼjil! ¿Tiʼ tzaj tiʼj tuʼnju mintiʼ nimen te Jehová? Tej ttijen ya mintiʼtl ajbʼenxix te Jehová kyuʼn qe xuʼj lu (1 Reyes 11:1-6). Qa ikʼ jlu tiʼj jun xjal at nimxix tnabʼil ik tzeʼn Salomón, ax ikx jaku tzikʼ jlu tiʼj alkyexku jun qe. Tuʼntzunju, axpe ikx mintiʼ tuʼn qok ten ximel tiʼj tuʼn qkubʼ mojeʼ tukʼil jun xjal mintiʼ kʼujlaʼn Jehová tuʼn.

16. Qa at jun testigo de Jehová otoq kubʼ mojeʼ tukʼil jun nya ajbʼel te Jehová aj tok te testigo de Jehová, ¿tiʼ kbʼantel tuʼn?

¹⁶ ¿Yajtzun qa at jun otoq kubʼ mojeʼ tukʼil jun nya ajbʼel te Jehová aj tok te testigo de Jehová? In tzaj tqʼamaʼn Tyol Dios jlu kye xuʼjilbʼaj: «Kynimanx kychmile tuʼntzun tokslan kychmile qa mya okslal kychmile tiʼj tyol Dios, mya tuʼn yol tuʼn tokslan, noq oʼkx tuʼnju kymodiye bʼaʼn» (1 Pedro 3:1). ¿Tiʼ in tzaj tyekʼun jlu? In  tzaj tyekʼun qa at jun xuʼj sok tilil tuʼn, tuʼn tok te jun tbʼanel xuʼjilbʼaj ex tuʼn kyjapun kawbʼil tuʼn aʼyeju ateʼkux toj Tyol Dios, jakulo tzʼok tqʼoʼn chmilbʼaj twitz tiʼj qa aj tikʼ junjun qʼij mas in nok t-xuʼjil te tbʼanel xjal ex, tuʼn jlu, jaku kubʼ t-ximen tuʼn tok te testigo de Jehová. O tzikʼ jlu kyiʼj nimku mejebʼleʼn. Ax ikx qeju chmilbʼaj nya testigo de Jehová kyxuʼjil, il tiʼj tuʼn tjapun kyuʼn aju in tzaj tqʼamaʼn 1 Pedro 3:1.

17, 18. a) ¿Tiʼ onin tiʼj Noé tuʼn tkyaj anqʼin tej ttzaj Nimxix Jbʼal? b) ¿Tiʼ onin kyiʼj tnejel okslal tuʼn kykyaj anqʼin tej tkubʼ xiten Jerusalén?

¹⁷ Aqeju nya bʼaʼn amiw jaku tzaj kyqʼamaʼn qe tuʼn miʼn qnimentl te Jehová. Atzun qeju tbʼanel amiw jaku qo tzaj kyonin tuʼn kukx qajbʼen te Jehová. Qo ximen tiʼj Noé. Tej tten Noé, nojni twitz Txʼotxʼ kyuʼn xjal aqeju oʼkx in che ximen tiʼj nya bʼaʼn tkyaqil ambʼil (Génesis 6:5). Puro nya bʼaʼn qe xjal, kyjuʼtzun, bʼaj t-ximen Jehová tuʼn kykubʼ tnajsaʼn kykyaqil xjal lu. Noqtzun tuʼnj, in tzaj tqʼamaʼn Tyol Dios qa ok Noé te jun tbʼanel xjal ex qa kukx xi tbʼiʼn aju tzaj tqʼamaʼn Jehová te (Génesis 6:7-9). ¿Tiʼ onin tiʼj tuʼn kukx tajbʼen te Jehová?

¹⁸ Mintiʼ ok tmojbʼan tibʼ Noé kyukʼil qeju mintiʼ kʼujlaʼn Jehová kyuʼn. Atz ok tmojbʼan tibʼ tukʼil t-xuʼjil, kyukʼil tkʼwaʼl ex qe kyxuʼjil, ex kykyaqil qe jlu atz ok kyqʼoʼn kywiʼ tiʼj tuʼn tjaw kybʼinchaʼn ark junx ex tuʼn kypakbʼan (2 Pedro 2:5). A jlu onin kyiʼj tuʼn kykyaj anqʼin tej ttzaj Nimxix Jbʼal. Toj ambʼil jaʼlo, kykyaqil xjal atz tzajni qe tiʼj Noé kyukʼix qe toj tja. Tuʼntzunju, jaku txi qqʼoʼn chjonte tuʼnju e nimen Noé ex tuʼnju mintiʼ ok kyamiwin kyibʼ kyukʼil nya bʼaʼn xjal. Ax ikx qeju tnejel okslal e nimen ex mintiʼ ok kymojbʼan kyibʼ kyukʼil qeju nya kʼujlaʼn Jehová kyuʼn. A jlu onin kyiʼj tuʼn kykyaj anqʼin tej tkubʼ xiten Jerusalén toj abʼqʼi 70 (Lucas 21:20-22).

19. ¿Alkyeqe jaku che onin qiʼj tuʼn kukx qajbʼen te Jehová?

¹⁹ Ik tzeʼn bʼant tuʼn Noé kyukʼil toj tja ex qeju tnejel okslal, mintiʼ tuʼn tok qamiwin qibʼ kyukʼil qeju mintiʼ kʼujlaʼn Jehová kyuʼn. At nim millón qerman aqeju kukx in che ajbʼen te Jehová, jaku che ok te qamiw. Jaku qo tzaj kyonin tuʼn kukx qajbʼen te Dios kyoj qeju bʼajsbʼil tqʼijlalil lu (1 Corintios 16:13; Proverbios 13:20). ¡Tbʼanelxixlo kʼelel aj qkyaj anqʼin aj tkubʼ najsaʼn nya bʼaʼn ex aj qanqʼin toj Tbʼanel Najbʼil tzul tqʼoʼn Jehová! Tuʼntzunju, qjyonktz tbʼanel qamiw kyoj bʼajsbʼil tqʼijlalil jaʼlo.