¿Oʼkxpe o qo kubʼ bʼinchaʼn tuʼn qaqʼunan, tuʼn qsaqchan, tuʼn qkubʼ mojeʼ, tuʼn kyten qkʼwaʼl ex tuʼn qtijen? ¿Moqa atx juntl tiquʼn o qo kubʼ bʼinchaʼn? (Job 14:1, 2). In tzaj tqʼamaʼn Tyol Dios qa axpe ikx qeju xjal at kynabʼil o che ximen tiʼj jlu. (Uʼjinxa Eclesiastés 2:11.)

Tuʼn tel qnikʼ tiʼj tiquʼn xqo kubʼ bʼinchaʼn, il tiʼj tuʼn tel qnikʼ tiʼj alkye tten tzaj tzyet anqʼibʼil. Aj tel kynikʼ xjal tiʼj alkye tten o kubʼ bʼinchaʼn qcerebro ex alkye tten o kubʼ bʼinchaʼn tkyaqil qxmilal, in nel kynikʼ tiʼj qa at Jun at tnabʼil o qo kubʼ tbʼinchaʼn. (Uʼjinxa Salmo 139:13, 14.) Qa at jun Bʼinchal qe, atlo jun tiquʼn xqo kubʼ tbʼinchaʼn. Qa ma tzʼel qnikʼ tiʼj tiquʼn xqo kubʼ tbʼinchaʼn, ok kʼonil qiʼj tuʼn qtzalajxix toj qanqʼibʼil.

Tej kykubʼ tbʼinchaʼn Dios xjal, xi tqʼoʼn jun tbʼanel kyaqʼun. Kubʼ t-ximen Dios tuʼn tkubʼ kynojsaʼn twitz Txʼotxʼ kyukʼil kykʼwaʼl, tuʼn tok Txʼotxʼ kyuʼn te jun tbʼanel najbʼil ex tuʼn kyanqʼin te jumajx. (Uʼjinxa Génesis 1:28, 31.)

Tej tel kypan kyibʼ xjal tiʼj Dios, mintiʼ kubʼ tchʼixpuʼn Dios t-ximbʼetz ex mintiʼ kubʼ t-ximen qa mintiʼtl qajbʼen te. In tzaj tqʼamaʼn Tyol Dios qa o tzʼaqʼunan Dios atxix ojtxe tuʼn kyklet tmajen ex tuʼn tbʼant tajbʼil twitz Txʼotxʼ. Ax ikx tajbʼil Dios tuʼn tanqʼina ik tzeʼn o kubʼ t-ximen atxix ojtxe. (Uʼjinxa Salmo 37:29.) In tzaj tqʼamaʼn Tyol Dios tiʼ il tiʼj tuʼn tbʼant quʼn tuʼn qanqʼin ik tzeʼn tajbʼil Dios.